मलाकि 2
2
निङ्वाॽफुसाम्बाहाॽ साम्दिङ्
1मुक्साम्दाङ्बा यहवे दाङ्बे़ल्ले़ अक्खे पाःत्तुॽ, “निङ्वाॽफुसाम्बासे, कन् साम्दिङ्ङिन् खे़निॽ लागिरो॥ 2खे़निॽ के़जोगुम् के़बाःत्तुम्बा याःम्बक्कोलाम् आङ्गाॽ मिङ्सो इङ्धाङ् आग्बिरिर पोङ्ॽ॥ आङ्गाॽ पाःत्तुङ्बा पाःन्निन् खे़निॽ के़ङ्घे़प्सुम्मिन्ने़भग्र आङ्गाॽ खे़निॽ सम्धाङ् माङ्दे थासुङ्ॽ॥ खे़निॽ के़घोसुम्बा मुॽइसाम् पाःन्हाॽओ साङ्ग्रा माङ्दे थासुङ्ॽ॥ कुजे़क्काङ्ङिल्ले़, खे़निॽ खे़न् के़घोसुम्बा मुॽइसाम्हाॽओ आसेःन्छा साङ्ग्रा थासुङ्ङाङ् वाॽ थेआङ्भे़ल्ले़ आङ्गाॽ आइङ्जाङ्ङिन् सिङ्सिङ् ये़क्ये़क्काङ् के़ङ्घे़प्सुम्ने़न्॥
3“खे़निॽ के़जोगुम्मिल्ले़ चोगुल्ले़ आङ्गाॽ खे़निॽ सामे़न्छाॽहाॽ खुम्दिङ् पिरुङ्सिङ्ॽ॥ तङ्नाम्मो खे़निॽ सिदुङ्जभा के़दोःम्दुम्सिम्बा थक्सा हिःल्ले़ खे़निॽ नारान् ले़ङुङ् पिनिङ्ॽ हे़क्क्याङ् खे़न् थक्सा हिःन्नु सोरिक् लाःक्कात् लाप्फुनिङ्ॽ॥ 4आङ्गाॽ ले़बिहाॽनु चोगुङ्बा आमाङ्हुप्पिन् आभे़ल्ले़साङ् वाॽर फाॽआङ् खे़निॽ कन् साम्दिङ्ङिन् पिनिङ्बा फाॽआङ् कुसिङ् के़निःत्तुम्ॽ” मुक्साम्दाङ्बा यहवे दाङ्बे़ल्ले़ पाःत्तुॽ॥
5“आङ्गाॽ आमाङ्हुप्पिन् खे़न्हाॽनु वये़, हिङ्मन् नु सनारुङ्ले़ माङ्हुप्पिन्, हे़क्क्याङ् खे़न्हाॽरे़ आङ्गाॽ मिङ्सो इङ्धाङ् मे़बिआर फाॽआङ् आङ्गाॽ खे़न् पाःन्हाॽ खे़न्हाॽ पिरुङ्सिङ्, खे़ब्याङ् खे़न्हाॽ आङ्गाॽनु मे़गिसे़आङ् मिङ्सो इङ्धाङ् मे़बिराङ्॥ 6से़क्खाबा निसाम्मिन् खुन्छिॽ मुराओए पत्छे़, हे़क्क्याङ् खे़न्हाॽरे़ इङ्ले़क् पान् थेआङ् मे़म्बाःत्तुन्॥ नुॽमादामा नु कुदोःप्मा लाम्मो खे़न्हाॽ आङ्गाॽनु सोरिक् लाङ्मे़घेगे़आङ् खे़न्हाॽरे़ यरिक् मनाहाॽ लायोलाम् मे़नुःक्तुसिरो॥
7“थेआङ्भे़ल्ले़ निङ्वाॽफुसाम्बे़ल्ले़ कुम्ब्राःल्ले़ आफाल्ले़साङ् से़क्खाबा ने़हिनिङ्वाॽरे़ पान् हुॽमासि पोङ्, हे़क्क्याङ् मे़न्छाम् याप्मिहाॽ खुने़ॽलाम्बा निसाम् मे़हुॽसिङ्ल पोङ्, थेआङ्भे़ल्ले़ खे़न् निङ्वाॽफुसाम्बे़न् मुक्साम्दाङ्बा यहवे दाङ्बे़ल्ले़ कुइङ्घङ् के़साबारो॥
