लुका 21
21
मेमेदुमाल्ले़ कुहुक्सोयाङ्
(मत्ति १२:४१-४४)
1ये़सुरे़ माङ्हिम्मो हुक्सोयाङ् तोःम्मादे़न्नो याङ्साकुन्धेसाबाहाॽरे़ खुनिॽ हुक्सोयाङ्ङिन् मे़गेःत्तुर मे़बत्छे़बान् ओमे़त्तुसिर युङे़॥ 2खे़प्मो लत्छा याङ्गे़साॽमा मेमेदुमाधिक्ले़ याङ्ने़त्छि#२१:२ याङ्ने़त्छि ग्रिक पाःन्दाङ्ङो “ने़त्छि ले़प्तोन्॥” कन् यहुदिहाॽरे़ मे़जोगुबा के़रे़क्नुःल्ले़ कुमे़ल्लुङ् सुःल्लिक्पा याङ् वये़॥ केःत्तुबा निसुआङ् 3पाःत्तु, “से़क्खाए कन् याङ्गे़साॽमा मेमेदुमाल्ले़ वेॽहाॽनुःल्ले़ यरिक् हुक्सोयाङ् केःत्तुआङ् वाॽरो, 4थेआङ्भे़ल्ले़ कन् याङ्साकुन्धेसाबाहाॽरे़ग खुनिॽ के़योबाआङ् के़नम्बा याङ्हाॽए मे़याक्तु, कर याङ्गे़साॽमा मेमेदुमाल्ले़ग खुने़ॽ कुयाङ्साॽमो कत्तुबा चामा थुङ्मालाम् याक्तुआङ् वाॽरो॥”
इनोगे़न् तुक्खेन् नु निङ्घुम्
(मत्ति २४:३-१४; मर्कु १३:३-१३)
5हे़क्क्याङ् कुभा हुॽसाम्बाहाॽरे़ माङ्हिम्मिल्ले़ कुयाःम्बेओ खे़न् नुःब्नुःबा लुङ्हाॽ नु मनाहाॽरे़ निङ्वाॽफुमाङ्ङो मे़दोन्दुबा के़घे़म्बा के़लाॽबा पाःन्हाॽरे़ कुयाःम्बेओ मे़बाःत्तुरो॥ हे़क्केःल्ले़ ये़सुरे़ खे़ङ्हाॽ मे़त्तुसि, 6“खिनिॽ आल्लो के़निसुम्बान् थिक् लुङ्सम्दाङ् वेॽ लुङ्धिक्काङ् मे़न्ने़ए यमा ये़म् तार पत्लो॥”
7हे़क्क्याङ् खे़ङ्हाॽरे़ ये़सुन् सेःन्मे़दोसु, “सिक्साम्बे, कन् आप्फाल्ले़ पोङ्बाबे? कन् पोङ्मानुःल्ले़ तगि थे मिक्सेन् पोङ्बे?”
8ये़सुरे़ खे़ङ्हाॽ नोगप् पिरुसि, “सिङ्सिङ् लॽरे़म्मे़ॽओ, आत्तिल्ले़आङ् खिनिॽ इङ्गे़न्ले़क्तिल्लरो, थेआङ्भे़ल्ले़ यरिक् मनाहाॽ इङ्गाॽ आमिङ्ङो निङ्वाॽफुमाङ्ङिल्ले़ सेःन्दुबा ख्रिस्ते़न् इङ्गाॽएरो, हे़क्क्याङ् आल्लो ये़म्मिन् त्ये़आङ् वाॽ फाॽआङ् मे़बाःत्तुॽ, कर खे़ङ्हाॽरे़ खुनिॽ पाःन्निन् मे़घे़प्से़म्मिन्ने़ॽओ॥ 9हे़क्क्याङ् खिनिॽ थङ्हाॽ नु के़जिहाॽरे़ कुयाःम्बेओ के़घे़प्सुम्, कर निङ्वाॽ मे़मये़म्मिन्ने़ॽओ॥ कङ्हाॽग पोङ्माए पोङ्, कर बा खे़न् ये़म्मोएग इक्सादिङ् खाम्बेःक्माल्ले़ कुनुप्मान् मे़दाने़न्लो॥”
10हे़क्क्याङ् ये़सुरे़ खे़ङ्हाॽ मे़त्तुसि, “मे़न्छाम् सुवाङ्हाॽ नु लाजेॽहाॽ लुम्मो थङ् पोक्॥ 11हे़क्क्याङ् यरिक् ते़न्नो पयम् यम्बा लुप्लि थाङ्, यम्बा साक् पोक् हे़क्क्याङ् यम्बा मिन्देॽहाॽ पोःक्काङ् किप्मा के़घुबा नु निङ्वाॽ के़माबा मिक्सेःन्हाॽ ताङ्साक्पो मे़धाःप्लो॥
