तोलिङ्सोमु 32
32
याकुबे़न् एसाबरे़ कुदुम्से़ पेःक्मा यारिप् पोङ्ॽ
1याकुबे़न्नाङ् कुहिम् ले़प्माङ् थासिङ्, हे़क्क्याङ् निङ्वाॽफुमाङ्ङिल्ले़ कुमाङ्लाइङ्बाहाॽरे़ खुने़ॽ मे़दुमु॥ 2याकुबे़ल्ले़ खे़ङ्हाॽ निसुसिआङ् पाःत्तु, “कङ्ग निङ्वाॽफुमाङ्ङिल्ले़ कुधक्सुबा कुदुरायक्लो!” खे़ल्ले़चोगुल्ले़ खुने़ॽ खे़न् ते़न्निल्ले़ कुमिङ् महनोम#३२:२ महनोम—कन् मिङ्ङे़ल्ले़ कुबेन् हिब्रुओ “ने़त्छि तुरायक्” पोङ्॥ मे़त्तु॥
3कुम्भुॽ एसाबरे़ कुदुम्से़ ए़दोम लाजेॽओबा सेइर ते़ङ्गप्पो याकुबे़ल्ले़ खुने़ॽनुःल्ले़ तगि इङ्घङ् के़साबाहाॽ पाङ्घुदेसुसि॥ 4याकुबे़ल्ले़ खे़ङ्हाॽ अक्तङ्बा इङ्जाङ् पिरुसि, “आङ्गाॽ आन्दाङ्बा एसाबे़न् अक्खे मे़त्ते़म्मे़ॽ, के़से़वारोबा याकुबरे़ अक्खे पाःत्तु, ‘आङ्गाॽ लाबाने़न्नु वयाङ् हे़क्क्याङ् आल्ल थारिक् खुने़ॽनु वयाङ्॥ 5आङ्गाॽ पित्हाॽ, अदङ्हाॽ, मे़ल्लुक् मे़ःन्दाहाॽ हे़क्क्याङ् से़वारोबाहाॽ नु से़वारोमाहाॽ कत्तुङ्सिङ्ॽ॥ आल्ल आङ्गाॽ आन्दाङ्बाल्ले़ कुसिराॽ थाङ्ङाबि फाॽआङ् कन् इङ्घङ्ङिन् हाङुङ्बारो॥’”
6खे़न् इङ्घङ् के़साबाहाॽ याकुबरो मे़नुःक्से़ मे़भे़रे़आङ् खे़ङ्हाॽरे़ मे़बाःत्तु, “आनिगे पेःक्मनाआङ् के़म्भुॽ एसाबे़न् तुम्ना, हे़क्क्याङ् आल्लो खुने़ॽ किप् लिसि मनाहाॽनु खे़ने़ॽ के़दुम्से़ फे़न्ल पत्॥”
7हे़क्केःल्ले़ याकुबे़न् साॽरिक् किसे़आङ् निङ्साम्मो थ्ये़॥ खुने़ॽनु के़वाॽबा मनाहाॽ कुलुप् ने़त्छिओ फःक्खुसि हे़क्क्याङ् मे़ल्लुक् मे़ःन्दाहाॽ, पित्हाॽ, हे़क्क्याङ् उमेहाॽआङ् कुलुप् ने़त्छिओ फःक्खुसि॥ 8“एसाबे़न् फे़न्नाङ् लत्छा लुप्पोबाहाॽ से़रुसिसाङ् वेॽसमा लुप्पोबाहाॽग मे़दाङ्” फाॽआङ् खुने़ॽ निङ्वाॽ इःत्तु॥
9खे़ब्याङ् याकुबे़ल्ले़ पेलिगे़न् तुवा चोगु, “आन्धे़बा अब्राहाम्मिल्ले़ कुनिङ्वाॽफुमाङ्, आम्बा इसहाक्के़ल्ले़ कुनिङ्वाॽफुमाङ्, यहवे दाङ्बाए, ‘खे़ने़ॽ आबाङे के़लाजेॽओ हे़क्क्याङ् के़गाॽइहाॽओ नुःक्खे़ पेगे़ॽओ, हे़क्क्याङ् आङ्गाॽ नुरिक् मे़त्ने़रो’ के़मे़त्ताङ्ङाङ् वये़॥ 10खे़ने़ॽ के़से़वारोबान् उसेःन्धाङ् के़जोगुबा लुङ्माॽ तुक्मे़न् नु नसाःन्साबा पोङ्मा पाःन्ने़न् आङ्गाॽ मिसाक्काङ् मे़लाॽआन्लो॥ थेआङ्भे़ल्ले़ आङ्गाॽ यर्दन यङ्घङ्ङिन् काःक्तुङ्ङाङ् फे़राङ्ङिल्ले़ लत्छा तक्कात् थिक्लक् फे़त्तुङ्ङाङ् वये़॥ कर आल्लो कुलुप् ने़त्छि हिम्सयङ् नु कम्भ्यारिक् यरिक् थक्साहाॽ कत्तुङ्सिङ्ॽ॥ 