Jɔ̀ɔŋ 4

Wo Jisɛ̀ yaà wo nìeɔ̀ e yìwìà ko Sàmilià

1Wo Jisɛ̀ wa nyìmàŋ kɛ̀ ke gbòò aŋ Fɛlosiì nyaŋ naŋ wa kòmò kɛ̀ anyuùŋ zimgbe yaà wa kɔ̀ɔ̀yɛ̀ ko nɛ̀ɛ̀uŋ niìŋ yèè wò yaà nyiìŋ wa guuye e nìàŋ anyùùŋ màŋjɛ̀wɛ̀ nyaŋ wo Jɔ̀ɔŋ yaà wa guuye nyàŋ. 2Kɛɛ e tɔɔɓaà nàŋ yaà kɛ̀, anyùùŋ màŋjɛ̀wɛ̀ Jisɛ̀ nyàŋ nàŋ yaà wa gùùyè anyùùŋ nyaŋ. Wo Jisɛ̀ wuŋ bi gò wa gùà wò nyùùŋ gbiŋ. 3Kpeiŋ nààŋ wo Jisɛ̀ naŋ kòmò e yèɛ anyùùŋ nyaŋ yaà wa woo lɛ̀ e nyaàiŋ euŋ dè, wò naŋ yèwè ko Jùdià yèè wò naŋ ɓɛìŋ kɔ̀ ko Galaliì. 4È yaà wa esàɓù ke nyɛ̀nɛ̀ŋ Dayàa kɛ̀ wo Jisɛ̀ naŋ wa kɔ̀ɛ̀ ko Sàmilià.

5Ke dòmàŋ kàaiuŋ nɛɛ̀ŋ diɛŋ, wo Jisɛ̀ naŋ hàì ko jawa bà wɔŋ fùɔ̀ŋ Sàmiliàa sùà àŋ nyaaŋ Sikà. E jawa bi naŋ wa gbɛ̀ɛ̀ koɓɛ̀ e dììɛ wo Jègɔ naŋ wa kìɛ̀ŋ koɓɛ̀ wo jɔ̀àfelaauŋ nɔɔ̀ŋ Jòòsɛ e teenga gɔuo sùà. 6Wɔŋ gòòmàmàì Jègɔɔ̀ kòò wɔ̀ŋ yaà wa nɔŋ koɓɛ̀ bi, yèè nààŋ wo Jisɛ̀ naŋ wa naàŋ kaaìŋ yèè wò naŋ yɔkpɔ̀, wò naŋ wuŋ haì yèè wò naŋ wuŋ jɛ̀ì kɔɔ wèè wo gè nyiiŋ. È yaà wa e tèèngà e gɔɛɛ hàì ɗìò tɛɛ nààŋ wò nao wa haì.

7Wo nìe bà e yìwìà wɔŋ fùɔ̀ŋ Sàmiliàa sùà nao hnè ko tìwìyè e wùìyè. Wò naŋ dèèyè e sàiŋ tìwìyà wuiyèuŋ nɛ̀ ko goloì wèè wo juwià e wùìyè. Yèè wo Jisɛ̀ nauŋ woò wààŋ, “Nìe wɛɛ̀, kìɛ̀im weè e wùìyè miŋ tìà.” 8Tɛɛ̀ zà naŋ wa kaaìŋ e teengaà anyùùŋ màŋjɛ̀wɛ̀ Jisɛ̀ nyaŋ nauŋ wa jòò jɛ̀wɛ̀ yèè àŋ naŋ kɔ̀ ko jawaì ko dìnìè e nɛ̀ŋje.

9Kpeiŋ wo nìeɔ̀ e yìwìà ko Sàmilià naŋ fàsàì wo Jisɛ̀ wààŋ, “Dièsɔa tɛɛ̀ naŋ ɓɛ̀nɛ̀ŋ hɛ̀ɛ̀nɛŋ wèè muàŋ maim dawè wèè e wuiyè tìa, tiiŋ zà mùŋ yaà wo Juùù nyuuŋ, yèè mìŋ yaà wo jɔùŋ e yìwìà ko Sàmilià? Màŋ nyìmàŋ fo kɛ̀ aŋ Juùù nyaŋ yaà anyùùŋ nyaŋ e yìwìà ko Sàmilià fè kpùlìà kè nyɛ̀nɛŋ.”

