Nyɛ̀nɛ̀ŋ 8

1Wo Sɔɔ̀ naŋ wa nyimèè wèè aŋ jìwà wo Siiwììŋ.

Wo Sɔɔ̀ nimilà ke gbòò anyuùŋ hààwe nyàŋ

Ke ɗɔ̀ɔ̀ guùŋ bi diɛŋ ke gbòò anyuùŋ hààwe nyàŋ naŋ wa tɔ̀ɔ̀tù e nimilà kùwa ko Jùlusɛ̀làm. Anyuùŋ hààwe nyàŋ gbiŋ, eɓìèmaŋjɛ̀wɛ̀ aŋ keela tàeɗùù nyaŋ, naŋ wa dùɔ̀ŋ aŋ ɓààyè maŋ tàta màŋ sùà wɔŋ fùɔ̀ŋ Jùdiàa sùà yèè ko Sàmilià. 2Anyuùŋ zòòlò Dayà bà naŋ wa sìè wo Siiwììŋ, àŋ yaà ke nyowo sùà àŋ golo weèuŋ.

3Kɛɛ wo Sɔɔ̀ naŋ tɔ̀ɔ̀tù ke gbòò anyuùŋ hààwe nyàŋ nìmila. Wò yaà wa jɔ̀à sùà maŋ saaŋ màŋ dìì guùŋ guùŋ, wò kuwo aŋ felaa yèè aŋ jɔùŋ wò deke, yèè wò gbìɛ̀ŋ nyìŋ ko sààŋ nyìwì.

Ebò Siaàŋ nɔ̀ŋ wòo niŋ ko Sàmilià

4Anyuùŋ hààwe nyàŋ naŋ wa ɓààyè maŋ tàta màŋ sùà nyaŋ, naŋ kɔ̀ koɓɛ̀ gbiŋ àŋ yaà wòò ke mìè gbìàŋ Ebò Siaàŋ. 5Wo Felè naŋ wa kɔ̀ ko jawa gbee bà ko Sàmilià yèè wò nao wòò ke miè gbìaàŋ koɓɛ̀ anyùùŋ nyaŋ e nyaàiŋ dè e kèè wo yèɔ wo Dayà naŋ tàeɗùù wèè wo hìàŋ e jòèye e ɗuunyaàŋ wɔ. 6Anyùùŋ nyaŋ gbiŋ naŋ wa jàà maŋ nùŋ dìì tɛ̀ɛ̀ wèè aŋ kùmìàŋ e yèɛ wo Felè yaà wa woo lɛ̀, nààŋ wò yaà wa nyìnìè maŋ kèì mèè yèè maŋ tɔ̀ɔ̀màŋsèì keì. 7Aŋ jinàŋ naanààŋ nyaŋ naŋ wa kpààŋ sɛiŋ aŋ fòlò anyuùŋ zimgbe ko sùà, yèè anyuùŋ gò ɓɛ̀nɛ̀ŋ kàaiŋ tɛ̀ɛ̀ yèè anyuùŋ kpɔ̀ɔ̀kpɔɔ nyàŋ zimgbe nyiŋ naŋ wa jòèyè. 8Kpeiŋ e zɔlɔ̀ gbee naŋ wa nɔ̀ŋ ko jawa gbee wii.

9Wo felaa bà heo wa joo àŋ nyaaŋ wo Saimɔ̀ŋ, wo yèɔ wèè e teenga bà wò hewa nyɛ̀nɛ̀ŋ maŋ keì gbeegbèè ekɔìɗòlò sùà e yèɛ hewa fòònò anyùùŋ nyaŋ gbiŋ ko Sàmilià. Wò naŋ wa kɛ̀ɛ̀ maŋ yòngà kɛ̀ wò yaà wo nyuùŋ kɛ̀ɛ̀nɛ̀ŋ e gaàŋ gbee, 10yèè anyùùŋ nyaŋ gbiŋ ko jawa gbeeì, pɔ̀ɔ yèè wo bàneuŋ, hewa jàà maŋ nùŋ dìì tɛ̀ɛ̀ wèè aŋ kùmìàŋ e yèɛ wò woà lɛ. Anyùùŋ nyaŋ hewa woò nyààŋ, “Wuŋ nàŋ yaà e gààŋ Dayà lii àŋ nyaaŋ ‘E gaàŋ Gbeeɛ̀.’ ” 11Esaɓùɛ àŋ heuŋ wa kumiàŋ lɛ nàŋ yaà kɛ̀, wèè e teenga mùŋlaŋ, wò naŋ nyɛ̀nɛ̀ŋ maŋ kèì kɔìɗòlò gɛ̀wɛɛ̀ maŋ yè maŋ naŋ nyiŋ wa foonò maŋ. 12Kɛɛ nààŋ àŋ naŋ wa hààwè wo Felè nààŋ wò naŋ nyiŋ wòò Ebò Siaàŋ nyaàiŋ dè e Kànà Dayàa yèè e dèè Jisɛ̀ Kulaìɛ, aŋ jɔùŋ yèè felaa naŋ wa nɔ̀ŋ gùa nyiŋ. 13Wo Saimɔ̀ŋ wuŋ bi naŋ wa haawè, yèè nààŋ wò naŋ wa nɔ̀ŋ gùauŋ, wò naŋ dè wo Felè maŋjɛ̀wɛ. È nauŋ wa foonò nààŋ wò naŋ wa yɛ̀mɛ̀ maŋ kèè mèè maŋ yèè maŋ tɔ̀ɔ̀màŋsèì keì maŋ wo Felè yaà wa nyinie màŋ.

