MARKA 15

Pilata hmaah Isua an hruai

(Mt 27.1-2,11-14; Lk 23.1-5; Joh 18.28-38)

1Tin, zîng a lo nih veleh, puithiamte chu upate leh lehkhaziaktute leh rorêltuho zawng zawng nên an inrâwn a, Isua chu an phuar a, an hruai a, Pilata hnênah an pe ta nghâl a. 2Tin, Pilata chuan a hnênah, “Juda-te lal i ni em?” tiin a zâwt a. Tin, ani chuan a hnênah, “Ni e,” tiin a chhâng a. 3Tin, puithiamte chuan kawng tam takin an hêk a. 4Tichuan, Pilatan a zâwt leh a, a hnênah, “Eng mahin i chhâng lo maw? Ngai rawh, an hêkna che zozai hi!” a ti a. 5Isua erawh chuan eng mahin a chhâng ta lo va; chutichuan, Pilata chuan mak a ti hle a.

Isua thi tûra tih a ni

(Mt 27.15-26; Lk 23.13-25; Joh 18.39; 19.16)

6Tin, Pilata chuan kût nîah mi tâng pakhat an ngen apiang a chhuahsak ṭhîn a. 7Tin, mi pakhat Barabba an tih chu helte zîngah phuarin a lum reng a, chûng chuan helnaah chuan tual an that a ni. 8Tin, mipuiho chu an han chho va, an tân a tihsak ṭhin anga ti tûrin an ngên ta a. 9Tin, Pilatan a chhâng a, an hnênah, “Juda-te lal hi chhuahsak che u ila in duh em?” a ti a. 10(Puithiam lalten îtsîkna avângin an rawn hruai tih a hre si a.) 11Nimahsela, puithiam lalte chuan mipuiho chu Barabba chhuahsak zâwk dîl tûrin an fuihpawrh a.

12Pilata chuan an hnênah, “Juda-te lal in tiha hi engtin nge ka tih tâk ang le?” tiin a chhâng leh a. 13Tin, anniho chu, “Kraws-ah khêngbet rawh,” tiin an au leh a. 14Tin, Pilata chuan an hnênah, “Engah maw? Eng nge a tihsual ni?” a ti a. Nimahsela, anniho chu, “Kraws-ah khêngbet rawh,” tiin an au chiam a. 15Tichuan, Pilata chuan mipuiho chu tihlungawi a duh a, Barabba chu a chhuahsak ta a; tin, Isua chu a vuak zawhin kraws-a khenbeh tûrin a pe ta a.

Sipaiten nuihza siam nân Isua an hmang

(Mt 27.27-31; Joh 19.2-3)

16Tin, sipaite chuan in hual chhûng kawtlai, Praitorian an tihah chuan amah chu an hruai lût a, an pâwla mi zawng zawng an ko khâwm a. 17Tichuan, puan sen duk an sintîr a, hlîng lukhum an phiar a, an khumtîr a. 18Tin, “Chibai, Juda-te lal!” tiin chibai an bûk ta a. 19Tin, a lûah chuan luangin an vua a, chil an chhâk a, ṭhingṭhiin chibai an bûk a. 20Tin, nuihza siam nân an hman zawhin puan sen duk chu an hlîp a, ama puan an sintîr leh a, kraws-a khenbeh tûrin an hruai chhuak ta a. 21Tin, mi veivâk pakhat, ram lam ata lo kal, a kraws pu tûrin an man a - Simona, Kurini khuaa mi, Aleksandra leh Rufa pa chu. #Rom 16.13

Isua an khêng bet

(Mt 27.32-44; Lk 23.26-43; Joh 19.17-27)

22Tin, Isua chu Golgotha hmunah an hruai a (chu chu ‘Lu ruh hmun’ tihna a ni). 23Tin, uain, murra nêna pawlh an pe a; nimahsela, a la duh lo va. 24Tin, kraws-ah an khêngbet a, an chan ṭheuh tûr hriat nân ṭhum vâwrin a silhfênte chu an insem a. #Sam 22.18 25Tin, Isua an khenbeh chu fehrehsân lai a ni a. 26Tin, a hêkna lehkha a chung lamah an ziak a, “JUDA-TE LAL” tiin. 27Tin, ama rual chuan suamhmang pahnih an khêngbet ve a; a ding lamah pakhat, a vei lamah pakhat. #15.27: Kutziak bu ṭhenkhatah chuan châng 28 “Hetiang hian lehkha thu, ‘Ani chu bawhchhetute zîngah an chhiar tel ta,’ tih chu a lo thleng dik ta a ni,” tih a chuang. #Is 53.12