10Wo Jisɛ̀ naŋ wòò wo nìeɔ̀ wààŋ, “Sèè maŋ weè nyìmàŋ e nɛ̀ɛŋ wo Dayà kiɛ̀ŋ anyùùŋ lɛ, yèè miàim wo nyùnɔ̀ɔŋ yààùm daawe wèè e wuiyè tìa wɔ̀, mùŋ heuŋ nàŋ dawè, yèè wò heum nàŋ kìɛ̀ŋ e wùìyèɛ e yèɛ kiɛ̀ŋ wo nyùùŋ wɔŋ nyiiŋ gèe gò jùà lɛ.”

11Wo nìeɔ̀ naŋ woò wààŋ, “Dàa, muŋ kuwà wɔ̀ŋ fali tìwìyà è wùìyè, e kìlà ngèè wɔŋ gòòmamàìɔ naŋ zutùùŋ. Kòò mùŋ do nàŋ gè e wuiyè kìɛ̀ŋ wɔŋ nyiiŋ gèe gò jùà lɛɛ̀? 12Wo nèwàènèwe wiɔ̀ Jègɔ naŋ wi wa kìɛ̀ŋ wɔŋ gòòmamàì wɛɛ̀ŋ, aŋ jɔ̀àfelaauŋ nyàŋ yaà maŋ ɗolònɛ̀um màŋ naŋ wuŋ tììyè sùà. È ɓɛ̀nɛ̀ŋ nɔ̀ŋ e tɔ̀ɔ̀nyaàŋ e kìlà, mùŋ naŋ gongò kɛ̀ mùŋ kuwa e sɛmɛmaŋ mɔ̀ɛ̀ è nìàŋ e yèɛ wo Jègɔ kuwa wa lɛ̀?”

13Wo Jisɛ̀ naŋ fasàì wò naŋ wòò wo nìeɔ̀ wààŋ, “Ke jòòmàì do ɓɛìŋ nàŋ nyɛ̀nɛ̀ŋ anyùùŋ nyaŋ gbiŋ do nàŋ tìè e wùìyè lɛɛ̀ nyaŋ. 14Kɛɛ sèè wo nyùùŋ gbiŋ wo tìà e wùìyèɛ mìŋ do nàŋ kiɛ̀ŋ lɛ, ke jòòmàì naàuŋ wa nàwèè ɓɛìŋ nyɛ̀nɛ̀ŋ julɔfɔ. E wùìyèɛ mìŋ do nàŋ kiɛ̀ŋ lɛ è do nàŋ nɔ̀ŋ ke wuiyè soo wo nyùùŋ wii ko sùà e yèɛ kiɛ̀ŋ wɔŋ nyiiŋ gèe gò jùà.”

15Wo nìeɔ̀ naŋ fasàì wààŋ, “Dàa, kɔ̀nɛɛ̀ŋ kìɛ̀im e wùìyè lɛɛ̀ bà miŋ tìà! Tɛɛ̀ do nàŋ nyɛ̀nɛ̀ŋ ke jòòmàì naàim ɓɛìŋ nyɛ̀nɛ̀ŋ yèè miŋ naàŋ ɓɛìŋ nɔ̀ɔ̀ŋ hìnìè kòɓɛ̀ wɔ̀ŋ gòòmàmàì wɛɛ̀ŋ wèè ka tàwà è wùìyè.”

16Wo Jisɛ̀ nauŋ woò wààŋ, “Kɔ̀à yèè muŋ nyààŋ wo faniŋ mɔɔ̀ŋ muŋ kɛɛ̀ ɓɛìŋ kià.”

17Wo nìeɔ̀ naŋ fasàì wò naŋ wòò wo Jisɛ̀ wààŋ, “Miŋ kuwà felaa.”

