Maafiù 7

Wo Jisɛ̀ wààŋ ɓɔ̀ mùŋ jeè wò nyùùŋ è keì

(Luù 6.37, 38, 41, 42)

1“Ɓɔ̀ nìŋ kilià è kiti ànyùùŋ diɛŋ, wèè kɛ̀ wo Dayà goiŋ nàŋ kìlìè kiti diɛŋ nyɛ̀iŋ pɛɛ. 2Jàaìŋ jii kɛ̀, ke sàwà gunɛ̀ɛŋ nìŋ do nàŋ toomò wèè naŋ kìlìà anyùùŋ e kiti diɛŋ lɛ̀, kiiŋ nɔŋ wo Dayà do nàŋ toomò wèè weiŋ kìlìà kiti diɛŋ. 3Kpeiŋ kɛ̀, wèè kiìŋ naàŋ mùŋ yɛmɛ̀ ke kuùfìèɛ ko sòòfɛ̀ɛ̀ dàwi mɔɔ̀ŋ, kɛɛ muŋ fè jàà jii kɛ̀ wɔ̀ŋ kuùfòò gbee kòò wɔ̀ŋ yaà kò sòòfɛ̀ɛ̀ muàŋ biì? 4Dièsɔa mùŋ naŋ ɓɛ̀nɛ̀ŋ wòò wo wùìya mɔɔ̀ŋ maàŋ, ‘Tɔ̀ miŋ gòum ke kuùfìèɛ ko sòòfɛ̀ɛ̀,’ kɛɛ muŋ fè yɛ̀mɛ̀ wɔ̀ŋ kuùfòòɔ kò sòòfɛ̀ɛ̀ muàŋ biì? 5Mùŋ yaà wo nyùùŋ fɛ̀ɛ̀ ɗòònààkeì. Gè wɔŋ kuùfòòɔ ko sòòfɛ̀ɛ̀ muìŋ jiɛ̀, kpeiŋ kɛ̀ màŋ ɓɛ̀nɛ̀ŋ yɛ̀mɛ̀ dìì tɛ̀ɛ̀ wèè maŋ gè ke kuùfìèɛ ko sòòfɛ̀ɛ̀ wùìya mɔɔ̀ŋ.

6“Ɓɔ̀ mùŋ kiɛ̀ŋ è nɛ̀ɛŋ naŋ sɔ̀ wò Dayà dèè lɛ kòɓɛ̀ àŋ sùùŋ. Esaɓù kɛ̀ àŋ do nàŋ kìlè aum gbùwà ke guùŋ. E kìlà ɓɔ̀ mùŋ gbìàŋ mànɛ̀ŋ kɛnɛ kɛ̀ɛ̀nɛ̀ŋ ɓaàum màŋ kòɓɛ̀ àŋ nyùàŋ, àŋ do miŋ nàŋ sɔ̀pɔ̀sɔ̀pɔ̀ maŋ gòlò.

Dàwè wo Dayà, kàmè wo Dayà, kpulà koɓɛ̀i wo Dayà yaà lɛ

(Luù 11.9-13)

7“Dàweìŋ wo Dayà wèè e nɛ̀ɛŋ nìŋ naŋ kpɛɛ̀ŋ weè niŋ lɛ̀. Sèè nìŋ nyɛnɛŋ tii, wò doiŋ niŋ nàŋ kiɛ̀ŋ. Kàmeìŋ koɓɛ̀i wo Dayà yaà lɛ, nìŋ douŋ nàŋ mɛɛ̀ŋ, kpùlaìŋ wɔŋ gbemgbeeɔ̀ koɓɛ̀i wo Dayà yaà lɛ, wò do wuŋ nàŋ yilè weèiŋ. 8Esaɓù kɛ̀ wo Dayà dò nàŋ kìɛ̀ŋ wo nyùnɔ̀ɔŋ gbiŋ dawàuŋ wèè manɛ̀ŋ wɔ. Wò do nàŋ kìɛ̀ŋ manɛ̀ŋ koɓɛ̀ wo nyùnɔ̀ɔŋ gbiŋ kamàŋ mìŋ wɔ, e kìlà wò do nàŋ yìlè wɔŋ gbemgbeeɔ̀ wèè wo nyùnɔ̀ɔŋ yɛ̀mɛ̀ manɛ̀ŋ maŋ wò zoolà weè miŋ màŋ. 9Nyɛ̀iŋ nààŋ felaa kòmaŋ nyɛɛ̀ŋ bà gbiŋ ɓɛ̀nɛ̀ŋ kìɛ̀ŋ wo jɔ̀àfelaa mɔɔ̀ŋ ke dùò sèè wò dawàùm wèè ke gbɔ̀u? 10Ɔ̀ɔ̀ màŋ ɓɛ̀nɛ̀ŋ kìɛ̀ŋ wo jɔ̀àfelaa mɔɔ̀ŋ wo kaì sèè wò dawàùm wèè wo kɛì? 11Jòòpɛɛ nìŋ kuwa maŋ kpèè naanààŋ, kɛɛ nàŋ nyìmàŋ e ɗèwè manɛ̀ŋ kɛnɛ kìɛ̀ŋ koɓɛ̀ aŋ jɔ̀àiŋ nyàŋ. Dièsɔa nìŋ naŋ ɓɛ̀nɛ̀ŋ gòngo kɛ̀ wo Dèdaiŋ nɔɔ̀ŋ ko àìjɛnɛ̀ŋ wo naàŋ kìɛ̀ŋ mànɛ̀ŋ kɛnɛ kòɓɛ̀ ànyùùŋ nyaŋ dawàuŋ nyaŋ?