12“कन् पोङ्मानुःल्ले़ तगिग खिनिॽ हुक् के़म्याक्तिआङ् निङ्घुम् के़म्मे़त्तिॽरो॥ हे़क्क्याङ् यहुदि चुम्लुङ्हिम्मो खासे़न् के़म्लोःन्दिआङ् पुङ्लाहिम्मो के़म्धे़क्तिॽरो॥ आमिङ्ङिल्ले़ चोगुल्ले़ हाङ्हाॽ नु सुहाङ्गे़म्बाहाॽरे़ खुनिॽ तगि के़म्ये़प्सिॽरो॥ 13कङ्ग इङ्गाॽ आयाःम्बेओ पाःप्मा के़घोसुम्बा सुये़म्लो॥ 14हे़क्क्याङ् खिनिॽ से़ःप्सिङ्मारे़ लागि थे़मा पाःप्माबे फाॽआङ् तगिसा निङ्साम्मो मे़ध्ये़म्मिन्ने़ॽओ॥ 15थेआङ्भे़ल्ले़ इङ्गाॽ खिनिॽ पाःप्मा के़बोङ्बा सुत्लाहाॽ नु सिक्कुम्दिङ् निङ्वाॽ पिनिङ्लो॥ हे़क्केःल्ले़ आत्तिन्नाङ् खिनिॽ बिफ्युङ्हाॽरे़ अप्मा नु पाःन्धक्मा मे़न्छुक्तुन्लो॥ 16खिनिॽ पामाहाॽ, फुॽनुसाॽहाॽ, काॽइ सोॽधोःक्हाॽ नु तेःङ्जुम्हाॽरे़ इङ्गे़म्ले़क्तिआङ् ते़म्मा के़म्बाङ्घिॽरो॥ खे़ङ्हाॽरे़ खिनिॽ कुभाग के़म्से़रिॽ॥ 17खिनिॽ याप्मि नसान् के़जोगिबाल्ले़ के़रे़क् मनाहाॽरे़ खिनिॽ के़म्जिःत्तिॽ, 18हे़क्केसाङ् खिनिॽ थे़गेःक्इधिक्काङ् मक्मे़धाने़न्लो॥ 19खिनिॽ कन् के़रे़क् पाःन्हाॽ के़धरुम्मिल्ले़ए खिनिॽ हिङ्मन्निन् ताङ्लो॥”
यरुसले़म्मिल्ले़ कुमे़क्मान्
(मत्ति २४:१५-२१; मर्कु १३:१४-१९)
20आल्ल यरुसले़म्मिन् निङ्मि थक्सुबाहाॽरे़ मे़गबुबा के़निसुम्मिल्ले़ आल्ल कुमे़क्मान् निःत्ताङ्ङे वाॽ फाॽआङ् कुसिङ् निःत्ते़म्मे़ॽओ॥ 21हे़क्क्याङ् यहुदियाबा मनाहाॽ कोःक्मा फाङ्जङ् हे़ङ्घात्ति मे़घे़त्छिङ् मे़बेःक्ल, ये़क्यक्को के़वाॽबाहाॽ लाःक्कात् मे़घे़त्छिङ् मे़बेःक्ल, हे़क्क्याङ् पाङ्भेॽओ के़युङ्बाहाॽ याम्मो ये़क्यक्को मे़न्दाने़न्लरो॥ 22थेआङ्भे़ल्ले़ साम्यो साप्लाओ कन् साप्ते़आङ् पप्पा पाःन्निन् के़त्ल फाॽआङ् कङ्ग खुम्दिङ्ले़न् ये़न्हाॽ पोङ्लो॥ 23कन् ये़म्मिङ्ग मे़न्छुक्मा के़वाॽमा नु सावामाहाॽरे़ लागि आक्खे़न् किप्मा के़घुबा पोङ्ङि! इक्सादिङ् खाम्बेःक्मो यम्बा तुक्खे थाःरो, हे़क्क्याङ् निङ्वाॽफुमाङ्ङिल्ले़ कुघुम्दिङ्ङिन् कन् मनाहाॽओ चुक्लो॥ 24खे़ङ्हाॽ ताभेःल्ले़ मे़जे़प्तु मे़से़रुसिॽ हे़क्क्याङ् यरिक् लाजेॽओ पुङ्लाधाबा मे़बोङ्ङाङ् मे़बेःक्लो॥ थिम्मे़न्दङ् सुवाङ्हाॽरे़ खुनिॽ ये़म् मे़ङ्गे़त्ते थारिक् खे़ङ्हाॽरे़ यरुसले़म्मिन् मे़दोॽरु मे़सॽरुॽरो॥
मे़न्छाम्साःल्ले़ कुयुमान्
(मत्ति २४:२९-३१; मर्कु १३:२४-२७)