Wo Jisɛ̀ nauŋ woò wààŋ, “Mùŋ naŋ gbàì e tɔ̀ɔ̀nyaàŋ kɛnɛ, muŋ kuwà felaa. 18Àum naàŋ gbìàŋ ke nyɛ̀ɛ̀ koɓɛ̀ aŋ fèlàà nɔɔnɔŋ kenɛiŋ, e kìlà wo felaaà mùŋ kuwa naàŋ wɔ wo fè wò fanuum, mùŋ naŋ gbàì e tɔ̀ɔ̀nyaàŋ kɛnɛ.”

19Yèè wò naŋ ɓɛìŋ wòò wo Jisɛ̀ wààŋ, “Dàa, kà gongò kɛ̀ mùŋ yaà wo kèèlà Dayà. 20Aŋ nèwàènèweim nyàŋ naŋ zòòlò Dayà wɔŋ toò gbee wɛɛ̀ŋ dìmɛ̀, kɛɛ nyɛ̀iŋ nààŋ Juùù nyaŋ naŋ woò kɛ̀ ko Jùlusɛ̀làm nɔŋ nàŋ yaà tɛ̀ɛ̀ wèè Dayà zòòlo.”

21Wo Jisɛ̀ naŋ fasàì wo nìeɔ̀ yèè wò nauŋ woò wààŋ, “Nìe wɛɛ̀, hààweè e yèɛ mìŋ yààùm wòo sùà lɛ, e teengaà kòò è yaà hinie e yèɛ wo nyùùŋ gbiŋ naàŋ ɓɛìŋ zòòlò wò Dèdaà wɔ̀ŋ toò gbee wɛɛ̀ŋ dìmɛ̀ ɔ̀ɔ̀ kò Jùlusɛ̀làm. 22Anyùùŋ nyaŋ e yìwìà ko Sàmilià aŋ nyimààŋ kɛ̀ ɓòò àŋ zoolà. Kɛɛ yàwi nààŋ Juùù nyaŋ èiŋ nyìmàŋ wo Dayàa è zoolàìŋ wɔ, yèè esaɓù wilɛ̀ sùà anyùùŋ nyaŋ gbiŋ e ɗuunyaàŋ àŋ do nàŋ jòèyè. 23Kɛɛ e teenga kòò è yaà hinie, e kìlà kòò è yaà naàŋ kià tɛ! Wo Jinàaŋ do nàŋ nyɛ̀nɛ̀ŋ anyuùŋ zòòlò Dayà kɛnɛ nyàŋ aŋ zòòlò Dayà e tɔ̀ɔ̀nyaàŋ sùà. 24Wo Dayà yaà wo Jinàŋ, yèè aŋ yè nyaŋ zoolàùŋ nyaŋ kuwa auŋ zoolò e gààŋ wo Jinàaŋ sùà yaà e tɔ̀ɔ̀nyaàŋ sùà.”

25Wo nìeɔ̀ naŋ wòò wo Jisɛ̀ wààŋ, “Kà nyìmàŋ kɛ̀ wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, wo Kulaìɔ kòò wò yaà hinie. Sèè wò hnàŋ, wò do wi nàŋ kpìnìè maŋ keì maŋ gbiŋ janjai.”

26Wo Jisɛ̀ naŋ wòò wo nìeɔ̀ wààŋ, “Miàŋ nàŋ yaà wo nyùùŋ bi, miàim wo yèɔ yààùm naàŋ gbùùyè kɔɔ sààmɛ wɔ̀.”

27E teenga kpuu bi sùà nɔŋ anyùùŋ màŋjɛ̀wɛ̀ Jisɛ̀ nyaŋ naŋ kɛ̀ɛ̀ maŋjɛ̀wɛ ko nɛ̀ɛ̀uŋ niìŋ. Yèè è naŋ nyiŋ wa foonò nààŋ àŋ nauŋ mɛɛ̀ŋ wò yaà gbùùyè wo jɔùŋ kɔɔ. Kɛɛ wo bà guùŋ pɛɛ gòuŋ wa dawè wààŋ, “Kiìŋ wò manaŋ ɔ̀ɔ̀ wèè kiìŋ wò yaà gbùùyè wo nìeɔ̀ kɔɔ?”

