Luù 5

Wo Jisɛ̀ naŋ nyààŋ wo nyùùŋ màŋjɛ̀wɛ̀ jiɛ̀jiɛ̀ɔ

(Maafiù 4.18-22; Mài 1.16-20)

1Ke ɗɔ̀ɔ̀ guùŋ wo Jisɛ̀ sia wa e tiwi feìŋ nɛ wɔŋ juwoɔ̀ kɔɔ ko Gɛ̀nɛ̀nsalɛ̀, nààŋ anyùùŋ nyaŋ yaà wa kɔ̀ɔ̀yɛ̀ ko nɛ̀ɛ̀uŋ niìŋ wèè aŋ kòmàŋ ke mìè gbìàŋ Dayàa. 2Wò naŋ wa yɛ̀mɛ̀ maŋ gɔ̀ tìyèe màŋ jaa e wùìyèɛ diɛŋ e gbɛ̀ɛ̀ e tiwi feìŋ nɛ. Kɛɛ anyuùŋ sùnga nyàŋ àŋ miŋ wa naàŋ fòlà sùà wèè aŋ gùà maŋ kpee nyiŋ màŋ. 3Wo Jisɛ̀ naŋ wa sɛ̀ɛ̀ wɔŋ gɔɔ̀ bà guùŋ sùà, wɔŋ yèɔ wo Saimɔ̀ŋ kanaŋ wa wɔ̀ŋ, yèè wo Jisɛ̀ nauŋ dawè wèè wo dulò wuŋ tòloò wɔŋ yèwà e tiwi feìŋ nɛ. Wo Jisɛ̀ naŋ jòwò wɔŋ gɔɔ̀ sùà wo jɛi wèè wo kaà anyùùŋ nyaŋ.

4Nààŋ wo Jisɛ̀ naŋ kpɛ̀ɛ̀yɛ̀ gbòà koɓɛ̀ anyùùŋ nyaŋ, wò naŋ wòò wo Saimɔ̀ŋ wààŋ, “Dùlò wɔŋ gɔɔ̀ fauŋ e wùìyèɛ diɛŋ nyɛ̀iŋ nààŋ dàwium nyàŋ niŋ gbìào maŋ kpeeiŋ màŋ wèè niŋ kùwà aŋ kɛ̀ì.”

5Wo Saimɔ̀ŋ naŋ fasàì wààŋ, “Kààmɔɔŋ, è naiŋ nàaŋ tomo wɔŋ dùmɔ̀ɔŋ gbiŋ, e gòiŋ nàaŋ kùwà è nɛ̀ŋ gbiŋ. Kɛɛ sèè mùŋ woà yɛi, mìŋ doo nàŋ gbìɛ̀ŋ maŋ kpee màŋ.” 6Nààŋ àŋ nao gbìɛ̀ŋ maŋ kpee màŋ, àŋ naŋ wa kùwò aŋ kɛì zimgbe e nyɛ̀nɛ̀ŋ maŋ kpee màŋ joo tòloò wèè maŋ kɛtɛ kɛ̀tɛ̀. 7Kpeiŋ àŋ naŋ nyààŋ anyuùŋ sùnga dàwi nyiŋ nyàŋ e yìwìà je nyiŋ gɔɔ̀ sùà wèè aŋ hnàŋ aŋ kpuumàŋ nyiŋ. Aŋ felaa nyàŋ naŋ hnè yèè nyiŋ gbiŋ naŋ gɔ̀ɛ̀ɛ̀ maŋ kpee màŋ aŋ kùwà aŋ kɛ̀ì aŋ dììyà maŋ gɔ màŋ, e joo tòloò wèè maŋ gɔ màŋ maŋ hɔ̀wɛ. 8Nààŋ wo Saimɔ̀ŋ Piilɛ̀ naŋ yɛ̀mɛ̀ aŋ kɛ̀ì nyaŋ, wò naŋ dè maŋ gɛ̀ɛ̀nùuŋ màŋ dìì wo Jisɛ̀ fɛɛ̀feìŋ yèè wò naŋ woò wààŋ, “Kanaà, ɓɔ̀ mùŋ gbɛ̀ɛ̀im, esaɓù kɛ̀ mìŋ yaà wo nyùùŋ maŋ jùumù.”