14Nààŋ aŋ keela tàeɗùù nyaŋ ko Jùlusɛ̀làm naŋ wa kòmò kɛ̀ anyùùŋ nyaŋ ko Sàmilià jàà ke mìè Dayàa kùàŋ dìì, àŋ naŋ wa tùɔ̀ŋ wo Pììlɛ yèè wo Jɔ̀ɔŋ ko nɛ̀ɛ̀ŋ nyiŋ niìŋ. 15Nààŋ aŋ keela nyàŋ nao haì, àŋ naŋ zoolò wèè wo Jìnàŋ Nɛɛmaàŋ dèyà wo nɔ̀ŋ anyuùŋ hààwe nyɛɛ̀ŋ sùà. 16Kɛɛ wèè paŋ tii kaaìŋ wa, wo Jìnàŋ Nɛɛmaàŋ kòò wò dèyè wa weè ànyùùŋ nyɛɛ̀ŋ bà gbiŋ diɛŋ. Àŋ naŋ wa nɔŋ nɔ̀ŋ gùa nyiŋ e dèè Kanaà Jisɛ̀ɛ sùà. 17Kpeiŋ wo Pììlɛ yèè wo Jɔ̀ɔŋ naŋ gbùwò anyùùŋ nyaŋ gbiŋ naŋ wa hààwè wo Kanaà sùà nyaŋ maŋ kùàŋ diɛŋ, yèè wo Jìnàŋ Nɛɛmaàŋ naŋ dèyè wo nɔ̀ŋ aŋ gbiŋ ko sùà.

18Kpeiŋ nààŋ wo Saimɔ̀ŋ naŋ yɛmɛ̀ kɛ̀ wo Jìnàŋ Nɛɛmaàŋ sɛ̀ɛ̀ anyùùŋ nyaŋ ko sùà nààŋ aŋ keela tàeɗùù nyaŋ naŋ nyiŋ gbùwò maŋ kùàŋ diɛŋ lɛ̀, wò naŋ kìɛ̀ŋ wo Pììlɛ yèè wo Jɔ̀ɔŋ e nɛɛnɛŋ, 19yèè wò naŋ nyiŋ woò wààŋ, “Kìɛ̀nìim e gààŋ lɛɛ̀ miàŋ pɛɛ, wèè kɛ̀ wo nyùùŋ gbiŋ mìŋ gbuwo maŋ kùàŋ diɛŋ wo Jìnàŋ Nɛɛmaàŋ dèyà wo sɛɛ̀uŋ ko sùà.”

20Wo Pììlɛ nauŋ woò wààŋ, “Muàŋ yèè e nɛɛnɛŋ mɔ̀ɛ̀ do naŋ jɔ̀ ko jàhamaŋ, sèè mùŋ gongà kɛ̀ màŋ ɓɛ̀nɛ̀ŋ dìnìàŋ e nɛ̀ɛŋ wo Dayà kiɛ̀ŋ lɛ e nɛɛnɛŋ! 21Muŋ fè wò bàwibà, e kìlà tɛɛ̀ ngèè e fè tòmoum, esaɓù muŋ kuwà kè jìì tɔ̀ɔ̀nyaàŋ kò fɛ̀ɛ̀fèìŋ Dayài. 22Fè maŋ tùwo naanààum màŋ jɛwɛ, yèè muŋ zoolò wèè wo Dayà juuyàum hakɛ̀ wèè maŋ gòngo naanààum mɛɛ̀ŋ mùŋ naŋ yaà bànè hàa ke jii mɔɛ̀ŋ sùà maŋ. 23Esaɓù mìŋ yɛmɛ̀ kɛ̀ mùŋ yaà wo nyùùŋ hɔ̀ɛŋ yèè maŋ jùumùum màŋ màum dèkà mààŋ wo nyùùŋ keì.”

