लुका 19
19
ये़सुन् नु जक्कै
1ये़सुन् ये़रिहो ये़क्यक्लाम् पोःक्खे़र पेर पत्छे़॥ 2खे़न् ये़क्यक्को जक्कै मिङ् के़वाःप्पा याङ्साकुन्धेसाबा तुम्एःङ्याङ् के़भोङ्बाधिक् वये़॥ 3ये़सुन् पेर पत्छे़ल्ले़ खुने़ॽआङ् ओमे़प्मा निङ्वाॽ चोगुआङ् ये़सुरे़ कुओमे़त्छे़ पे, कर ताङ्सा चोगे़बाल्ले़ मनाहाॽरे़ खुने़ॽ मे़धेःक्तुआङ् निमा मे़सुक्तुन्॥ 4हे़क्केःल्ले़ खुने़ॽ तगि पेआङ् ये़सुरे़ कुओमे़त्छे़ लाम्मिल्ले़ कुबेसाङ्बा पःत्छेॽबुङ्मो लासे़आङ् युङ्सिङ्॥ 5ये़सुन् खे़प्मो के़रे़ल्ले़ थो ओमये़आङ् मे़त्तु, “जक्कैए, खे़ने़ॽ हारा थ्ये़ॽओ॥ आइन् इङ्गाॽ के़हिम्मो ने़आबारो॥”
6हे़क्केःल्ले़ जक्कैन् यो थ्ये़आङ् कुसिराॽ पधाङ्थाङे़र ये़सुन् कुहिम्मो लाम्दाःक्मा पिरु॥ 7खे़प्मो के़वाॽबा मनाहाॽरे़ ये़सुन् लायोबाल्ले़ कुहिम्मो याङ्धोःक्से़ पेरो फाॽआङ् कानाक्नाक् मे़लॽरे़रो॥
8याङ्सि जक्कैन् ये़म्सिङ्ङाङ् दाङ्बान् अक्खे मे़त्तु, “इङ्गाॽ कत्तुङ्बा याङ्साकुन्धेन् कुभ्रे़ःङ् याङ्गे़साॽबाहाॽ हाःत्तुङ्सिङ्लो॥ हे़क्क्याङ् आत्तिन्हाॽ इङ्ले़क् मे़त्तुङ्सिङ्ङाङ् यरिक् याङ् फोःक्खुङ्सिङ्ङाङ् वाॽआ, खे़ङ्हाॽ इङ्गाॽ लिसिले़ङ् थारिक् नुःक्तुङ् पिरुङ्सिङ्लो॥”
9हे़क्केःल्ले़ ये़सुरे़ पाःत्तु, “आइन् कन् हिम्सयङ्ङिल्ले़ से़न्लप् खोसुआङ् वाॽरो, थेआङ्भे़ल्ले़ जक्कैःन्नाङ् अब्राहामरे़न्ने कुमुॽइदाङ्सारो॥ 10मे़न्छाम्सान् लायोओ के़माबाहाॽ कोःप्मा नु हिङ्मासि फाॽआङ् त्ये़बारो॥”
साम्म्याङ् याङ्इत्छिल्ले़न् खे़दाॽ
(मत्ति २५:१४-३०)
11कन् पाःन्निन् मे़घे़प्सुआङ् ये़सुरे़ वेॽसमा खे़दाॽधिक् मे़त्तुसि, थेआङ्भे़ल्ले़ खुनिॽ यरुसले़म निःत्ताङ् मे़गे़रे़आङ् मे़वये़, हे़क्क्याङ् कुभारे़ निङ्वाॽफु हाङ्जुम्मिन् खिमो ता फाॽआङ् मे़इःत्तुआङ् मे़वये़रो॥ 12“कुन्धे साबाधिक् माःङ्घा लाजेॽओ हाङ्युक् खोमाआङ् नुःङ्मा तामा फाॽआङ् लाम्दिक् चोगे़रो॥ 13खुने़ॽ पेःक्मानुःल्ले़ तगि थिबोङ् कुसे़वारोबाहाॽ उःत्तुसिआङ् लत्छा लत्छा साम्म्याङ् याङ्#१९:१३ लत्छा लत्छा साम्म्याङ् याङ्—ग्रिक पाःन्दाङ्ङो “१० मिना॥” मिना फाॽइन् ला सुम्सिरे़न् नाम्याक् पोङ्॥ पिरुसिर अक्खे मे़त्तुसि, ‘इङ्गाॽ मे़न्नुःङ् मे़न्दाए थारिक् कल्ले़ ले़ङ्हङ् चोगे़म्मे़ॽओ॥’” 14कर कुयक्युङ्बाहाॽरे़ खुने़ॽ मे़जिःत्तुआङ् कुएगाङ् कुएगाङ् “कन् मनाःल्ले़ आनिगे सम्दाङ् हाङ् चोगुबा सिराॽ मे़धाङ्ङिन्लो” मे़बाःत्तुर इङ्साबाहाॽ मे़बाङ्घुसि॥