9È naŋ wa fòònò wo Pììlɛ yaà anyuùŋ sùnga dàwiuŋ nyàŋ e nyaàiŋ dè aŋ kɛ̀ì zimgbe nyàŋ àŋ naŋ wa kùwò nyaŋ. 10È naŋ wa ɓɛìŋ fòònò wo Jìiiŋ yaà wo Jɔ̀ɔŋ, aŋ jɔ̀àfèlàà Zɛɓɛdiì nyaŋ. Nyiŋ nàŋ yaà wa anyùùŋ tòmò dàwì Saimɔ̀ŋ nyaŋ. Kɛɛ wo Jisɛ̀ naŋ wòò wo Saimɔ̀ŋ wààŋ, “E jùù ɓɔ̀ è nyɛ̀nɛ̀iŋ, e yìwìà nàaŋ nìŋ do nàŋ hìɛ̀ŋ anyùùŋ koɓɛ̀ Dayài.” 11Àŋ naŋ gɔ̀ɛ̀ɛ̀ maŋ gɔ màŋ ko tiwiì, yèè àŋ naŋ jòò manɛ̀ŋ nyiŋ màŋ gbiŋ aŋ dè Jisɛ̀ maŋjɛ̀wɛ.

Wo Jisɛ̀ naŋ sùngò wo felaa bà

(Maafiù 8.1-4; Mài 1.40-45)

12Wo Jisɛ̀ naŋ wa hnè ko jawa bà wɔŋ fùɔ̀ŋ Galaliìɔ sùà, ko yèi wò naŋ wa mɛ̀ɛ̀ŋ wo felaa kùwìè e sààŋ mankùnù naanààŋ bà. Nààŋ wo felaaà naŋ wa yɛ̀mɛ̀ Jisɛ̀, wò naŋ gbùwò wɔŋ dewàuŋ nɔɔ̀ŋ dììnaŋ wo Jisɛ̀ fɛɛ̀feìŋ, yèè wò nauŋ pɔwɔ̀ wààŋ, “Dàa, kɔ̀nɛɛ̀ŋ sungàim, esaɓù kà nyìmàŋ kɛ̀ màim ɓɛ̀nɛ̀ŋ sùnga ka zɛ̀nɛ̀ŋ sèè mùŋ mɔnɔŋ.”

13Wo Jisɛ̀ naŋ vùlɔ̀ŋ wɔŋ kuàuŋ nɔɔ̀ŋ wò naŋ mɛ̀nlɛ̀ɛ̀ŋ wo felaaà wò nauŋ woò wààŋ, “Mìŋ manaŋ. Joyà muŋ zɛ̀nɛ̀ŋ!” Ko fɛɛ̀feìŋ, e sààŋ maŋkùnùɛ naŋ jùò wo felaaà e kɔɔ sùà. 14Wo Jisɛ̀ naŋ wòò wo felaaà wààŋ, “Ɓɔ̀ mùŋ woò wò nyùùŋ bà gbiŋ è keì lɛɛ̀ fiò. Kɛɛ jiɛ̀, kɔ̀à muŋ tɔɔ̀ muàŋ bi koɓɛ̀ wo sìèfèìŋ zòòloɔ̀ ko Jùlusɛ̀làm wo yɛmɛ yɛ̀mɛ̀ùm tɛ̀ɛ̀ wèè wo nyìmàŋ kɛ̀ e sààŋ maŋkùnùɛ èum jùà e kɔɔ sùà. Kpeiŋ wò do nàŋ kìɛ̀ŋ ke mìè seì koɓɛ̀ anyùùŋ fuɔŋ nyàŋ, kɛ̀ àŋ nyìmàŋ kɛ̀ e sààŋ maŋkùnùɛ èum jùà e kɔɔ sùà janyai. Tɛɛ̀ dò nàŋ nyɛ̀nɛ̀ŋ nyɛ̀iŋ nyiŋ naŋ ɓɛìŋ tòòmò koɓɛ̀ guùŋ. Kpeiŋ kɔ̀à muŋ kiɛ̀ŋ e nɛ̀ŋ saaà koɓɛ̀ wo sìèfèìŋ zòòloɔ̀ e yèɛ wo Mòòze naŋ wa wòò kii niŋ lɛ̀ wèè e tɔɔ̀ kɛ̀ wo Dayà wòum joeyè.”

15Ebò Jisɛ̀ɛ naŋ wa ɓɛìŋ ɓaayè, yèè anyuùŋ zimgbe naŋ hnè ko nɛ̀ɛ̀uŋ niìŋ wèè auŋ kumiàŋ e kìlà wo sùngà maŋ sàaŋ nyiŋ màŋ. 16Kɛɛ e teenga gbiŋ wò folo anyùùŋ nyaŋ e tɛɛ wo kà koɓɛ̀ bà su wèè wo zoolò.

