Jɔ̀ɔŋ 6

Wo Jisɛ̀ naŋ gɔ̀ɔ̀yɛ̀ anyuùŋ tààsùùŋ nɔɔnɔŋ

(Maafiù 14.13-21; Mài 6.30-44; Luù 9.10-17)

1Eɓìèmàŋjɛ̀wɛ̀ tɛɛ̀, wo Jisɛ̀ naŋ ɓèmè anyùùŋ màŋjɛ̀wɛ̀uŋ nyàŋ yèè àŋ naŋ nìè wɔŋ juwoɔ̀ wɔŋ fùɔ̀ŋ Galaliìɔ, wɔŋ yèɔ àŋ nyaaŋ ɓɛìŋ wɔŋ Jùwò Tàbiliàa. 2Anyuùŋ zimgbe naŋ wa dè wo Jisɛ̀ maŋjɛ̀wɛ nààŋ àŋ naŋ wa yɛ̀mɛ̀ maŋ kèè mèè maŋ wò naŋ wa nyɛ̀nɛ̀ŋ maŋ nààŋ wò naŋ wa jòèyè anyuùŋ sàaŋ nyàŋ. 3Wo Jisɛ̀ yaà anyùùŋ màŋjɛ̀wɛ̀uŋ nyàŋ naŋ jòwò wɔŋ toò bà dìmɛ̀ yèè àŋ naŋ jɛ̀ì koɓɛ̀ guùŋ. 4E teengaà wèè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ, wɔŋ ɗàà gè aŋ Juùù nyaŋ wa naàŋ gbɛ̀ɛ̀. 5Wo Jisɛ̀ naŋ gè e fɛ̀ɛ̀ dìì yèè wò naŋ yɛ̀mɛ̀ anyuùŋ zimgbe yaà hìnìè ko nɛ̀ɛ̀uŋ niìŋ, wò naŋ dàwè wo Felè wààŋ, “Kòò è naiŋ ɓɛ̀nɛ̀ŋ kàa wèè e dènàŋ e nɛ̀ŋje sɛmɛ wèè anyùùŋ nyɛɛ̀ŋ gbiŋ aŋ jè?” 6Wo Jisɛ̀ nauŋ wa tɛɛ̀ dawè wèè wo kòmàŋ kɛ̀ kiɛ̀ŋ wo Felè kuwa wa wèè wo woò. Kɛɛ wo Jisɛ̀ wuŋ bi wò wa nyìmàŋ kɛ̀ kiɛ̀ŋ wò do wa nàŋ nyɛ̀nɛ̀ŋ.

7Wo Felè naŋ fasàì wààŋ, “Wèè anyùùŋ nyɛɛ̀ŋ bà guùŋ pɛɛ wo yɛ̀mɛ̀ e nɛ̀ŋje jɔa tòloò wèè euŋ kpɛ̀lɛ̀ sùà, sɔɔ̀ eiŋ mààŋ e nɛɛnɛŋ esɔ̀ngɔ̀ e nɛ̀ɛ̀nɛ̀ŋ wɔŋ dòà guùŋ wèè eiŋ dènàŋ e nɛ̀ŋje wèè anyùùŋ nyɛɛ̀ŋ gbiŋ.”

8Wo Anɗù, wo wùìyà Saimɔŋ Piilɛ̀ɔ wo yèɔ yaà wa wo nyùùŋ màŋjɛ̀wɛ̀ Jisɛ̀ɔ bà guùŋ wɔ naŋ woò wààŋ, 9“Wo felaajɔa bà kòò wò yaà kià wò kuwa maŋ gbɔ̀ù fàà nɔɔnɔŋ e yèɛ àŋ bàànè diidàà yaà aŋ kɛ̀ì tìyèe. Kɛɛ e gò gàŋ wèè ànyùùŋ nyɛɛ̀ŋ gbiŋ.”

