LUQA 12
12
Kapitlu 12
Twissija fuq il-wiċċ b’ieħor
1Sadattant in-nies bdiet tinġabar bl-eluf, kulħadd jgħaffeġ fuq xulxin. U hu qabad jgħid l-ewwelnett lid-dixxipli tiegħu: “Ilqgħu rwieħkom mill-ħmira tal-Fariżej, jiġifieri mill-wiċċ b’ieħor tagħhom.#Mt 16,6; Mk 8,15. 2Xejn ma hu mgħotti li ma jinkixifx, u xejn ma hu moħbi li ma jsirx magħruf.#Mt 10,26; Mk 4,22; Lq 8,17. 3Għalhekk, kulma tkunu għedtu fid-dlam għad jinstama’ fid-dawl, u kulma tkunu tkellimtu fil-widnejn, fil-kmamar ta’ ġewwa, għad jixxandar minn fuq il-bjut#12,3: Jixxandar minn fuq il-bjut: fl-ibliet orjentali, bit-toroq dojoq u d-djar ħdejn xulxin, il-bejt kien il-post fejn jiltaqgħu n-nies u jxerrdu l-aħbarijiet; ara Mk 2,4..
Minn min għandkom tibżgħu
(Mt 10,28-31)
4“Dan ngħidilkom, ħbieb tiegħi, tibżgħux minn dawk li joqtlu l-ġisem u mbagħad ma jkunu jistgħu jagħmlu xejn iżjed. 5Ħa nurikom jien minn min għandkom tibżgħu; ibżgħu minn Dak li, wara li jkun qatlek, għandu s-setgħa jixħtek ġol-infern. Iva, ngħidilkom, minn dan ibżgħu. 6Ħames għasafar tal-bejt mhux żewġ soldi jinbiegħu? U anqas wieħed minnhom ma hu minsi quddiem Alla. 7U intom, sa x-xagħar ta’ raskom, kollu magħdud. Xejn la tibżgħu, għax intom aktar minn ħafna għasafar tal-bejt tiswew.#Lq 12,24; 21,18.
Id-dixxiplu jistqarr li hu ma’ Ġesù
(Mt 10,32-33; 12,32)
8“U ngħidilkom li kull min jistqarr quddiem il-bnedmin li huwa miegħi, Bin il-bniedem ukoll jistqarr li huwa miegħu quddiem l-anġli ta’ Alla. 9Iżda min jiċħad lili quddiem il-bnedmin, jien niċħad lilu quddiem l-anġli ta’ Alla.#Lq 9,26. 10U kull min jgħid xi ħaġa kontra Bin il-bniedem tinħafirlu; iżda min jieqaf lill-Ispirtu s-Santu ma jinħafirlux.#Mk 3,28-29. 11Meta jeħdukom quddiem is-sinagogi u l-kapijiet u s-setgħat, toqogħdux tħabblu raskom kif sejrin twieġbu jew x’sejrin tgħidu,#Mk 13,11; Lq 21,12-15. 12għax l-Ispirtu s-Santu jgħallimkom dak il-ħin stess x’għandkom tgħidu.”
Il-parabbola tal-għani iblah
13Xi ħadd mill-folla qallu: “Mgħallem, għid lil ħija jaqsam il-wirt miegħi.” 14“Ħabib,” wieġbu Ġesù, “min qegħedni mħallef fuqkom, jew qabbadni nqassmilkom il-ġid bejnietkom?”#Eż 2,14; Atti 7,27. 15Imbagħad qal lin-nies: “Iftħu għajnejkom u ħarsu rwieħkom minn kull regħba, għax imqar jekk wieħed ikollu bir-radam, ħajtu ma tiddependix mill-ġid li jkollu.”#1 Tim 6,9-10. 16U qalilhom parabbola: “Wieħed raġel għani ġabar kotra ta’ frott mir-raba’ tiegħu. 17U beda jaħseb u jgħid bejnu u bejn ruħu, ‘X’se nagħmel? Għax dan il-frott kollu ma għandix fejn naħżnu! 18Ara x’nagħmel,’ qal, ‘inħott l-imħażen li għandi u nibni oħrajn akbar, u naħżen fihom il-qamħ u l-ġid kollu li għandi. 19Imbagħad ngħid lili nnifsi: Ruħi, għandek ħażna kbira ta’ ġid għal bosta snin; mela strieħ, kul, ixrob, ixxala!”#Sir 11,19. 20Iżda qallu Alla, ‘Iblah li int! Dan il-lejl stess jitolbuk ruħek lura#12,20: Jitolbuk ruħek lura: kostruzzjoni stilistika biex ma jissemmiex Alla direttament.. U l-ħwejjeġ li ħejjejt għalik, ta’ min ikunu?’ 21Hekk jiġrilu min jiġma’ l-ġid għalih innifsu bla ma jistagħna quddiem Alla.”#Mt 6,20.