Wo Jisɛ̀ naŋ sùngò wo felaa kpɔ̀ɔ̀kpɔɔ

(Maafiù 9.1-8; Mài 2.1-12)

17Ke ɗɔ̀ɔ̀ guùŋ nààŋ wo Jisɛ̀ yaà wa kàa sùà anyùùŋ nyaŋ, aŋ Fɛlosiì nyaŋ yaà aŋ kààmɔ̀ɔ̀ŋ maŋ Sàwà Dayà nyaŋ bà nyiŋ jaao wa. Àŋ naŋ wa yèwè maŋ jawa màŋ gbiŋ sùà wɔŋ fùɔ̀ŋ Galaliìɔ yèè wɔŋ fùɔ̀ŋ Jùdiàa sùà yèè ko Jùlusɛ̀làm. E gààŋ wo Kanaà Dayà yaà wa wo Jisɛ̀ ko diɛŋ wèè wo wa jòèyè anyuùŋ sàaŋ nyàŋ. 18Anyùùŋ bà naŋ wa hnè, àŋ naŋ hìɛ̀ŋ wo felaa kpɔ̀ɔ̀kpɔɔ bà wò hawa wɔŋ gbùmaŋ sùà. Àŋ manaŋ wa wèè auŋ jɔ̀ɔ̀yɛ̀ ko saaìŋ auŋ hàà wo Jisɛ̀ fɛɛ̀feìŋ. 19Kɛɛ esàɓù e faaàŋ, aŋ gò wa yɛ̀mɛ̀ ɗewe wèè aŋ jɔ̀ɔ̀yɛ̀ wò felaaà kò saaìŋ. Kpeiŋ àŋ naŋ jòwò ke saaàŋ dìmɛ̀ yèè àŋ nao gè maŋ ɓàmu màŋ bà e tèèngà koɓɛ̀i wo Jisɛ̀ sia wa lɛ̀. Àŋ nao wa nyɛ̀nɛ̀ŋ e jewì gbee, yèè àŋ naŋ dìkìè wɔŋ gbùmauŋ nɔɔ̀ŋ e jèì aaŋ kɔ̀ɔ̀yɛ̀ wo felaaà auŋ deeyè anyùùŋ nyaŋ tɛɛ wo Jisɛ̀ fɛ̀ɛ̀fèìŋ. 20Nààŋ wo Jisɛ̀ naŋ yɛmɛ̀ kɛ̀ àŋ kuwa wa e hààweɛ̀ kɛ̀ wò ɓɛ̀nɛ̀ŋ jòèyè wo felaaà, wò nàŋ wòò felaaà wààŋ, “Dàwi miɔ̀ŋ, kà jùùyà maŋ jùumùum màŋ hakɛ̀.”

21Aŋ kààmɔ̀ɔ̀ŋ maŋ Sàwà Dayà nyaŋ yaà Fɛlosiì nyaŋ naŋ tɔ̀ɔ̀tù wòò nyiŋ bi e fèemàŋ nyààŋ, “Ɓòò wo felaa wɛɛ̀ naŋ gongò kɛ̀ wò yaà, wò yaà tii woo? Wò yaà gbùùyè maŋ mìè ɓɛ̀ɛ̀pɔ̀ɔ koɓɛ̀ Dayài. Wo Dayà wuŋ guùŋ nɔŋ nàŋ juuyà maŋ jùumù hakɛ̀.”

