TIRHKOHTE 16

Timothean Paula leh Sila a zui

1Tin, Derbe khuaah leh Lustra khuaah chuan a kal bawk a; tin, chutah chuan a hming Timothea, zirtîr pakhat a awm; ani chu ring ve Juda hmeichhe fapa a ni a, a pa erawh chu Grik a ni; 2Lustra leh Ikonion khuaa unau awmte chuan ani chu an fak ṭhîn a. 3Paulan ani chu an hnêna kal veah a duh a; tichuan, chumi lama Juda awmte avâng chuan a serh a tansak a, a pa chu Grik a ni tih an hre vek si a.

4Tin, khaw tina an kal pahin, Jerusalem khuaa tirhkoh leh upa awmte thurêl kha zawm atân unaute hnênah an pe zêl a. 5Chutichuan, kohhrante chu rinnaah chuan an nghet ta a, ni tin an pung ta deuh deuh va.

Troas khuaah Paulan zêl a hmu

6Tin, Thlarau Thianghlimin Asia rama thuhril a khap avângin, Phrugia leh Galatia ram chu an fang chhuak ta a; 7tin, Musia ram kiang an thlenin Bithunia rama luh an tum a; nimahsela, Isua thlarauvin a phal si lo va. 8Chutichuan, Musia ram chu an pêl a, Troas khuaah an chhuk ta a.

9Tin, zânah Paulan mumang angin Makedonia rama mi pakhat dingin, “Makedonia ramah lo kai la, min pui rawh,” tia ngên chiamin a hmu a. 10Tin, chu mang chu a man zawh veleh Makedonia ramah chuan kal kan tum ta nghâl a, an hnêna Chanchin Ṭha hrilah Pathianin min ko tih kan hria a.

Philippi khuaa Ludi pianthar thu

11Tin, Troas khua ata lawngin kan chhuak a, tluang takin Samothraki khuaah kan kal a, a tûkah chuan Neapoli khuaah kan kal leh a; 12tin, chuta ṭang chuan Philippi khuaah kan kal a, chumi khua chu Makedonia rama khaw pakhat a ni a, chumi bialah chuan khaw pawimawh ber a ni a, Rom khuaa mi pêmte khua a ni. Chumi khuaah chuan ni tam deuh kan châm a.

13Tin, Chawlhniah chuan kulh kawngkhâr pâwn lamah, lui kamah, ṭawngṭaina hmun nia kan rinah chuan kan kal a; tin, kan ṭhu a, hmeichhe lo kal khâwmhote hnênah chuan thu kan sawi a. 14Tin, a hming Ludi, puan sen duk zuartu, Thuatira khuaa mi, Pathian betu hmeichhe pakhatin kan thu a hria a; tin, Paula thusawi chu zâwm tûrin Lalpan a thinlung a tivâr ta a. 15Tin, amah leh a chhûngten baptisma an chan zawhin, “Lalpa ring takzeta mi ruat chuan, ka inah lo thleng rawh u,” tiin min ngên chiam a, min chelh ta a.

Philippi khuaa lung in tân

16Tin, ṭawngṭaina hmunah chuan kan kal laiin, nula tu emaw ramhuai aienthiam zâwlin min tâwk a, ani chuan a aien avângin a pute chu sum tam tak a hmuhtîr ṭhîn a. 17Chu mi chuan Paula leh keini min zui a, “Hêng mi chhandamna kawng hrilhtu che u hi, Chungnungber Pathian bâwih an nih hi,” tiin a au va. 18Chutiang chuan ni rei tak a ti ṭhîn a. Chutichuan, Paula chu a lungni ta lo va, a hawi a, ramhuai hnênah chuan, “Isua Krista hmingin a kawchhûng ata chhuah thu ka pe a che,” a ti a. Tin, chutih lai tak chuan a chhuak ta nghâl a.

