1 KORINTH 10

Milem laka fîmkhur tûr

1Unaute u, hêng hi in hriat loh ka duh lo ve, khatia min thlahtute zawng zawng chhûm hnuaia an awm veka, an zaa tuifinriat pawh an kai veka, #Ex 13.21-22; 14.22-29 2an zaa chhûmah leh tuifinriatah pawh Mosia bêl tûra baptis-a an awm veka, 3an zaa thlarau lam chaw hmun khat pawh an ei ṭheuhva, #Ex 16.35 4an zaa thlarau lam in tûr hmun khat pawh an in ṭheuh kha; anmahni zuitu thlarau lam lungpuia mi kha an in ṭheuh si a; chu lungpui chu Krista a ni. #Ex 17.6; Num 20.11 5Nimahsela, an zînga mi tam zâwk chungah chuan Pathian a lungni ta lo va; thlalêrah khân tlu hlumin an awm a. #Num 14.29-30

6Tin, chûng chu kan tân entîrna a ni, thil sual an châk ang bawk khân kan châk ve loh nân. #Num 11.4 7An zînga ṭhenkhat milem betu an ni ang khân milem betu ni suh u, “Mipui chu ei leh in tûrin an ṭhu hlawm a, infiam tûrin an tho leh a,” tih ziak ang khân. #Ex 32.6 8An zînga ṭhenkhatin nula an ngai a, ni khatah sînghnih leh sângthumin an tlûk hlum phah ang khân i inngai hek suh ang u. #Num 25.1-18 9An zînga ṭhenkhatin Lalpa an fiaha, rûla tihborala an awm phah ang khân Lalpa chu i fiah hek suh ang u. #Num 21.5-6 10An zînga ṭhenkhat an phunnawi a, tiboraltu tihborala an awm phah ang khân phunnawi hek suh u. #Num 16.41-49

11Tin, chûng chu entîrna tûrin an chungah a lo thleng a nih kha; keini, hun tâwp lo thlennate hi min zilhna tûrin an ziak a ni bawk a. 12Chuvângin, dinga inring chu fîmkhur rawh se; chuti lo chuan, a tlu dah ang e. 13Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang.

14Chuvângin, ka duh takte u, milem biak hi tlânsan rawh u. 15Mi fingte hnêna sawi angin ka sawi a ni; ka thusawi hi ngaihtuah rawh u.

16Malsâwmna no mal kan sâwmsak ṭhin hi Krista thisen ṭâwmpuina a ni lo vem ni? Chhang kan phel ṭhin hi Krista taksa ṭâwmpuina a ni lo vem ni? #Mt 26.26-28; Mk 14.22-24; Lk 22.19-20 17Keini mi tam tak hi chhang tlang khat, taksa pumkhat kan nih hi; kan zain chhang tlang khata mi kan chang ṭheuh si. 18Tisa lama Israel-ho chu en teh u; inthawina sa eitute chuan maichâm chu an ṭâwmpui lo vem ni? #Lev 7.6 19Milem leh a hnêna thilhlante chu chaw tak khûka khûkpui tûr ka tihna em ni? Ni suh e. 20Jentail-te inthawina chu Pathian lakah ni lovin, ramhuaiho lakah an inthawi ṭhîn a ni tih ka sawi zâwk a ni; nangni zawngin ramhuaiho in ṭâwmpui ka duhsak lo che u asin. #Deut 32.17 21Lalpa no leh ramhuai no in in kawp thei lo vang; Lalpa dawhkâna mi leh ramhuai dawhkâna mi in ei kawp thei hek lo vang. 22A nih loh leh, Lalpa chu thîk tûrin chawhthawh kan tum a ni maw? Amah aiin kan chak zâwk em ni? #Deut 32.21

23Thil engkim tih a thiang a; nimahsela, thil engkim tih a ṭha kher lo. Thil engkim tih a thiang a; nimahsela, thil engkim tihin mi a siam ṭha lo. #1 Kor 6.12 24Tu pawhin mahni ṭhatna tûr zawng lovin, mi dang ṭhatna tûr zawng zâwk rawh se. 25Sa dâwra an zawrh apiang chu, chhia leh ṭha hriatna avânga eng mah zâwt kher lovin ei mai rawh u; 26lei leh a chhûnga mi zawng zawng hi Lalpa ta a ni si a. #Sam 24.1 27Ringlomi zînga tuin emaw a sâwm che ua, kal in duh si chuan chhia leh ṭha hriatna avânga eng mah zâwt kher lovin, an hlui che u apiang chu ei mai rawh u. 28Amaherawhchu, tuin emaw, “Hei hi inthawina a ni,” tiin a hrilh che u chuan, a hriattîrtu che u avâng leh chhia leh ṭha hriatna avângin ei suh u, 29nangma chhia leh ṭha hriatna ka ti lo va, mi dang chhia leh ṭha hriatna chu a ni ka tih zâwk ni. Engah nge mi dang chhia leh ṭha hriatnain ka zalênna a sawisêl ni? 30Lâwm taka ka chan chuan, a chunga lâwmthu ka sawina chungah hian engah nge sawi chhiat ka nih ni?

31Chutichuan, in ei pawhin, in in pawhin, in tih apiangah pawh Pathian ropuina tûr hlîrin ti rawh u. 32,33Keiin mahni sâwtna zawng lovin, chhandam an nih theihna tûrin mi tam tak sâwtna zawng zâwkin, mi zawng zawng engkima ka tihlâwm ang tak hian, Juda-te tân pawh, Grik-te tân pawh, Pathian kohhranho tân pawh, an tlûk phahna tûr rêng eng mah ti suh u.

Currently Selected:

1 KORINTH 10: MIZOVBSI

Highlight

Copy