22Wo Jisɛ̀ nyìmàŋ kɛ̀ kiìŋ àŋ yaà wa goongo maŋ jii nyiŋ màŋ sùà. Kpeiŋ wò naŋ nyiŋ woò wààŋ, “Wèè kiìŋ nìŋ gongà maŋ keì mààŋ mɛɛ̀ŋ maŋ jiiŋ màŋ sùà e nyaàiŋ dè e nɛ̀ɛŋ mìŋ naŋ woò lɛ? 23E naàŋ nɔ̀ŋ è keì nyìnga, wèè wo nyùùŋ bà wo wòò wo felaa wɛɛ̀ wààŋ, ‘Kà jùùyà maŋ jùumùum màŋ hakɛ̀. Esaɓù kɛ̀ wo nyùùŋ bà gbiŋ fè ɓɛ̀nɛ̀ŋ yɛ̀mɛ kɛ̀ tɔɔɓaa maŋ jùumùuŋ màŋ nɔ̀ŋ hakɛ̀ jùùya miŋ ɔ̀ɔ̀ maŋ gò nɔ̀ŋ hakɛ̀ jùùya miŋ. Kɛɛ wo nyùùŋ gbiŋ fòuŋ ɓɛ̀nɛ̀ŋ wòo wààŋ, yewà dìì muŋ ka, sɔɔ̀ wo nyùùŋ wii wo kɛ̀ɛ̀nɛ̀ŋ e gààaŋ wèè wouŋ sùngà.’ 24Mìŋ doiŋ nàŋ nyɛ̀nɛ̀ŋ naŋ nyìmàŋ kɛ̀ miàŋ, wo Jɔ̀àfèlàà Nyuùŋ Kpùnɔɔ̀ŋ kuwa gààŋ e ɗuunyaŋ lɛɛ̀ diɛŋ wèè ka jùùyà maŋ jùumù hakɛ̀.” Kpeiŋ wò naŋ wòò wo felaa kpɔ̀ɔ̀kpɔɔɔ̀ wààŋ, “Yewà dìì, muŋ ɓemè wɔŋ gbùmaŋ mɔɔ̀ŋ, muŋ ka ko gboo moo!”

25Ko fɛ̀ɛ̀fèìŋ aŋ gbiŋ, wo felaaà naŋ yèwè dìì, wo ɓèmè wɔŋ gbùmauŋ nɔɔ̀ŋ wò hawa weè sùà lɛ, wo kà ko gboouŋ noo, wò yaà tɛ̀nɛŋ sùà wo Dayà. 26Tɛɛ̀ naŋ wa fòònò anyùùŋ nyaŋ gbiŋ. E jùù naŋ nyiŋ nyɛ̀nɛ̀ŋ, àŋ naŋ tɛ̀nɛ̀ŋ wo Dayà àŋ yaà woo nyààŋ, “Kiìŋ è kèè mèè gbee è naiŋ yaà nàaŋ yɛmɛ̀ lɛ!”

Wo Jisɛ̀ naŋ nyààŋ Liivaà

(Maafiù 9.9-13; Mài 2.13-17)

27Eɓìèmàŋjɛ̀wɛ̀ tɛɛ̀ wo Jisɛ̀ naŋ yèwè ko jawa wii wò yaà kɔɔyɛ, yèè wò naŋ yɛ̀mɛ̀ wo nyuùŋ kùwà nɛ̀ɛ̀nɛ̀ŋ fuɔɔ̀ŋ àŋ nyaaŋ Liivaà wɔ, wò jaa ko saaŋ kùwìà nɛ̀ɛ̀nɛ̀ŋ fuɔɔ̀ŋ. Wo Jisɛ̀ nauŋ woò wààŋ, “Dèim maŋjɛ̀wɛ.” 28Wo Liivaà naŋ yèwè dìì, wo jòà e tòmouŋ nɛ̀, yèè wò naŋ dè Jisɛ̀ maŋjɛ̀wɛ.

29Eɓìèmàŋjɛ̀wɛ̀ tii, wo Liivaà naŋ wa kɛ̀ɛ̀nɛ̀ŋ wɔŋ ɗaa gèe gbee ko gboouŋ noo wèè wo Jisɛ̀ yaà anyùùŋ màŋjɛ̀wɛ̀uŋ nyàŋ. Nyiŋ, e hààwè anyuùŋ kùwà nɛ̀ɛ̀nɛ̀ŋ fuɔŋ nyàŋ zimgbe nyiŋ yaào wa e kpùlìà aŋ nyùùnèènyɛiŋ joo bà, yaà wa jììyè nɛ̀ŋ koɓɛ̀ guùŋ. 30Aŋ kààmɔ̀ɔ̀ŋ maŋ Sàwà Dayà nyaŋ bà nyiŋ ke gbòò aŋ Fɛlosiì nyaŋ sùà, naŋ tɛɛ̀ yɛmɛ̀, yèè àŋ naŋ dàwè anyùùŋ màŋjɛ̀wɛ̀uŋ nyàŋ nyààŋ, “Wèè kiìŋ nyɛ̀iŋ nààŋ anyuùŋ kùwà nɛ̀ɛ̀nɛ̀ŋ fuɔŋ nyàŋ yaà anyùùŋ maŋ kpèè naanààŋ nyaŋ jiiyà nɛ̀ŋje koɓɛ̀ guùŋ?”