10Yèè wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Kɔ̀à nyɛ̀nɛìŋ anyùùŋ nyaŋ aŋ jɛi maŋ gbòò sùà.” Kɛɛ maŋ dɛɛ ɓou yaà wa koɓɛ̀ bi. Aŋ felaa nyàŋ yaà wa esɔ̀ngɔ̀ tààsùùŋ nɔɔnɔŋ (5,000). 11Kpeiŋ wo Jisɛ̀ naŋ ɓèmè e gbɔ̀ù nɔɔnɔɛ̀ŋ yaà aŋ kɛ̀ì tìyèe nyàŋ, yèè wò naŋ yɛ̀mɛ̀ kofùiŋ wò naŋ gè wo Dayà esɛ̀. Wò naŋ nyìmè nyìmè e gbɔ̀uɛ̀ yèè wò naŋ niŋ kìɛ̀ŋ anyùùŋ màŋjɛ̀wɛ̀uŋ nyàŋ wèè aŋ goonò niŋ aŋ nyùùŋ nyaŋ fèemàŋ. Yèè wò naŋ nyiŋ ɓɛìŋ gòònò aŋ kɛ̀ì tìyèe nyàŋ aŋ gbiŋ e tɛɛ. Wo nyùùŋ gbiŋ naŋ wa gbìlè wo dià. 12Nààŋ anyùùŋ nyaŋ naŋ wa gbìlè yèè àŋ naŋ diè, wo Jisɛ̀ naŋ wòò anyùùŋ màŋjɛ̀wɛ̀uŋ nyàŋ wààŋ, “Gbònògbonòìŋ e nɛ̀ŋje gbànaàŋ naŋ joo lɛ̀ wèè e go nàŋ pɔɔ̀.” 13Yèè anyùùŋ màŋjɛ̀wɛ̀uŋ nyàŋ naŋ gbònògbònò e gbɔ̀u bàànè diidàà gbànaàŋ naŋ joo lɛ̀ yaà aŋ kɛ̀ì nyaŋ, e dìà maŋ pòùm zììyà jɛ̀wɛ̀ tìyèe.

14Nààŋ anyùùŋ nyaŋ naŋ yɛ̀mɛ̀ e kèè mèè lɛɛ̀ wo Jisɛ̀ naŋ yaà nyɛ̀nɛ̀ŋ lɛ, àŋ naŋ woò nyààŋ, “Tɔɔɓaa wɛɛ̀ nàŋ yaà wo wɛ̀ijìɔ wɔŋ fɛ̀ì Dayàa naŋ wòò kiiuŋ kɛ̀ wò do nàŋ hnè e ɗuunyaàŋ sùà wɔ!” 15Yèè nààŋ wo Jisɛ̀ naŋ wa nyìmè kɛ̀ anyùùŋ nyaŋ manaŋ wa auŋ kùwà maŋ gàaŋ gàaŋ wèè auŋ nyɛ̀nɛ̀ŋ wo kana nyiŋ sèè pɛɛ wò go niŋ wa mànàŋ, wò naŋ nyiŋ wa jòò yèè wò naŋ ɓɛìŋ kɔ̀ wɔŋ toò bà dìmɛ̀, ko yèi wò naŋ wa ɓɛ̀nɛ̀ŋ nɔ̀ŋ wuŋ guùŋ.

Wo Jisɛ̀ naŋ kààìŋ e wùìyèɛ diɛŋ

(Maafiù 14.22-33; Mài 6.45-52)

