Qāyīlelas (Acts) 5
5
1Lā tā numūqī da bagwānum glīkādis Ananias gla wīs kunum ī Sapphira lāḵūd ḵīs awīnāgwīs dī,
2La āḵīla ḵā wa‐ūqī kilūmk dik wīskumāya mas uk, qilāklātlak gla wīs kunum, gāḵ sa au um gāyūtl lāk, la gīgā‐lītlas lāḵ gūgwayau sī da apostles.
3Aū mī sī Peter nīkia, Ananias, māzī lāgītla sī Satan kūta lāḵūs naukayā kūs kās klīlqāla ūsa ḵā Holy Spirit glū kās qilātlzinda ūsak la‐ūḵwā sī da awīnāgwīs?
4Yiḵs k̤īs mīk de sī lā‐ḵā, k̤īs da ī hūs ma ā, hī mī sīḵs la ā lā‐ḵā, k̤īsas sū‐um uḵnūgwādis kā hūs‐mīs naukayīs qayū lāḵs de ūs kās qīgīlas ūsas qīkos, māzīs lāgītla uḵ‐īdiḵ lāḵūs naukāya kūs, k̤īsa ā kūs hī klīlqāla gītlī bagwānum, hī masī da Ike Gīkumī yūs klīlqāla gītla.
5Wa yiḵs la ī Ananias wūklilāḵ gada, wātldumk, la yāḵ‐wālītlā lāwe yīs hāsīk dī la kitl‐īzī kiasī da nāhwā wūklilā ḵīk.
6Lī da hiyātl‐ā glāḵwūm gilītl kās k̤unīpī dīk, lah daḵw lā‐wilsas kās le wunum‐tīduk.
7Wa yiḵs lā‐āḵunts yūduhw zā kuklilā gīla hī qīh‐īda ā‐gūtlī gaḵa ā sī kunum as kīyos kauglitl lāḵī da la qīh īda ā tsīs tlāwunumk dī, gāḵīklā.
8Lī Peter nānāḵmīk, nītla laga gāḵun hī ma ī wāḵālā‐yū wī da awīnāgwīsa ūs la lāḵūyau, lī da zidāk nīkia, aulamī hī um gāḵ wāḵālayū wī.
9La ā sī Peter nīkik, mā zīs lā‐gītl daḵwa qīqāḵū kās gwānā ūsāḵ Spirit ā sī da Ike Gīkumī, dok, gūgwayau sa lāk dī wunumtīd ḵīs tlāwunumk de ūs, hī mīs lāh daḵw‐kl dāwilsa klūkl.
10Wa hīh īda mī sa zidāk yāḵ‐wālītl lāḵ gūgwayaus, lāwe yīs hāsīk dī, gāḵa ā sa hiyātl‐ā gāḵīklā, la dūqila kīḵs la ī tlilā, lāh dāḵw dāwilsāk kās le wunumtīduk lāḵ uḵ‐āsas tlāwunumk des.
11Lā ḵwuntīd zī kias wīlī da church, glū mī wāḵa‐āsa sī da la khā‐lāḵ gada qīhīdaasik.
12Wa lāḵ āyasau sī da apostles kīnum ī da māmātl‐tīk̤ī gla wa wunwunhyis qaīnī uḵe lāḵī da ḵīnum bagwānum; lāh daḵw numātlāh daḵw um laḵa awīnagwītl hus wūtla lāḵ Solomon.
13La ās kīyos numūq bagwānum gayūtl lāḵā wa‐ūq nālā kās le qestā kās le kupīh‐īd glūh dāḵwī, la mīs glī da kīnum bagwānum hyās‐hyīla lah daḵwuk.
14La hīmin gindāl ālīgindālī da la ī‐ūqis lā ḵunts Gī‐yā, aul kīnum ā ḵī da bībagwānum gla wa zīdāk.
15Ek‐la gaḵa wilsila sī da zīzih‐k̤ā laḵa tihyilā, qilumga‐ulsilas qil‐zūdālas laḵa tāgītl hī mī sa tlīwāyī, kā wāh mī lāḵs au um lāḵī gāgūmas as Peter teskum diḵ numūqa lah daḵwik lāḵīs la‐ī‐nāhwa hiyākula.
