1 KORINTH 16

Ringtu dangte tâna thilpêk

1Tin, mi thianghlimte tâna thawhlâwm thu kha zawng, Galatia rama kohhranho pâwl hnênahte thu ka pêk angin nangni pawhin lo ti ve rawh u. #Rom 15.25-26 2Ni sarih ni hmasa berah chuan mi tinin, malsâwmna in hmuh angzia zêlin dah khâwl ṭheuh ula; ka lo kal huna thawhlâwm khawn rêng rêng a awm loh nân. 3Tin, in khawngaih thilpêk chu Jerusalem khuaa kalpui tûrin, ka lo thlen hunah tu pawh ṭha in tih apiang lehkhate kengin ka tîr ang. 4Tin, ka kal vena âwm a nih phei chuan ka hnênah an kal ang.

Paula zin dân tûr

5Tin, Makedonia ram ka fan chhuah hnu-ah chuan in hnênah ka lo kal ang; Makedonia ram chu ka fang rêng rêng dâwn si a. #Tirh 19.21 6Nangni hnênah erawh chuan ka châm reng a ni thei e, thlasik chhûng zawng pawh a ni mahna, khawiah pawh ka kalna tûr apiangah nangnin mi thlah theihna tûrin. 7Tûna kal pah maia hmuh che u ka duh lo va, Lalpan rem a tih chuan in hnênah rei deuh châm ka beisei si a. 8Nimahsela, Pentikos thlengin Ephesi khuaah hian ka châm reng ang, #Lev 23.15-21; Deut 16.9-11 9kawngka zau tak leh sâwt tak ka tân a inhawng si a, dotute tam tak an awm bawk. #Tirh 19.8-10

10Tin, Timothea kha a lo thlen chuan, ṭi lova in hnêna a awm nân fîmkhur rawh u; keiin ka thawh ang bawk hian Lalpa hna chu a thawk si a. #1 Kor 4.17 11Chuvângin, tu mân hmusit suh se; ka hnêna a lo kal theih nân thlamuang takin thlah zâwk ang che u; unaute rualin amah lo hmuh ka beisei si a.

12Kan unau Apollova thu kha chu, unaute ruala in hnêna lo kal tûrin ka ngên chiam a; nimahsela, tûnah zawng lo kal a duh hauh lo va; a remchân hunah erawh chuan a lo kal ang.

Thu hnuhnûng leh chibai bûkna

13Invêng ula, rinnaah chuan ding nghet ula, intihuai ula, chak takin awm rawh u. 14In tih apiang chu hmangaiha tih ni vek rawh se.

15Unaute u, Stephana chhûngte chu Akaia rama âwih hmahruaitute an ni a, mi thianghlimte rawngbâwl tûrin an inpe tih in hria e; #1 Kor 1.16 16chutiang mite hnênah leh, hnathawha ṭanpui leh, thawk rim apiangte hnênah chuan intulût tûrin ka ngên a che u.

17Tin, Stephana te, Phortunata te, Akaika te an lo kal hi ka lâwm a ni, in awm loh pawh lang lova min siam avângin. 18Anni hian ka rilru leh in rilru an tiharh si a; chutichuan, hetiang mite hi lâwm rawh u.

19Asia ram kohhrante hian chibai an bûk a che u. Akuila leh Priskilli, an ina kohhran inkhâwmho nên hian Lalpaah chuan chibai tam takin an bûk a che u. #Tirh 18.2 20Unau zawng zawng hian chibai an bûk a che u. Fawh thianghlimin chibai inbûk ṭheuh rawh u.

21Kei Paulan keima kut ngeia chibai ka bûkna che u a nih hi. 22Tu pawhin Lalpa a hmangaih loh chuan ânchhe dawngin awm rawh se. Kan Lalpa chu a lo kal e. 23Lalpa Isua Krista khawngaihna chu in hnênah awm rawh se. 24Krista Isua ka hmangaihna hi in zaa hnênah awm rawh se. Amen.

Currently Selected:

1 KORINTH 16: MIZOVBSI

Highlight

Copy