Matius 4

Ngkeskwaure wait uskwe khatuke hyury a Yesuske

(Mrk. 1:12-13; Luk. 4:1-13)

1 # Ibr. 2:18; 4:15 Maktei o Hulasokwe Memeanke kyeuk Yesuske ma byai wen malosy-loskye, ma ngkeskwaure wait uskwe khatuke#4:1 Ti ayat ne kbyohe, ngkeskwaure wait uskwe khatuke, i neke ani a Ibliske. ana hyury a I ti wen desy. 2Ode ti wen desike, Yesuske yas sekwe hean at. Ma khyury ma imlar a ksyalik. 3Dendye ngkeskwaure wait uskwe khatuke mya ma tyanuk ti I de byohe, “Kolnye Hulasokwe Anan a O, desikemo maso hatw ne ma ktyoy a kotw.”

4Keskye Yesuske tyanuk ti i ma byohe, “Rkesy ti Kitab Lanke de, ma irkye imorif ne lema khyali kotkwe#4:4 Ti ayat ne kibohe, kotkwe, neke rkesy ti Kitab Lan tel Yunanike o rotkye. bo, de irkye imorif ne khyali Hulasokwe tunanare.”#Ul. 8:3; Luk. 4:4

5Maktei o ngkeskwaure wait uskwe khatu desike yal Yesuske, ma yor I bai Nus Nelnyelkye, neke nus Yerusalemke, ma ramdiry ti Hulasokwe Seike wasi embuhkwe, 6#Luk. 4:10-11ode tyanuk ti I de byohe, “Kolnye Hulasokwe Anan a O, desikemo mnwusuk a mosy ne ei hahke nde! Kali rkesy ti Kitab Lanke de, ma kbyohe, ‘Khyali O, dendye Hulasokwe yal haretke ti wasi nyaso manosy laitare, ma ana rma ma rkoal eta O. Ode ana ral simatare ma ratak a O, ma kete lwaumure kena hature.’”#Mzm. 91:11-12

7Keskyede Yesuske tyanuk ti i ma byohe, “Rkesy ti Kitab Lanke dakun de, ma irkye kete hyury a Hulasokwe.”#Ul. 6:16; Luk. 4:12

8Maktei o ngkeskwaure wait uskwe khatu desike yor Yesuske bai wen atatke it, ode syusu mait nus o hnu mamin ti nuske ktem ne mumu, ktyabal nam eras mamin ti krala nekre mumu ti Yesuske. 9Maktei o tyanuk ti I de byohe, “Nam ribun-ribun nekre mumu ne ana kal ti O ma wasimw, kolnye mswakitil ode mou ma yaw.”

10Keskyede Yesuske tyanuk ti i ma byohe, “Maditi lakhidik o toha ne! Kali rkesy ti Kitab Lanke de, ma musti mo irkye syakitil ode you ti Hulasokwe, ode cuma mo syambayan ti I a myesan bo.”#Ul. 6:13; Luk. 4:8

11Maktei o ngkeskwaure wait uskwe khatuke lyoin toha Yesuske. Kyoat iloin toha Yesuske bonyo, Hulasokwe wasi nyaso manosy laitare rma ma rsaluk Yesuske.

Yesuske hyatuk wasi karyake ti propinsi Galileake

(Mrk. 1:14-15; Luk. 4:14-15)

12 # Mat. 14:3; Mrk. 6:17; Luk. 3:19-20 Ode kyoat Yesuske tyomolu o Yohanes a rkumak i ma rluk i ei sey metmetke kralake bonyo, Yesuske yulak i bai propinsi Galileake, 13#Yoh. 2:12ma imin ti hnu Nazaretke. Dendye byetik toha hnu Nazaretke, ma bya ti imin ti hnu Kapernaumke. Hnu Kapernaum neke kimin o Tasi Kakan Galileake kserike, ti lasmyer a heitlulswo Israel anan a Zebulon ode Naftali neke wait lasmyerare. 14Yesuske iba ti de iba ma ti lasmyer desikre ne, neke ksyusu ohe nam Yesaya#4:14 Heitlulswo Yesaya neke iry a manety Hulasokwe wasi nyanoare. ikesy ti wasi kitabke ne kdi ti de. Nam Yesaya ikesy neke kbyohe,

15 # Yes. 8:23–9:1 “Lasmyer a Zebulonke, ode lasmyer a Naftalike,

kimin ti Tasi Kakan Galileake kserike,

ti sah Yordanke kseri haratke.