12“Tùwoìŋ tɛ̀ɛ̀ koɓɛ̀ anyuùŋ kpùuŋ dàwiiŋ nyàŋ màànààŋ nìŋ manaŋ wèè aiŋ tuwò lɛ. Tɛɛ̀ nàŋ yaà e fàsàì maŋ Sàwà Dayà maŋ yaà e yèɛ aŋ wɛ̀ijì nyaŋ naŋ wa kaà lɛ.

Ke dòmaàŋ koɓɛ̀ wɔŋ nyiiŋ gèeɔ̀ naŋ suulìì

(Luù 13.24)

13“Jɔ̀ɔ̀yɛìŋ ke dòmàŋ gbàngì suulìɛ niŋ jɔ̀à. Esaɓù kɛ̀ ke dòmaàŋ kɔ̀à koɓɛ̀ wɔŋ gbàngì jàhamaàŋ yɛ naŋ dɛ̀ɛ̀ fàà e kìlà ke gò nyìngà kàaiŋ. Anyuùŋ zimgbe jɔɔyɛ̀ wɔŋ gbàngì ke dòmaŋ gbee bì sùà. 14Kɛɛ ke dòmaàŋ kɔ̀à koɓɛ̀ wɔŋ gbàngì wɔŋ nyiiŋ gèe gò jùàa yɛ̀ naŋ suulìì yèè kè naŋ nyìngè kàaiŋ. Anyuùŋ kpàka nɔŋ nàŋ yɛmɛ̀ nyìŋ.

Wo Jisɛ̀ naŋ kìɛ̀ŋ e go nyaàiŋ dè aŋ wɛ̀ijì tòa

(Luù 6.43, 44)

15“Yɛ̀mɛìŋ nyiŋ bi diɛŋ wèè aŋ wɛ̀ijì tòa nyàŋ. Àŋ hnàŋ yèè mùŋ yɛmɛ̀ nyìŋ ke fòolàa àŋ naŋ kpàà maŋ fɛ̀ì ɓaawaa sùà, kɛɛ tɔɔɓaa maŋ jii nyiŋ màŋ sùà àŋ yaà mààŋ aŋ yilì kùùno nyàŋ àŋ nyaaŋ nyààŋ aŋ pɔ̀ɔ̀wɛ̀i.#7.15 Aŋ pɔ̀ɔ̀wɛ̀i àŋ yaà aŋ yilì kùùno aŋ yè nyaŋ kuwo aŋ tɔɔ yèè aŋ ɓaawaa aŋ nyiŋ gbìlà. 16Nìŋ do nyiŋ nàŋ nyìmè e yìwìà maŋ keì kààìŋ kii nyiŋ màŋ. E ɓìè maŋ dɛiŋ fè kòmàŋ màŋ gbɛ̀mɛ̀ɛ̀ŋ ɔ̀ɔ̀ màŋ kuù kòmàŋ maŋ àŋ nyaaŋ feè kòmàŋ maŋ. 17Ke kuù bɔ̀u nàŋ komo ke kuù kòmàŋ siaŋ, kɛɛ ke kuù naanààŋ nàŋ komo ke kuù kòmàŋ naanààŋ. 18Ke kuù bɔ̀u fè kòmàŋ kè kuù kòmàŋ naanààŋ, e kìlà ke kuù naanààŋ fè kòmàŋ kè kuù kòmàŋ siaŋ. 19Ke kùù gbiŋ ke yèɛ komo maŋ kuù kòmàŋ naanààŋ maŋ, dò nàŋ nɔ̀ŋ kɔ̀àa nyiŋ yèè aŋ nyiŋ gbìàŋ ko hmɔ̀ɔ̀ŋ. 20E ɗèwè guùŋ nɛ nɔŋ nìŋ do nàŋ jàà jii e nɛ̀ɛŋ maŋ kùù komo lɛ̀, yɛi nɔŋ nìŋ do nàŋ nyìmè aŋ wɛ̀ijì tòa nyàŋ e yìwìà maŋ keì kààìŋ kii nyiŋ màŋ sùà.