11आङ्गाॽ पेलि फाक्ने़रो, आम्भुॽ एसाबरे़ कुहुक्कोलाम् आङ्गाॽ से़ःप्ताङ्ङे़ॽओ, थेआङ्भे़ल्ले़ आनिगे कुम्मा कुस्साहाॽआङ् के़रे़क् से़रिगे़बि फाॽआङ् आङ्गाॽ खुने़ॽनु किआरो॥ 12कर खे़ने़ॽ के़बाःत्तुआङ् वाॽ, ‘आङ्गाॽ से़क्खासाङ् खे़ने़ॽ के़नुॽ के़दार चोगुङ्, हे़क्क्याङ् के़मुॽइदाङ्साहाॽ वरःङ्ङोबा ये़ःङ्घा कुइसिक् निःत्मे़दे़त् चोगुङ्सिङ्ॽ॥’” #तोलिङ् २२:१७
13खे़न् से़न्दिक् खुने़ॽ हाबा खे़प्मो याङ्धोःक्ते़आङ् ने़स्से़, हे़क्क्याङ् खुने़ॽ कुयाङ्सा कुन्धेलाम् कुम्भुॽ एसाबे़न् पिमा फाॽआङ् मिक्तोक् सुङ्हाॽ से़न्दु॥ 14खे़न् मिक्तोक् सुङ्हाॽ—कुगिप् ने़त्छि मे़ःन्दामा, निबोङ् कुम्बाबा मे़ःन्दा, किप् ने़त्छि कुम्मामा मे़ल्लुक् हे़क्क्याङ् निबोङ् थुःम्बा, 15सुम्बोङ् के़धाप्मा उमे नु उमेसाःत्हाॽ, हे़क्क्याङ् लिबोङ् पित्मा, थिबोङ् पित्, निबोङ् कुम्मामा अदङ् नु थिबोङ् अदङ्हाॽ मे़वये़॥ 16खुने़ॽ खे़ङ्हाॽ के़रे़क् कुलुप् कुलुप् से़न्दुसि हे़क्क्याङ् कुसे़वारोमाहाॽरे़ खुन्छिॽ कम्ब्राङ्ङो पिरुसिआङ् खे़ङ्हाॽ मे़त्तुसि, “आङ्गाॽनुःल्ले़ तगि पेगे़म्मे़ॽ हे़क्क्याङ् थक्सा लुप्हाॽरे़ खुन्छिॽलुम्मो मिसाक् ताम्दाम्बा चोगे़म् ने़से़म्मे़ॽ॥”
17खुने़ॽ के़रे़क्नुःल्ले़ तगि लाम्गे़लोबान् सुजा पिरुआङ् मे़त्तु, “आम्भुॽ एसाबरे़ खे़ने़ॽ के़दुम्माङ् से़ःन्गे़दोःॽ ‘खे़ने़ॽ हाःत्ले़ कुमनाने़? खे़ने़ॽ आत्तान् के़बेःक्पाने़? के़दगि के़बेःक्पा कन् थक्सालुप्हाॽ हाःत्ले़न्छिबे?’ 18खे़ने़ॽ अक्खे मे़त्ते़ॽ, ‘खे़ङ्हाॽग के़से़वारोबा याकुबरे़ कुधक्सासि॥ कङ्हाॽ के़रे़क् आदाङ्बा एसाबरे़ कुलागि मिक्तोक् सुङ्ले़ लागि हाङुबा॥ खुने़ॽग आनिगे एगाङ् फे़ल्ल पत्॥’”
19खुने़ॽ निसिगेक्पा, सुम्सिगेक्पा हे़क्क्याङ् थक्सालुप् के़दिःक्पाहाॽ के़रे़क् इङ्जाङ् पिरुसि, “एसाबे़न् केदुम्मुम्मिल्ले़ खिनिॽ हाबाहे़क्के मे़त्ते़म्मे़ॽओ॥ 20‘के़से़वारोबा याकुबे़न् आनिगे एगाङ् एगाङ् फे़ल्ल पत्’ फाॽआङ् एसाबे़न् मे़त्ताम्मे़ॽओ॥” थेआङ्भे़ल्ले़ “आङ्गाॽ आदगि हाङुङ्बा मिक्तोःक्किल्ले़ एसाबे़ल्ले़ कुसाक्के़न्निन् चिःक्मा सुक्तुबिला, हे़क्क्याङ् खे़न् एगाङ् आङ्गाॽ तुमुङ्ङिल्ले़ खुने़ॽ ताःक्काबिला” फाॽआङ् इःत्तुआङ् वये़॥ 21खे़ल्ले़चोगुल्ले़ याकुबरे़ कुमिक्तोक् सुङ्हाॽ खुने़ॽनुःल्ले़ तगि हाङुदेसु, हे़क्क्याङ् खुने़ॽ आबाङेग खे़न् से़न्दिक् आबाङे कुसाःङ्गा हिम्मो याःक्ते़॥