8“कर खे़निॽ निङ्वाॽफुसाम्बाहाॽरे़ नुबा लाम्मिन् के़ले़रुम्माङ् थिक्नाहाङ् के़हिआसि के़बेगिआङ् के़वयिॽ॥ खे़निॽ निसाम्मिल्ले़ यरिक् मनाहाॽ ताप्फे़ःम्बा याःम्बक् चोक् पाङ्घुसिआङ् वाॽ॥ आङ्गाॽ ले़बिहाॽनु चोगुङ्बा माङ्हुप्पिन् खे़निॽ के़भेःन्दुम्माङ् के़वयिॽ” लॽरिक् मुक्साम्दाङ्बा यहवे दाङ्बे़ल्ले़ पाःत्तुॽ॥ 9“कल्ले़चोगुल्ले़ आङ्गाॽ खे़निॽ के़रे़क् मनाहाॽरे़ खुन्छिॽ तगि थेआङ् मेःम्बा नु कुनामे़न्छाॽ चोःक्निङ्ङाङ् वाॽआ, थेआङ्भे़ल्ले़ खे़निॽ आङ्गाॽ आलाम्मो लाङ्गे़ङ्घेगिन् कर आसाम्यो थिम्मिल्ले़ कुयाःम्बेओ मनाहाॽ के़हुॽरुम्सिम्मे़ल्ले़ एःक् पएःक् के़जोगुम्माङ् वाॽरो॥”
यहुदाःल्ले़ इङ्ले़क् चोगु
10आनिॽ के़रे़क्ले़ पानुदिङ् पा लत्छा मे़वाॽने़म्बि? थे लत्छा निङ्वाॽफुमाङ्ङिल्ले़ आनिॽ नावागे़न् चइःत् आजोगे़बा मेःम्बि? हे़क्केःल्ले़ थेआङ् इङ्आले़क्सिङ्ङाङ् आनिॽ पाधे़बाहाॽरे़ मे़जोगुबा माङ्हुप्पिन् आजिःन्दुम्बाबे? 11यहुदाःल्ले़ इङ्ले़क् चोगुआङ् वाॽ॥ इस्राइल लाजेॽओ नु यरुसले़म ये़क्यक्को सिक्के़ले़ःङ्बा याःम्बक् मे़जोगुआङ् वाॽ॥ यहुदाःल्ले़ वेॽ लाजेॽबा माङ्हाॽ से़वा के़मे़प्मा मे़न्छुमाहाॽ मेःक्खिम् मे़त्तुसिआङ् यहवे दाङ्बे़ल्ले़ कुसिराॽ के़धाङ्बा सेसेदे़न्निन् चिःन्दुआङ् वाॽरो॥ 12अक्खे के़जोःक्पा आत्तिन् मनाःल्ले़ मुक्साम्दाङ्बा यहवे दाङ्बाओ हुक्सोयाङ् तारुॽ, यहवे दाङ्बे़ल्ले़ खे़न् मनान् याकुबरे़ कुसुवाङ्हाॽलाम् लाःक्कात् लःत्तुदेसुरो॥
13खे़निॽ याम्मो वेॽ पान् के़जोगुम्, खे़निॽ मिक्वाःल्ले़ यहवे दाङ्बाओ ले़त्ति तोःम्मादे़न्निन् वागे़रक्सुम्ॽ॥ खे़निॽ के़हाबि हे़क्क्याङ् मे़रिङ् के़धक्तिॽ, थेआङ्भे़ल्ले़ खे़निॽ हुक्कोबा हुक्सोयाङ्ङिन् खुने़ॽ आभे़ल्ले़आङ् निनि मे़लाप्तुन्ॽ, खे़न् हुक्सोयाङ्ङिन् यहवे दाङ्बे़ल्ले़ मे़दाःक्तुन्॥ 