24Wo Saimɔ̀ŋ naŋ fàsàì wo Pììlɛ yèè wo Jɔ̀ɔŋ wààŋ, “Pɔ̀wɔìŋ wo Kanaà weèim, wèè e yèɛ nìŋ naŋ woò e nyaàiŋ eim dè lɛ kɛ̀ ɓɔ̀ è kaàim.”

25Yèè nààŋ wo Pììlɛ yèè wo Jɔ̀ɔŋ naŋ wa naàŋ kìɛ̀ŋ ke miè gbìaàŋ e nyaàiŋ dè wo Kanaà Dayà, àŋ naŋ kɛ̀ɛ̀ maŋjɛ̀wɛ ko Jùlusɛ̀làm. Àŋ naŋ wòò ke mìè gbìàŋ Ebò Siaàŋ maŋ vàà Sàmilià maŋ zimgbe miŋ sùà nààŋ àŋ yaà wa kɔɔyɛ.

Wo Felè yèè wo nyùùŋ Itìopìàa

26Kɛɛ wo màìkà Kanaà naŋ wòò wo Felè wààŋ, “Yewà dìì yèè muŋ ka ko tèèngà ko jèè gɔɛɛ̀ koɓɛ̀ ke dòmàŋ ke fòùngà e diì wòaà ke yèɛ deye ko Gaazà lɛ e yìwìà ko Jùlusɛ̀làm.” 27-28Wo Felè naŋ yèwè dìì wo ka. Wò naŋ wa mɛ̀ɛ̀ŋ wo nyùùŋ gbèè wɔŋ fùɔ̀ŋ Itìopìàa bà guùŋ ke dòmàŋ guùŋ bi diɛŋ wò jaa wɔŋ gɔ̀ sòouŋ nɔɔ̀ŋ sùà. Wo felaa bi nàŋ sia wa e kèè e sùlò nɛɛnɛɛ̀ŋ feìŋ wèè wo jɔùŋ kana gbeeɔ̀ àŋ nyaaŋ Kandeì wèè wɔŋ fùɔ̀ŋ Itìopìàa. Wo kenàŋ gbeeɔ̀ naŋ wa kɔ̀ ko Jùlusɛ̀làm ko zoolo, yèè wò yaà wa naàŋ kɛ̀ɛ̀ sùà maŋjɛ̀wɛ ko jawauŋ noo. Wò yaà wa kpìnìè wɔŋ fɛi e yìwìà wɔŋ fɛ̀ì wɛ̀ijìɔ Àzaayà nààŋ wò yaà wa kɔɔyɛ wɔŋ gɔ̀sòouŋ nɔɔ̀ŋ sùà wɔŋ yèɔ aŋ sòo nyàŋ gɔɛɛ dìì wɔŋ. 29Yèè wo Jinàŋ Nɛɛmaàŋ naŋ wòò wo Felè wààŋ, “Kɔ̀à koɓɛ̀ wɔŋ gɔ̀ sòo wiiŋ yèè muŋ sie wuŋ kɔɔ fɔ̀ɔ̀.” 30Wo Felè naŋ kɔ̀ɔ̀ maŋ dùaŋ dùaŋ koɓɛ̀ wo kenàaŋ yèè wò nauŋ kumiè wò yaà kpìnìè wɔŋ fɛ̀ì wɛ̀ijìɔ Àzaayà. Wo Felè nauŋ dawè wààŋ, “Màŋ nyìmàŋ kɛ̀ kiɛ̀ŋ mùŋ yaà kpinie?”

