तोलिङ्सोमु 35
35
याकुबे़न् बेथेलओ नुङ्ॽ
1खे़ब्याङ् निङ्वाॽफुमाङ्ङिल्ले़ याकुबे़न् मे़त्तुॽ, “पोगे़ॽआङ् थो बेथेलओ पेगे़ॽ हे़क्क्याङ् खे़प्मोए युङे़ॽओ, के़म्भुॽ एसाबरोलाम् खे़ने़ॽ के़घे़त्छिङ्ङे़ल्ले़ खे़ने़ॽओ के़धाःम्सिङ्बा निङ्वाॽफुमाङ्ङिल्ले़ कुलागि खे़प्मो लत्छा ले़त्ति तोःम्मादे़न् थिक् चोगे़ॽओ॥” #तोलिङ् २८:११-१७
2खे़ल्ले़चोगुल्ले़ याकुबरे़ कुहिम्सयङ् हे़क्क्याङ् खुने़ॽनु के़वाॽबाहाॽ के़रे़क् मे़त्तुसि, “खिनिॽ के़गत्तुम्सिम्बा मुरे़न्लाजेॽबा माङ्हाॽ लाप्फेसाम्सिम्मे़ॽ हे़क्क्याङ् आबाङे सेसेसाङ्साङ् चोःक्सिङ्ङाम्मे़ॽआङ् चाङ् ले़क्सिङाम्मे़ॽ॥ 3खे़ब्याङ् आनिॽ बेथेलओ पेगि, हे़क्क्याङ् आङ्गाॽ आदुक्खे़रे़न् ये़न्नो आबेलि के़घे़म्बा हे़क्क्याङ् आङ्गाॽ आत्तान् पेःक्कासाङ् आङ्गाॽनु सोसोरिक् के़वाॽबा निङ्वाॽफुमाङ्ङिल्ले़ कुलागि खे़प्मो आङ्गाॽ लत्छा ले़त्ति तोःम्मादे़न् थिक् चोगुङ्ॽ॥” 4खे़ल्ले़चोगुल्ले़ खे़ङ्हाॽरे़ आबाङे मे़गत्तुबा मुरे़न्लाजेबा माङ्हाॽ हे़क्क्याङ् आबाङे खुनिॽ ने़क्खोओ मे़वारुबा निरिक्वाहाॽ मे़भे़न्दुआङ् याकुबे़न् मे़बिरु हे़क्क्याङ् याकुबरे़ सकेमरे़ कुबेसाङ्बा यहिबा सिङ्बुङ्ङिल्ले़ कुबुङ्ङो लुप्तु॥
5खे़ङ्हाॽ लाम्दिःक्को मे़धासिङ्ङे़ल्ले़ खिर्लिबा ये़क्यक्हाॽओ निङ्वाॽफुमाङ्लाम् किमा यङ्मा त्ये़, हे़क्क्याङ् आत्तिल्ले़आङ् खे़ङ्हाॽ मे़म्भत्तुन्सिन्लो॥
6याकुब हे़क्क्याङ् खुने़ॽनु के़वाॽबा के़रे़क् कनान लाजेॽबा लुज पाङ्जुम्मो (बेथेलआङ् मे़मे़त्तुॽ) मे़गे़रे़॥ 7खे़प्मो खुने़ॽ लत्छा ले़त्ति तोःम्मादे़न् थिक् चोगु॥ खे़न् ते़न्निन् खुने़ॽ ए़ल्बेथे़ल मिङ् वाःत्तु थेआङ्भे़ल्ले़ खुने़ॽ कुम्भुॽरोलाम्बा खे़त्छिङ्ङे़ल्ले़ निङ्वाॽफुमाङ्ङिन् आबाङे खे़प्मो खुने़ॽनु थाःम्सिङ्ङाङ् वये़॥
8खे़प्मो रे़बिकारे़ कुसे़वारोमा दे़बोरान् स्ये़ हे़क्क्याङ् खे़न् बेथेलरे़ कुबेसाङ्बा ये़हिबा सिङ्बुङ्ङिल्ले़ कुबुङ्ङो मे़लुप्तु॥ खे़ल्ले़चोगुल्ले़ खे़न् ते़न्निल्ले़ कुमिङ् अल्लोन कुबत मिङ् मे़वातु॥
