Matthaia 3

Baptistu Johana thuhril

(Mk 1.1-8; Lk 3.1-18; Joh 1.19-28)

1Tin, chûng lai chuan Baptistu Johana chuan, 2“Sim rawh u; vânram chu a hnai tawh e,” tiin Judai thlalêrah thu hrilin a lo kal a. #Mt 4.17; Mk 1.15 3Amah chu a ni, zâwlnei Isaian,

“Thlalêra mi au râwl chuan,

‘Lalpa lamlian sial ula,

A kawngte tingîl rawh u,’ a ti,”

tia a sawia kha. #Is 40.3

4Tin, chu mi Johana chuan sanghâwngsei hmul puan a sin a, a kâwng chu savun kâwnghrênin a hrêng a; a chaw chu khaukhuap leh khawizu a ni. #2 Lal 1.8

5Chumi lai chuan Jerusalem khuaa mi te, Judai rama mi zawng zawng te, Jordan lui dung vêla mi zawng zawngte chu an chhuak a, a hnên lamah an kal a, 6an sualte thupha chawiin Jordan luiah chuan a hnênah baptisma an chang ta hlawm a. 7Nimahsela, Pharisaite leh Saddukaite tam tak a baptisma chang tûra lo kal a hmuh veleh an hnênah, “Rûl thlahte u! Thinur lo thleng tûr hi tlânsan tûrin tuin nge zilh che u? #Mt 12.34; 23.33 8Chutichuan, sim hming pu tlâkin rah rawh u: 9‘Abrahama kan thlahtu a ni alâwm,’ tiin inngaihtuah suh u; Pathianin hêng lungte hi Abrahama thlahahte a dintîr thei e, ka tih che u hi. #Joh 8.33 10Tûn apangin thingbul tinah hreipui an dah ta; chutichuan, thing tin rah ṭhaa rah lo apiang an kit a, meiah an paih ṭhîn. #Mt 7.19 11Kei zawngin in simna tûrin tuiin ka baptis ṭhîn che u a; nimahsela, ka hnunga lo kal tûr chu keimah aiin a ropui zâwk a, a pheikhawk keng tlâk pawh ka ni lo ve. Ani chuan Thlarau Thianghlim leh meiin a baptis ang che u; 12a kutin a sisêp a keng a, a hruih a zâp fai hliau ang a, zêmah chuan a buh a khung ang, a sî erawh chu mei mit thei lovin a hâl ral ang,” a ti a.

Isua baptisma chan thu

(Mk 1.9-11; Lk 3.21-22)

13Chumi lai chuan a hnêna baptisma chang tûrin, Galili ram aṭangin Jordan luiah Johana hnênah Isua a lo kal a. 14Johana erawh chuan, “I mi baptis ka ṭûl zâwk si a, ka hnênah i lo kal zâwk a ni maw?” tiin khap a tum a. 15Nimahsela, Isuan a hnênah, “Tûnah remti hrâm rawh, hetianga felna zawng zawng hlen chhuah hi kan tân a mawi a ni,” tiin a chhâng a. Tichuan, rem a ti ta a.

16Tin, Isua chu baptisma a chan veleh tui ata a chhuak ta nghâl a; tin, ngai teh, a tân vân a lo inhawng a, Pathian Thlarau chu ṭhuro anga lo chhukin, a chunga lo fu a hmu a. 17Tin, ngai teh, vân aṭangin awin, “Hei hi ka Fapa duh tak, ka lawm êm êma chu a ni,” a ti a. #Gen 22.2; Sam 2.7; Is 42.1; Mt 12.18; 17.5; Mk 1.11; Lk 9.35

Currently Selected:

Matthaia 3: MIZOVBSI

Highlight

Copy