15हे़क्क्याङ् खे़ल्ले़ हाङ्युक् खोसुआङ् नुःक्खे़ त्ये़रो॥ आल्ल खुने़ॽ याङ् पिरुसिबा कुसे़वारोबाहाॽ उःत्तुसिआङ् ले़ङ्हङ् के़जोगुम्माङ् आक्खे़म्म्याक् याङ् के़धगुम् फाॽआङ् सेःन्दोसुसि॥ 16थिक्सिगेक्पा से़वारोबाल्ले़ मे़त्तु, “आदाङ्बे, इङ्गाॽ के़याङ्धिक्किल्ले़ वेॽ थिबोङ् याङ् थगुङ्ङाङ् वाॽरो॥” 17हे़क्क्याङ् खे़ल्ले़ मे़त्तु, “नुरे़रो आसेवारोबे, साॽरिक् नुबा के़जोगुरो! खे़ने़ॽ थिबोङ् ये़क्यक् सम्दाङ् सुहाङ्गे़म्बा के़बोङ्लो, थेआङ्भे़ल्ले़ चुक्सा पाःन्नो नसाःन्साबा के़बोःक्खे़रो॥” 18हे़क्क्याङ् निसिगेक्पा से़वारोबाल्ले़ मे़त्तु, “आदाङ्बे, इङ्गाॽ के़याङ्धिक्किल्ले़ वेॽ ङासि याङ् थगुङ्ङाङ् वाॽरो॥” 19हे़क्क्याङ् खे़न् मे़त्तु, “खे़ने़ॽआङ् ङासि ये़क्यक् सम्दाङ् सुहाङ्गे़म्बा के़बोङ्लो॥” 20हे़क्क्याङ् सुम्सिगेक्पा से़वारोबाल्ले़ मे़त्तु, “आदाङ्बे, के़याङ्धिक्किन् बा कप्मो वाॽरो, के़याङ्ङिन् इङ्गाॽ तेत्तो सुङुङ् चिक्खुङ्ङाङ् कत्तुङ्लो॥ 21खे़ने़ॽनु इङ्गाॽ किसाङ्लो, थेआङ्भे़ल्ले़ खे़ने़ॽ के़जिःप्पा के़जोक्॥ खे़ने़ॽ के़म्बिरुन्सिन्बान् के़नाःक्तुसिॽ, के़न्देसुम्बान् के़सुप्सुॽरो॥” 22हे़क्केःल्ले़ हाङ्ङिल्ले़ खे़न् से़वारोबान् मे़त्तु, “खे़ने़ॽ ताक्के़भे़ॽबा सेवारोबे! आल्ल बा खे़ने़ॽ के़बाःन्नोलाम् आप्तिक् कुःत्ने़ॽरो॥ इङ्गाॽ थे मे़बिरुङ्ङिन् बा खे़न् नाःक्तुङ्, थे़मा मे़देसुङ्ङिन् खे़न् सुप्सुङ् फाॽआङ् खे़ने़ॽए निङ्वाॽ के़गत्तुरो॥ 23हे़क्केःल्ले़ खे़न् आयाङ्ङिन् थेआङ् सिङ्नात् के़गे़बाहाॽरो के़न्युक्खुन्? इङ्गाॽ त्याङ्ङिल्ले़ आयाङ्ङिल्ले़ कुस्साग खोसुङ्बा वये़॥” 24खे़न् हाङ्ङिल्ले़ खे़प्मो के़ये़प्पाहाॽ मे़त्तुसि, “खे़ल्ले़ कत्तुबा याङ्इत्छिन् नाप्ते़म्मे़ॽआङ् थिबोङ् याङ्इत्छि के़गप्पे़न् पिरे़म्मे़ॽओ॥”
25हे़क्क्याङ् खे़ङ्हाॽरे़ खुने़ॽ मे़मे़त्तु, “आदाङ्बे, खे़ल्ले़ग आन्देःन्छा थिबोङ् याङ् कत्तुङ्ग!”
