NUMBERS 6
6
Nazarit thutiam chungchâng
1Tin, Lalpan Mosia a bia a, 2“Israela thlahte hnênah sawi la, an hnênah, ‘Mipa emaw, hmeichhia emaw pawhin eng emaw thutiam bik, Lalpa tâna inpêkna Nazarit thutiam a tiam lai chuan, 3uain leh zu a nghei tûr a ni; uain thûr pawh, zu thûr pawh a in tûr a ni lo va, grêp tui pawh a inin grêp rah a tharlâm pawh, pho vuai pawh a ei tûr a ni hek lo.#Lk 1.15 4A intihhran chhûng zawng chuan grêp hruia mi a mu pawh, a pil pawh a ei tûr a ni lo. 5Intihhranna thu a tiam chhûng zawng chuan a lû pawh meh hauh loh tûr a ni; Lalpa tâna a intihhran chhûng ni a kim hma loh chuan tihhran a ni ang a, a sam a zuah tûr a ni. 6Lalpa tâna a intihhran chhûng zawng chuan mitthi ruang a hnaih tûr a ni lo. 7A pa te, a nu te, a unaupa te, a farnu te emaw thih thûah pawh a intibawlhhlawh tûr a ni lo, Pathian tâna a intihhranna chuan a phuar avângin. 8A intihhran chhûng zawng chuan Lalpa pual a ni.
9A kiangah mi lo thi ta thutin a intihhranna lû chu lo tibawlhhlawh ta ang sela, a inthen ni, a ni sarih nîah a lû a mêt tûr a ni. 10Tin, ni riat nîah inbiakna puan in kawngkaa puithiam hnênah ṭhuro tuak khat emaw, pârvano tuak khat emaw a rawn keng tûr a ni; 11tin, puithiam chuan pakhat chu sual thawi nân a hlân ang a, pakhat chu hâlral thilhlanah, mitthi avânga a tisualnaah inremna a siamsak ang a; tin, chumi ni vêk chuan a lû chu a tithianghlim tûr a ni. 12Tin, thiam loh thawi nân berâmno a pa kum khat mi rawn kengin, a intihhranna nite chu Lalpa hnênah a tiṭha leh ang; a intihhranna chu tihbawlhhlawh a nih tâk avângin a hmaa mi kha eng mah lo a ni ta si a.
13Tin, hei hi Nazarit mi, an intihhran ni bi a kim huna tih dân tûr chu a ni: inbiakna puan in kawngkaah hruai tûr a ni ang a;#Tirh 21.23-24 14tin, Lalpa tâna thilhlanah berâmpa kum khat mi sawisêl bo hâlral thilhlanah pakhat, sual thawi nân berâmno a nu kum khat mi sawisêl bo pakhat, remna thilhlan atân berâmpa sawisêl bo pakhat, 15dawidim telh loh chhang leh chhangphut dip tak, hriaka hmeh siam chhang hlâwm leh, hriaka chulh chhangpêr pan bâwm khat, an chhangphut thilhlan tûr leh in tûr thilhlan tûrte nên an hlân tûr a ni. 16Tin, puithiamin chûng chu Lalpa hmaah a hlân ang a, a sual thawina leh a hâlral thilhlan chu a hlân ang; 17tin, berâmpa chu bâwma chhang dawidim telh lohte nên chuan, remna inthawi thilhlan atânte Lalpa hnênah a hlân ang a; puithiam chuan chhangphut thilhlan leh in tûr thilhlan pawh chu a hlân tel bawk ang. 18Nazarit mi chuan inbiakna puan in kawngkaah a intihhranna lû chu a mêt ang a, intihhranna sam chu a la ang a, remna inthawi thilhlan hnuaia meiah chuan a rawh tûr a ni.
19Tin, puithiam chuan berâmpa dâr chhum hmin leh, bâwma dawidim telh loh chhang pakhat leh, dawidim telh loh chhangpêr pan pakhat a la ang a, Nazarit chuan a intihhranna lû a meh zawhin a kentîr ang a; 20tin, puithiam chuan thên thilhlanah Lalpa hmaah a thên tûr a ni; hei hi puithiam pual a ni ang, thên irâwm leh thên bawp nên. Chumi zawhah chuan Nazarit chuan uain a in thei tawh ang. 21Hei hi a ni, Nazarit thutiam dân leh Lalpa hmaa an thilhlan dân chu, ama duh thûa a hlan tiam lovin; a intihhranna thutiam azir zêlin a ti tûr a ni,’ ti rawh,” tiin.
Puithiamten mipui mal an sâwma chham tûr
22Tin, Lalpan Mosia a bia a, 23“Arona leh a fapate hnênah, ‘Hetiang hian Israela thlahte mal in sâwm tûr a ni; an hnênah:
24“Lalpan malsâwm che uin
vêng zêl che u rawh se;
25 Lalpan a hmêl in chungah
êntîr sela, khawngaih zêl
che u rawh se,
26 Lalpan in lam lo hawi sela,
thlamuanna pe che u rawh se,”
tiin sawi rawh u,’
tiin sawi rawh.
27Chutianga ti chuan Israela thlahahte ka hming chuantîr a ni ang a; tin, keiin anni chu mal ka sâwm ang,” tiin.
Currently Selected:
NUMBERS 6: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.