16Gāḵa ā ḵa ā sī da k̤īsī hūzī mas wāḵa ās gāḵwutlzaulīsil lāḵī da ātl‐ūskumīs kīnum gūqila lāḵ awīstālīsas Jerusalem, gāḵ sa zīzih‐k̤ā gla wī da hī‐hawānī‐k̤ulā sū wa sī da mū‐umḵwī gīlāke; lah dāḵw hītl‐īdā matsū nāhwā mā.
17La ā sī da gīkumāyī labled glāḵwilītl gla wī da nāhwā wa‐ūqs (yiḵi da numskum ātla Sadducees) lah daḵw aul ūzakumā,
18Lah daḵw dāhīd ḵā apostles kās wulhīdīk laḵa wālazī.
19Lā glā tī da gāya‐nāqila lāḵī da Ike Gīkumī ḵā kānūkl uḵstūdiḵ tihyile sī da wālāzī, kās lāwilsā mas daḵwīk nīkia,
20Hāga glāḵwātl yāk̤ugātl lāḵī da hawāḵ‐ulazī lāḵī da kīnum bagwānum wīlas gada wātldum qāqīxāl lāḵā qilā.
21Wa gilh daḵw mīs wūklilā ḵīk, lāh daḵw la‐īkl laḵa hawaḵ‐ulazī ḵī da la nāh‐īda, kās k̤ākūklamasī: gāḵ tī da gīkumāyī labled, gla wī da wa‐ūqas, kās klīlālī ḵī da council kā kāpīkūwīs, gla wī da nāhwa qilsqilyāq sī da sāsum as Israel, lah daḵw yālāḵ‐īdāyū nūq laḵa wālazī kā gāḵ‐yū wīs.
22Wa gil mīs gāḵī da uḵulgisāk, lah daḵw dūḵ‐wāklila kīḵs la ī kīyos laḵa wālazi, lah daḵw aīdaākā kās nītlīs.
23Nīkia, yiḵī da wālazī aulāk̤ial tumāgiq mā, la mī sunūh dūqila um ḵī da ī‐aāḵsīlek glāk‐glūs laḵa tihyiles, gil mīs glā nūh uḵstūd ḵā tihyiles lānūh kīyos dūqitl bagwānum laḵa awīklila.
24Wa gil mī sī da aāḵsīle ḵī da hawāḵ‐ulazī gla wī da gīkumāyī labled wuklilāḵ wātldumh dāḵwas, lah dāḵw nūtlas wola‐ās klas.
25Gāḵa ā sa numūq nītlāh dāḵwuk, dok, yiḵī da bibagwānum ūs wulā sūkt lāḵā wālazī la glākglawītl laḵā hawāḵ‐ulazī k̤ākūklāmas ḵā kīnum bagwānum.
26La ā sī da aāḵsīle ḵī da hawāḵ‐ulazī gla wī da wātilgis, wa gāḵ daḵwīs, k̤īs glātl ī‐autl‐tsīlāk, kāh dāḵws kitlilā ā sa kīnum bagwānum, gwākutlā ī tīsāpih‐īd tsa wā.
27Gilh daḵw mīs gāḵs, lah daḵw qisumgālītlas lāḵā council, lī da gīkumāyī labled wuklāh dāḵwuk,
28Nīkia, k̤īs dā unūh nīk kās k̤īsa ūs ītīd k̤ākūklā matsīs glīkula sū wa ūs a? wa, doḵīs la‐īnīh dāḵwūs kūtā mas ḵūḵ Jerusalemḵ yisūs k̤ākūklā‐mazumh dāḵwā kūs, las nīk kunūh gāḵī gīga‐āklilāts ulqe sīs glīkula sū wa.
29Lī Peter gla wī da wa‐ūq apostles nānāḵmī kās nīkī, hī mī gānūh egas kunūh hī mī nānākīgī sū wī da Ike Gīkumī lāḵ bagwānum ī.
30Yiḵī da Umyāḵī dūtla sints wī‐ūmp wūtla qilāgilīsā masuḵ Jesus, yiḵīs lāh daḵwa ūs k̤īlāgiqa tīk‐wāklilūdāyū ūs lāḵā gla‐īs.