28Wo nìeɔ̀ naŋ jòò e wuiyè sànuuŋ nɛ̀, kpeiŋ wò naŋ kɔ̀ɔ̀ maŋ dùàŋ ko jawa gbeeì, yèè wò naŋ wòò anyùùŋ nyaŋ wààŋ, 29“Hnaìŋ niŋ yɛmɛ̀ wo kenàaŋ wo yèɔ naim wòò maŋ keì maŋ gbiŋ mìŋ naŋ nyɛ̀nɛ̀ŋ maŋ. Ɓàà wɛɛ̀ wò wɛ̀i ɓɛ̀nɛ̀ŋ nɔ̀ŋ wo yèɔ wo Dayà naŋ tàeɗùù wèè wo joeyè e ɗuunyaàŋ wɔ?” 30Anyùùŋ nyaŋ gbiŋ naŋ kɔ̀ɔ̀ maŋ dùàŋ koɓɛ̀ Jisɛ̀i e yìwìà ko jawaì.

31Jòòpɛɛ tɛɛ̀ kpɛlɛɛ yaà wa kaaiŋ, anyùùŋ màŋjɛ̀wɛ̀ Jisɛ̀ nyaŋ yàuŋ wa pɔɔwɔ nyààŋ, “Kààmɔɔŋ, jè weè e nɛ̀ŋ.”

32Kɛɛ wo Jisɛ̀ naŋ nyiŋ fasàì wààŋ, “Kà jè e nɛ̀ŋje e yèɛ niŋ nyimààŋ è kii niŋ lɛ̀.”

33Anyùùŋ màŋjɛ̀wɛ̀uŋ nyàŋ naŋ tɛɛ̀ tɔ̀ɔ̀tù wòòwoo nyiŋ bi e fèemàŋ nyààŋ, “Ɓàà è ɓɛ̀nɛ̀ŋ nɔ̀ŋ tɔ̀ɔ̀nyaàŋ kɛ̀ wo nyùùŋ bà wòuŋ hìàŋ e nɛ̀ŋje?”

34Wo Jisɛ̀ naŋ nyiŋ fasàì wààŋ, “E nɛ̀ŋje mɛ̀ nàŋ yaà wèè ka nyɛ̀nɛ̀ŋ e yèɛ wo Dayà naim tùɔ̀ŋ wèè ka nyɛ̀nɛ̀ŋ lɛ. Wuŋ naim tùɔ̀ŋ, yèè mìŋ kuwa ka kpɛ̀ɛ̀yɛ̀ e tòmoɛ̀ wò naim kiɛ̀ŋ wèè ka nyɛ̀nɛ̀ŋ lɛ. 35Nìŋ kuwa e keì wòò ke sai sùà nààŋ, ‘Maŋ wàà tiinàŋ naŋ joo wèè eiŋ kpàà manɛ̀ŋ ɓù maŋ.’ Kɛɛ mìŋ yààìŋ wòo sùà wèè naŋ gè fɛ̀ɛ̀ dìì wèè niŋ yɛmɛ̀ wɔŋ ɓùɔ, yèè nìŋ do nàŋ yɛmɛ̀ kɛ̀ e teengaà è haì wèè naŋ kpàà manɛ̀ŋ ɓù maŋ. 36Wo nyùnɔ̀ɔŋ yèɔ kpaa manɛ̀ŋ ɓù maŋ wɔ̀, yɛmɛ̀ e pààwa, e kìlà àŋ gbonàŋ maŋ kùù kòmàŋ wɔŋ nyiiŋ gèe gò jùà, wèè kɛ̀ wo nyuùŋ tòmò ɓùɔ yèè wo nyuùŋ kpàà manɛ̀ŋ ɓùɔ naŋ ɓɛ̀nɛ̀ŋ gììyà e zɔlɔ̀ koɓɛ̀ guùŋ. 37E keì wòo lɛɛ̀ è yaà tɔ̀ɔ̀nyaàŋ, ‘Wo nyùùŋ bà tomàŋ wɔŋ ɓùɔ, yèè wo nyuùŋ joo bà kpàà manɛ̀ŋ ɓù maŋ.’ 38Kàiŋ tùàŋ wèè naŋ kpàà manɛ̀ŋ ɓù ko ɓùi ko yèi anyuùŋ joo bà naŋ nyɛ̀nɛ̀ŋ e tòmo nyìngaà gbiŋ lɛ̀.”