19Tin, a pute chuan an sum hmuhna a bo tih an hriatin, Paula leh Sila chu an man a, hotute hmaah dâwr hmunah an hnûk lût a. 20Tichuan, rorêltute hnênah an hruai a, “Hêng mite hi Juda-te an ni a, kan khua an tibuai êm êm a, 21dân eng emaw kan lawm leh zawm thiang lote hi an hril ṭhîn a, Rom mi kan ni si a,” an ti a.

22Chutichuan, mipuite pawh chu tirhkohte bei tûrin an lo thawk ve a, rorêltute chuan an puante an phih hlihsak a, tianga vuak thu an pe a. 23Tin, vawi tam tak an vuak zawhin tân inah an khung a, a vêngtu hnênah him taka vên tûr an ti tlat a; 24chuti kauva thu an pêk avâng chuan ani chuan rip chhûngnungah a khung a, an keahte chuan thingkawl a buntîr tlat a.

25Nimahsela, zanlaiah Paula leh Sila chu Pathian hnênah an ṭawngṭai a, hla an sa a, mi tângten an ngaithla a; 26tin, thawklehkhatah lîr nasa takin a lo nghîng a; chutichuan, tân in lungphûmte lam chu a nghîng a; tin, kawngkhâr zawng zawng chu a inhawng nghâl a, mi tin kawlbunte chu a lo inphelh ta vek a. 27Tin, a vêngtu chu a muhîl a lo harh a, tân in kawngkhârte chu inhawngin a hmu a, mi tângte chu an tlan bo emaw a ti a, a khandaih a phawi a, a intihlum dâwn a. 28Nimahsela, Paula chu aw ring takin a au va, “Eng mah intih suh; kan zain hetah kan la awm vek alâwm,” a ti a. 29Tin, a vêngtu chuan khâwnvârte a lam a, a zuang lût a, hlauva khûr chungin Paula leh Sila hmaah chuan a bawkkhup a; 30tin, anni chu a hruai chhuak a, “Pute u, chhandama awm tûrin eng nge ka tih tûr?” a ti a.

31Tin, anni chuan, “Lalpa Isua ring la; tichuan, chhandamin i awm ang, nang leh i chhûngte nên,” an ti a. 32Tin, a hnênah leh a ina awm zawng zawng hnênah chuan Lalpa thu an sawi a. 33Tin, chumi zânah, chumi lai la la chuan a hruai a, an vuakna vualte chu a sil fai a; tin, ani leh a chhûngte zawng zawng chuan baptisma an chang ta nghâl a. 34Tin, a inah a hruai chho va, ei tûr a hlui a; tin, Pathian an rin avângin, ani chu a chhûngte zawng zawng nên an hlim ta êm êm a.

35Tin, ni a chhuahin rorêltute chuan, “Kha mite kha chhuah rawh,” tiin mi mantute an tîr a. 36Tin, tân in vêngtu chuan Paula hnênah an thu a hrilh a, “Rorêltute chuan chhuah tûr che uin mi an rawn tîr a ni; chuvângin, tûnah lo chhuak ula, thlamuang takin kal rawh u,” a ti a. 37Nimahsela, Paula chuan an hnênah, “Rom mi kan ni si a, kan thiam leh thiam loh hre lovin vântlâng mit hmuhin min vua a, tân inah min khung a; tûnah hian a rûkin min hnawt chhuak dâwn vei a ni maw? A ni tawp lo vang; anmahni ngei lo kal sela, min rawn hruai chhuak rawh se,” a ti a. 38Chutichuan, mi mantute chuan chûng thu chu rorêltute hnênah chuan an hrilh a. Tin, Rom mi an ni tih an hriat chuan an hlau ta a; 39tin, an va kal a, an thlêm chiam a, an hruai chhuak a, khua ata chu kal bovah an ngên a. 40Tin, tân in ata chu an chhuak a, Ludi inah chuan an lût a; tin, unaute chu an hmu a, an thlamuan a, an chhuak ta a.

Currently Selected:

TIRHKOHTE 16: MIZOVBSI

Highlight

Copy