MARAKO 7

1KANDI bakagoma namberali Abafalisayo nabahandiki abamu, 2abarugire Yerusalemu, kandi bakarora abegeswabe abamu nibalya ebyokulya byabu nebyara ebibihire, nibyo bitanabire. 3Baitu Abafalisayo Nabayudaya bona, obubatanabaga muno omu byara byabu, tibalyaga, baitu bakwataga engeso ezabakuru: 4kandi obubarugaga omu katale obubatanabaga tibalyaga: kandi haroho ebindi bingi, ebibahairwe okubikwata okwogyaga empwahwa, nebibindi, nebinaga ebyemirirnga. 5Abafalisayo nabahandiki bamukaguza ngu Kiki abegeswa bawe ekibahinzire okugenda omu ngeso zabakuru, baitu berira kwonka nebyara ebibihire? 6Yabagambira ati Isaya akaragura kurungi halinywe abagobya, nkokukyahandikirwe ngu

Abantu banu nibantaho ekitinisa ekya ha munwa,

baitu emitima yabu endi hara. 7Baitu nibandamiza busa,

Nibegesa ebiragiro byabantu ongu nibyo byokukwata. 8Inywe muleka ekiragiro kya Ruhanga, nimukwata engeso zabantu. 9Yabagambira ati Nimwangira kimu ekiragiro kya Ruhanga, mukwate engeso zanyu. 10Baitu Musa akagamba ati So na nyoko obatinege: kandi ati Anyakugeya ise rundi nyina bamuitege mali: 11baitu inywe mugamba ngu Omuntu obwaraba nagambira ise rundi nyina ati Kyona ekinkukuhaire okukugasira niyo Korobani, nukwo kugamba ngu Ekyokuhongera Ruhanga: 12timukyamuleka kuko’ra ekintu ise nobwakuba nyina 13nimuihaho ekigambo kya Ruhanga obwengeso zanyu, ezimwayegeseze inywe: kandi mukora ebindi bingi nkebi. 14Kandi yagaruka okweta ekitebe namberali, yabagambira ati Mumpu’re inywena, mwetegereze; busaho kintu ekyaheru yomuntu 15obukitaha omuliwe ekirukusobora okumusisa: baitu ebinyakuruga omu muntu, nibyo bimusisa omuntu. 16Anyakuina amatu agokuhu’ra ahu’re. 17Kandi obuyatahire omu nju, arugire omu kitebe, abegeswabe bamukaguza orufumo oru. 18yabagambira ati Nukwo nainywe timunyina magezi? Timurukwetegereza ngu Kyona ekinyakuli aheru obukitaha omu muntu, 19tikisobora kumusisa; baitu tikitaha omu mutimagwe, rundi omundaye, nikihinguramu nikigenda aheru? Akagamba ati nasemeza ebiribwa byona. 20Yagamba ati Ekinyakuruga omumuntu, nikyo kimusisa omuntu. 21Baitu omunda omu mitima yabantu nuho harugamu ebitekerezo ebibihire, 22Orwanju, okuiba,okuita, obusihani, okwegomba, ebyokusisa, ebisuba, okwanjuka,eriso eribi, okujuma, emyehembo, obudomadoma; 23ebibihire ebi byana biruga omunda, kandi bimusisa omuntu.

24Kandi akaimuka, yarugayo, yagenda ha mitano ya Turo na Sidoni. Kandi akataha omu nju, atarukwenda omuntu wena okumanya. 25Baitu ahonaho omukazi akabanyina akaisikike akabaloho omuzimu omubi, obuyamuhulire, yaija natereza amaju ha bigerebye. 26Kandi omukazi akabali Muyonani, ihangalye Musorifoiniki. Yamwesengereza abinge omuzimu ha muisikiwe. 27Yamugambira ati leka abana bamale okuiguta: baitu tikiri kirungi okukwata ebyokulya byabana, okubinagira obubwa. 28Baitu yagarukamu namugambira ati Nukwo, mukama wange; nobubwa nabwo bulya omu rwemo oburagalika obwabana. 29Yamugambira ati Habwekigambo kinu oyegendere, omuzimu gurugire ha muisiki wawe. 30Yagarukayo omu njuye, yasanga omwana abyamibwe ha kitabu, nomuzimu gumurugireho.

31Kandi yaruga ha mitano eya Turo, yaija naraba omu Sidoni, nahagati omu mitano eya Dekapoli, yahika ha nyanja eya Galiraya. 32Baleta namberali omufu wamatu, atarukugamba kurungi; bamwesengereza okumutaho omukonogwe. 33Yamuiha omu kitebe omunsita, yamuta enkumu omu matuge, yacwa amacwanta, yamukoraho ha rulimi; 34yarora haiguru omu iguru, yasinda, yamugambira ati Efasa, nukwo kugamba ngu Iguka. 35Amatuge gaiguka, amasanga gorulimirwe gaboho’roka, yagamba kurungi. 36Kandi yabatere’ra batagambirago muntu: baitu nkokuyayeyongire bati muno muno okukirangana. 37Kandi bahuni’ra muno muno ihano, nibagamba ngu Byona abikozire kurungi: ahuliza abafu bamatu, kandi agambisa abafu bakanwa.

Currently Selected:

MARAKO 7: BRR64

Highlight

Copy