Jon 17

Bàu Waiq Khàn da Chuaq Jêxu

1Jò Chuaq Jêxu hêq ca doi bàu aih, Haq ngoi ngan ta plình waiq khàn:

“Baq ôi, khoi trùh jò xìn Ìh broq ca Con jah 'ngah 'ngai waq ca Con hadai broq ca Baq jah 'ngah 'ngai.

2“ 'Màng ca Ìh khoi am ca Con cwìang itai enh 'nhèq ca mangai dìq dŏng, Con am ca wì can rìh hloi hloi, aih mangai Baq ma khoi jao am ca Con. 3Can rìh hloi hloi, aih canao loq ca Baq, Boc Plình joq 'nàng, wa Chuaq Jêxu Crich ma Ìh khoi thê trùh. 4Au khoi broq 'ngah 'ngai hiniq Ìh ŏi crŏng taneh. Au khoi broq dìq bìac ma Ìh khoi jao ca Au broq. 5Manàiq cô, xìn Baq broq Au jah 'ngah 'ngai lem lình enh ngìa ca Baq, aih 'ngah 'ngai lem lình ma Au i pajùm ca Ìh adroi ca jò broq plình crŏng taneh.

6“Au khoi pa'noh hiniq Ìh am ca wì Ìh ma khoi am ca Au enh crŏng taneh. Wì haq mangai da Ìh, èh Ìh khoi am wì ca Au. Wì khoi iu wèq bàu Ìh. 7Manàiq cô wì loq rìm bìac ma Ìh khoi am ca Au, dìq dŏng trùh enh Ìh. 8Ma jah 'màng aih bàu ma Ìh khoi doi ca Au, Au doi ca wì. Wì iu bàu cô wa wì loq Au trùh enh Ìh, wa lùi Ìh khoi thê Au trùh ta cô. 9Au waiq khàn am ca wì. Au ùh waiq khàn am ca mangai crŏng taneh, mahaq waiq khàn am ca wì ma Ìh khoi am ca Au, ma jah 'màng aih wì mangai da Ìh. 10Rìm bìac Au ma i, aih bìac da Baq, wa dìq dŏng bìac cleq da Baq, hadai aih da Au. Au jah 'ngah 'ngai lem lình nhò wì haq. 11Manàiq Au ùh ŏi ta crŏng taneh hòm, mahaq wì haq xôq ŏi ta crŏng taneh. Au hlài ta Ìh. Waiq Baq Hadròih, xìn wèq ban wì ŏi ta hiniq Ìh, hiniq ma Ìh khoi am ca Au, waq ca wì broq mòiq manoh 'màng ca Ba xôq mòiq manoh. 12Jò Au ŏi ta wì, Au khoi wèq ban wì ma Ìh khoi am ca Au ŏi ta hiniq Ìh. Au khoi wèq ban wì haq đòiq ùh hnhung mòiq ngai, enh gùng ca mangai ma jah creo con da bìac raliang cađac, tiaq bàu ma khoi achìh ta Sech Hadròih jah xìt.

13“Manàiq cô Au hlài ta Ìh. Jò Au ŏi ta crŏng taneh, Au doi dìq ca bìac cô waq ca can bùi lem da Au jah ùc bình ta manoh wì. 14Au khoi doi ca wì bàu Ìh. Crŏng taneh khoi git ca wì taiq wì ùh broq mangai crŏng taneh tìah ca Con hadai ùh broq Mangai da crŏng taneh. 15Au ùh waiq xìn Baq yŏc 'noh wì khoi enh crŏng taneh, mahaq xìn Ìh wèq ban wì khoi ca can kiac dù. 16Wì haq ùh broq mòiq manoh ca mangai crŏng taneh, 'màng ca Au ùh broq mòiq manoh ca mangai crŏng taneh. 17Xìn Ìh yŏc bàu joq 'nàng broq wì wìa mangai hadròih. Bàu Ìh aih bàu joq 'nàng. 18Ìh khoi thê Au trùh crŏng taneh 'màng leq, Au hadai thê wì lam ta crŏng taneh. 19Taiq wì ma Au broq hadròih dađeh, waq ca wì hadai jah wìa hadròih nhò bàu joq 'nàng.

20“Au ùh xài toq waiq khàn am ca wì, mahaq Au waiq khàn am dìq dŏng mangai ma lùi Au nhò bàu anoi hnài wì haq. 21Waq ca wì dìq dŏng broq mòiq, 'màng ca Baq ŏi enh dalam ca Au, Au ŏi enh dalam ca Baq. 'Màng aih wì hadai broq mòiq ŏi ta Ba waq ca crŏng taneh jah lùi Ìh khoi thê Au trùh ta cô. 22'Màng ca Au khoi am ca wì haq 'ngah 'ngai lem lình Ìh ma khoi am ca Au, waq ca wì jah broq mòiq, hadai broq mòiq tìah ca Ba. 23Au ŏi enh dalam ca wì haq, wa Ìh ŏi enh dalam ca Au, waq ca wì jah broq mòiq dìq ca manoh. 'Màng aih mangai crŏng taneh jah loq Ìh khoi thê Au trùh, wa loq Ìh loq waq ca wì 'màng ca Ìh loq waq ca Au.

24“Ôi Baq! Wì mangai ma Ìh khoi am ca Au, Au enh waq wì ŏi ti Au. Au ŏi ti leq, wì hadai ŏi ti aih, waq ca wì hnoq 'ngah 'ngai lem lình da Au Ìh ma khoi am ca Au, ma jah 'màng aih Ìh khoi loq waq ca Con adroi ca jò broq loh crŏng taneh.

25“Ôi Baq ta-atoq, 'nhac ca wì crŏng taneh ùh loq ca Ìh, mahaq Au loq ca Ìh, wa 'bài mangai cô loq cla Ìh ma thê Au trùh ta cô. 26Au khoi patô am ca wì loq hiniq Ìh, wa Au ŏi patô am ca wì loq hiniq Ìh tam hòm, waq ca can loq waq ma Ìh am ca Au, jah ŏi ta manoh wì, wa Au hadai ŏi enh dalam ca wì haq.”

Currently Selected:

Jon 17: HreB

Highlight

Copy