39Anyùùŋ fùɔ̀ŋ Sàmilià nyaŋ zimgbe nyiŋ ko jawa wii naŋ wa hààwè wo Jisɛ̀ esàɓù ke mìè seìɛ wo nìeɔ̀ naŋ wa kiɛ̀ŋ lɛ nààŋ wò naŋ woò wààŋ, “Wo kenàaŋ naim wòò maŋ keì maŋ gbiŋ mìŋ naŋ nyɛ̀nɛ̀ŋ maŋ.” 40Yèè nààŋ anyùùŋ ko Sàmilià nyaŋ naŋ hnè koɓɛ̀ Jisɛ̀i, àŋ nauŋ pɔwɔ̀ wèè wo nyiŋ nɔ̀ŋ e gòlò wèè maŋ ɗɔɔ kpàa. Wo Jisɛ̀ naŋ nyimèè yèè wò naŋ nyiŋ nɔ̀ŋ e gòlò wèè maŋ ɗɔ̀ɔ̀ tìyèe.

41Anyùùŋ nyaŋ zimgbe nyiŋ naŋ wa hààwè wo Jisɛ̀ esàɓù e yèɛ nyiŋ bi nauŋ wa kumiè wò naŋ nyiŋ woò lɛ. 42Àŋ naŋ wòò wo nìeɔ̀ nyààŋ, “Tɔɔɓaa e gòiŋ naàŋ nɔŋ hààwè wò Jisɛ̀ èsàɓù è yèɛ mùŋ naŋ wi woò lɛ. Yàwi bì èiŋ kùmìàŋ e yèɛ wò naŋ woò lɛ, yèè è naiŋ haawè kɛ̀ wuŋ nàŋ yaà wo yèɔ wo Dayà naŋ tàeɗùù wèè wo nɔ̀ŋ wo Nyuùŋ Jòèyeɔ̀ wèè e ɗuunyaàŋ wɔ!”

Wo Jisɛ̀ naŋ nyɛ̀nɛ̀ŋ wo jɔ̀àfèlàà nyùùŋ gbèè fuɔɔ̀ŋ bà wo jòèyà

43Nààŋ maŋ ɗɔ̀ɔ̀ tìyèe màŋ naŋ mààŋ, wo Jisɛ̀ nao yèwè yèè wò naŋ kɔ̀ ko Galaliì. 44Wo Jisɛ̀ wuŋ bi naŋ kìɛ̀ŋ ke mìè seì wààŋ, “Anyùùŋ fè jàà àŋ wɛ̀ijì gbiŋ kùàŋ dìì maŋ fùɔ̀ŋ nyiŋ bi màŋ sùà.” 45Nààŋ wo Jisɛ̀ naŋ hàì ko Galaliì, anyùùŋ nyaŋ nauŋ wa ɓeè, esaɓù kɛ̀ e tèèngà guùŋ àŋ naŋ wa kɔ̀ ko Jùlusɛ̀làm e tèèngà wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ yèè àŋ naŋ yɛ̀mɛ̀ e nɛ̀ɛŋ gbiŋ wò naŋ wa nyɛ̀nɛ̀ŋ lɛ.

