1 KORINTH 4

Tirhkohte rawngbâwlna

1Keiniho hi Krista rawngbâwltuah leh Pathian thurûk enkawltuah miin min ngai rawh se. 2Hetah hian enkawltu chu mi rinawm nih a ngai bawk a ni. 3Nimahsela, nangnin mi fiahna leh mihring ngaihtuahnain mi fiahna chu ka tân thil tê tak tê a ni; mahni pawh ka infiah ngai hek lo. 4Eng mah indemna ka hre si lo va; nimahsela, chu chuan thiam mi chantîr chuang lo; mi fiahtu chu Lalpa a ni zâwk. 5Chutichuan, a hun hma hian eng mah fiah suh u, Lalpa lo kal hma loh zawng; ani chuan thima thil thuhrûkte chu êngah a rawn la chhuak ang a, thinlunga tumte pawh a tilang bawk ang; chumi hunah chuan, mi tinin Pathian lakah chuan mahni chan tâwkah fak an hlawh ṭheuh tawh ang.

6Tin, unaute u, thu ziakte chu in khûm lohna tûrin, keimahniah hian in zir theih nân, chûng thûte chu in ṭhatna tûrin kei leh Apollovan kan inbel a ni, in zîngah tu mân pakhat chhuangin pakhat in uan khum loh nân. 7Nang tuin nge tilêm chuang che? I dawn loh chu eng nge i neih ni? I dawn a nih si chuan engati nge dawn ni lo anga i uanpui ni? 8Tûn apangin in tlai ta a, tûn apangin in hausa ta a, kan tel lovin ro in rêl ta a nih hi le; a ni, rorêl tak tak ula chu ka duh a ni, keini pawhin nangmahni nêna ro kan rêl theih nân. 9Pathianin keini tirhkohte hi thi tûra ruat sa angin a hnuhnûng berah min târ chhuakah ka ngai a ni; khawvêlte leh vântirhkohte leh mihringte mit hmuha ennawma siamin kan awm hi. 10Keini zawng Krista avângin mi â kan ni a, nangni erawh chu Kristaah chuan mi fing in ni zâwk e; keini zawng kan chak lo va, nangni erawh chu in chak e; nangni zawng mi chawimawiin in awm a, keini erawh chu mi hmuhsitin kan awm zâwk a ni. 11Tûn thleng pawh hian kan rilṭâmin kan tuihâl a, silhfên kan khawp lo va, mi kut thak hnawihna kan ni a, awmna bulbâl kan nei lo va; 12mahni kuta thawkin kan rim hle a; miin min hauvin mal kan sâwmsak ṭhîn a; miin min tihduhdahin kan tuar hrâm hrâm ṭhîn a; #Tirh 18.3 13miin min hêkin kan thlêm ṭhîn a; tûn thleng pawh hian khawvêl hnâwmhnawk, thil zawng zawng bawlhhlawh angin miin min siam a ni.

14In zahna tûrin hêng thu hi ka ziak lo va, ka fa duh takte anga zilh tûr che uin ka ziak zâwk a ni. 15Kristaah chuan zirtîrtu sîngkhat nei mah ula, pa zawng tam tak in nei si lo a ni; keiin Krista Isuaah chuan Chanchin Ṭhain ka hring che u a nih kha. 16Chutichuan, mi zir tûrin ka ngên a che u. #1 Kor 11.1; Phil 3.17 17Chumi avâng chuan Timothea, Lalpaa ka fa duh tak leh rinawm chu, in hnênah ka rawn tîr a ni; ani chuan Kristaa ka awm dân, ram tina kohhranho pâwl tina ka zirtîr ṭhin ang hi a hriattîr leh ang che u.

18Tin, kei in hnêna lo kal tawh lo tûr ang maiin ṭhenkhat in uang a ni. 19Nimahsela, Lalpan rem a tih chuan rei lo tê chinah in hnênah ka lo kal ang; chutichuan, mi uangte thu chu ni lovin, an thiltihtheihna chu ka hre zâwk tawh ang. 20Pathian ram chu thûah a awm lo va, thiltihtheihnaah a awm zâwk a ni. 21Eng nge in duh zâwk? Vuakfung nên nge in hnênah ka lo kal anga, hmangaihna leh thuhnuairawlhna rilru puin?

Currently Selected:

1 KORINTH 4: MIZOVBSI

Highlight

Copy