LUKA 20
20
Isua thuneihna chungchâng
(Mt 21.23-27; Mk 11.27-33)
1Tin, ni khat chu heti hi a ni a, Pathian biak inah mite a zirtîra, Chanchin Ṭha a hril laiin, puithiam lalte leh lehkhaziaktute chu, upate nên a hnênah an lo kal thut a; 2tin, a hnênah, “Tu thuin nge hêng thil hi i tih? Tuin nge thu pe che? Min hrilh rawh,” tiin an zâwt a. 3Tin, ani chuan an hnênah, “Kei pawhin thu kam khat ka zâwt ve ang che u; mi hrilh rawh u. 4Johana baptisma kha vâna mi thu nge mihring thu?” a ti a, a chhâng a. 5Tin, an inngaihtuah a, “ ‘Vâna mi thu,’ kan tih chuan, ‘Engah nge a thu in âwih loh?’ min ti si ang a. 6Tin, ‘Mihring thu,’ kan tih chuan mi zawng zawngin lungin min dêng ang; Johana chu zâwlnei a nih an ring si a,” an ti a. 7Tichuan, an chhâng a, “Khawi lam zâwk thu nge ni kan hre lo,” an ti a. 8Tin, Isuan an hnênah, “Kei pawhin tu thuin nge hêng thil hi ka tih ka hrilh bîk lo vang che u,” a ti a.
Grêp huan thlawh hlawhtute tehkhin thu
(Mt 21.33-46; Mk 12.1-12)
9Tin, vântlâng hnênah he tehkhin thu hi a sawi ta a: “Tuin emaw grêp huan a siam a, lo enkawltute hnênah thlawh hlawh tûrin a pe a, rei tak thang tûrin ram dangah a kal ta a. #Is 5.1 10Tin, a lawh hun chuan, huana rah chu a chan ai an lo pêk tûrin, lo enkawltute hnênah chuan bâwih pakhat a tîr a; nimahsela, lo enkawltute chuan an lo vêl a, kutruakin an kaltîr leh ta a. 11Tin, bâwih dang a tîr leh a; chu pawh chu an lo vêl leh bawk a, zahthlâk takin an siam a, kutruak vêkin an kaltîr leh ta a. 12Tin, a pathumna a tîr leh pek a; chu mi pawh chu an lo tisil a, an paih chhuak ta a.
13Tin, grêp huan neitupa chuan, ‘Engtin nge ka tih ang aw? Ka fapa duh tak ka tîr mai ang, ani hi an lo zah mahna,’ a ti a. 14Nimahsela, lo enkawltute chuan ani chu an lo hmuh veleh, ‘He mi hi roluahtu tûr chu a ni; i that ang u; chutichuan, a ro chu kan tân a ni ang,’ tiin an inrâwn a. 15Tichuan, grêp huan ata chu an theh chhuak a, an tihlum ta a. Chutichuan, grêp huan neitupa chuan an chungah engtin nge a rawn tih ang? 16Lo enkawltute chu a rawn tiboral ang a, huan chu mi dangte a pe ang,” a ti a. Tin, chu chu an hriatin, “Chûng êm chu thleng suh se!” an ti a.
17Nimahsela, ani chuan anniho chu a en a, “He thu an ziak hi eng nge ni le?
‘In satute lung duh loh kha,
Chu ngei chu a kila lung ṭangkai ber a lo ni ta,’
tih hi. #Sam 118.22 18Tu pawh chumi lung chunga tlu apiang an keh sawm ang; a delh lek phei chu a râwt dip ang,” a ti a.
Chhiah pêk leh pêk loh thu
(Mt 22.15-22; Mk 12.13-17)
19Tin, chutih lai tak chuan lehkhaziaktute leh puithiam lalten man an tum a; nimahsela, mipui chu an hlau va; chu tehkhin thu chu anmahni demin a sawi tih an hre si a.
