DEUTERONOMY 24

Inmâk leh inneih leh

1Miin nupui a neiha, a chunga thil mawi lo eng emaw a hriat avânga a mit a tlun loh chuan heti hi a ni ang a, inmâkna lehkha a ziaksak ang a, a pe ang a, a in ata a chhuahtîr tûr a ni.#Mt 5.31; 19.7; Mk 10.4 2Tin, a in ata a chhuah hnu chuan mi dang a va nei thei ang. 3Tin, a pasal hnuhnûng zâwk chuan a huata, inmâkna lehkha a ziaksaka, a pêka, a in ata a chhuahtîr emaw, a pasal hnuhnûng zâwk, nupuia neitu chu a thi emaw a nih chuan, 4a pasal hmasa, amah kaltîrtu khân, tibawlhhlawh tawh a ni a, a nei leh thei lo vang; Lalpa ngaihin tenawm a ni, Lalpan luah tûra a pêk che u ramah chuan sual in luhtîr tûr a ni lo.

Dân chi hrang hrang

5Mi, nupui nei hlim chu sipaiah a kal tûr a ni lo va, eng hna thawkah mah phût tûr a ni lo; a in lamah kum khat chu a duh ang angin a awm ang a, a nupui nên hlim takin an awm tûr a ni. 6Buh râwt sawmna emaw, a chung lam lung emaw tu mah in hrênsak tûr a ni lo, mi nunna hrênsak in ni dâwn si a.

7Tu pawh, Israela thlah, a unaute zînga mi rû a, sal deha dek emaw, zuar emaw hriat chhuah an nih chuan, chu rûkrupa chu tihhlum tûr a ni; chutiang chuan in zîng ata, chu thil ṭha lo chu in tibo tûr a ni.#Ex 21.16

8Phâr hri chungchâng thûah chuan, ngun taka dap chhuaka, puithiam, Levi-hote zirtîr dân ang zêla ti tûrin fîmkhur rawh u; anmahni thu ka pêk angin fîmkhur takin in ti tûr a ni.#Lev 13.1—14.54 9Aigupta ram ata in lo chhuahna kawnga Lalpa in Pathianin Miriami chunga a tih dân kha hre reng rawh u.#Num 12.10

10Eng pawh in ṭhenawm in pûktîrin, a hrêng la tûrin a inah in lût tûr a ni lo.#Ex 22.26-27 11Pâwnah in ding ang a, in pûktîra chuan hrêng chu pâwnah a rawn lâksak tûr che u a ni. 12Mi rethei a nih chuan a hrêng chu in mutpui tûr a ni lo; 13a silhfênah chuan a muta, a fak theih nân che u a hrêng chu ni tlâkah in pe kîr leh ngei tûr a ni; tichuan, Lalpa in Pathian ngaihin in tân thil fel a ni ang.

14In mi rawih, mi rethei leh tlachhamte chu in unau emaw, in ram, in awmnaa awm ram dang mi emaw pawh ni sela, in hnehchhiah tûr a ni lo;#Lev 19.13 15a thawh ni chuan a hlawh chu in pe tûr a ni a, niin a tlâk hnan tûr a ni lo; mi rethei a ni a, chutah chuan a rilru a dah ṭhîn a ni; chuti lo chuan, in chungchâng thûah Lalpa a au vang a, in tân sual a lo ni dah ang e.

16Fate avângin pate tihhlum tûr a ni lo va, pate avângin fate tihhlum tûr a ni hek lo; mi tin mahni sual avâng ṭheuhva tihhlum tûr an ni.#2 Lal 14.6; 2 Chr 25.4; Ezek 18.20

17Ram dang mite leh pa nei lote ro chu dik lo takin in rêlsak tûr a ni lo va, hmeithai puan chu hrêngah in lâksak tûr a ni hek lo;#Ex 23.9; Lev 19.33-34; Deut 27.19 18nangni pawh Aigupta ramah khân bâwih in ni tawh a, Lalpa in Pathianin chuta ta chu a tlan che u a ni tih in hre reng tûr a ni; chuvâng chuan a ni hêng thil hi ti tûra thu ka pêk che u ni.

19In lova buh in senga, buhphal in khâwm hmaih chuan in la leh tûr a ni lo, ram dang mi te, pa nei lo te, hmeithaite ta tûr a ni; tichuan, Lalpa in Pathian chuan in kutkawih zawng zawngah mal a sâwm dâwn che u nia.#Lev 19.9-10; 23.22 20In olive thing in vuakin a zârte chu in vaw nawn tûr a ni lo; ram dang mi te, pa nei lo te, hmeithaite ta tûr a ni. 21In grêp, huana mi in lawhin a ṭo in zawng tûr a ni lo; ram dang mi te, pa nei lo te, hmeithaite ta tûr a ni. 22Tin, Aigupta ramah khân bâwih in ni tawh tih in hre reng tûr a ni; chuvâng chuan a ni, hêng thil hi ti tûra thu ka pêk che u ni.

Currently Selected:

DEUTERONOMY 24: MIZOVBSI

Highlight

Copy