ISAIA 29

Jerusalem chan tûr

1E! Ariel, Ariel, Davida awm hmun khuarna khua! Kumah kum belh rawh u; kûtte chu lo thleng leh rawh se. 2Chumi hunah chuan Ariel hi ka timangang ang a; tichuan, sûnna leh ṭahna a awm ang; tin, ani chu ka tân Ariel ang a ni ang. 3Tin, nangmah beih tumin i vêlah ka ep ang chia, kulh siamin ka hual vêl bawk ang chia, bei tûr chein hual vêlna kulhbîngte ka siam ang. 4Tichuan, tihtlûkin i awm ang a, lei hnuai aṭangin thu i sawi ang a, i ṭawng chu vaivut zîngah zawi têin a ri chhuak ang; i aw chu ramhuai aienthiam zâwl aw ang lekin lei hnuai aṭangin a chhuak ang a, i ṭawng chu vaivut zîng aṭangin a lo chhuak se se ang. 5Nimahsela, nangmah dotu mipuite chu vaivut dip tak angin an awm ang a, mi hlauhawmho mipuite chu buhsî boral ṭhînte ang hian an awm bawk ang; a ni, chu chu mitkhapkâr lekah a lo awm thut ang. 6Khawpui ri te, lîr nghîng te, ri nasa tak te, ṭhâwngaleivir te, thlipui te, thil kan ral hmang mei alh tein anni chu Sipaihote Lalpa hremin an awm ang. 7Tichuan, Ariel dotu hnam zawng zawng mipuiho, amah leh a kulhbîng beitute zawng zawng leh amah timangangtu zawng zawngte chu, mumang ang lek an ni ang, zâna inlârna ang lek hi. 8Mi, rilṭâmin mumang a neihin chaw a lo ei ṭhîn a; nimahsela, a han harh a, a kua chu a lo la ruak ang hi a ni ang; a nih loh leh, mi, tuihâlin mumang a neihin tui a lo in ṭhîn a; nimahsela, a han harh a, a lo la chauvin tui a la châk ang hi an ni ang: Zion tlâng beitu, hnam zawng zawng mipuiho chu chutiang chu an ni ang.

Zilhna pawisa lo

9Ding reng ula, mak ti rawh u, nuam leng ula, mitdelin awm rawh u! An rui a, nimahsela uain vâng a ni lo; an pai an pai a, nimahsela zu vâng a ni lo. 10Lalpa chuan mut duhna thlarau chu in chungah a leih bua a, in mit, zâwlneite chu, a maimitchhîntîr a; in lu, hmutheitute chu, a khuh ta si a.#Rom 11.8 11Tichuan, inlârna rêng rêng in tân lehkhabu châr tlat thu ang a ni ta, chu chu miten lehkha thiam mi hnênah, “Khawngaih takin hei hi chhiar rawh,” tiin an pe ṭhîn a. Tin, ani chuan, “Ka chhiar thei lo, châr tlat a nih hi,” a ti ṭhîn a. 12Tichuan, lehkhabu chu lehkha thiam lo mi hnênah, “Khawngaih takin hei hi chhiar rawh,” tiin a pe ṭhîn a; tin, ani chuan, “Lehkha ka thiam lo,” a ti ṭhîn.

Nakin hnu atân beisei tûr

13Tin, Lalpa chuan, “He mite hian mi rawn hnaih a, an ka leh an hmuiin mi chawimawi ṭhîn tak a; nimahsela, an thinlung chu ka hlatah an sawn a, an mi ṭihna chu mihring thupêk an inzirtîr mai chu a ni;#Mt 15.8-9; Mk 7.6-7 14chuvângin, ngai teh, he mite zîngah hian thilmak ka ti leh nghâl ang, thilmak, thilmak tak mai chu; tichuan, an mi fingte finna chu a boral tawh ang a, an mi bengvârte hriatna chu thupin a awm tawh ang,” a ti a.#1 Kor 1.19

15An remruat chu Lalpa laka thup tûra thûk taka zawngtute chu an chung a pik e! An thiltihte chu thim hnuaiah a awm a, “Tuin nge min hmu ang? Tuin nge hriat pawh min hria ang?” an ti a. 16Thilte hi in tiletling vek ṭhîn e a! Bêlvawtu chu bellei ang leka ngaihin a awm dâwn em ni, thilsiam chuan a siamtu chu, “Ani mi siam ka ni hlei nêm,” a tih ni? A nih loh leh thil dintu chu a thil din chuan, “Hriatna rêng a nei lo,” a tih ni?#Is 45.9; Rom 9.20 17Rei lo tê chinah a ni lâwm ni Lebanon chu lei ṭha tak hmuna chantîrin a awm dâwna, lei ṭha tak hmun chu ram ngawa ngaihin a awm dâwn?

18Chumi nîah chuan bengngawngte chuan lehkhabu thute chu an bengin an hre tawh ang a, mitdel mitte chuan thim hnuai leh thim zîng aṭangin a hmu tawh ang. 19Thuhnuairawlhte pawh chuan Lalpa-ah chuan an hlimna chu an tipung tawh ang a, mihring zînga retheite chu Israel-ho Mi Thianghlimaah chuan an lâwm tawh ang. 20Mi hlauhawm chu eng mah lova siamin a awm tawh a, hmusittu chu a reh tawh a, khawlohna nghâkhleltute zawng zawng chu tihboralin an awm tawh si a; 21chûngte chuan mi chu thupawi thûa thil tisualtuah an siam ṭhîn a, kulh kawngkaah zilhtu awh nân thang an kam ṭhîn a, mi fel chu thil eng mah lo maiin an pumpelhtîr ṭhîn. 22Chuvângin, Lalpa, Abrahama tlantu chuan Jakoba chhûngte chungchâng thûah heti hian a ti: “Jakob-ho chu tûnah chuan an mualpho tawh lo vang a, an hmai chu a dâng tawh hek lo vang. 23An fa, ka kutchhuakte chu, an zîngah an hmuhin ka hming chu an tithianghlim tawh zawk ang; a ni, Jakob-ho Mi Thianghlima chu an tithianghlim ang a, Israel-ho Pathian chu an ṭih tawh ang. 24Thlarauva vâk bote pawh chuan an lo hre thiam tawh ang a, mi phunnawite chuan thu zirtîr chu an zir tawh ang,” tiin.

Currently Selected:

ISAIA 29: MIZOVBSI

Highlight

Copy