Matius 18

Yesuske wasi matoha Iare robak ma rhe ohe ti sir mumu ne ese lan i

(Mrk. 9:33-37; Luk. 9:46-48)

1 # Luk. 22:24 Kyoat desike Yesuske wasi matoha Iare rma ma rena I ma rbohe, “Tuanggurw, esei ne ana lan i ti kyoat Hulasokwe ima ma ihareta kola Rajake ne de?”

2Lemade Yesuske yabuk naman kakanke it, ode yaso i ma imdiry ti wait a kditlalan ne, 3#Mrk. 10:15; Luk. 18:17ode tyanuk ma byohe, “Mtyomolu mamak nam kutanuk ne! Esei desike lema tyunik totnyo yabi atyat desikre ba, ma tyohak ti Hulasokwe kola naman kakanke, i desike ana Hulasokwe lema wasi iry a i. Kali Hulasokwe wasi irire sir ne, iry a Hulasokwe ihareta kola Rajake ti ralat a kralanare ne.#18:3 Ti ayatare dum ne ti tel mabuske kbyohe, Kerajaan Sorgake, ode ti ayatare dum dakun o ti tel mabuske kbyohe, Kerajaan Allahke. Tunke khatu deru ne kbuanare mais. Neke ti tel Maslyarkwe kbyohe, iry a Hulasokwe ihareta kola Rajake ti ralat a kralanare ne. Matos ti Mat. 18:4,23ke dakun. 4Klala esei desike nyauk tenanke ma babaf kola naman kakanke, desikemo i desike lan a i ti iry a Hulasokwe ihareta kola Rajake ti ralat a kralanare ne.

5 Ode esei desike kolnye khyali Yaw, desikeo you ma yal iry a lema maber o ktyahal maola naman kakanke ne, # 18:5 Ti tel Yunanike ayat neke kbyohe, yal naman kakanke. Neke kbuanke o, yal iry a lema maber o ktyahal maola naman kakanke. Matos ti Mat. 18:10ke dakun. desikemo ktela iala desike kola ne you ma yal Yaw dakun ma desy.”

Ktela kihury ma irire radi ei lim o sal ne

(Mrk. 9:42-48; Luk. 17:1-2)

6Ode Yesuske tyanuk ti sir huruk ma byohe, “Esei desike hyury a iry a wasi tohtohakke lenla malkyakaw ma Yaw ne,#18:6 Ti tel Yunanike ayat neke kbyohe, naman kakan matohak ma Yaw ne. Neke kbuanke o, iry a wasi tohtohakke lenla malkyakaw ma Yaw ne. ma dyi ei lim o sal, desikemo iry mahury desike, ana Hulasokwe yukun i o ksunw ksyalik, ma kbyilak ti kolnye rikat a hatw lan ne ti iry mahury desike telake, ode rtolar i ei tasike kralake. 7Ode ana atyatke kidurak nuske ktem ne, kali rhury irire ma rdi ei lim o sal. Mlay bain, hurhury neke kimin ti nuske ktem ne a nggora, keskyede kolnye esei desike yala ktela kihury ma irire radi ei lim o sal ne, ana atyatke kdyan iry maala ktela desy. 8#Mat. 5:30Dendye kolnye simamkwe serit a khyury ma mala lim o sal, ta lwaumkwe serit a khyury ma mala lim o sal, desikemo mal turike ma mtwusy ohut lwaumw ta simamw desy ma motuk ba. Kali lemamo mmworif ti wen sra eraske nini nam a mor lwaumkwe serit, ta simamkwe serit, desike ne eras ma kbyilak ti kolnye mbwuma mmworif mor lwaumw deru desy, ta simamw deru desy, keskyede ana rotuk o bai ay malehur nini namke kralake. 9#Mat. 5:29Ode kolnye matamkwe serit a khyury a o ma mdwi ei lim o sal, desikemo mhwakilw matamkwe khatu desy ba! Kali lemamo mmworif ti wen sra eraske mor matamkwe serit, desike ne eras ma kbyilak ti kolnye mmworif mor matamw deru desy, keskyede ana rotuk o bai wen ay malehur nini namke kralake.