16Ebɛ̀ŋ wɔŋ duùmfeìŋ wiiŋ, anyùùŋ màŋjɛ̀wɛ̀ Jisɛ̀ nyaŋ naŋ dèyè wɔŋ juwoɔ̀ kɔɔ. 17Anyùùŋ màŋjɛ̀wɛ̀uŋ nyàŋ aŋ sɛ̀ɛ̀ wɔŋ gɔɔ̀ sùà aŋ kà ko feìŋ e tèèngà ko Kepanàùm. Kɛɛ e koya lii wo Jisɛ̀ kòò wò hnè wa weè kò nɛ̀ɛ̀ŋ nyiŋ niìŋ. 18E tèèngà guùŋ bi sùà wɔŋ dùfòì gbee naŋ tɔ̀ɔ̀tù màaŋ wɔŋ nyɛ̀nɛ̀ŋ wɔŋ juwoɔ̀ wɔŋ tɔ̀ɔ̀tù ɓùlònòɓulono sɛmɛ. 19Anyùùŋ màŋjɛ̀wɛ̀ nyaŋ wa naàŋ ka fauŋ wɔŋ juwoɔ̀ tɛɛ, yèè àŋ naŋ yɛ̀mɛ̀ wo Jisɛ̀ wò yaà kààìŋ e wùìyèɛ diɛŋ wò yaà hìnìè e gbɛ̀ɛ̀ wɔŋ gɔɔ̀, yèè e jùù naŋ nyiŋ nyɛ̀nɛ̀ŋ. 20Yèè wo Jisɛ̀ naŋ nyiŋ woò wààŋ, “Miàim wo Jisɛ̀ wo, e jùù ɓɔ̀ è nyɛ̀nɛ̀iŋ!” 21Kɛɛ e teengaà àŋ nauŋ wa ɓeè e kìlà àŋ manaŋ wa wèè wo jòwà wɔŋ gɔɔ̀ sùà lɛ, ko fɛɛ̀feìŋ wɔŋ gɔɔ̀ naŋ hàì e tiwi feìŋ nɛ kùàŋ wùŋ maŋ wuŋ koɓɛ̀i àŋ yaà wa kɔɔyɛ lɛ̀.

Anyùùŋ nyaŋ naŋ wa jè e nɛ̀njeɛ̀ nyaŋ naŋ kàmè wo Jisɛ̀

22Wɔŋ niìsìaà bàa, anyùùŋ nyaŋ naŋ wa jòò wɔŋ je nyiŋ wɔŋ fàa lɛ̀, e yìwìà wɔŋ fàa koɓɛ̀i aŋ gbɛ̀ìŋ Jisɛ̀ yaà wa lɛ̀, wa nyìmàŋ kɛ̀ wɔŋ gɔ̀ jɔ̀à guùŋ nɔŋ àŋ naŋ wa yɛ̀mɛ̀ e wùìyèɛ diɛŋ. Àŋ wa ɓɛìŋ nyìmàŋ kɛ̀ wo Jisɛ̀ gò wa dè ànyùùŋ màŋjɛ̀wɛ̀uŋ nyàŋ màŋjɛ̀wɛ wèè aŋ ka. 23Anyùùŋ bà naŋ wa hìɛ̀ŋ maŋ gɔ e yìwìà ko Tàbilià yèè àŋ naŋ hnè koɓɛ̀i e faaàŋ naŋ wa jè e nɛ̀ŋjeɛ̀ lɛ nààŋ wo Kanaà Jisɛ̀ naŋ wa kìɛ̀ŋ ke sɛ̀ gèe koɓɛ̀ Dayài weè niŋ. 24Àŋ naŋ wa yɛmɛ̀ kɛ̀ wo Jisɛ̀ yaà anyùùŋ màŋjɛ̀wɛ̀uŋ nyàŋ àŋ wa ka. Kpeiŋ àŋ naŋ sɛ̀ɛ̀ maŋ gɔ miiŋ sùà yèè àŋ naŋ kɔ̀ ko kààmè wo Jisɛ̀ ko Kepanàùm.

Wo Jisɛ̀ yaà mààŋ e nɛ̀ŋje e yèɛ kiɛ̀ŋ wɔŋ nyiiŋ

25Anyùùŋ nyaŋ naŋ mɛ̀ɛ̀ŋ wo Jisɛ̀ wɔŋ juwoɔ̀ wɔŋ fàa bàa, yèè àŋ nauŋ dawè nyààŋ, “Kààmɔɔŋ, kiìŋ e teenga mùŋ naŋ kià hnè?”

26Wo Jisɛ̀ naŋ nyiŋ fasàì wààŋ, “Miŋ woòiŋ e tɔɔɓaaà kɛ̀, niŋ fèìm mìò kaame wèè èsàɓù è kèè mèèɛ nìŋ naŋ yɛmɛ̀ lɛ, kɛɛ è yaà wèè esàɓù e nɛ̀ŋjeɛ̀ nìŋ naŋ jìɛ̀ jè yèè nìŋ naŋ diè lɛ. 27Ɓɔ̀ nìŋ tomo wèè è nɛ̀ŋjeɛ̀ do nàŋ pɔɔ̀ lɛ. Tòmoìŋ wèè e nɛ̀ŋjeɛ̀ kiɛ̀ŋ wɔŋ nyiiŋ gèe gò jùàa lɛ̀. Miàim wo Jɔ̀àfèlàà Nyuùŋ Kpùnɔɔ̀ŋ doiŋ nàŋ kìɛ̀ŋ e nɛ̀ŋje lɛɛ̀, esaɓù kɛ̀ wo Dayà wo Dèdaà wòim hàà e fèè e nɛ̀ŋ yìliauŋ nɛ̀ wèè ka niŋ nyɛ̀nɛ̀ŋ.”