25“हे़क्क्याङ् नाम्, लाबा नु खेःम्सिक्हाॽओ यम्बा मिक्सेःन्हाॽ मे़धाःप्लो॥ हे़क्क्याङ् वाहङ्ङिल्ले़ कुसःक्मान् नु यम्बयम्बा वाभे़ल्ले़ङ्ङिल्ले़ चोगुल्ले़ इक्सादिङ् खाम्बेःक्मोबा मे़न्छाम् सुवाङ्हाॽ साॽरिक् किमाओ नु निङ्साम्मो मे़धारो॥ 26आल्ल इक्सादिङ् खाम्बेःक्मो के़दाबार के़बप्पा इनोगे़न् तुक्खेन् मे़इःत्तुआङ् मनाहाॽ खुनिॽ साम् मिक्किल्ले़ पक्थसि, थेआङ्भे़ल्ले़ ताङ्साक्पोबा मुक्साम्हाॽ नु खेःम्सिक्हाॽ मे़यङ्लो॥ 27हे़क्क्याङ् मे़न्छाम्सान् खाप्मिःत्तो यम्बा मुक्साम् हे़क्क्याङ् मिमिदिङ्नु युर पप्पा मे़न्छाम् याप्मिहाॽरे़ मे़निसुॽरो॥ 28आल्ल कन् के़रे़क् पोङ्ङिल्ले़ खिनिॽ थे़गेःक्पे़न् फोःक्खे़म्मे़ॽआङ् थाःङ् ओमये़म्मे़ॽओ, थेआङ्भे़ल्ले़ खिनिॽ से़न्लप्पिन् निःत्ताङ् तार पत्लो॥”
पःत्छेॽबुङ्मोलाम् निसाम्
(मत्ति २४:३२-३५; मर्कु १३:२८-३१)
29हे़क्क्याङ् ये़सुरे़ खे़ङ्हाॽ कन् खे़दाॽइन् मे़त्तुसि, “आल्ल पःत्छेॽबुङ्मान् नु वेॽ सिङ्बुङ्हाॽ ओमे़त्ते़म्मे़ॽ॥ 30आल्ल कुसङ् कुभे़क्वा लःन्निल्ले़ हाङ्वाःम्मा ये़म्मिन् निःत्ताङ् तार पत् फाॽआङ् खिनिॽ कुसिङ् के़निःत्तुम्लो॥ 31हे़क्केलॽरिक्के इङ्गाॽ पाःत्तुङ्बा कन् काक् पाःन्हाॽ के़त्ल पेःक्पा के़निसुम्मिल्ले़ निङ्वाॽफु हाङ्जुम्मिन् निःत्ताङ् वाॽ फाॽआङ् कुसिङ् के़निःत्तुम्लो॥
32“इङ्गाॽ से़क्खाए मे़त्निङ्, कन् के़रे़क् पाःन्हाॽ मे़म्बोङ्ङे थारिक् कन् मे़न्छाम् थाःक्हाॽ मे़न्छिने़न्लो॥ 33ताङ्साक्पान् नु खाम्बेःक्मान् ले़क्काङ् पेक्, कर इङ्गाॽ आबाःन्जाक्हाॽ आप्फाल्ले़आङ् मे़ले़क्ने़न् मे़बेःक्ने़न्लो॥
34“खिनिॽ याम्दादा सुक्खेवा नु चामा थुङ्मा हे़क्क्याङ् कन् हिङ्मन्ले़न् निङ्साम् चोःक्मो सिङ्सिङ् लॽरे़म्मे़ॽओ, मेःन्ने फाॽग्र हक्चघत् थक्सापुसा इजोओ मे़धाबा हे़क्के कन् ये़न्हाॽओ खिनिॽआङ् के़ध्ये़ॽइरो॥ 35थेआङ्भे़ल्ले़ कन् इक्सादिङ् खाम्बेःक्मो के़वाॽबा के़रे़क् मनाहाॽनुआङ् हे़क्केलॽरिक्के पोङ्लो॥ 36के़रे़क् ये़म्मो आप्फाल्ले़साङ् कन् के़दाबा पाःन्नोलाम् खे़त्छिङ्मा पेःक्मा मुक्साम् के़घोसुम्ल हे़क्क्याङ् मे़न्छाम्साःल्ले़ कुदगि ये़प्मा के़सुक्पा के़बोःक्खिर फाॽआङ् सिङ्सिङ् लॽरे़म्मे़ॽर तुवा चोगे़म्मे़ॽओ॥”
37हे़क्क्याङ् ये़सुरे़ थिक्याःन्धक् माङ्हिम्मो हुॽरुसिर वये़, कर से़न्दिक् याङ्धोःक्से़ जैतुन कोःक्माओ पेर वये़रो॥ 38हे़क्क्याङ् तानाम्सा माङ्हिम्मो खुने़ॽ कुबाःन्जाक् खे़म्से़ मनाहाॽ मे़द्ये़रो॥
Currently Selected:
लुका 21: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