पनिएल मे़प्मनाबा ते़न्नो याकुबे़न् चुङ्ॽ
22खे़न् से़न्दिक् याकुबे़न् पोगे़, हे़क्क्याङ् ने़त्छि मे़ल्लिङ्गे़न् कुमेःत्हाॽ, ने़त्छि कुसे़वारोमाहाॽ नु थिबोङ्ङाङ् थिक् कुस्सा ये़म्बित्छाहाॽ याङ्सिङ्ङाङ् यब्बोक यङ्घङ्ङिन् काःक्तु॥ 23खुने़ॽ खे़ङ्हाॽ यङ्घङ्ङिल्ले़ नाधाःम्बि पाङ्घुसि, हे़क्केलॽरिक्के खुने़ॽ कत्तुबा के़रे़क् कुजिगक्वाहाॽआङ् हाङुदेसु॥ 24अक्खेलॽरिक् याकुबे़न् एःक् याःक्ते़॥ हे़क्क्याङ् लत्छा मनाधिक् खामे़न्ओःत्ते थारिक् खुने़ॽनु चुङे़॥ #होसे १२:३-४ 25खे़न् मनाःल्ले़ याकुबे़न् नाःम्मा मे़सुक्तुम्बा निसुआङ् खे़ल्ले़ याकुबरे़ कुलाङ्भिःप्मे़न् सुसु पिरु, खे़ल्ले़चोगुल्ले़ खे़न् मनाःन्नु चुङे़ल्ले़ याकुबरे़ कुलाङ्ङिन् लिघे़ॽ ले़न्दे़॥ 26खे़ब्याङ् खे़न् मनाःल्ले़ मे़त्तु, “खाओःप्मा चोक्, आङ्गाॽ पेःक्मा पाङ्घाङ्ङे़ॽ॥”
कर याकुबरे़ नुगप् पिरु, “आङ्गाॽ मुॽइसाम् के़म्बिआन्ल थारिक् मे़ले़त्ने़न्॥”
27खे़न् मनाःल्ले़ मे़त्तु, “के़मिङ् थेग?”
खुने़ॽ नुगप् पिरु, “याकुब॥”
28खे़न् मनाःल्ले़ खुने़ॽ मे़त्तु, “आल्ल खे़ने़ॽ के़मिङ् याकुब मेःन् कर इस्राइल#३२:२८ इस्राइल—कन् मिङ्ङे़न् हिब्रुओ “खुने़ॽ निङ्वाॽफुमाङ्ङे़न्नु थक्” इग्र “निङ्वाॽफुमाङ्ङिन् थक्” खे़म्दे़त्॥ पोङ्, थेआङ्भे़ल्ले़ खे़ने़ॽ निङ्वाॽफुमाङ्ङिन्नु हे़क्क्याङ् मे़न्छाम् याप्मिहाॽनु के़धक्ते़आङ् के़नाःन्दुरो॥” #तोलिङ् ३५:१०
29खे़ब्याङ् याकुबे़ल्ले़ खे़न् सेःन्लाप्तु, “आङ्गाॽ पेलि फाक्ने़, के़मिङ् थेग? मे़त्ताङ्ङे़ॽ॥” #खालो १३:१७-१८
कर खे़ल्ले़ मे़त्तु, “थेआङ् आमिङ् से़ःन्गे़दोआबे?” खे़ब्याङ् याकुबे़न् मुॽइसाम् पिरु॥
30खे़ल्ले़चोगुल्ले़ याकुबरे़ खे़न् ते़न्निन् पनिएल#३२:३० पनिएल—कन् मिङ्ङे़न् हिब्रुओ “निङ्वाॽफुमाङ्ङिल्ले़ कुनारा” खे़म्दे़त्॥ मिङ् वाःत्तु, थेआङ्भे़ल्ले़ “निङ्वाॽफुमाङ्ङिन् निसुङ्ङाङ्साङ् आङ्गाॽ कुहिङ्वे़त्ते वाॽआरो” लॽरिक् खुने़ॽ पाःत्तु॥
31खे़ल्ले़ कुलाङ्ङिल्ले़ चोगुल्ले़ ए़ःक्खङ् ए़ःक्खङ् लॽरे़र लाङ्घेगे़ हे़क्क्याङ् नाम् के़रे़ल्ले़ पनिएल मे़प्मनाबा ते़न्निन् ले़रुध॥ 32खे़न् मनाःल्ले़ याकुबरे़ कुलाङ्भिःप्मो सुसु पिरु खे़ल्ले़चोगुल्ले़ आल्लो थारिक्साङ् इस्राइलिहाॽरे़ सालाङ्भिःप्मोबा सान् मे़न्जने़ल्लो॥
Currently Selected:
तोलिङ्सोमु 32: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