26हे़क्केःल्ले़ हाङ्ङिल्ले़ नोगप् पिरुसि, “खे़प्से़म्मे़ॽओ, के़गप्पाल्ले़ आल्लसाङ् यरिक् खोसुॽरो, कर हाःत्ले़ मे़गत्तुन्, खे़ल्ले़ कत्तुबान्नाङ् नाप्लो॥ 27आल्ल इङ्गाॽ खुनिॽ सम्दाङ् हाङ् चोगुङ्नि फाॽआङ् खुनिॽ सिराॽमे़न्धाङ्मनाबा आनिङ्मिहाॽ कप्मो तारे़म्सिम्मे़ॽआङ् इङ्गाॽ आदगिए से़रे़म्सिम्मे़ॽओ॥”
ये़सुन् यरुसले़म्मो मिमिदिङ्नु लाःत्
(मत्ति २१:१-११; मर्कु ११:१-११; युहु १२:१२-१९)
28हे़क्क्याङ् ये़सुरे़ हे़क्के पाःत्तु सुरुआङ् यरुसले़म ले़प्माङ् कुहुॽसाम्बाहाॽरे़ खुनिॽ तगि तगि थासिङ्लो॥ 29हे़क्क्याङ् खुने़ॽ बे़थफागे नु बेथानि पाङ्जुम्हाॽरे़ निःत्ताङ् के़रे़ल्ले़ जैतुन कोःक्माओ ने़प्फु कुहुॽसाम्बाहाॽ उःत्तुसिआङ् अक्खे मे़त्तुसिर पाङ्घुसि, 30“खिन्छिॽ तगाङ्बा पाङ्भेॽओ पेसे़ॽ॥ खे़प्मो के़लाःत्छिल्ले़ आप्फाल्ले़आङ् मे़न्युक्के के़वाॽबा अदङ्साधिक् इमे़घेःक्खुआङ् ये़प्पा के़दुम्सुॽ॥ खे़न् ले़रे़त्छे़ॽआङ् कत्ना फे़त्ते़त्छे़ॽ॥ 31मनाहाॽरे़ थेआङ् कन् अदङ्सान् के़ले़त्छुबाबे फाॽआङ् सेःन्गे़म्लाप्सिने़ फाॽग्र कङ्ग दाङ्बान् चाहाबा चोगे़आङ् वाॽ फाॽआङ् मे़त्ते़से़ॽओ॥”
32हे़क्क्याङ् खे़ङ्हाॽ पेसिल्ले़ ये़सुरे़ पाःत्तुबा हे़क्के से़क्खाए अदङ्सान् निःसे़त्छु॥ 33हे़क्क्याङ् खे़ङ्हाॽरे़ खे़न् ले़रे़त्छुर पत्छे़त्छिल्ले़ खे़प्मो कुन्दाङ्बाहाॽ मे़द्ये़आङ् सेःन्मे़दोसुसि, “थेआङ् कन् अदङ्सान् के़ले़त्छुबाबे?”
