YOSUHA 16
16
1KANDI omugabo ogwagabirwe abana ba Yusufu gukabandiza ha Yorudani Yeriko, ha maizi ga yeriko oburugaizoba, niryo irungu, gwatemba okuruga Yeriko gwaraba omu nsi eyensozi okuhikya Beseri; 2Gwaruga beseri, gwahika Ruzi, gwahinguraho gwahika ha mutano gwa Abaraki okuhikya Atarosi; 3Gwasirimuka obugwaizoba okuhikya omutano gwa Abayafuleti, okuhikya omutano gwa Besi-horoni eya ifo, nokuhikya Gezere: kandi gwagarukira ha nyanja. 4Kandi abana ba Yusufu, Manase na Eferaimu bahabwa obugwetwa bwabu. 5Nomutano gwabana ba Eferaimu nkebitabu byabu okubiri ngunu: omutano ogwobugwetwa bwabu oburugaizoba gukaba guli Atarosi-adara, okuhikya Besi-horoni eyeruguru; 6kandi omutano gwarugayo gwagenda obugwaizoba Mikimesasi ha bukizi bwemoso: kandi omutano gwakikira oburagaizoba okuhikya Taanasi-siro, gwahinguraho ha rubaju rwa Yanoha orwoburugaizoba; 7kandi gwasirimuka okuruga Yanoha okuhikya Atarosi, na Naara, gwahika Yeriko, gwagarukira Yorudani. 8Okuruga Tapuha omutano gwahinguraho gwaraba obugwaizoba okuhikya akambu Kana; kandi gwagarukira ha nyanja. Bunu nubwo bugwetwa obworuganda rwa bana ba Eferaimu nkebitabu byabu okubiri; 9hamu nembuga ezasorolirwemu abana ba Eferaimu hagati omu bugwetwa bwa bana ba Manase, embuga zona hamu nebika byazo. 10Kandi batabingemu Abakanani abatahaga Gezere: baitu Abakanani batahaga hagati omu Eferaimu, nokuhika hati, bafoka abairu okukora omulimo gwobuiru.
Currently Selected:
YOSUHA 16: BRR64
Highlight
Share
Copy
Want to have your highlights saved across all your devices? Sign up or sign in
Bible in Runyoro-Rutooro 1964 Version © Bible Society of Uganda, 1964.