31Wo kenàaŋ naŋ fasàì wààŋ, “Diè mìŋ naŋ niŋ ɓɛ̀nɛ̀ŋ nyìmaŋ sèè wo nyùùŋ go niŋ gɔ̀ì sùà ko nɛ̀ɛ̀ŋ miìŋ?” Yèè wò naŋ pɔ̀wɔ̀ wo Felè wèè wo jòwà wɔŋ gɔ̀sòoɔ̀ sùà wo jɛi nyiuŋ kɔɔ. 32Kià naŋ yaà wa koɓɛ̀i wo kenàaŋ yaà wa kpinie wɔŋ fɛ̀ì Dayàa sùà lɛ,

“Wò yaà mààŋ wo ɓaawaa wo yèɔ àŋ yaà kòasùà wèè auŋ jìwà,

ɔ̀ɔ̀ mààŋ wo ɓaawaa bɔwɔ gò ɓɛ̀nɛ̀ŋ gòla sèè àŋ nɔ̀ùŋ hɛ̀nɛŋ sùà maŋ duum ko fɛ̀ɛ̀fèìŋ wo nyuùŋ kɛ̀ɛ̀uŋ nɔɔ̀ŋ.

Yèè wo gò wa gbòà.

33Àŋ nauŋ wa ngaanɓù, yèè aŋ gòuŋ wa kìɛ̀ŋ etɔ̀ɔ̀yaàuŋ nɛ̀.

Ɓòò naŋ ɓɛ̀nɛ̀ŋ tɔ̀ɔ̀ ke kpoouŋ nɛɛ̀ŋ fèemàŋ?

Esaɓù kɛ̀ àŋ nauŋ gè anyuùŋ gè nyiiŋ nyàŋ tɛɛ e ɗuunyaàŋ diɛŋ.”

34Yèè wo nyùùŋ gbèè fuɔɔ̀ŋ naŋ dàwè wo Felè wààŋ, “Wòòim, kèè ɓòò wo wɛ̀ijìɔ yaà wa woo kià, wuŋ bi ɔ̀ɔ̀ wo nyuùŋ joo bà?” 35Wo Felè naŋ tɔ̀ɔ̀tù gbòa e yìwìà koɓɛ̀ yaà wɔŋ fɛ̀ì Dayàa sùà, yèè wò nauŋ wòò Ebò Siaàŋ e nyaàiŋ dè wo Jisɛ̀. 36Yèè nààŋ àŋ yaà wa naàŋ kɔɔyɛ ke dòmaàŋ diɛŋ, àŋ naŋ hàì koɓɛ̀ e wùìyè bà. Wo nyùùŋ gbèè fuɔɔ̀ŋ naŋ wòò wo Felè wààŋ, “Yɛ̀mɛ̀, e wùìyè lɛɛ̀ kià, esaɓù bà kòò è yao eim kèèwè kùàŋ feìŋ wèè miŋ go nàŋ nɔ̀ŋ gùaim?”

[ 37Wo Felè nauŋ woò wààŋ, “Màŋ ɓɛ̀nɛ̀ŋ nɔ̀ŋ gùaum sèè mùŋ kɛɛnɛ̀ŋ e hààwe ke jii mɔɛ̀ŋ gbiŋ sùà.” Wo nyùùŋ gbèè fuɔɔ̀ŋ naŋ fasàì wààŋ, “Mìŋ kuwa e hààweɛ̀; kà haawè kɛ̀ wo Jisɛ̀ Kulaì nàŋ yaà wo Jɔ̀àfèlàà Dayàa.”]

38Wo kenàaŋ naŋ wòò wo nyuùŋ dùùnyàŋ gɔ̀ sòouŋ nɔɔ̀ŋ wèè wo jàà wuŋ. Yèè wo Felè yaà wo nyuùŋ gbeeɔ̀ naŋ dè e wùìyèɛ sùà, yèè wo Felè nauŋ gùò. 39E teengaà àŋ naŋ fòlò e wùìyèɛ sùà lɛ, wo Jìnàŋ wo Kanaà Dayà naŋ nyɛ̀nɛ̀ŋ wo Felè wo jɔɔnɔ̀ŋ ko fɛɛ̀feìŋ. Wo nyuùŋ gbeeɔ̀ gòuŋ wa ɓɛìŋ yɛmɛ̀ gbiŋ, kɛɛ wuŋ noo kenàaŋ naŋ kɔ̀ɔ̀ e zɔlɔ̀ e jouŋ nɛ̀ sùà. 40Wo Felè naŋ wa yɛ̀mɛ̀ wuŋ bi wò yaà ko jawaì àŋ nyaaŋ ko Àzotɔ̀. Wò naŋ wa kìlìè maŋ jawa màŋ gbiŋ sùà wɔŋ fàà bi, e jèèsùà wo hàì ko Sesèlià, wo yaà wòò Ebò Siaàŋ e nyaàìŋ dè wo Jisɛ̀ koɓɛ̀ anyùùŋ nyaŋ.

Currently Selected:

Nyɛ̀nɛ̀ŋ 8: WFESD

Highlight

Copy