28Kpeiŋ àŋ naŋ dàwè wo Jisɛ̀ nyààŋ, “Kiìŋ naŋ yaà maŋ keì maŋ è naiŋ ɓɛ̀nɛ̀ŋ nyɛ̀nɛŋ wèè wo Dayà wo miŋ jàà kùàŋ dìì?”

29Wo Jisɛ̀ naŋ nyiŋ fasàì wààŋ, “Wo Dayà manaŋ maŋ kɛ̀ɛ̀nɛ̀ŋ e hààwe miàim wo yèɔ wò naŋ tùɔ̀ŋ wɔ sùà.”

30Anyùùŋ nyaŋ naŋ fasàì nyààŋ, “Kiìŋ è tɔ̀ɔ̀màŋsèì keì mùŋ do nàŋ tɔɔ̀ wèè e nyɛ̀nɛ̀ŋ e hààwè e yèɛ mùŋ woà lɛ? Kiìŋ è tòmo mùŋ do nàŋ nyɛ̀nɛ̀ŋ? 31E teengaà aŋ nèwàènèwe wi nyàŋ yaà wa ke fòùngà e diì wòaà sùà lɛ, àŋ naŋ wa jè e nɛ̀ŋje bà àŋ nyaaŋ maanàŋ. È yaà sìnga niŋ wɔŋ fɛ̀ì Nɛɛmaàŋ sùà e yèɛ wo nyùùŋ naŋ ɓɛ̀nɛ̀ŋ kpɛ̀nɛŋ, yèè e sìnga bi naŋ woò wààŋ, ‘Wo Dayà naŋ nyiŋ wa kìɛ̀ŋ e nɛ̀ŋje e yìwìà ko àìjɛnɛ̀ŋ wèè aŋ jè.’ ”

32Kpeiŋ wo Jisɛ̀ naŋ nyiŋ woò wààŋ, “Miŋ woòiŋ e tɔɔɓaaà kɛ̀, wo Mòòze nàŋ gòiŋ wa kìɛ̀ŋ è nɛ̀ŋjeɛ̀ e yìwìà kò àìjɛnɛ̀ŋ. Wo Dèda miɔ̀ŋ naiŋ wa kìɛ̀ŋ e nɛ̀ŋje kɛnɛɛ̀ e yìwìà ko àìjɛnɛ̀ŋ. 33Yèè e nɛ̀ŋjeɛ̀ wo Dayà naŋ kiɛ̀ŋ lɛ nàŋ yaà miàŋ wo yèɔ naŋ dèyè e yìwìà ko àìjɛnɛ̀ŋ wɔ wèè ka kìɛ̀ŋ wɔŋ nyiiŋ gèè koɓɛ̀ anyùùŋ nyaŋ e ɗuunyaàŋ.”

34Yèè anyùùŋ nyaŋ naŋ wòò wo Jisɛ̀ nyààŋ, “Dàa, kìɛ̀ŋ wi e nɛ̀ŋje lɛɛ̀ e teenga gbiŋ.”

