EZEKIELA 10
10
Pathian ropuinain Temple a chhuahsan
1Tichuan, ka han en a, ngai teh, cherub-ho lû chunga vân dum awmah khian sapphir lung ni âwm tak, lalṭhutthlêng ang taka lang hi a lo lang a.#Ezek 1.26; Thup 4.2 2Tin, ani chuan puanzaisîn sin hnênah khân, “Cherub hnuaia tawlailîr virte keah sâwn va lût la, cherub-ho inkâra meivâm saw i kut khinghnih khatin va lâwk la, khawpui chungah theh darh rawh,” a ti a. Tin, ka hmuh lai ngeiin a kal ta a.#Thup 8.5 3Tin, mi a luh lai khân cherub-ho chu in pui ding lampangah an ding a; tin, hung chhûngnung chu chhûmin a khat ta a. 4Tin, Lalpa ropuina chu cherub-ho aṭang chuan a chho va, biak in kawngka chungah chuan a han ding ta a, in chu chhûmin a khat a, hung chhûng chu Lalpa ropuina êng chuan a khat ta a. 5Tin, cherub-ho thla zâp ri te chu hung chhûng pâwnta zâwkah te pawh chuan Pathian Engkimtitheian mi a biak laia a aw ang maiin a hriat a.
6Tin, heti hi a ni a, puanzaisîn sin hnêna, “Cherub-ho inkâra tawlailîr vir kâr ata mei va la rawh,” tia thu a pêkin, ani chu a va lut a, tawlaitîr ke bulah chuan a ding ta a. 7Tin, cherub chuan cherub-ho inkâr aṭang chuan cherub-ho inkâra mei awm chu a han ban a, a la a, puanzaisîn sin kutah chuan a pe a, ani chuan a lo la a, a chhuak ta a. 8Tin, cherub-ho thla hnuaiah chuan mihring kut ang mai hi a lo lang a.
9Tin, ka han en a, ngai teh, cherub-ho sîrah chuan tawlailîr ke pali, cherub pakhat kiangah tawlailîr ke pakhat, cherub dang kiangah tawlailîr ke dang ka hmu a; tin, tawlailîr ke lan dân chu Tarsis lung zia ang hi a ni a.#Ezek 1.15-21 10Tin, an lanziaah chuan an paliin ang khat an ni a, tawlailîr ke pakhat chhûnga tawlailîr ke dang awm ang mai hi a ni a. 11An kal chuan sîr liah an kal thei a, an kal pawhin an her ngai lo; amaherawhchu, a hmasa hawi lam apiang an zui a ni, an kalin an her chuang lo. 12Tin, an taksa pum chu, an hnung te, an kut te, an thlate leh tawlailîr kete pawh kha, a vêlin mitin a khat a, an palia tawlailîr kete pawh kha.#Thup 4.8 13A tawlailîr kete kha chu ka beng hriat ngeiah, “Tawlailîr ke vir” tih a ni.
14Tin, mi tinin hmêl pali ṭheuh an nei a, hmêl pakhat chu cherub hmêl a ni a, pahnihna chu mihring hmêl a ni a, pathumna chu sakeibaknei hmêl, palina chu mupui hmêl a ni a.#Ezek 1.10; Thup 4.7 15Tin, cherub-ho chu an chho ta a; hei hi Kebar lui kama thil nung ka hmuh chu a ni. 16Tin, cherub-ho an kal chuan tawlailîr kête chu an kiangah a kal ve a; tin, cherub-ho khân lei ata chho tûra an thlate an zâr chuan tawlailîr kête chuan a hransan ngai lo va. 17An din chuan hêngte hi an ding ve a, an chhoh chuan hêngte hi an chho ve ṭhîn a, thil nung thlarau chu anmahniah a awm si a. 18Tin, Lalpa ropuina chu in pui kawngka chung aṭang chuan a chhuak a, cherub-ho chungah chuan a ding ta a. 19Tin, cherub-ho chuan an thla an zâr a, an chhuahin ka mit hmuh ngeiah lei ata an chho va, tawlailîr kete chu an kiangah a awm zêl a; tin, Lalpa in luhna chhak lam kawngkhâr bulah chuan an ding ta a, Israel Pathian ropuina chu an chungah a awm a. 20Hei hi Kebar luia Israel Pathian hnuaia ka thil nung hmuh chu a ni; cherub-ho an ni tih ka hria. 21Mi tinin hmêl hrang pali leh thla pali an nei ṭheuh va, an thla hnuaiah chuan mihring kut ang mai hi a awm a. 22Tin, an hmêl lam thûah chuan Kebar luia ka hmuh hmêlte ang bawk kha an lan dân leh anmahni ngeite pawh an ni a; tin, an hma zâwng zêlin an kal ṭheuh va.
Currently Selected:
EZEKIELA 10: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