Wo Jisɛ̀ naŋ wòò anyùùŋ bà wààŋ miŋ nyimààìŋ

(Luù 13.25-27)

21“Anyùùŋ nyaŋ gbiŋ nyààìm ‘Kanaà, Kanaà’ nyaŋ, nààŋ naàŋ kɔ̀ è Kànà àìjɛnɛ̀ɛŋ sùà, sɔɔ̀ nɔŋ aŋ yè nyaŋ do nàŋ nyɛ̀nɛ̀ŋ e yèɛ wo Dèda miɔ̀ŋ ko àìjɛnɛ̀ŋ manaŋ wèè aŋ nyɛ̀nɛ̀ŋ lɛ. 22Sèè ke ɗɔɔɛ̀ haì wa nàwèè wèè wo Dayà wo gbàì anyùùŋ nyaŋ gbiŋ, aŋ zimgbe nyiŋ doim nàŋ woò nyààŋ, ‘Kanaà, Kanaà! Àŋ do nàŋ woò nyààŋ è naiŋ wa gbòò ke mìè Dayàa e deè mɔ̀ɛ̀ diɛŋ, e kìlà è naiŋ gè aŋ jinàŋ naanààŋ anyùùŋ maŋjɛ̀wɛ, yèè è naiŋ nyɛ̀nɛ̀ŋ maŋ kèè mèè zimgbe.’ 23Kɛɛ mìŋ do nyiŋ nàŋ woò mìàŋ, ‘Miŋ nyimààìŋ yèè niŋ fè wa ànyunùim! Yèwa nìim feìŋ, nyɛ̀iŋ nààŋ nyuùŋ nyɛ̀nɛ̀ŋ keì naanààŋ nyɛɛ̀ŋ.’

Anyuùŋ nyɛ̀lɛ̀ maŋ sààŋ ɗì tìyèe nyàŋ

(Luù 6.47-49)

24“Weètii wo nyùnɔ̀ɔŋ gbiŋ komo maŋ miè gbìaim mɛɛ̀ŋ e kìlà wo miŋ jɔ̀ɔ̀lɔ̀ dìì wɔ, wò yaà mààŋ wo nyuùŋ kɛ̀ɛ̀jii wò yèɔ naŋ nyɛ̀lɛ̀ ke saauŋ nɛɛ̀ŋ wɔŋ duò tàà gbee diɛŋ. 25Maŋ gɔ̀àà maŋ naŋ sɔ̀ɔ̀, maŋ wùìyè maŋ jòwà, wɔŋ dùfòì gbee naŋ mààŋ wɔŋ ɓùlà ke saaàŋ. Kɛɛ ke gò wa sɔ̀àà esaɓù kɛ̀ wò naŋ wa tɔ̀ɔ̀tù ke saauŋ nɛɛ̀ŋ nyɛ̀lɛ wɔŋ duò tàà diɛŋ.

26“Kɛɛ wo nyùnɔ̀ɔŋ gbiŋ naŋ kòmò maŋ miè gbìaim mɛɛ̀ŋ yèè wò naŋ gè maŋhɛɛ wèè wo miŋ jɔ̀ɔ̀lɔ̀ dìì wɔ, wò yaà mààŋ wo nyuùŋ gò kɛ̀ɛ̀nɛ̀ŋ jiikɛ̀ɛɔ̀ wò yèɔ naŋ nyɛ̀lɛ̀ ke saauŋ nɛɛ̀ŋ e heiyɛɛ̀ sùà wɔ. 27Maŋ gɔ̀àà maŋ naŋ sɔ̀ɔ̀, maŋ wùìyè maŋ jòwà, wɔŋ dùfòì gbee naŋ mààŋ wɔŋ ɓùlà ke saaàŋ. Eɓìèmàŋjɛ̀wɛ̀, ke saaàŋ naŋ gɔɛɛ ke sɔ̀àà dìì fukpù.”

Wo Jisɛ̀ naŋ kaà e gaàŋ gbee sùà

28Nààŋ wo Jisɛ̀ naŋ wa kpɛ̀ɛ̀yɛ̀ maŋ keì mɛɛ̀ŋ wòo, e kàa kiiuŋ nɛ̀ naŋ wa fòònò anyùùŋ nyaŋ. 29Wò naŋ nyiŋ wa kaà mààŋ wo nyuùŋ kùwìè e gààŋ. E kàauŋ nɛ̀ gò wa tèènè è kàà àŋ kààmɔ̀ɔ̀ŋ màŋ Sàwà Dayà nyaŋ bà.

Currently Selected:

Maafiù 7: WFESD

Highlight

Copy