जकरिया 13
13
लायोलाम्बा सेसे पोङ्मा
1“खे़न् ये़न्नो दाउदरे़ कुहिम्सयङ् नु यरुसले़म के़युङ्बाहाॽरे़ खुन्छिॽ लायोन् हे़क्क्याङ् खुन्छिॽ आसुत्थोन् सेसेसाङ्साङ् चोःक्मारे़ लागि लत्छा वाबुन्दाक्वा च्वाःत् पुन् लःन्॥”
2मुक्साम्दाङ्बा यहवे दाङ्बे़ल्ले़ उवा चोगुॽ, “खे़न् ये़म्मो आङ्गाॽ लाजेॽलाम्बा माङ्हाॽरे़ खुन्छिॽ मिङ्ङे मासुङ् पिरुङ्सिङ्ॽ, हे़क्क्याङ् खे़ङ्हाॽ निङ्वाॽसुम्माङ् मे़ल्लॽने़न्ॽ॥ माङ्निङ्वाॽपान् के़बाःप्पाहाॽ नु आसुत्थो साम्हाॽआङ् लाजेॽलाम् आङ्गाॽ लःत्तुङ्देसुङ्सिङ्ॽ॥ 3हे़क्क्याङ् आरसाङ् कुभारे़ माङ्निङ्वाॽपान् पाःत्तुने़भग्र, खुने़ॽ सागे़वाःम्बा कुम्मा कुम्बासिरे़ए खे़न् अक्खे मे़मे़त्तुॽ, ‘खे़ने़ॽ सिमाए पोङ्ॽ, थेआङ्भे़ल्ले़ खे़ने़ॽ यहवे दाङ्बे़ल्ले़ कुमिङ्ङो इङ्ले़क् के़बाःत्तुआङ् वाॽ॥’ खे़ल्ले़ माङ्निङ्वाॽपान् पाःत्तुल्ले़ खुने़ॽ सागे़वाःम्बा कुम्मा कुम्बासिरे़ खे़न् फ्याक् लस्सुर मे़धुबुॽ॥”
4“खे़न् ये़न्नो के़रे़क् माङ्निङ्वाॽपान् के़बाःप्पाहाॽ खुन्छिॽ माङ्निङ्वाॽपान् सुफोलाम् सिरिङ्ममो मे़धारो, हे़क्क्याङ् इङ्ले़क् माङ्निङ्वाॽपान् पाःप्मारे़ लागि माङ्निङ्वाॽपान् के़बाःप्पे़ल्ले़ सामुरिक्लाम् थाक्मनाबा चाङ् मे़जाक्खुन्ॽ॥ 5खे़ल्ले़ अक्खे पाःत्तुॽ, ‘आङ्गाॽग माङ्निङ्वाॽपान् के़बाःप्पा मेःन्आ, कर याःम्बक् के़जोःक्पा के़जाबाआरक्लो, थेआङ्भे़ल्ले़ आङ्गाॽ थाङ्बे़न् वयाङ्ङाङ्धोए खाम्बेःक्कोलाम् हिङ्सिङ्ङाआङ् वाॽआ॥’ 6कुभारे़ खे़न् ‘खे़ने़ॽ के़धक्को कन् काःन्दे़आङ् के़बप्पाहाॽ थे़माबे?’ फाॽआङ् सेःन्मे़दोसुने़भग्र खे़ल्ले़ अक्खे मे़त्तुसिॽ, ‘कन् आङ्गाॽ आन्जुम् आन्देङ्बाहाॽरे़ खुन्छिॽ हिम्मो काःन्दाङ्बा याङ्घेःक्लो॥’”
मे़ल्लुक्कम्बान् हिप्मा
7मुक्साम्दाङ्बा यहवे दाङ्बे़ल्ले़ उवा चोगुरो,
“ताभेए! आमे़ल्लुक्कम्बे़ल्ले़ कुदक्ले़ङ्वाओ पोगे़ॽओ,
खुने़ॽग निःत्ताङ्बा आन्जुम् आन्देङ्बारो॥
मे़ल्लुकम्बे़न् थे़क्तुक् साक्खाःक् हिप्ते़म्मे़ॽओ,
हे़क्क्याङ् मे़ल्लुक्हाॽ फुत्छिङ्ज्याङ् मे़बोङ्लो,
हे़क्क्याङ् आहुक्किल्ले़ चुजुक्साहाॽ साःप्सुङ्सिङ्लो॥
8के़रे़क् लाजेॽओ कुलक् ने़त्छि मनाहाॽ मे़से़रुसिरो,
हे़क्क्याङ् खे़ङ्हाॽ खक्पे़त् युम्रे़क् मे़मे़क्लो,
हे़क्केसाङ् कुलक् थिक् मे़दाङ् मे़याःक्लो॥
9खे़ल्ले़ याःन्दिक् कुलक् थिक्हाॽ मिओ याक्तुङ्सिङ्लो,
युप्पा साङ्मनाबा कुइसिक् खे़ङ्हाॽ योःन्दुङ्सिङ्लो,
साम्म्याङ् योःम्मनाबा कुइसिक् साॽरुङ्सिङ्लो॥
खे़ङ्हाॽरे़ आङ्गाॽ आमिङ्ङो पेलि मे़भाक्कारो,
खे़ब्याङ् आङ्गाॽ खे़ङ्हाॽ नुगप् पिरुङ्सिङ्लो॥
‘खे़ङ्हाॽ आङ्गाॽ आमनासि’ फाॽआङ् मे़त्तुङ्सिङ्लो,
हे़क्क्याङ् खे़ङ्हाॽरे़ अक्खे मे़बाःत्तुरो,
‘यहवे दाङ्बे़न् आनिगे निङ्वाॽफुमाङ्लो॥’”
Currently Selected:
जकरिया 13: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
