DEUTERONOMY 15

Kum sarihna

(Lev 25.1-7)

1Tin, kum sarih a vei kum apiangin ngaihdamna in siam tûr a ni. 2Ngaihdam dân chu hetiang hi a ni: leiba neitu apiangin an ṭhenawmte an lo pûktîr chu an ngaidam tûr a ni; a ṭhenawm pawh, a unau pawh a ṭhîng lui tûr a ni lo, Lalpa ngaihdamna chu puan a nih tawh avângin. 3Hnam dang mi chu in ṭhîng lui thei ang a; amaherawhchu, in ta eng pawh in unaute lo hman chu in ngaidam tûr a ni. 4-5Hêng thupêk, tûna ka thupêk zawng zawng che u hi, pawm tûra Lalpa in Pathian aw chu ṭhahnemngai taka in zawm phawt chuan, mi rethei rêng rêng in awm hauh lo vang a (Lalpa in Pathianin luah tûra a pêk che u ramah chuan, Lalpan mal a sâwm ngei ngei dâwn che u a ni); 6Lalpa in Pathian chuan a tiam che u angin mal a sâwm ang che u a, hnam tam tak in pûktîr ang a, nangni erawh chuan in pûk lo vang; hnam tam tak chungah ro in rêl ang a, in chungah erawh chuan ro an rêl ve lo vang.

7 Lalpan ram a pêk che u in awmnaah in unaute zîngah rethei an awm chuan, in unau retheite lakah chuan in rilru tikhauh suh ula, kawm hek suh u,#Lev 25.35 8an lakah chuan in thilphal ngei ngei tûr a ni a, an tlâkchhamnaa an mamawh phuhrûkna khawp in pûktîr tûr a ni. 9‘Ngaihdam kum, kum sarihna chu a lo thleng dâwn ta,’ tiin, in unau retheite chu hmu mawha eng mah pe duh lovin, in thinlungah dik lo taka ngaihtuahna awm lo tûrin fîmkhur rawh u; chuti lo chuan, ani chuan i chungchâng thûah Lalpa a au vang a, in tân sual a lo ni dah ang e. 10In pe ngei ngei tûr a ni a; tin, in pêk hunah pawh in thinlung a hnûr hauh lo tûr a ni; chutiang thil avâng chuan a ni, Lalpa in Pathianin in thiltih zawng zawngah leh, in kutkawih zawng zawngah mal a sâwm dâwn che u ni. 11Chu ramah chuan mi retheite awm loh lai a awm dâwn si lo va; chuvângin, ‘In rama in unaute chungah te, tlachhamte chungah te, in mi retheite chungah te in thilphal ngei ngei tûr a ni,’ tiin thu ka pe che u a ni.#Mt 26.11; Mk 14.7; Joh 12.8

Israel mi bâwih en dân tûr

(Ex 21.1-11)

12In unau, Hebrai pa emaw, Hebrai nu emaw, in hnêna an hralha, kum ruk in rawng an bâwl chuan, kum sarih kum chuan in chhuahtîr tûr a ni.#Lev 25.39-46 13Tin, in chhuahtîr hun chuan kutbêngin in chhuahtîr tûr a ni lo; 14in berâm ruala mi te, in hruiha mi te, in uain sâwr khura mi te ui lo takin in pe tûr a ni; Lalpa in Pathianin mal a sâwm dân che u ang zêlin in pe tûr a ni. 15Aigupta ramah khân bâwih in ni tawh a, Lalpa in Pathianin a tlan che u tih kha in hre reng tûr a ni; chuvâng chuan a ni, tûnah hian hêng thu hi ka pêk che u ni. 16Tin, heti hi a ni ang a, nangmahni leh in chhûngkua an ngainat avâng leh in intihthiam avânga in hnêna, ‘Ka chhuahsan lo vang che u,’ an tih tlat chuan, 17thîr zum in la ang a, kawngkhâr chhanah an beng in vit ang a; tichuan, kumkhuain in bâwih an ni ang. Tin, in bâwihnu pawh chutiang bawk chuan in ti tûr a ni. 18Chhuahtîr chu thil harah in ngai tûr a ni lo. Inhlawhfa thawh leh hnih thawkin kum ruk in rawng an bâwlsak tawh si che u a; tin, Lalpa in Pathianin in thiltih apiangah mal a sâwm zêl ang che u.

Ran piang hmasa ber Lalpa ta

19In ran rual te, in berâm rualte zînga a pa, piang hmasa ber apiangte chu Lalpa in Pathian pualah in pe tûr a ni; in bâwngpa piang hmasa ber chu hnathawkah in chhawr tûr a ni lo va, in berâm rualte zînga piang hmasa ber hmul chu in mêt tûr a ni lo.#Ex 13.12 20Lalpa in Pathian hmaah kum tinin Lalpan hmun a la ruat tûrah chuan in ei tûr a ni, nangni leh in chhûngte nên. 21Sawisêl kaina nei, a ke bai emaw, a mit del emaw, sawisêl kaina nei tawh phawt chu Lalpa in Pathian hnêna inthawi nân in hmang tûr a ni lo. 22Nangmahni awm hmunah in ei tûr a ni; thianghlim lote leh thianghlimte pawhin hêng sangai te, sakhi te ang hi chu in ei thei ang. 23A thisen erawh chu in ei hauh lo tûr a ni; tui angin leiah in leihbaw mai tûr a ni.#Gen 9.4; Lev 7.26-27; 17.10-14; 19.26; Deut 12.16,23

Currently Selected:

DEUTERONOMY 15: MIZOVBSI

Highlight

Copy