9याकुबे़न् पदन आरामलाम् नुःक्से़आङ् याम्मो निङ्वाॽफुमाङ्ङिन् थाःम्सिङ् हे़क्क्याङ् खुने़ॽ हाङ्वा मुॽइसाम् पिरु॥ 10निङ्वाॽफुमाङ्ङिल्ले़ खुने़ॽ मे़त्तु, “खे़ने़ॽ के़मिङ्ङिन्ग याकुबरो, कर आल्लआङ्धो खे़ने़ॽ याकुब के़मे़म्मे़त्ने़ल्लो, खे़ने़ॽ के़मिङ् इस्राइल पोङ्लो॥” खे़ल्ले़चोगुल्ले़ निङ्वाॽफुमाङ्ङिल्ले़ कुमिङ् इस्राइल मे़त्तु॥ #तोलिङ् ३२:२८ 11निङ्वाॽफुमाङ्ङिल्ले़ खुने़ॽ मे़त्तु, “आङ्गाॽ मुक्साम्दाङ्बा निङ्वाॽफुमाङ्आरो॥ फुङ्वाफे़क्ते़ॽर पेगे़ॽ, हे़क्क्याङ् यरिक् पोःन्दे़ॽर पेगे़ॽ॥ लत्छा सुबाङ् हे़क्क्याङ् सुवाङ्हाॽरे़ खुन्छि लुप्हाॽ खे़ने़ॽलाम्मे मे़बोःन्लो, हे़क्क्याङ् हाङ्हाॽआङ् खे़ने़ॽलाम् मे़लःन्लो॥ #तोलिङ् १७:४-८ 12अब्राहाम नु इसहाक्के़न् पिरुङ्सिङ्बा लाजेन् आङ्गाॽ खे़ने़ॽ पिने़, हे़क्क्याङ् आङ्गाॽ खे़न् लाजेन् खे़ने़ॽ के़एगाङ् के़स्सा के़म्मे़न्छाॽहाॽ पिरुङ्सिङ्ॽ॥” 13खे़ब्याङ् खुने़ॽनु ताॽजे़क्खे़बा ते़न्नोलाम् निङ्वाॽफुमाङ्ङिन् थो पेगे़रो॥
14निङ्वाॽफुमाङ्ङिन् खुने़ॽनु ताॽजे़क्खे़बा ते़न्नो याकुबरे़ निङ्वाॽसोक्ले़ लत्छा लुङ् सित्लाङ् थिक् फोःक्सु॥ हे़क्क्याङ् खुने़ॽ खे़ॽयो निङ्वाॽफुमाङ्ङो चे़ल्ले़क्सेॽ थि सिदुङ्जभा तोःन्दु हे़क्क्याङ् निःङ्गेॽइल्ले़ ले़ःक्तु॥ #तोलिङ् २८:१८-१९ 15हे़क्क्याङ् याकुबरे़ निङ्वाॽफुमाङ्ङिन् खुने़ॽनु ताॽजे़क्खे़बा ते़न्निल्ले़ कुमिङ् बेथेल युक्खु॥
राहेल्ले़न् मासिङ्ॽ
16खे़ङ्हाॽ याम्मो बेथेललाम् मे़धासिङ्ङाङ् एप्रात के़प्मा मिसाक्लक् वये़ल्ले़ राहेल्ले़न् कुसादुङ्ङिल्ले़ तरु हे़क्क्याङ् खे़न् साॽरिक् तुगे़॥ 17खे़न् कुसादुङ्ङे़ल्ले़ तम्मा ले़रुआङ् हुक्के़लामे़ल्ले़ खे़न् मे़त्तु, “मे़ङ्गिएओ वेॽ के़स्सा ये़म्बित्छाधिक् पोःक्खे़॥” 18खे़ल्ले़ कुसक्मा पेःक्मा चोगे़ल्ले़ खे़ल्ले़ खे़न् अङे़ःक्वान् बे़न-ओनि (आङ्गाॽ आदुक्खेःल्ले़ कत्तुङ्बा सा) मिङ् वाःत्तु॥ कर कुम्बारे़ खे़न् अङे़ःक्वान् बेन्यामिन (आजुक्वा हुक् सा) मिङ् वाःत्तु॥
