ZAKARIA 3
3
Inlârnaa puithiam lalber hmun
1Tin, puithiam lalber Josua, Lalpa vântirhkoh hmaa ding leh a dodâltu tûr Setana ama ding lampanga ding chu mi entîr a.#Ezra 5.2; Thup 12.10 2Tin, Lalpa chuan Setana hnênah,
“Aw Setan,
Lalpa chuan hau che rawh se!
A ni, Lalpa, Jerusalem thlangtu
chuan hau che rawh se!
He mi hi thingthu,
mei ata phih chhuah chu
a ni lo vem ni?”
a ti a. 3Tichuan, Josua chu silhfên bawlhhlawh taka inthuamin vântirhkoh hmaah chuan a lo ding a. 4Tin, a hmaa dingte chu a han bia a, “A silhfên bawlhhlawh kha hlihsak rawh u,” tiin. Tin, ama hnênah chuan, “Ngai teh, i khawlohnate chu ka tihbosak ta chia; tichuan, silhfên hlu takin ka thuam ang che,” a ti a. 5Tin, kei chuan, “Lukhum mawi tak khumtîr rawh se,” ka han ti a. Tichuan, lukhum mawi fe chu an khumtîr ta a, silhfênin an thuam a; tin, Lalpa vântirhkoh chu a kiangah a ding a. 6Tin, Lalpa vântirhkoh chuan Josua hnênah,
7“Sipaihote Lalpa chuan
heti hian a ti a ni:
‘Ka kawngte i zawh zêla,
ka thu tukte i tih chuan,
Ka in chhûng ro i rêl ang a,
Ka rorêl hmunte chu
i vawng bawk ang a,
Hêng dinghote zîngah hian
tel ve theihna tûr
ka pe ang che.
8Tûnah ngai teh, aw Josua,
puithiam lalber,
Nang leh i ṭhiante i hmaa
ṭhute nên ngai rawh u,
Thil ṭha thleng entîr lâwkna
an ni si a;
Ngai teh u,
ka chhiahhlawh Chawrno chu
ka rawn chhuah dâwn si a.#Jer 23.5; 33.15; Zak 6.12
9Ngai teh mah u,
Josua hmaa ka lung dah chu;
Lung pakhatah chuan
mit pasarih a awm a ni.
Ngai teh u, a chungah chuan
thil ziakte ka ziak ang a,
Chu ram khawlohnate chu
ni khat thilah ka la bo vek
mai ang,’
Tih hi Sipaihote Lalpa
thuchhuak a ni.
10‘Chumi nîah chuan mi tinin
grêp hrui hnuaiah te leh,
Theipui hnuaiah te mahni
ṭhenawmte in sâwm
ṭheuh tawh ang,’
Tih hi Sipaihote Lalpa
thuchhuak a ni,” tiin
a tiam ta a.#Mik 4.4
Currently Selected:
ZAKARIA 3: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