46Wo Jisɛ̀ naŋ ɓɛìŋ kɛ̀ɛ̀ ko jawaì àŋ nyaaŋ Kenàŋ wɔŋ fùɔ̀ŋ Galaliìɔ sùà, ko yèi wò naŋ wa kìlè e wùìyèɛ maŋ tala muaŋ. Wo jɔ̀àfèlàà nyùùŋ gbèè fuɔɔ̀ŋ bà guùŋ yaà wa siinyɛŋ ko jawa gbeeì àŋ nyaaŋ Kepanàùm lɛ. 47Nààŋ wo nyùùŋ gbèè fuɔɔ̀ŋ naŋ wa kòmò kɛ̀ wo Jisɛ̀ wa hnàŋ e yìwìà ko Jùdià yèè wò hàì ko Galaliì, wò naŋ kɔ̀ yèè wò nauŋ pɔwɔ̀ wèè wo sùngà wo jɔ̀àfelaauŋ nɔɔ̀ŋ wèè wo go nàŋ fɔ̀. 48Wo Jisɛ̀ naŋ wòò wo kenàaŋ wààŋ, “Nyɛ̀iŋ nààŋ bà nyiŋ naàŋ kɛ̀ɛ̀nɛ̀ŋ è hààwe sɔɔ̀ nɔ̀ŋ naŋ yɛ̀mɛ̀ e kèè mèè yèè maŋ tɔ̀ɔ̀màŋsèì keì maŋ kaaìŋ!”

49Wo kenàaŋ naŋ fàsàì wo Jisɛ̀ wààŋ, “Kanaà, kɔ̀nɛɛ̀ŋ hnaàŋ muŋ sùngà wo jɔ̀àfelaa miɔ̀ŋ wo go nàŋ fɔ̀!”

50Kpeiŋ wo Jisɛ̀ naŋ wòò wo kenàaŋ wààŋ, “Wo jɔ̀àfelaa mɔɔ̀ŋ do nàŋ nɔ̀ŋ wɔŋ nyiiŋ gèe sùà. Kɔ̀à ko gboo moo ko nɛ̀ɛ̀uŋ niìŋ.”

Wo kenàaŋ naŋ wa hààwè e yèɛ wo Jisɛ̀ nauŋ wa woò lɛ, yèè wò naŋ kɔ̀. 51Aŋ ɓɔ̀ìjɔ̀à tòmò wo nyùùŋ gbèè fuɔɔ̀ŋ bà nauŋ mɛ̀ɛ̀ŋ ko dòmaìŋ yèè wò nauŋ woò wààŋ, “Wo jɔ̀àfelaa mɔɔ̀ŋ do nàŋ kɛ̀ɛ̀ wɔŋ nyiiŋ gèeɔ̀ sùà!”

52Wo kenàaŋ naŋ dàwè aŋ ɓɔìjɔ̀àuŋ nyàŋ wààŋ, kiìŋ è teenga e sàaŋ nauŋ fòlò e kɔɔ sùà, yèè àŋ nauŋ woò nyààŋ, “E kɔɔ bìaà nauŋ fòlò e kɔɔ sùà jìɛ̀ e tèèngà e gɔɛɛ gbòà guùŋ nɛ maŋ gɔɛɛ.” 53Wo dèdà wo felaajɔaà naŋ ngàà jàà jii kɛ̀ e tèèngà guùŋ bi sùà e gɔɛɛ gbòà guùŋ nɛ wo Jisɛ̀ nauŋ woò wààŋ, “Wo jɔ̀àfelaa mɔɔ̀ŋ do nàŋ kɛ̀ɛ̀ wɔŋ nyiiŋ gèeɔ̀ sùà.” Kpeiŋ wo felaaà yaà ke kpoouŋ nɛɛ̀ŋ gbiŋ naŋ kɛ̀ɛ̀nɛ̀ŋ hààwe wo Jisɛ̀ sùà.

54Tɛɛ̀ nàŋ yaà wa e kèè mèè dìà tìyèeɛ̀ wo Jisɛ̀ naŋ nyɛ̀nɛ̀ŋ nààŋ wò naŋ yèwè ko Jùdià yèè wò naŋ kɔ̀ ko Galaliì.

Currently Selected:

Jɔ̀ɔŋ 4: WFESD

Highlight

Copy