19अक्खेलॽरिक् राहेल्ले़न् स्ये़, हे़क्क्याङ् एप्रात (बेथले़हे़म) पेःक्मा लाम्मो खे़ङ्हाॽरे़ खे़न् मे़लुप्तु॥ 20याकुबरे़ खे़ल्ले़ कुइःप्पुङ् सम्दाङ् लत्छा सित्लाङ्धिक् लेःत्तु॥ कन् राहेलरे़ कुइःत्तोबा सित्लाङ्ङिन् आल्लो थारिक्आङ् ने़रो॥
21इस्राइलले़न् लाम्दिःक्को तगि थासिङ् खुने़ॽ मिग्दल एदेरलाम् नाधाःम्बि साःङ्गाहिम् लेःत्तु॥
याकुबरे़ कुस्सा कुएहाॽ
(१ साप्मु २:१-२)
22इस्राइलले़न् खे़न् लाजेॽओ वये़ल्ले़ रुबे़न्ने़न् कुम्बारे़ कुजक्मेःत् बिल्हाःन्नु इप्से़, हे़क्क्याङ् इस्राइलरे़ कन् पाःन्निन् खे़प्सु॥ #तोलिङ् ४९:४
याकुबरे़ थिक्ने़त् कुस्सा ये़म्बित्छाहाॽ मे़वये़—
23लिआ ले़प्माङ्बा कुस्साहाॽ
तुम्बे़न् रुबेन
खे़ब्याङ् सिमियोन, ले़बि, यहुदा, इस्साखार हे़क्क्याङ् जबलुन॥
24राहेल ले़प्माङ्बा कुस्सा ये़म्बित्छाहाॽ
युसुफ नु बेन्यामिन॥
25राहेलरे़ कुसे़वारोमा बिल्हालाम्बा के़बोङ्बा कुस्सा ये़म्बित्छाहाॽ,
दान नु नप्तालि॥
26लिआरे़ कुसे़वारोमा जिल्पा ले़प्माङ्लाम् के़बोङ्बा कुस्सा ये़म्बित्छाहाॽ
गाद नु आसेर॥
पदन आरामओ सागे़वाःन्छिङ्बा याकुबरे़ कुस्सा ये़म्बित्छाहाॽ हाबा कन्हाॽसिरो॥
इसहाक्के़न् मासिङ्ॽ
27याकुबे़न् खुने़ॽ कुम्बा इसहाकरो मम्रे इग्र किर्यतअर्बाओ त्ये़ (खे़ङ्ग हे़ब्रोनरो), खे़प्मो अब्राहाम नु इसहाक युङे़त्छिआङ् वये़सि॥ #तोलिङ् १३:१८ 28इसहाक्के़न् किप्थिक्काङ् ये़त्पोङ् तङ्बे के़रे़आङ् वये़॥ 29खे़ब्याङ् इसहाके़न् मासिङ्॥ खुने़ॽ खदाक्मि तुम्से़र थारिक् हिङे़ हे़क्क्याङ् कुसुधे़बा कुधाक्थे़बाहाॽनु तङ्से़ पे॥ हे़क्क्याङ् कुस्सा एसाब नु याकुबरे़ खे़न् लुप्ते़त्छु॥
Currently Selected:
तोलिङ्सोमु 35: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