35Kpeiŋ wo Jisɛ̀ naŋ nyiŋ woò wààŋ, “Mìŋ yaà nɔŋ mààŋ e nɛ̀ŋje e yèɛ kiɛ̀ŋ wɔŋ nyiiŋ lɛ̀. Wo nyùnɔ̀ɔŋ gbiŋ dèìm maŋjɛ̀wɛ yèè wò haawàìm wɔ, e jìyè yèè ke jòòmàì naàuŋ wa nàwèè ɓɛìŋ kùwò. 36Kɛɛ kàiŋ niŋ woò kɛ̀, jòòpɛɛ nàim yɛmɛ̀ kɛɛ kòò niŋ kɛ̀ɛ̀nɛ̀ìm è hààwe kò sùà. 37Wo nyùnɔ̀ɔŋ gbiŋ wo Dèda miɔ̀ŋ doim nàŋ kiɛ̀ŋ wɔ wò do nàŋ nɔ̀ŋ wo nyùùŋ màŋjɛ̀wɛ̀ miɔ̀ŋ bà guùŋ. Miŋ naàŋ gè màŋhɛɛ wèè kauŋ jàà kùàŋ dìì. 38Esaɓù kɛ̀ miŋ gò dèyà è yìwìà kò àìjɛnɛ̀ŋ wèè ka nyɛ̀nɛ̀ŋ è yèɛ mìàŋ bi mìŋ manaŋ lɛ̀, kɛɛ wèè ka nyɛ̀nɛ̀ŋ e yèɛ wo Dayàa naim tùɔ̀ŋ wɔ manaŋ lɛ̀. 39Yèè e yèɛ wo Dayà manaŋ ka nyɛ̀nɛ̀ŋ lɛ tiŋ tɛɛ̀, wèè ka yɛ̀mɛ̀ anyùùŋ nyaŋ gbiŋ wò naim kiɛ̀ŋ nyaŋ diɛŋ wèè kɛ̀ wo bà gbiŋ ɓɔ̀ wò go. E kìlà, wò manaŋ wèè ka nyiŋ gè e fàaà dìì wɔŋ nyiiŋ gèeo sùà ke ɗɔɔ dìàmaàŋ. 40Wo Dèda miɔ̀ŋ manaŋ wèè anyùùŋ nyaŋ gbiŋ aim yɛmɛ̀ miàim wo Jɔ̀àfèlàà Nyuùŋ Kpùnɔɔ̀ŋ aim haawè yèè aŋ kɛ̀ɛ̀nɛ̀ŋ wɔŋ nyiiŋ gèe gò jùà. Yèè mìŋ do nyiŋ nàŋ gè e fàaà dìì wɔŋ nyiiŋ gèeo sùà ke ɗɔɔ dìàmaàŋ.”

41Àŋ Juùù nyaŋ naŋ tɔ̀ɔ̀tù maŋ ɗìòsùà gùlia nààŋ àŋ naŋ kòmò wo Jisɛ̀ naŋ woò wààŋ, “Mìŋ yaà mààŋ e nɛ̀ŋje e yèɛ naŋ dèyè e yìwìà ko àìjɛnɛ̀ŋ.” 42Yèè àŋ naŋ woò nyààŋ, “Wɛɛ̀ nààŋ fè wo Jisɛ̀ wò jɔ̀àfèlàà Jòòsɛɔ̀? Wo dèdauŋ nɔɔ̀ŋ yèè wo yèyeuŋ nɔɔ̀ŋ kòò àŋ yaà kià. Dièsɔa wò naŋ naàŋ ɓɛ̀nɛ̀ŋ wòo wààŋ wò naŋ dèyè e yìwìà ko àìjɛnɛ̀ŋ?”