14खे़निॽ से़ःन्गे़दोसुम्, “यहवे दाङ्बे़ल्ले़ आनिगे थेआङ् लाप्फुसिगे़आङ् वयिगे़बाबे?” थेआङ् अक्खे पोःक्खे़बा आङ्गाॽ मे़त्निङ्ॽ, थेआङ्भे़ल्ले़ खे़ने़ॽ थाङ्बे़न् के़वये़ल्ले़ मेःक्खिम् के़मे़त्तुमा के़मेःत्तिन्नु के़जोगुबा माङ्हुप्पिन् खुने़ॽ निसुरो, खुने़ॽग खे़ने़ॽ के़मेःत् वये़, खुने़ॽनु के़जोगुबा माङ्हुप्पिन् के़भेःन्दु, हे़क्केसाङ् खे़न् मे़न्छुमान् के़न्देःङ्मा नु मेःक्खिम्मो माङ्हुप् के़बोङ्मा के़मेःत्लो॥ 15थे यहवे दाङ्बे़ल्ले़ खे़ने़ॽ नु के़मेःत्ते़न् नासिङ्गे़न् थक्लाओ नु याम्साम्मो लत्छा के़जोगे़सिबा मेःम्बि? हे़क्क्याङ् थेआङ् खे़न्छिॽ लत्छाने़सिङ्? थेआङ्भे़ल्ले़ खे़न्छिॽ लाम्बा के़बोङ्बा साहाॽ से़क्खाबा निङ्वाॽफुमाङ्ङिल्ले़ कुमना मे़बोङ्ल के़लॽबा खुने़ॽ निङ्वाॽ इःत्तुॽ॥ कल्ले़चोगुल्ले़ खे़निॽ आबाङे याम्साम्मिन् कम्ब्राङ् मे़त्ताम्मे़ॽ हे़क्क्याङ् खे़निॽ आबाङे थाङ्बे़न् के़वयिल्ले़ मेःत्ते़न्नु के़जोगुम्बा मेःक्खिम् माङ्हुप्पिन् मे़भेःन्दे़म्मिन्ने़ॽ॥ 16“मेःत् ये़म्बा से़मा पाःन्निन् आङ्गाॽ चिःत्तुङ्ॽ,” यहवे दाङ्बा इस्राइलबा निङ्वाॽफुमाङ्ङिल्ले़ पाःत्तुॽ, “खे़निॽ लुम्मो आत्तिन्हाॽरे़ मेःत् ये़म्बा से़मा याःम्बक् के़जोगुम्ॽ॥ खे़न् पाःन्निन् आङ्गाॽ चिःत्तुङ्ॽ॥ कल्ले़चोगुल्ले़ आबाङे याम्साम्मिन् आबाङेए कम्ब्राङ् मे़त्ताम्मे़ॽआङ् माङ्हुप्पिन् मे़भेःन्दे़म्मिन्ने़ॽ॥”
खासे़न् ये़न्
17खे़निॽ पाःन्निल्ले़ यहवे दाङ्बे़न् नासे़र के़याःन्दुम्माङ् वाॽ॥ कर खे़निॽ से़ःन्गे़दोसुम्ॽ, “आनिगे आक्खेलॽरिक् खुने़ॽ नासे़र याःन्दुम्बे़बे?” कर खे़निॽ अक्के के़बाःत्तुम्माङ् नार के़याःन्दुम्ॽ, “ताप्फे़ःम्बा याःम्बक् के़जोःक्पाहाॽ के़रे़क् यहवे दाङ्बे़ल्ले़ कुमिक्साओ नुबाए मे़जोक् हे़क्क्याङ् खुने़ॽ खे़ङ्हाॽनु कुनिङ्वाॽ ताःॽ,” इग्र “खासे़न् के़लोःम्बा निङ्वाॽफुमाङ्ङे़न् आत्ति वाॽबे?”
Currently Selected:
मलाकि 2: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.