L-inkwiet u t-tħassib
(Mt 6,25-34)
22Imbagħad Ġesù qal lid-dixxipli tiegħu: “Għalhekk ngħidilkom, tinkwetawx ruħkom għall-ħajja, x’se tieklu, anqas għall-ġisem, x’se tilbsu. 23Għax il-ħajja aqwa mill-ikel, u l-ġisem aqwa mill-ilbies. 24Ħarsu lejn iċ-ċawl; la jiżra’ u lanqas jaħsad, la għandu mħażen u lanqas kmamar fejn jerfa’, u madankollu Alla jitimgħu. Wisq aktar mit-tajr tiswew intom!#S 147,9; Lq 12,7. 25U min minnkom, bl-inkwiet tiegħu kollu se jseħħlu jtawwal għomru mqar b’jum wieħed? 26Jekk mela anqas ħaġa tassew ċkejkna ma għandkom ħila tagħmlu, għaliex tinkwetaw ruħkom mill-bqija? 27Araw il-ġilji kif jikbru: u la jitħabtu u lanqas jinsġu. Ngħidilkom li anqas Salamun, fil-glorja kollha tiegħu, ma kien jilbes bħal wieħed minnhom.#1 Slat 10,4-7; 2 Kron 9,3-6. 28Mela jekk Alla jlibbes hekk imqar ħaxixa selvaġġa li llum hawn u għada tinxteħet fil-forn, kemm aktar lilkom, nies ta’ fidi ċkejkna? 29Hekk ukoll intom, toqogħdux tfittxu x’se tieklu u x’se tixorbu, u xejn titħassbu; 30dawn kollha ħwejjeġ li jfittxuhom in-nies tad-dinja, u Missierkom jaf li teħtiġuhom. 31Fittxu mela s-Saltna tiegħu, u magħha mbagħad iżidilkom dawn ukoll.
Teżori fis-sema
(Mt 6,19-20)
32“Le, merħla ċkejkna, tibżgħu xejn, għax Missierkom għoġbu jagħtikom is-Saltna!#Lq 22,29; Apk 1,6. 33Bigħu ġidkom u agħtuh karità u fittxu għalikom infuskom boroż li ma jitmermrux, teżor li ma jiġix nieqes fis-sema, fejn la l-ħalliel ma jersaq u lanqas il-kamla ma tħassar.#Mt 19,12; Mk 10,21; Lq 18,22. 34Għax fejn hemm it-teżor tagħkom, hemm tinsab qalbkom ukoll.”
Il-qaddejja li jishru
35“Żommu ġenbejkom imħażżma u l-imsiebaħ tagħkom mixgħula;#1 Slat 18,46; 2 Slat 4,29; 9,1; Ġob 38,3; Prov 31,17; Ġer 1,17; Mt 25,1-7; Ef 6,14; 1 Pt 1,13. 36kunu bħal nies jistennew lil sidhom lura mill-festa tat-tieġ, biex malli jiġi u jħabbat jiftħulu minnufih.#Mt 13,35-37. 37Henjin dawk il-qaddejja li meta jiġi sidhom isibhom jishru! Tassew ngħidilkom, li hu jitħażżem, iqegħedhom madwar il-mejda, u jgħaddi quddiemhom iservihom.#Lq 17,7-8; Ġw 13,4. 38U kieku kellu jiġi fil-ħin tat-tieni sahra, jew tat-tielet, u jsibhom xorta waħda fuq dmirhom, henjin huma! 39Kunu afu dan, li kieku sid id-dar kellu jkun jaf xħin ikun ġej il-ħalliel ma kienx se jħalli min jinfidlu l-ħajt ta’ daru#12,39: Il-ħajt ta’ daru: ara nota Mt 6,19..#Mt 24,43-44. #1 Tess 5,2. 40Mela kunu lesti intom ukoll, għax qatt ma tistgħu tobsru s-siegħa li fiha jiġi Bin il-bniedem.”