31Wo Jisɛ̀ naŋ nyiŋ woò wààŋ, “Anyuùŋ ɓòù nyaŋ fè kàmè wò zòòlègòò, sɔɔ̀ nɔŋ anyuùŋ sàaŋ nyàŋ. 32Miŋ gò hnàŋ wèè ka nyààŋ ànyùùŋ tɔ̀ɔ̀nyaàŋ nyaŋ wèè aŋ fè màŋ tùwo naanààŋ nyiŋ màŋ jɛwɛ. Mìŋ naŋ hnè wèè ka nyààŋ anyùùŋ maŋ jùumù nyaŋ.”

Anyùùŋ bà naŋ dàwè wo Jisɛ̀ e nyaàiŋ dè ke tɔùŋ kùwa

(Maafiù 9.14-17; Mài 2.18-22)

33Anyùùŋ bà naŋ dàwè wo Jisɛ̀ nyààŋ, “Wèè kiìŋ anyùùŋ màŋjɛ̀wɛ̀ Jɔ̀ɔŋ Gùà Nyùnɔ̀ɔŋ e kpùlìà anyùùŋ màŋjɛ̀wɛ̀ aŋ Fɛlosiì nyaŋ kuwo ke tɔùŋ e kìlà àŋ zoolà e teenga gbiŋ, kɛɛ aŋ jeum nyàŋ nɔ̀ŋ jììyè nɛ̀ŋje yèè àŋ tiye?”

34Wo Jisɛ̀ naŋ nyiŋ woò wààŋ, “Nìŋ yaà goongo kɛ̀ nàŋ ɓɛ̀nɛ̀ŋ nyɛ̀nɛ̀ŋ aŋ nyùùnèènyɛiŋ nyàŋ wɔŋ ɗàà gè ke yɛɛ̀ gbìaàŋ sùà aŋ kùwà ke tɔùŋ e teengaà wo kɛ̀ɛ̀nɛ̀ŋ jɔnɔ̀ɔŋ yàa nyìŋ e tɛɛ ko sààŋ yɛɛ̀ gbìaìŋ lɛ? Kpele, niŋ fè tii nyɛ̀nɛ̀ŋ! 35Kɛɛ e teenga do nàŋ hnè aŋ nyiŋ gè wo kɛ̀ɛ̀nɛ̀ŋ jɔnɔ̀ɔŋ e tɛɛ, ke ɗɔɔ bi diɛŋ àŋ do nàŋ kùwò ke tɔùŋ.”

36Wo Jisɛ̀ naŋ nyiŋ wòò ke kàɓanè yɛɛ̀ wààŋ, “Wo nyùùŋ gbiŋ fè ɓèmè wɔ̀ŋ deè fàà jɛ̀ì wèè wo gbùwà è jèwì wɔ̀ŋ deè gɔu wɔ̀ŋ lomò. Sèè wò nyɛnɛŋ tii, wɔŋ deè fàà jɛ̀ì wiiŋ do nàŋ sɛ̀ɛ̀ wɔŋ deè gɔuɔ̀ wɔŋ tòòyà e jèwìɛ e nɔ̀ŋ gbee, e kìlà wɔŋ deè fàà jɛ̀ìɔ naàŋ tɛ̀ɛ̀wɛ̀ wɔ̀ŋ deè gɔuɔ̀. 37E kìlà wo nyùùŋ fè sìà màŋ juumuaŋ jɛi wɔ̀ŋ ɓuù bàànè fɛ̀ì yilì gɔu sùà. Sèè wò nyɛnɛŋ tii, maŋ juumuaŋ màŋ do nàŋ sɛ̀kɛ̀ wɔŋ ɓuù bàànè fɛ̀ì yilì gɔuɔ̀, kɛ̀ maŋ juumuaŋ màŋ e kpùlìà wɔŋ ɓuù bàànè fɛ̀ì yilìɔ pɔɔpɔ̀ɔ̀. 38Sèè è nɔ̀ŋ yɛi, sià maŋ juumuaŋ jɛi wɔŋ ɓuù bàànè fɛ̀ì yilì jɛ̀ì sùà! 39Yèè wo nyùùŋ gbiŋ naàŋ mɔ̀nɔ̀ŋ màŋ juumuaŋ jɛi sèè wò tie maŋ gɔu màŋ. Wò do nàŋ woò wààŋ, ‘Maŋ juumuaŋ gɔu màŋ yaà tɛ̀ɛ̀.’ ”

Currently Selected:

Luù 5: WFESD

Highlight

Copy