43Yèè wo Jisɛ̀ naŋ nyiŋ woò wààŋ, “hɔ̀àneìŋ maŋ ɗìòsùà gùlia nyɛ̀iŋ bi e fèemàŋ. 44Wo nyùùŋ gbiŋ fè ɓɛ̀nɛ̀ŋ hnàŋ kò nɛ̀ɛ̀ŋ miìŋ sɔɔ̀ wo Dèdaà naim tùɔ̀ŋ wɔ wo nyiŋ gè nyààŋ diɛŋ wèè aŋ hnàŋ ko nɛ̀ɛ̀ŋ miìŋ. Kɛɛ sèè àŋ hnàŋ, mìŋ do nyiŋ nàŋ gè e fàaà dìì wɔŋ nyiiŋ gèeo sùà ke ɗɔɔ dìàmaàŋ. 45Wo wɛ̀ijìɔ bà guùŋ naŋ wa sìngè wò naŋ woò wààŋ, ‘Wo Dayà do nàŋ kàà anyùùŋ nyaŋ gbiŋ.’ Weètii wo nyùnɔ̀ɔŋ gbiŋ naŋ kòmò yèè wò naŋ gbèè e yèɛ wo Dèdaà naŋ woò lɛ wò do nàŋ hnè ko nɛ̀ɛ̀ŋ miìŋ. 46Wo nyùnɔ̀ɔŋ nɔŋ naŋ yɛ̀mɛ̀ wo Dayà wɔ nàŋ yaà wo yèɔ naŋ yìwìè ko nɛ̀ɛ̀uŋ niìŋ wɔ. Kɛɛ wo nyùùŋ bà gbiŋ kòò wò yɛ̀mɛ̀ wa wò Dèdaà. 47Mìŋ yààìŋ wòò e tɔɔɓaaà kɛ̀, wo nyùnɔ̀ɔŋ kɛɛnɛ̀ìm e hààwe ko sùà wɔ wò do nàŋ kɛ̀ɛ̀nɛ̀ŋ wɔŋ nyiiŋ gèe gò jùà. 48Miàŋ nàŋ yaà e nɛ̀ŋjèɛ kiɛ̀ŋ wɔŋ nyiiŋ gèe lɛ̀. 49Aŋ nèwàènèweiŋ nyàŋ naŋ wa jè e nɛ̀ŋjeɛ̀ àŋ nyaaŋ maanàŋ lɛ ke fòùngà e diì wòa sùà, yèè ko diemeì àŋ naŋ fɔ̀. 50Kɛɛ e nɛ̀ŋjeɛ̀ e yìwìà ko àìjɛnɛ̀ŋ è dèyà, wèè kɛ̀ wo nyùnɔ̀ɔŋ gbiŋ do niŋ nàŋ jè wɔ wo naàŋ wa nàwèè fɔ̀. 51Miàŋ nàŋ yaà e nɛ̀ŋjè wɔŋ nyiiŋ gèeɔ̀ naŋ dèyè e yìwìà ko àìjɛnɛ̀ŋ lɛ. Sèè wo nyùùŋ gbiŋ wò jè e nɛ̀ŋje lɛɛ̀, wò do nàŋ nɔ̀ŋ wɔŋ nyiiŋ gèeɔ̀ sùà wèè julɔfɔ. E nɛ̀ŋje bi zà nàŋ yaà e kenìŋ mɛ̀, e yèɛ mìŋ kiɛ̀ŋ wèè kɛ̀ anyùùŋ nyaŋ gbiŋ e ɗuunyaàŋ aŋ nɔ̀ŋ wɔŋ nyiiŋ gèeo sùà.”

52Aŋ Juùù nyaŋ naŋ wa tuù wèè e yèɛ wo Jisɛ̀ naŋ wa woò lɛ, yèè àŋ naŋ tɔ̀ɔ̀tù nyiŋ bi kpàànè kpàànè e fèemàŋ. Àŋ naŋ dawè nyààŋ, “Dièsɔa wo felaa wɛɛ̀ naŋ wi ɓɛ̀nɛ̀ŋ kìɛ̀ŋ e kenùuŋ nɛ̀ wèè eiŋ niŋ gbìlà?”

