GALATIA 4

1Nimahsela, heti hian ka ti a ni: roluahtu tûr chu engkim chungah hotu ni mah sela, naupang a la nih chhûng zawng bâwih nên engah mah a danglam chuang lo ve; 2a pa ruat hun chu a lo thlen hma loh chuan, vêngtu leh enkawltute hnuaiah a awm zâwk a ni. 3Chutiangin keini pawh naupang kan nih lai khân, khawvêl zirtîrna dik lo hnuaiah bâwihah kan awm. 4,5Nimahsela, a hun bi a lo kim khân fa nihna kan hmuh theih nân, Dân hnuaia awmte chu tlan tûrin Pathianin a Fapa, hmeichhe hrin, Dân hnuaia lo piangin a tîr chhuak ta a.#Rom 8.15-17. 6Tin, fa in nih avângin Pathianin a Fapa Thlarau chu, “Abba! (Ka pa!)” tia auvin kan thinlungah a rawn tîr a. 7Chutichuan, bâwih i ni tawh lo va, fa i ni zâwk e; tin, fa i nih chuan Pathian zâra roluahtu tûr i ni.

Paulan Galatia mite a vei

8Nimahsela, Pathian in hriat loh lai khân, an pianzia rêng pawha Pathian ni hlei lote bâwih in ni a. 9Tûna Pathian in lo hriat hnu hi zâwngin - ni lo, Pathian mi hriat in lo nih hnu hian, tih tûr a ni zâwk e, khawvêl zirtîrna dik lo, eng mah ni hlei lo, a bâwiha awm leh in châkate lamah chuan engtiziaa hawi kîr leh nge in nih? 10Ni te, thla te, hun te, kum te in serh ṭhîn. 11In tân tha ka sêng thlâwn dah law maw tih ka hlauhsak a che u.

12Unaute u, ka ngên a che u, keimah angin awm rawh u, kei pawh nangmahni angin ka awm si a. Ka pawi eng mah in khawih lo. 13Chanchin Ṭha in hnêna ka hril hmasak ṭum kha ka tisa chak lohna avâng a ni tih in hre si a. 14Tin, ka tisaa in tân thlêmna awm chu in hmusit lo va, in ten hek lo; Pathian vântirhkoh angin, Krista Isua ang maiin mi lawm tâk zâwk kha. 15Vânnei in intihna kha khawiah nge ni ta le? Tih theih phei chu ni sela, nangnin in mitte kher chhuakin mi pe tawh ang tih ka hriatsak che u asin. 16Chutichuan, thu dik tak ka hrilh che u avângin in hmêlma ka lo ni ta em ni? 17Ṭha lamah ni hauh si lovin, ṭhahnemngai takin an zawng chhuak ṭhîn che u a; a ni, anmahni in zawn theih nân pâwn lama khâr hnan che u an duh a ni. 18Thu ṭha lamah erawh chuan eng lai pawhin ṭhahnemngai taka zawna awm fo hi a ṭha a ni, in hnêna ka awm lai chauh ni lovin. 19Ka naute u, Krista chu nangmahniah siam puitlina a awm hma loh chuan, nau veiin ka vei leh che u hi. 20A ni, tûnah hian in hnêna awma ka aw tihdanglam ka châk theihzia mai chu! In chung thûah ka mangang si a.

Hagari leh Sari tehkhin thu

21Dân hnuaia awm duhte u, mi hrilh rawh u, Dân thu chu in ngaithla ṭhîn lâwm ni? 22Heti hian ziak a ni si a: “Abrahaman fapa pahnih a nei a, pakhat chu bâwihnu lakah, pakhat chu bâwih lonu lakah. #Gen 16.15; 21.2 23Nimahsela, bâwihnu laka mi chu tisa dân angin a piang a, bâwih lonu laka mi erawh chu thutiam avângin a piang a ni,” tih hi. 24Chûng thu chu tehkhinna a ni; chûng hmeichhiate chu thuthlung pahnih an ni; pakhat chu Sinai tlânga mi, bâwih ni tûra fa hringtu chu; chu chu Hagari a ni. 25Tin, Hagari hi Arabia rama Sinai tlâng chu a ni a, Jerusalem, tûnlaia awm nên hian ang khat an ni, a fate nên bâwihah an awm si a. 26Chung lam Jerusalem erawh chu bâwih a ni lo va, chu ngei chu keini nu a ni.

27“Nang, ching, fa hring ngai lo,

hlim rawh;

Nang, nau vei ngai lo,

au chhuak rawh;

Pasal nei mi ai chuan,

khawharnu chuan

Fate a nei tam zâwk si,”

tih ziak a nih kha. #Is 54.1

28Tichuan, unaute u, keini hi Isaaka ang khân thutiam fate kan ni. 29Nimahsela, chumi lai chuan tisa dâna lo piang chuan Thlarau dâna lo piang chu a tiduhdah ang khân, tûnah pawh chutiang bawk a ni. #Gen 21.9 30Nimahsela, Pathian Lehkha Thuin engtin nge a sawi? “Bâwihnu chu a fapa nên hnawt chhuak rawh; bâwihnu fapa chuan bâwih lonu fapa chu ro a luahpui dâwn si lo,” a ti. #Gen 21.10 31Chutichuan, unaute u, bâwihnu laka fate kan ni lo va, bâwih lonu laka fate kan ni zâwk.

Currently Selected:

GALATIA 4: MIZOVBSI

Highlight

Copy