1 KORINTH 2

Khenbeh Krista thu hril

1Tin, unaute u, kei zawng Pathian thurûk hrilh che uin in hnêna ka lo kal lai khân, thusawi ropui leh finna ropui nêna lo kal ka ni lo. 2Isua Krista, amah ngei khenbeha a awm thu chauh lo chu in zîngah eng mah rêng hriat ka tum loh kha. 3Tin, chak lo leh hlauvin, nasa taka khûr chungin in zîngah ka awm a. #Tirh 18.9 4,5Tin, in rinna chu mihring finnaa innghat lovin, Pathian thiltihtheihnaa innghata a awm theih zâwkna tûrin, ka ṭawngka chhuak leh ka thuhrilte chu thufinga thlêmna thuin a ni lo va, Thlarau leh thiltihtheihna hriattîrin a nih zâwk kha.

Pathian finna

6Amaherawhchu, puitlingte zîngah chuan thufing zawng kan sawi ṭhîn; nimahsela, he khawvêl thufing hi a ni lo, he khawvêl rorêltu boral tûrte thufing hi a ni hek lo; 7Pathian thufing thurûk chu kan sawi zâwk ṭhîn a ni, thufing inthup, kan ropuina tûra Pathianin khawvêl awm hmaa a ruat lâwk tawh chu. 8Chu chu he khawvêl rorêltute rêng rêng hian an hre lo; hria sela chuan ropuina Lalpa chu an khêngbet lo vang.

9“Mita hmuh ngai loh,

benga hriat ngai loh,

Mihring rilrua lût ngai lo,

Pathianin a hmangaihtute tân

A buatsaih apiangte chu,”

tih ziak ang zâwk khân. #Is 64.4 10Keini erawh chu chûng chu Pathianin Thlarauvin min hriattîr ta a ni; Thlarau chuan engkim a chhui chhuak si ṭhîn; a ni, Pathian thu ril pawh. 11Mihring thute chu mihring rilru, a chhûnga awm vêk lo chuan, mihring zîngah tuin nge hria ang? Chutiang bawkin Pathian thute chu Pathian Thlarau vêk lo chuan tu mân an hre lo. 12Chutichuan, a thlâwna Pathianin thil min pêkte chu kan hriat theihna tûrin, keini zawngin khawvêl thlarau ni lovin, Thlarau, Pathian hnêna mi chu, kan hmu zâwk a ni. 13Mihring finna zirtîr thûa sawi lovin, Thlarau zirtîr thûa sawi zâwkin, Thlarau lam thute chu thlarau lam mite hnêna hrilh fiahin, chûng thil min pêk thute pawh chu kan sawi ṭhîn. 14Khawvêl mi chuan Pathian Thlarau lam thilte chu a lâwm ṭhîn lo, ani ngaih chuan âtthlâk a ni si a; Thlarauva hriat fiah a nih avângin a hre thei lo rêng rêng bawk a ni. 15Thlarau mi erawh chuan thil engkim a hre fiah ṭhîn a, ani lah chu tu mân an hre fiah si lo. 16Tuin nge Lalpa rilru hre tawha, amah chu zirtîr thei ang? Keini erawh chuan Krista rilru kan pu a ni. #Is 40.13

Currently Selected:

1 KORINTH 2: MIZOVBSI

Highlight

Copy