53Wo Jisɛ̀ naŋ nyiŋ fasàì wààŋ, “Mìŋ yààìŋ wòò e tɔɔɓaaà kɛ̀, sèè nìŋ go gbìlà e kèìŋ miàim wo Jɔ̀àfèlàà Nyuùŋ Kpùnɔɔ̀ŋ yèè naŋ tìà maŋ sɛnìim màŋ, niŋ naàŋ nɔ̀ŋ wɔ̀ŋ nyiiŋ gèe sùà. 54Anyùùŋ nyaŋ do nàŋ gbìlè e kenìŋ mɛ̀ yèè aŋ tìà maŋ sɛnìim màŋ nyaŋ, àŋ do nàŋ kɛ̀ɛ̀nɛ̀ŋ wɔŋ nyiiŋ gèe gò jùà, yèè mìŋ do nyiŋ nàŋ gè e fàaà dìì wɔŋ nyiiŋ gèeo sùà ke ɗɔɔ dìàmaàŋ. 55E kenìŋ mɛ̀ nàŋ yaà e nɛ̀ŋje kɛnɛɛ̀, yèè maŋ sɛnìim màŋ nàŋ yaà e nɛ̀ŋ tìa kɛnɛɛ̀. 56Anyùùŋ nyaŋ do nàŋ gbìlè e kenìŋ mɛ̀ yèè aŋ tìà maŋ sɛnìim màŋ nyaŋ, àŋ doim nàŋ nyìnìè wɔŋ nyiiŋ gèe nyiŋ nɔɔ̀ŋ ko sùà, yèè wɔŋ nyiiŋ gèe miɔ̀ŋ do nyiŋ nàŋ nɔ̀ŋ ko sùà. 57Wo Dèdaà yaà wɔŋ nyiiŋ gèeɔ̀ sùà wɔ naim tùɔ̀ŋ, yèè e saɓùuŋ nɛ̀ sùà miàŋ pɛɛ mìŋ yaà wɔŋ nyiiŋ gèeɔ̀ sùà. Yèè e ɗèwè guùŋ nɛ̀ sùà, wo nyùnɔ̀ɔŋ gbiŋ do nàŋ gbìlè e kenìŋ mɛ̀ wɔ wò do nàŋ nɔ̀ŋ wɔŋ nyiiŋ gèeo sùà esaɓù mɛ̀ sùà. 58Nyìmaìŋ kɛ̀, kɛɛ̀ nàŋ yaà e nɛ̀ŋjeɛ̀ naŋ dèyè e yìwìà ko àìjɛnɛ̀ŋ lɛ. E fè mààŋ è nɛ̀ŋjeɛ̀ àŋ nèwàènèweiŋ nyàŋ naŋ wa jè lɛ, yèè ko diemeì àŋ naŋ wa fɔ̀. Kɛɛ wo nyùnɔ̀ɔŋ gbiŋ do nàŋ jè e nɛ̀ŋje lɛɛ̀ wɔ wò do nàŋ nɔ̀ŋ wɔŋ nyiiŋ gèeɔ̀ sùà wèè julɔfɔ.”

59Wo Jisɛ̀ naŋ wa tɛɛ̀ woò nààŋ wò yaà wa kàà sùà anyùùŋ nyaŋ ko sààŋ zòòlò aŋ Juùù nyaŋ ko Kepanàùm.

Maŋ mìè gbìàŋ wɔŋ nyiiŋ gèe gò jùàa

60Anyùùŋ màŋjɛ̀wɛ̀ Jisɛ̀ nyaŋ zimgbe nyiŋ naŋ wa woò nyààŋ, “E kàa lɛɛ̀ naŋ nyìngè, ɓòò naŋ ɓɛ̀nɛ̀ŋ jàà kùàŋ dìì wèè e yèɛ wò yaà woo lɛ̀?”