20Tin, amah chu ram awptu rorêlna leh thuneihnaa thlen atân, a thusawi sual la tûrin an châng reng a, enthlatu, mi ṭha anga awm derte chu an tîr a. 21Anni chuan a hnênah, “Zirtîrtu, dik takin thu i sawiin i zirtîr a, tu mah thlei bîk lovin tihtak zetin Pathian kawng thu i zirtîr ṭhîn tih kan hria e; 22Kaisara hnêna chhiah kan chawi a thiang nge thiang lo?” tiin an zâwt a. 23Nimahsela, ani chuan an ngamthlêm a ni tih a hria a, 24an hnênah, “Duli mi entîr rawh u,” a ti a. “Tu lem leh tu hming nge chuang hi?” a ti a. Tin, anni chuan, “Kaisara,” an ti a. 25Tin, ani chuan an hnênah, “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. 26Tichuan, mipui hmaa a thu sawi sual lâk tûr an hmu lo va; a chhânna chu mak an ti hle a, an ngawi reng a.
Thawhlehna thu
(Mt 22.23-33; Mk 12.18-27)
27Tin, Saddukai, thawhlehna a awm lo tite zînga mi tute emaw a hnênah an lo kal a; #Tirh 23.8 28a hnênah, “Zirtîrtu, Mosian, ‘Tu pawh a unaupain nupui nei sela, fa nei lovin thi sela, a unaupain a nupui rochungin, a unaupa tân chi a thlahsak tûr a ni,’ tih min ziaksak a ni. #Deut 25.5 29Aw le, sal sarih an awm a; a upa berin nupui a nei a, fa nei lovin a thi a. 30A pahnihna chuan a rochung a; 31a pathumna chuan a rochung leh a; chutiang ṭheuhvin pasarihte chu fa nei lovin an thi zêl a. 32Chumi hnuah chuan hmeichhia pawh chu a thi ta a. 33Chutichuan, thawhleh hunah chuan a tu bera nupui nge ni ang? An pasarih chuan nupuiah an nei ṭheuh si a,” tiin an zâwt a.
34Tin, Isuan an hnênah, “He khawvêl mite hi nupui pasal an innei ṭhîn; 35nimahsela, chûng huna tel tlâkah leh mitthi zîng ata thawhlehnaa tel tlâka ruat apiangte chu nupui pasal an innei dâwn tawh lo ve; 36thih pawh an thi leh thei dâwn tawh lo a ni, vântirhkohte tlukin an awm dâwn si a; thawhlehna fate an nih avângin Pathian fate an ni ang. 37Mitthi kaihthawha an awm tûr thu, Mosia pawhin Hnim buk thûah Lalpa chu, ‘Abrahama Pathian, Isaaka Pathian, Jakoba Pathian,’ a tih lai khân a hriattîr kha. #Ex 3.6 38Ani chu mitthi Pathian a ni lo va, mi nung Pathian a ni zâwk e; ani ngaih chuan mi zawng zawng an nung vek si a,” a ti a.
39Lehkhaziaktu tuten emaw, “Zirtîrtu, i sawi dik zet mai,” an ti a, an chhâng a. 40Thu dang an zâwt ngam tawh si lo.
Messia chungchâng zawh fiahna
(Mt 22.41-46; Mk 12.35-37)
41Tin, ani chuan an hnênah, “Krista chu Davida fapa a ni tih engtiziaa sawi ṭhîn nge an nih? 42-43Fakna Hla Buah Davida ngeiin,
‘Lalpa chuan ka Lalpa hnênah,
I hmêlmate i ke nghahchhana
ka siam hma loh zawng
Ka ding lamah ṭhu rawh, a ti,’
a ti a. #Sam 110.1 44Chutichuan, Davidan ani chu ‘Lalpa’ a ti si a, engtin nge a fapa a nih theih le?” a ti a.
Lehkhaziaktute laka fîmkhur tûr
(Mt 23.1-36; Mk 12.38-40)
45Tin, mi zawng zawng hriatin a zirtîrte hnênah, 46“Lehkhaziaktute lakah fîmkhur rawh u; anni chuan kawrfual haa lên an duh ṭhîn a, dâwr hmunah chibai bûkte, inkhâwmna inah ṭhutphah ṭha berte, ruaiṭhehnaah hmun ṭha berte an ngaina ṭhîn a. 47Hmeithai sum an ei a, tlâng bum nân rei tak an ṭawngṭai ṭhîn; chûngho chuan thiam loh an chang nasa lehzual ang,” a ti a.
Currently Selected:
LUKA 20: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
