DEUTERONOMY 27
27
Lung phêka Pathian dân ziak
1Tin, Mosia leh Israel upate chuan mipuite chu, “Thupêk zawng zawng vawiina ka pêk che u hi pawm rawh u. 2Lalpa in Pathianin ram a pêk che ua kal tûra Jordan in kân ni chuan heti hi a ni ang a, lung lian tak tak in phun ang a, lung chârna in hnawih tûr a ni.#Jos 8.30-32 3In kai hnuin a chungah chuan he dân thu zawng zawng hi in ziak tûr a ni; tichuan, Lalpa, in pi leh pute Pathianin a lo tiam che u ang khân hnute tui leh khawizu luanna ram, Lalpa in Pathianin a pêk che u ramah chuan in kal thei ang. 4Tin, Jordan lui in kân zawh chuan heti hi a ni ang a, vawiina thu ka pêk che u ang hian Ebal tlângah lungte chu in phun ang a, lung chârna in hnawih tûr a ni. 5Tin, chutah chuan Lalpa in Pathian tân maichâm, lung maichâm in siam tûr a ni a, thîr hmanrua in hmang tûr a ni lo.#Ex 20.25 6Lalpa in Pathian maichâm chu lung chher lohvin in siam tûr a ni a; chumiah chuan Lalpa in Pathian tân hâlral thilhlante in hlân ang a; 7remna thilhlantein in inthawi ang a, chutah chuan in ei ang a, Lalpa in Pathian hmaah chuan hlim takin in awm tûr a ni. 8Tin, lung chungahte chuan he dân thu zawng zawng hi fiah takin in ziak tûr a ni,” tiin thu an pe a.
9Tin, Mosia leh puithiam Levi-hote chuan Israel mi zawng zawng chu an bia a, “Aw Israel mite u, ngun takin ngaithla rawh u; vawiinah hian Lalpa in Pathian mite in lo ni ta a. 10Chuvângin, Lalpa in Pathian thu chu in âwih tûr a ni a, vawiina thu ka pêk che u, a thupêkte leh a dânte chu in zâwm tûr a ni,” tiin.
Thu âwih lo tân ânchhia
11Tin, chumi nî vêk chuan Mosian mipuite chu thu a pe a, 12“Jordan lui râl in kai hnu chuan mipuite malsâwm tûrin Gerizim tlângah hêngho hi an ding tûr a ni: Simeon hnam te, Levi hnam te, Juda hnam te, Isakar hnam te, Josef hnam te, Benjamin hnamte hi;#Deut 11.29; Jos 8.33-35 13tin, ânchhe lawh tûrin hêngho hi Ebal tlângah an ding tûr a ni: Reuben hnam te, Gad hnam te, Aser hnam te, Zebulun hnam te, Dan hnam te, Napthali hnamte hi. 14Tin, Levi-hote chuan an han sawi ṭan ang a, Israel mi zawng zawng hnênah chuan aw ring takin:
15‘Themthiamte kutchhuak Lalpa tâna tenawm milem din chawp emaw, chhûn chawp emaw vawng ru apiang chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti ang a, an lo chhâwn tûr a ni.#Ex 20.4; 34.17; Lev 19.4; 26.1; Deut 4.15-19; 5.8
16‘A nu emaw, a pa emaw zah lo apiang chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti tûr a ni.#Ex 20.12; Deut 5.16
17‘A ṭhenawm ramri sawntu chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti tûr a ni.#Deut 19.14
18‘Kawng ata mitdel kawng lova kaltîrtu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.#Lev 19.14
19‘Ram dang mi te, pa nei lo te, hmeithai te ro dik lo taka rêlsaktu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.#Ex 22.21; 23.9; Lev 19.33-34; Deut 24.17-18
20‘A pa nupui mutpuitu chu ânchhe dawngin awm rawh se, a pa timualpho a nih avângin,’ an ti ang a. Mipui zawng zawng chuan, ‘Amen!’ an lo ti tûr a ni.#Lev 18.8; 20.11; Deut 22.30
21‘Ran eng pawh pâwltu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.#Ex 22.19; Lev 18.23; 20.15
22‘A farnu, a pa fanu emaw, a nu fanu emaw mutpuitu chu ânchhe dawngin awm rawh se,’ an ti ang a. Mipui zawng zawng chuan ‘Amen!’ an lo ti tûr a ni.#Lev 18.9; 20.17
23‘A pizawn mutpuitu chu ânchhe dawngin awm rawh se,’ an ti ang a. Mipui zawng zawng chuan ‘Amen!’ an lo ti tûr a ni.#Lev 18.17; 20.14
24‘A ṭhenawm that rutu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.
25‘Pawi khawih lo thah nâna thamna latu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.
26‘He dân thu pawm nghehpui lotu chu ânchhe dawngin awm rawh se,’ an ti ang a. Mipui zawng zawngin, ‘Amen!’ an lo ti tûr a ni.#Gal 3.10
Currently Selected:
DEUTERONOMY 27: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.