Il-qaddej il-fidil u l-qaddej il-ħażin
(Mt 24,45-51)
41“Mulej,” qallu Pietru, “din il-parabbola qiegħed tgħidha għalina, jew għal kulħadd?” 42Wieġbu l-Mulej: “Int min tgħid li hu l-qaddej fidil u għaqli? Min hu dak li s-sid iqiegħdu fuq in-nies tad-dar biex jagħtihom sehemhom f’ħin l-ikel? 43Hieni dak il-qaddej li sidu jiġi u jsibu jagħmel dan. 44Ngħidilkom is-sewwa, li jafdalu ġidu kollu f’idejh.#Mt 25,21-23. 45Imma nagħmlu mod li dak il-qaddej jibda jgħid f’qalbu, ‘Sidi jiddawwar ma jiġi,’ u jaqbad isawwat lill-qaddejja kollha, irġiel u nisa, u jiekol u jagħtiha għax-xorb u s-sokor; 46sid dak il-qaddej jasal f’jum meta ma jkunx jistennieh, f’siegħa li fiha jieħdu għal għarrieda, u jagħmlu bċejjeċ u jagħtih dak li ħaqqhom in-nies li mhumiex fidili. 47U dak il-qaddej li jkun jaf xi jrid sidu, u madankollu ma jħejjix jew ma jagħmilx li jrid sidu, swat kbir jaqla’.#Ġak 4,17. 48Min imbagħad, bla ma jkun jaf xi jrid sidu, jagħmel xi ħaġa li jkun ħaqqha s-swat, dan ftit jissawwat. Għax lil min tawh ħafna, ifittxu li jieħdu ħafna mingħandu; u min ħallewlu ħafna f’idejh, iżjed jippretendu mingħandu.
Firda minħabba Ġesù
(Mt 10,34-36)
49“Nar ġejt inqiegħed fuq l-art, u kemm nixtieq li diġà qabad! 50Iżda hemm magħmudija li biha għandi nitgħammed, u x’diqa għandi sa ma dan iseħħ!#Mk 10,38-39; Lq 2,14. 51Taħsbu intom li jien ġejt inġib il-paċi fid-dinja? Le, ngħidilkom, imma l-firda; 52għax mil-lum ’il quddiem ħamsa minn nies f’dar waħda jkunu mifruda bejniethom, tlieta kontra tnejn u tnejn kontra tlieta; 53jinfirdu l-missier kontra l-iben u l-iben kontra l-missier, l-omm kontra l-bint u l-bint kontra l-omm, omm ir-raġel kontra mart binha u mart l-iben kontra omm żewġha.”#Mk 7,6.
Iż-żmien jgħallem
(Mt 16,2-3)
54Lin-nies qalilhom ukoll: “Meta taraw sħaba tielgħa mill-punent, malajr tgħidu li tkun ġejja x-xita; u hekk jiġri.#Mt 16,2-3. 55U meta jonfoħ ir-riħ isfel, tgħidu li sħana se tagħmel; u tagħmel tassew. 56Uċuħ b’oħra, tafu taqraw wiċċ is-sema, u wiċċ l-art ukoll; mela ż-żmien ta’ issa kif ma tafux tfissruh?”
Irranġa ma’ min jixlik
(Mt 5,25-26)
57“U għala ma tiġġudikawx intom stess x’inhu s-sewwa? 58Jekk xi ħadd ikun se jtellgħek il-qorti, int u sejjer miegħu quddiem il-maġistrat, ħabrek biex tirranġa miegħu kif tkunu għadkom fit-triq, li ma jmurx ikaxkrek quddiem l-imħallef, u l-imħallef jagħtik f’idejn l-esekutur tas-sentenza, u dan imbagħad jitfgħek il-ħabs; 59għax kif ngħidlek jien, ma toħroġx minn hemm ġew qabel ma tkun ħallast sa l-inqas ħabba.”
Currently Selected:
LUQA 12: MB20
Highlight
Share
Copy
Want to have your highlights saved across all your devices? Sign up or sign in
Maltese DC Bible © Malta Bible Society, 2020.