DEUTERONOMY 18

Puithiamho chanpual

1Puithiam Levi-ho, Levi hnam zawng zawng chuan Israel-te zîngah chanvo leh rochan an nei tûr a ni lo va; Lalpa hnêna meia thilhlan leh a puala mi an ei tûr a ni. 2An unaute zîngah rochan chu an nei tûr a ni lo; an rochan chu an hnêna a sawi angin Lalpa a ni si a.#Num 18.20 3Inthawina hlântu mipuite laka puithiam pual tûr chu hêng hi a ni ang: bâwngpa pawh, berâm pawh, a dâr leh a bekbawr khinghnih leh a pumpui puithiam an pe tûr a ni. 4In buhbâl te, in uain te, in hriak haw hmasa te, in berâm hmul meh hmasak ber te in pe bawk tûr a ni. 5Lalpa in Pathianin Lalpa hminga rawngbâwla awm kumkhua tûrin, in hnam zawng zawng zîng ata a thlan an ni si a, anmahni leh an fapate nên.

6Tin, Levi mi tu pawh a awmna Israel ram, in awmna a khawii pawh chhuahsana, a rilrua châk taka Lalpan a la ruat tûr hmunah a lo kal chuan, 7chuta Lalpa hmaa awm ṭhîn Levi-ho, a unaute ang bawkin Lalpa a Pathian hmingin rawng a bâwl tûr a ni. 8An puithiam man tiam lovin, mi dang pual ang ei tûr chu an chang ve tho vang.

Hnam dangte anga fate hlan loh tûr

9 Lalpa in Pathianin a pêk che u ram in va thlen hun chuan, chûng hnamte thil tenawm tih ang chu in chîng ve tûr a ni lo. 10A fapa emaw, a fanu emaw meia kal tlangtîr te, aien chîng te, ṭhumvâwr chîng te emaw, mitlâkdawi hmang emaw te, dawithiam te,#Lev 19.26; Ex 22.18 11dawi ât te, ramhuaizâwl rawih te, dawithiam te, mitthi biak chîng mite in zîngah an awm tûr a ni lo.#Lev 19.31 12Hêng thil ti mi apiangte hi Lalpa ngaihin mi tenawm an ni si a; tin, hêng thil tenawm avâng hian a ni, Lalpa in Pathianin a hnawh chhuahsak che u ni. 13Lalpa in Pathian hmaah in ṭha famkim tûr a ni.#Mt 5.48

Pathianin zâwlnei a rawn tîr ang

14Chûng in va luah tûr rama hnamte chuan ṭhumvâwr leh aien chîngte an pawm ṭhîn a; nangni zawng Lalpa in Pathianin chutiang tih chu a phal lo a ni. 15Lalpa in Pathianin keimah ang hi in unaute zînga mi zâwlnei a siamsak ang che u. A thu chu in ngai tûr a ni,#Tirh 3.22; 7.37 16‘Lalpa kan Pathian aw chu min hriattîr tawh suh la, he mei nasa tak hi min hmuhtîr leh tawh suh la, kan thi dah ang e,’ tia Horeb tlânga pun khâwm nîa Lalpa in Pathian in duh dân ang khân. 17Tin, Lalpa chuan ka hnênah, ‘An thusawi chu an sawi ṭha hle a. 18An unaute zînga nangmah ang zâwlnei ka siamsak a; a kâah ka thûte ka dah ang a, a hnêna thu ka pêk apiang chu an hnênah a sawi ang a. 19Tin, heti hi a ni ang a, ka hminga ka thu a sawi pawm lo apiang chu ka ngaihtuah ang.#Tirh 3.23 20Ka hminga sawi tûr ka pêk loh sawi luitu zâwlnei emaw, pathian dangte hminga thusawitu zâwlnei emaw, chu zâwlnei chu tihhlum tûr a ni,’ a ti a. 21Tin, in thinlunga, ‘Engtin nge thu chu Lalpa sawi a ni lo tih kan hriat ang?’ in tih chuan, 22zâwlneiin Lalpa hminga thu a sawia, a thil sawi chu a thlen lohva, a hlawhtlin loh chuan, chu chu a ni Lalpa sawi loh va chu; zâwlnei chuan uangthuang takin an sawi mai mai a ni, amah chu in hlau tûr a ni lo.

Currently Selected:

DEUTERONOMY 18: MIZOVBSI

Highlight

Copy