10 Mnyenas! Kete mikanak iry a lema maber o ktyahal maola naman kakan nekre, kali Hulasokwe wasi nyaso manosy laitare kyaki-kyaki ne rajaga mamak iry a lema maber o ktyahal desikre. Ode nyaso desikre dakun o, kyaki-kyaki ne ramdiry ti Amakw wasi lulw ne ti wen sra eraske. [11Kali Irkye Ananke#18:11 Ti ayat ne kbyohe, Irkye Ananke, neke klyosu ohe Yesuske. (Matos Dan. 7:13-14.) ima ne, neke mya ma yaorif iry malakut sal nekre!]

Yesuske ihliak tunke ti domba matayarke

(Luk. 15:3-7)

12Yesuske tyanuk huruk ma byohe, Ti ei ne mumu neke ese wasi dombake atw, ma kolnye sasam itayar, desikeo ana yala sai de? De lema iry desike tyutuk domba dehean-siw kresi siw desy ti wenatke, ode bya ti yobak sasam matayar desy e? 13Mtyomolu mamak nam kutanuk ne! Kolnye itot domba sasam matayar desy, desikeo imukmuka imarmara i khyali domba sasam matayar desy, ma kbyilak ti domba hean siw kresi siw lema matayar desikre. 14Kola dene Amamy mamin ti wen sra eraske, lema you ma iry a wasi tohtohakke lenla malkyakaw ne, it a itayar dakun.”#18:14 Thunke khatu rakesy ti ayat ne ma kibohe, iry a wasi tohtohakke lenla malkyakaw ne, neke rkesy ti tel Yunanike kolnye: naman kakan ne.

Ktela tasurat ity wait o hatnimat maala lim o sal ma ity ne

15 # Luk. 17:3 Yesuske tyanuk ma byohe, “Kolnye waimw matohakke it a yala sal ti o, desikemo mbwa ti mait i, ma muhes tun a mor i ma mlwosu sal ialanare. Keskye kete kika iry mahe, de miru ne mhye bo. Ode kolnye tyoha nam mutanukare, ma you ohe nam iala desikre sal, desikemo inaka eraske kimin a e huruk ma desy. 16#Ul. 19:15Keskyede kolnye lema tyomolu nam mutanukare, desikemo mabuk irkye sasam ta enaru ma ti rait a o, ma mor sir ma mbyai iry desy huruk. Ma bisa ma iry desikre rtanuk a mlakye ti waimw desy ohe, i desike sal a i. 17Ode kolnye lema tyomolu iry desikre wait snuratare dakun de, desikemo ti mlwosu ti ribun matohakare ti wen rawahuk sir tike. Ode kolnye lema you ma tyomolu ribun matohak desikre dakun, desikemo kete muka lui mor i, de mrwekan o, i desike ihatw kola iry maily usure, dete lemamo yola iry a lema mahe Hulasokwe ne.

18 # Mat. 16:19; Yoh. 20:23 Lemade mtyomolu mamak nam kutanuk ne! Nam sai desike mbyu eta ti nuske ktem ne, desikeo Hulasokwe byu eta o wen sra eras imin tike dakun. Ode nam sai desike mbyohe mlay ma myala ti nuske ktem ne, desikeo Hulasokwe you ohe nam desike mlay o wen sra eras imin tike dakun. # 18:18 Ti tel Yunanike ayat ne kbyohe, “ Nam sai desike myikat eta ti nuske ktem ne, desikeo Hulasokwe yikat eta o wen sra eraske dakun. Ode nam sai desike mtyatar ti nuske ktem ne, desikeo Hulasokwe tyatar o wen sra eraske dakun.”

19 Ode mtyomolu mamak nam kutanuk ne! Kolnye ti ei neke irkye enaru, ma rety ral sasamke, ode rsambayan ma raten sai ta sai toha Amakw o wen sra eraske, desikeo ana Amakw yal nam raten desy ti sir. 20Kali kolnye ti wen desike irkye enaru ta enatelw ne rawahuk sir khyali rtohak ma Yaw, desikemo Yaw ne kor sir ti desy dakun.”

Yesuske ihliak tunke ti makarya lema ibuma isos iry salik wait lim o sal ne

21 # Luk. 17:3-4 Lemadendye Petrus mya ma yait Yesuske, ode yena I ma byohe, “Tuanggurw, kolnye waikw matohakke it, ma yala sal ma yaw, desikemo kswos wasi sal iala desy ba neke klai de? Musti mo kla-itw e?”