31Hī um la īk̤īstālīsa sū sī da Ike Gīkumī lāḵīs hītl‐k̤iūtlzāne kās lī Gīkumī glū kās Qilāgītlī, kās zawes māyādālazī lāḵ Israel, glū kās dīgiklilūdīḵ yekīnāyī.
32Nūgwa mī sunūh k̤ālāgīla mats gada nāhwāk; hī mīs ūgwākī da Holy Spirit, yiḵī da le zawe sa Ike Gīkumī lah daḵw ḵī da nāhwā la nānākīgī kī.
33Wa yiglāh daḵwuk yiḵs lah daḵwa ī wuklila ḵīk, la ḵwākla laḵ naukīh daḵwas, lah daḵw k̤wīḵ‐īd kās k̤īlākiah daḵwīk.
34La ās glāḵ‐wālītlī da numūq gāyūtl lah daḵwuk yiḵs la ī wāh k̤wīḵulā, gāyūtl laḵa Pharisees, glīkādis Gamaliel, kīyos wiyūglānum kās kauglitl laḵa law, la um ḵa ā wīs māya‐untl tsa nāhwā bagwānum a, la weḵā kā la mā wīs glī sī da apostles lāwilzumā.
35La nīk lāh dāḵwuk, yūkl bībagwānums Israel, yāklauh dāḵw la, kā ūs qayau kūs kās qīh‐īda asūsā ḵwā bībagwānumḵ.
36Lāḵī da gālākāwa yūtlā sūḵ da nālāḵ glāḵwīdūtlī Theudas wūtla, wūtl‐um nīk awīla bagwānum, yiḵī da lūtla qīwiyā‐tsa wa‐ūq wūtla bībagwānum, mūpun‐yāgi ḵuntīs wāḵa ās mūtla, la wāh kupetlūtl gla wūtlī, hī mīs lūtl k̤īlāgiqī, gla wīs lūtla wāh wa‐ūq wīlā, gla wī da wāḵa ās mūtla sī da lūtla wāh nānākīga yūtl kī, lūtl gwītl‐īd, kās au ma yūtl la wātl‐wātl tsīs‐tā.
37Wa hī mīs lūtl wāh ḵād ātla‐kāwī sī Judas wūtlas Galilee, wāh ḵād glāḵwīd lāḵī da lāh dum ūtla hātlā‐kulā, lūtlī wāh lo‐kl ḵā kīnum mūtla bagwānum a; lūtl ḵa ī tlilā, gla wīs lūtla wāh wa‐ūq wīla ḵād, hī mīs wāḵā as wūtla sa lūtla wāh nānākīga yūtl kī, la au‐mūtl la gwītl‐īda.
38La mī sin nīkiūkl, qātlas glaubāla ḵwā bībagwānumḵ, hī ma kā ḵū bagwānum zis lāḵ ḵwā wātldum īḵ, gla wa īāḵulā yīḵ, lā klūḵ wātl‐wātl tsīstā um‐kl:
39We, kā glā ḵū īāḵī um lāḵ sa Ike Gīkumī, lāh dāḵwis kīyos qīh‐īda ās klīh‐īdā mas lāḵuq, ā klas wutl‐um lāḵ nīk lāḵ kas kākādāla ūsā ḵā Ike Gīkumī.
40Hī mīs lāh dāḵw ek‐āgī sī wātldum as, wa gilh dāḵw mīs klīlāla ḵā apostles, la hwisīdik, lāh dāḵw uḵuk kā qatl la gīs yākuntā las glīkum as Jesus, lāh dāḵw hītl‐k̤uh īdik lā‐wilsā.
41Wa yiḵs lāh dāḵwa ī lāwils lāḵā qazīlasa sa council lāh dāḵw ek̤īkulāḵs hītl‐k̤ūluma ī tlālāk‐wunāl mumkzigīlāsū kā glīkum as Jesus.
42Wa, hwīlā‐kulāh daḵw mī sī ḵūḵ nīnālāḵ ga‐īklil lāḵā hawāḵ‐ulazī, lāḵād lāḵā nāhwā gūqila, k̤īs qātl k̤ākūklā mats glū glīḵsālas Jesus Christ.
Currently Selected:
Qāyīlelas (Acts) 5: Kwak
Highlight
Share
Copy
Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.
