ZEPHANIA 2
2
Sim tûra ngenna
1-2Aw hnam zah nachâng
hre lote u,
Thuruat a lo chhuah hma leh,
nî chu favai ang maia
a ral hma leh,
Lalpa thinrimna hlauhawm tak
chu in chunga a lo thlen hma leh,
Lalpa thinrimna ni chu
in chunga a lo thlen hma hian,
Tlân khâwm rawh u, a ni,
tlân khâwm huai huai rawh u.
3Nangni leia mi thuhnuairawlh
zawng zawng, a thu awihtute u,
Lalpa chu zawng rawh u;
Felna zawng ula,
thuhnuairawlh tum rawh u;
Lalpa thinrimna nîah chuan
thuhrûkin in awm thei mahna.
Israel ram vêla hnam dang chhiat tûr thu
4Gaza khua chu kalsanin
a awm ang a,
Askelon khua chu tihṭiauvin
a awm dâwn si a;
Chhûn laiah Asdod khu
an hnawt chhuak ang a,
Ekron khua chu pawh chhuahin
a awm ang.#Is 14.29-31; Jer 47.1-7; Ezek 25.15-17; Joel 3.4-8; Amos 1.6-8; Zak 9.5-7
5Tuipui kama chêng Kereth
hnamte chu an chung a pik e!
Aw Kanaan, Philistia mite ram,
Lalpa thu chu i chungah
a lo thleng a ni:
“Luahtu awm lo khawpin
ka tiboral ang che.”
6Tin, tuipui kam te chu
hnim hring hmun a ni ang a,
Berâmpute bûk khuarna leh
berâmte huang a ni ang.
7Tichuan, tuipui kam chu Juda
chhûngtea la awm chhunte
tân a ni ang a;
Chûngah chuan an berâm
rualte chu an tla ang a,
Tlai lamah chuan Askelon khaw
inahte an riak ang;
Lalpa an Pathian chuan
a rawn tlawh ang a,
An sal tânna chu a lehlinsak ang.
8“Moab deuna leh Amon fate
au khumna,
ka mite an deuna leh
An ramria an intihropuina
chu ka hre tawh a.#Is 15.1—16.14; 25.10-12; Jer 48.1—49.6; Ezek 21.28-32; 25.1-11; Amos 1.13-15
9Chutichuan,
a nuna ka nun chhûng chu,
Moab chu Sodom ang a ni ang a,
Amon fate chu Gomorra ang
an ni ngei ngei ang;
Kângṭhai hmun leh chi khur leh
kumkhaw luah loh a ni ang.
Ka mi la bângte chuan anni chu
râllâkah an la ang a,
Ka hnam la awm chhunte
chuan an luah ang,” tih hi
Sipaihote Lalpa, Israel-te
Pathian thuchhuak a ni.#Gen 19.24
10Chu chu an chapona aiah
an nei dâwn a ni,
Sipaihote Lalpa mite
chungah an intihlena,
an chêksawlh avângin.
11An tân Lalpa chu ṭihbaiawm tak
a ni ang a,
Lei pathiante chu a ṭâm vek
dâwn si a;
Tin, miten amah chibai
an bûk ang,
Mi tinin mahni hmun ṭheuhvah,
hnamte awmna zawng
zawngah chuan.
12“Nangni Ethiopia mite paw
ka khandaiha thahin
in awm ang.”#Is 18.1-7
13Tin, hmâr lam ram chungah
a kut a lek ang a,
Assuria ram a tiboral ang a,
Ninevi khua a tiṭiau vang a,
thlalêr angin a tiro vang.#Is 10.5-34; 14.24-27; Nah 1.1—3.19
14Tin, a chhûngah chuan
sa rual chi tin,
ramsate zawng zawng
an mu ang.
Tuivalawng leh sakuhte pawh
a ban chhîp bâwkahte
an chêng ang a;
Tukverhahte zai an vâwr ang;
Kawngka bulahte chuan
chhiatna a awm ang;
Sidar thinga siamte pawh
phoruang a chang ta si a.
15Hei hi khawpui hlim thei tak,
mahni inring tak, a thinlunga,
“Keimah, ka chuang ka liam hi
tu mah an awm lo,”
intirilru chu a ni.
Sate muthmun mai atân
a va ram nasa ta êm!
A kal pêl apiangin
an chek khum ang a,
an kut an thin khum ang.
Currently Selected:
ZEPHANIA 2: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