29Tin, mi vei apiangte chuan an lû thingin, “Ehei! Nang Pathian biak in ṭhiata ni thuma sa lehtu, #Sam 22.7; 109.25; Mk 14.58; Joh 2.19 30intidam la, kraws ata kha lo chhuk ta che,” tiin an tiel a. 31Chutiang bawkin puithiam lalte chuan, lehkhaziaktute nên anmahni zîngah tielin, “Mi dang mah a tidam ṭhîn a, mahni a intidam thei si lo. 32Kan hmuha kan rin theih nân, Krista, Israel lal chu, tûnah hian kraws ata chu lo chhuk ang hmiang,” an ti a. Tin, ama ruala khenbeh vete chuan ani chu an hau va.

Isua a thi

(Mt 27.45-56; Lk 23.44-49; Joh 19.28-30)

33Tin, chawfâk hun a lo nih chuan, behliang mun hun thlengin khawvêl a lo thim ta vek a. 34Tin, behliang mun hun lai chuan Isua chu aw ring takin, “Eloi, Eloi, lama sabakthani?” tiin a au chhuak a (chu chu “Ka Pathian, ka Pathian, engah nge mi kalsan?” tihna a ni). #Sam 22.1 35Tin, a kianga ding ṭhenkhatte chuan chu chu an hriatin, “Ngai teh u, Elija a ko a ni,” an ti a. 36Tin, mi pakhat a tlân a, sponj uain thûra chiah khatin, tiangah a târ a, a han intîr a, “Awm rawh se, amah la thla tûrin Elija a lo kal emaw i en ang u,” a ti a.#Sam 69.21. 37Tin, Isua chu aw ring takin a au va, a thlarau a thlah ta a. 38Tin, Pathian biak in puanzâr chu, a chung lam aṭangin a hnuai lam thlengin a lo thlêr chhuak ta a.#Ex 26.31-33. 39Tin, a hma zâwna sipai za hotu ding chuan a thlarau chutianga a thlah a hmuh chuan, “He mi hi Pathian Fapa a ni ngei mai,” a ti a.

40Tin, hmeichhiate pawh hla taka thlîrin an awm a; chûng zîngah chuan Mari Magdalini te, Mari, Jakoba te leh Josea nu te, Salomi te an tel a, 41(chûng chu Galili rama a awm laia amah zuia a rawng bâwlsak ṭhînte chu an ni) hmeichhe dang tam tak, Jerusalem khuaa ama ruala chho vete chu an tel bawk a.#Lk 8.2,3.

Isua phûm thu

(Mt 27.57-61; Lk 23.50-56; Joh 19.38-42)

42Tin, khua a lo tlai lam chuan Inrinni a nih avângin (chu chu Chawlhni hmaa ni hi a ni) 43Josefa, Arimathai khuaa mi, rorêltu zahawm, Pathian ram beisei mi ve bawk chu a lo kal a, huai takin Pilata hnênah a lût a, Isua ruang chu a dîl ta a. 44Tichuan, Pilata chuan chutia a thi ta thuai chu mak a ti hle a, sipai za hotu chu kovin, a thihna a rei tawh em tih a zâwt a. 45Tin, sipai za hotu kâ aṭanga a hriat chuan, a ruang chu Josefa hnênah a pe a. 46Tin, Josefa chuan puan zai sîn a lei a, amah chu a la thla a, puan zai sîn chuan a tuam a, thlân, lung ker kuakah a zalh a, thlân kawngkaah chuan lung a lum ta a. 47Tin, Mari Magdalini leh Josea nu Mari chuan an zalhna chu an hmu reng a.

Currently Selected:

MARKA 15: MIZOVBSI

Highlight

Copy