22Dendye Yesuske hyalas i ma byohe, “Lema kla-itw, ode lema hean-itw kresi itw dakun! De musti mo mswos wasi sal desy nini lema maki mal karyarike.#18:22 Ti tel Yunanike ayat ne kbyohe, musti mo mswos wasi sal desy nini karyarike hean itw kkyali itw (70x7). Neke kbuanke o, musti mo mswos wasi sal desy nini lema maki mal karyarike. 23Dendye kuhliak ktela Hulasokwe ima ma ihareta kola Rajake ne, neke kolnye:

Rajake it a yala ma byihy a wasi makaryaare wait utanare mumu. 24Dendye kyoat raja desike byihy wasi makarya desikre wait utanare bonyo, wasi makaryake it ma wasi utanke lan a ksyalik, neke blyawan bokbokke tatyailke ribunke atkwe enatelw ksala hean-at (340.000kg).#18:24 Ti tel Yunanike ayat ne kbyohe, blyawan bokbokke karyarike talentake ribunke hean (10.000 talenta). Neke kolnye tlau ti Rupiake, desikemo miliar-are ma desy. Dendye raja desy yaso ma ror makarya desy ma syara i. 25Ode khyali makarya desike lema syelw yal wasi utanke ma ktei, lemade raja desike yal haretke ma rketa makarya desy yor sawa o anan, ktyabal a lan o hnutat nekre mumu, ma ral khesike ma ral ma rselw a wasi utan desy ti raja desy. 26Lemadendye kyoat makarya desike itomolu ma rajake itanuk koldyesy bonyo, syakitil ode you ti raja desike wasi lulw ne. Ode yal ralake kralake ma iten toha rajake ma byohe, ‘Amam lan o, kuten ma mal klelanke tebikan ma yaw aduk, ma bisa ma kobak a ksala ma kswelw wasikw utan desy mumu ma ktei.’

27 Dendye raja desike ralake klyobak makarya desy ksyalik, lemade raja desike syos makarya desike wasi utanare ba mumu ma ktei.

28 Keskyede kyoat makarya desike ibetik bonyo, inal a yor lian makaryake it dakun, ma lian desike ika wasi utan ti makarya dai rabihy desy, neke karyarike kuban blyawan bokbokke atw. # 18:28 Ti ayat ne kbyohe, kuban blyawan bokbokke, neke heitlulswoke ti tel Romawike desikeo kani dinar, ma kuban blyawan bokbokke sasam neke kdedake kola ne katkye sekwe sasam a khesi. Desikeo utan ne wasi khesike mais kola irkye wasi katkye ti ikarya ti kantorke sekwe atw ne. Lemade makarya desike tye lian desy telake ode byohe, ‘Hei, mswelw wasimw utan muutan toha yaw desy mirin!’

29 Dendye lian desike syakitil ode you ti wasi lulululw ne, ode iten ma byohe, ‘Liakw, mukita aduk! Mlwobak yaw mo mal klelanke tebikan ma yaw aduk, ma kobak a ksala ma kswelw wasikw utanke mumu ti o!’

30 Keskyede makarya desike lema you elik, de yor lian desy ba ti lyuk a i ei sey metmetke kralake, nini lian desike syelw wasi utan desike mumu ma ktei.

31 Ode kyoat liat makarya idanare raatos a ktela desy bonyo, ralatare ksyal a ksyalik ti ktela desy, dendye rba ti rlosu ktela desike ti rajake. 32Lemade rajake yabuk makarya dai rabihy desy, ode tyanuk ti i ma byohe, ‘Makarya mahatw o! Wasimw utanke ribun ma yaw ksyalik, keskyede kswos ba bo. Kali marwen daku yaw, mane klwobak a o. 33Ode kyanmwane lema mlwobak liamw desy, kola dene kulobak o dakun ne de?’

34 Lemade raja desike kyeyer a ksyalik. Dendye yaso ma rluk makarya mahatw desike ei sey metmetke kralake. Ode yaso iry majaga ti sey metmet desy ma roban makarya desy, nini syelw wasi utanare mumu ma ktei.”

35Lemadendye Yesuske tyanuk ti wasi matoha Iare ma byohe, “Ana Amakw mamin ti wen sra eraske, yala ktela desy ti e dakun, neke ktela maola raja desike iala ti wasi makarya mahatw desy, kolnye lema mbyuma myal ralami kralanare mumu, ma mlyobak waimire ma msyos wait sal raala ti e desikre ba.”

Currently Selected:

Matius 18: SLU

Highlight

Copy