34हे़क्केःल्ले़ खे़ङ्हाॽरे़ नोगप् पिरे़त्छु, “कङ्ग दाङ्बान् चाहाबा चोगे़आङ् वाॽरो॥”
35हे़क्क्याङ् खे़ङ्हाॽरे़ खे़न् अदङ्सान् ये़सुरो तारे़त्छुआङ् अदङ्साःल्ले़ कुएःक्को खुनिॽ तेत्हाॽ मे़भे़सु, हे़क्क्याङ् ये़सुन् खे़न् सम्दाङ् मे़युक्खुरो॥ 36खे़न् युक्तुआङ् पेःल्ले़ मनाहाॽरे़ खुनिॽ तेत्हाॽ लाम्मो मे़भे़सुर खुने़ॽ लाम्दाःक्मा मे़बिरुरो॥
37हे़क्क्याङ् ये़सुन् जैतुन कोःक्माओलाम् सङ्माङ् थामा के़बोङ्बा ते़न्नो के़प्मा इःत्ते़आङ् वये़ल्ले़ यरिक् कुहुॽसाम्बाहाॽरे़ निङ्वाॽ के़माबा याःम्बक्हाॽ मे़निबान् मे़इःत्तुआङ् मे़सःत्ते़र यम्बा इक्लाओ अक्खेलॽरिक् निङ्वाॽफुमाङ्ङिल्ले़ कुनारा फोमा मे़हेःक्तु—
38“यहवे दाङ्बाल्ले़ कुमिङ्ङो के़दाबा हाङ्ङिन्
मुॽइसाबा पोङ्लरो॥
साङ्ग्राम्पेदाङ्ङो सनारुङ् पोङ्लरो,
निङ्वाॽफुमाङ्ङिल्ले़ कुमिमिदिङ् पोङ्लरो॥”
39कर खे़प्मो मनालुम्मो के़वाॽबा कुभा फरिसिहाॽरे़ ये़सुन् मे़मे़त्तु, “सिक्साम्बे, खे़ने़ॽ के़हुॽसाम्बाहाॽ हे़क्के मे़बाःत्ते़म्मिन्ने़ॽ फाॽआङ् फे़ःक्ते़से़ॽओ॥”
40हे़क्केःल्ले़ ये़सुरे़ खे़ङ्हाॽ नोगप् पिरुसि, “खे़प्से़म्मे़ॽओ, खे़ङ्हाॽ स्वाःत् मे़युङ्ङिल्ले़ग कन् लुङ्हाॽआङ् मे़सःत्ताङ् मे़बाःत् मे़लःन्लो॥”
ये़सुन् यरुसले़मरे़ कुलागि हाःप्
41कर ये़सुन् यरुसले़म ये़क्यक्किल्ले़ कुबेसाङ् के़रे़ल्ले़ खे़न् ये़क्यक्किन् ओमे़त्तुआङ् हाबे़, 42हे़क्क्याङ् अक्खे पाःत्तु, “आल्ल खिनिॽग सनारुङ् खोमा माराम्मिन् कुसिङ् के़निःत्तुम्मिल्ले़ पोःक्खे़बारो, कर कन् के़रे़क्ग के़मिक्साओलाम् थेःक्सिङ्बेआङ् वाॽरो॥ 43आल्ल के़निङ्मिहाॽरे़ खे़ने़ॽ काक् पिसाङ्लाम् के़म्गप्पाङ् खिरि के़म्धेःक्काङ् चिहुॽ के़म्हुॽबा ये़म् तार पत्लो॥ 44खे़ने़ॽ के़म्य के़म्लुःन्नाङ् के़स्साहाॽनु खाम्मो के़म्दङ्लो॥ थिक् लुङ् सम्दाङ् वेॽ लुङ्ङिन्ने पक्मे़न्धने़न्, थेआङ्भे़ल्ले़ निङ्वाॽफुमाङ्ङिन् खे़ने़ॽ के़से़ःप्से़ ये़बा सुये़म्मिन् के़नाॽरुरो॥”
ये़सुन् माङ्हिम्मो पेक्
(मत्ति २१:१२-१७; मर्कु ११:१५-१९; युहु २:१३-२२)
45-46हे़क्क्याङ् ये़सुन् माङ्हिम्मो लासे़आङ् खे़प्मो ले़ङ्हङ्बाहाॽ अक्खे मे़त्तुसिर नाःप्मा लःप्मा हेःक्तुसि, “साम्योसाप्लाओ साप्ते़आङ् पत्, ‘इङ्गाॽ आहिम्मिङ्ग तुवा चोःक्मा हिम् पोङ्,’#यसै ५६:७; यर्मि ७:११ कर खिनिॽग फाःन्दाहाॽ चिङ्सिङ्मा ते़न् के़जोगुम्माङ् के़वयिॽरो!”
47हे़क्क्याङ् खुने़ॽ थिक्याःन्धक् माङ्हिम्मो निसाम् हुॽरुसिरो॥ कर तुम्निङ्वाॽफुसाम्बाहाॽ, साम्योथिम्साम्बाहाॽ नु लाम्लोबाहाॽरे़ खुने़ॽ से़प्मा निङ्वाॽ मे़जोगु, 48कर आप्तिक् कुःप्मा पान् थेआङ् खे़ङ्हाॽरे़ मे़ङ्घोसुन्, थेआङ्भे़ल्ले़ मनाहाॽरे़ग खुने़ॽ हुॽरुसिबा निसाम्हाॽ खुनिॽ सिराॽ थाङे़र मे़घे़प्सुरो॥
Currently Selected:
लुका 19: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
