ISAIA 24

Lalpan khawvêl a hrem dâwn

1Ngai teh, Lalpa chuan lei hi a tiruakin, a tiram dâwn a, a khaikhup ang a, a awmate chu a tidarh dâwn. 2Tin, vântlâng chunga tih angin puithiam chungah pawh tih a ni ang; bâwihpa chunga a awm angin a pu chungah pawh a awm ang; bâwihnu chunga a awm angin a pi chungah pawh a awm ang; leitu chunga a awm angin hralhtu chungah pawh a awm ang; pûktîrtu chunga a awm angin pûktu chungah pawh a awm ang; a pung ûma pûktîrtu chunga a awm angin a hnêna a pung petu chungah pawh a awm ang. 3Lei hi tihruah fai kêlh leh tihchhiat fai kêlhin a awm ang; chu thu chu Lalpan a sawi tawh si a. 4Lei hi a ṭapin a chuai e, khawvêl hi a chauvin a chuai e, leia mi chungnungte chu an chau ve. 5Lei hi a awmnate hnuaiah chuan a bawlhhlawh zo ta; dânte chu an bawhchhiata, thuruat chu an tihdanglama, kumkhaw thuthlung chu an bawhchhiat avângin. 6Chuvângin, ânchhe lawhnain lei hi a ei zo va, a awmate chu thiam loh chantîrin an awm ta; chuvângin, leia awmte chu an kâng hlum a, mi tlêm tê chauh an la awm. 7Uain thar chu a ṭap e, grêp hrui chu a chau ve, thinlunga hlim zawng zawngte chu an rûm e. 8Khuangtête hlimna chu a reh e, lâwm taka awmte thâwm chu a tâwp e, ṭingṭang hlim ri chu a reh e. 9Hla sa chungin uain an in lo vang; zû chu a intute tân kha tak a ni ang. 10Buaina khawpui chu tihchimin a awm ta; tu mah rêng rêng an luh loh nân in tin khârin a awm ta. 11Uain avângin kawtthlêrahte chuan ṭap thâwm a awm a; hlimna zawng zawng tih thimin a awm a, he ram hlimna hi a bo ta. 12Khawpuiah chuan ṭiauna hnutchhiahin a awm a, a kulh kawngkhâr chu vuak chhiatin a awm ta. 13Lei lailîa mi tin zîngah hetiang hian a la awm dâwn si a, olive thing vuak hnua rah a la awm ṭhîn ang leh, grêp lawh hnua grêp hmaih lawh tûr a la awm ṭhîn ang mai hian. 14Chûngte chuan an aw an chhuah ang a, an au vang; Lalpa ropuina avângin tuifinriat aṭangin ring takin an au ve. 15Chumi avâng chuan Lalpa chu khawchhak lamah chawimawi rawh u, Lalpa, Israel-ho Pathian hming ngei chu, tuifinriat kam ruamahte chuan chawimawi rawh u.

16Kâwlkil tâwpa hla sakte kan hria, “Mi felte hnênah ropuina awm rawh se,” tih hla hi. Nimahsela, kei chuan, “Ka chêr tawlh tawlh a, ka chêr tawlh tawlh a, ka chung a pik e! Vervêk taka titute chuan vervêk takin an ti a; a ni, vervêk taka titute chuan vervêk tak takin an ti,” ka ti a. 17Aw leia awm, hlauhawmna te, khuarkhurum te, thang te chu i chungah a awm e. 18Tichuan, heti hi a ni ang a, hlauhawm thâwm aṭanga tlâna chu, khuarkhurumah a tla ang a; khuarkhurum chhûng ata chhuak chhova chu, thangah a âwk ang; chung lama tukverhte chu hawnin a awm si a, leilung nghahchhante chu a nghîng bawk a ni. 19Lei hi a keh chhe vek a, lei hi tihralin a awm zo va, lei hi nasa takin a nghîng a. 20Lei hi zu rui mi angin a pai thlawk thlawk ang a, bâwkte sâwi angin a sâwi luai luai ang; a bawhchhiatna chu a chungah rit takin a awm ang a; tichuan, a tlu ang a, a tho leh tawh lo vang.

21Tin, chumi nîah chuan heti hi a ni ang a, Lalpa chuan chung lama mi chungnungho pâwl lian tak chu a hrem ang, leia lei lalte nên. 22Tin, mi tângho khuarkhuruma hruai khâwma an awm angin chûngho chu hruai khâwmin an awm ang a, tân inah khungin an awm ang a, ni rei tak hnuah chuan hremin an awm ang. 23Chumi hunah chuan thla khi zak takin a awm ang a, ni khi mualpho takin a awm ang; Sipaihote Lalpa chu Zion tlângah leh, Jerusalem khuaah leh, a upaho hmaah chuan ropui takin lalah a awm dâwn si a.

Currently Selected:

ISAIA 24: MIZOVBSI

Highlight

Copy