61Kɛɛ wo Jisɛ̀ wa nyìmàŋ kɛ̀ anyùùŋ màŋjɛ̀wɛ̀uŋ nyàŋ yaà wa gùlìè ko ɗìòsùà wèè e yèɛ wò naŋ woò lɛ, yèè wò naŋ nyiŋ woò wààŋ, “Nìŋ manaŋ naim kɛ̀ɛ̀ maŋjɛ̀wɛ wèè esàɓù e yèɛ mìŋ naŋ woò lɛ? 62Kpeiŋ kɛ̀, diè nìŋ do nàŋ gongò sèè nìŋ yɛmɛ̀ weè miàim wo Jɔ̀àfèlàà Nyuùŋ Kpùnɔɔ̀ŋ mìŋ jowo ko àìjɛnɛ̀ŋ koɓɛ̀i mìŋ yewe lɛ̀? 63Wo Jìnàŋ Kanaà Dayà nàŋ kiɛ̀ŋ wo nyùùŋ wɔŋ nyiiŋ gèe. E nɛ̀ŋ kɛnɛ gbiŋ e fè è gààŋ nyuùnkpùuŋ sùà wèè e kìɛ̀ŋ wò nyùùŋ wɔ̀ŋ nyiiŋ gèe. Maŋ mìè maŋ mìŋ naŋ gbòò ko nɛ̀ɛ̀iŋ niìŋ maŋ, màŋ nyɛnɛŋ wo Jìnàŋ Kanaà Dayà woiŋ nɔ̀ŋ ko sùà, wo yèɔ kiɛ̀ŋ wɔŋ nyiiŋ gèe wɔ̀. 64Kɛɛ nyɛ̀iŋ nààŋ bà nyiŋ naŋ gè maŋhɛɛ wèè naim haawè.” Wo Jisɛ̀ naŋ wa tɛɛ̀ woò e fòfoo wò wa nyìmàŋ e yìwìà ko tɔɔtuì kɛ̀ ɓòò nàŋ heuŋ wa nàŋ kɛ̀ɛ̀nɛ̀ŋ e hààwe ko sùà. Yèè wò wa ɓɛìŋ nyìmàŋ kɛ̀ ɓòò nàŋ heuŋ wa nàŋ maàŋ koɓɛ̀ anyuùŋ naanààŋ nyaŋ. 65Kpeiŋ wo Jisɛ̀ naŋ nyiŋ ɓɛìŋ woò wààŋ, “Niŋ fè ɓɛ̀nɛ̀ŋ nɔ̀ŋ ànyùùŋ màŋjɛ̀wɛ̀im, sɔɔ̀ nɔŋ wo Dèdaà woiŋ gè nyààŋ diɛŋ wèè naim dè maŋjɛ̀wɛ. Esaɓùɛ lɛɛ̀ mìŋ naiŋ wòò maŋ keì mɛɛ̀ŋ gbiŋ.”

66Esàɓù maŋ keì mɛɛ̀ŋ wo Jisɛ̀ naŋ nyiŋ yaà wa woò maŋ, anyùùŋ màŋjɛ̀wɛ̀uŋ nyàŋ zimgbe nyiŋ naŋ kɛ̀ɛ̀ maŋjɛ̀wɛ yèè àŋ nauŋ hɔ̀ànè maŋjɛ̀wɛ de wèè aŋ kà ko nɛ̀nɛ̀ŋ gbiŋ ɓɛìŋ. 67Kpeiŋ wo Jisɛ̀ naŋ dàwè anyùùŋ màŋjɛ̀wɛ̀ zììyà jɛ̀wɛ̀ tìyèeuŋ nyàŋ wààŋ, “Nyɛ̀iŋ pɛɛ nìŋ manaŋ naŋ ka?”

68Kpeiŋ wo Saimɔŋ Piilɛ̀ nauŋ fasàì wààŋ, “Kanaà, sèè è kɛɛ̀ùm maŋjɛ̀wɛ, ɓɛ̀ ɓòò è naiŋ ɓɛ̀nɛ̀ŋ kàa? Tiŋ zà maŋ mìè gbòaum màŋ nàŋ kiɛ̀ŋ wɔŋ nyiiŋ gèe gò jùà. 69È kùwàùm e hààwe ko sùà, yèè è naiŋ haawè kɛ̀ muàŋ nàŋ yaà wo Jè Nɛ̀ɛ̀màŋ Gunɔ̀ɔŋ wo Dayà naŋ tùɔ̀ŋ wɔ.”

70Wo Jisɛ̀ naŋ fasàì wààŋ, “Mìŋ naiŋ wa tàeɗùù nyɛ̀iŋ nààŋ zììyà jɛ̀wɛ̀ tìyèe nyàŋ, kɛɛ nyɛ̀iŋ nyɛɛ̀ŋ wo bà guùŋ wò yaà wo nyuùŋ kɛ̀ɛ̀nɛ̀ŋ ke kpèè naanààŋ!” 71Wò yaà wa wòò e kèè wo Juɗà, wo jɔ̀àfèlàà Saimɔŋ Àkaaliɔ̀ɔ. Wo Jisɛ̀ wààŋ kɛ̀ wo Juɗà nàŋ douŋ wa nàŋ maàŋ, jòòpɛɛ wò yaà wa àŋ zììyà jɛ̀wɛ̀ tìyèe nyàŋ bà guùŋ.

Currently Selected:

Jɔ̀ɔŋ 6: WFESD

Highlight

Copy