Ode ti lasmyer desikre dakun o,

iry a lema Yahudi-nare ribun ramin ti.

16Ma iry mamorif ti lasmyer desikre, neke lulswoke rmorif ti kelerakokke,

keskyede senweke nenmo rmatakit madelaf lan ne.#4:16 Ti ayat ne kbyohe, madelaf lan ne. Neke ksyusu Yesuske.

Ode madelaf desike ksyusu salke ti iry a mamin ti kelerakok desikre.”

17 # Mat. 3:2; Mrk. 1:15 Kyoat desike Yesuske nenmo yabrita ti irire ma byohe, “Mtyunik wasimy lim o sal ba, kali sew a Hulasokwe ima ma ihareta kola Rajake ne kyarasy de!”

Yesuske yabuk matunik darkye irkye enaat ma rtoha I

(Mrk. 1:16-20; Luk. 5:1-11)

18Ode sekwe it bonyo, Yesuske lyakut ti Tasi Kakan Galileake kserike, desikeo yatos Simon a raabuk i o Petrus ne, neke yor wai Andreas, ma malmata rtunik wait darkye ti tasi kakan desy, kali sir neke iry maka tasi sir. 19Lemade Yesuske tyanuk ti sir ma byohe, “Mmya ma mtyoha Yaw. Kali ana kajar e ma midary a iry, ma iry midary desikre rtoha Yaw.”

20Lemadendye rtutuk elik wait darire, ode rtoha Yesuske. 21Maktei o Yesuske yor deruke rlakut tebikan bai lulkwe, ma lema soso bonyo Yesuske yatos Yakobus yor wai Yohanes, neke Zebedeus ananare, ma malmata ror amatke rasosan wait darire ti aroke kralake. Lemade Yesuske yabuk Yakobus yor Yohanes ma rtoha I. 22Dendye deruke rorw elik toha aroke, ode rtutuk amatke ti desy, ma rba ti rtoha Yesuske.

Yesuske yajar Hulasokwe tunanare ti iry ribunke ode nyoha iry a klurukare wait kbainare ma eras sir

(Luk. 6:17-19)

23 # Mat. 9:35; Mrk. 1:39 Lemade Yesuske yor matoha I desikre rlakut a rlola nus o hnu mamin ti propinsi Galileake ktem desy mumu, ma ti Yesuske yajar a irire ti sey rasambayan tiare, ode yabrita Brit Eraske ti kihali Hulasokwe ihareta kola Rajake ne. Ode nyoha iry a klurukare wait kbai sai ta sai bo, ma eras a sir. Ode yala iry a maluh maoly kabei ta kabei bo, ma malkyakaw a sir. 24Dendye ktela Yesuske iala desike kimelir ti nus o hnu mamin ti Siriake ktem desy mumu. Dendye khyury ma irire ribun a ror wait iry a klurukare, ode iry a mablukutare, ode iry a ngkeskwaure rasukar sirare, rtabal iry a mahukatare dakun, ma ror sir ti Yesuske. Dendye Yesuske nyoha iry desikre wait kbainare ma eras sir mumu. 25Ktela Yesuske iala desikre khyury ma iry ribunke lui-lui sir ma rtoha I. Neke dum a rosy a propinsi Galileake, ode dum a rosy a lasmyer Dekapoliske,#4:25 Tunke khatu rakesy ti tel Yunanike ma kibohe, Dekapoliske, neke kbuanke o nuske hean. Iry mamin ti lasmyer Dekapolis desike iry a lema Yahudi-nare. ode dum a rosy a nus Yerusalemke, ode dum a rosy a propinsi Yudeake, ode dum a rosy a lasmyer mamin ti sah Yordanke kseri timurke dakun.

Currently Selected:

Matius 4: SLU

Highlight

Copy