YOBU 32
32
1NIKYO abasaija abo abasatu balekera okugarukamu Yobu, baitu akabali wokuhiki’ra omu maisoge wenka.
2Nubwo okubihirwa kwa Erihu mutabani wa Barakeri Omubuzi, kwayaka: hali Yobu nuho hayakurwe okubihirwakwe, baitu akeyihaho wenka omusango okukira Ruhanga.
3Kandi okubihirwakwe kwayakira enganjanize isatu, baitu batabone ekyokugarukamu, baitu Yobu bakamucwera omusango.
4Lero Erihu akaba alinzire okubaza na Yobu, baitu bakamukira obukuru. 5Kandi Erihu obuyaboine tiyaboine tiharoho ekyokugarukamu omu kanwa kabasaija abo abasatu, okubihirwakwe kwayaka.
6Erihu mutabani wa Barakeri
Omubuzi yagarukamu nagamba ati
Nyowe ndi muto, kandi inywe muli bagurusi mali;
Nikyo nayigaliririze, ntarukuguma okuboleka okutekereza kwange.
7Nkagamba nti Ebiro nibyo bihikirire okugamba,
Kandi emyaka emingi esemerire okwegesa amagezi.
8Baitu haroho omwoyo omu bantu,
Kandi orwoya Rwowobusobozi bwona nurubaha okwetegereza.
9Tabali bakuru abanyina amagezi,
Nobubakuba abagurusi abarukwetegereza ebyobulyo.
10Nikyo ngambire nti Mumpu’re;
Nanyowe ndayoleka okutekereza kwange.
11Dora, nkalinda ebigambo byanyu,
Nkahwituka okuhu’ra ebyobulyo byanyu,
Obumwaseruire ekimuramba.
12Ego, nkabategera amatu,
Kandi, dora, busaho asinguire Yobu,
Rundi agarukuremu ebigambobye, omulinywe.
13Mwerinde muleke okugamba ngu Tuzoire amagezi;
Ruhanga nasobora okumusingura, tali muntu:
14Baitu tahakaine nanyowe ebigambobye;
Kunu tindimugarukamu nebigambo byanyu.
15Bahunirire, tibakigarukamu:
Tibaloho ekigambo ekibaragamba.
16Nyowe ndinde? Baitu tibarukugamba.
Baitu bemerire kwonka, batakigarukamu?
17Nanyowe ndayanukura ebyange,
Nanyowe ndayoleka okutekereza kwange.
18Baitu nyijuire ebigambo;
Omwoyo oguli omunda yange nugwo gumpambiriza.
19Dora, enda yange eri nkamarwa agatanyina hokuturukira;
Nkendyanga empyaka eziri haihi okuhulika.
20Ndagamba, nukwo mpumule;
Ndayasamya eminwa yange ningarukamu.
21Kandeke, mbesengerize, okusorora omu bantu;
Kunu timpe muntu wena amabara agokunyumiza. 22Baitu timanyire okuha amabara gokunyumiza;
Omuhangi wange yakunyihireho bwango.
Currently Selected:
YOBU 32: BRR64
Highlight
Share
Copy
Want to have your highlights saved across all your devices? Sign up or sign in
Bible in Runyoro-Rutooro 1964 Version © Bible Society of Uganda, 1964.
