John 21

1O̱ki. A̱nnika po̱o̱hsapoohtsika Jesus sota̱maistamatsoohsatsiiwa oma̱nikapiimiksi. Omiima o̱mahksikimi Tiberias ita̱i̱stamatsoohsatsiiwaiksi. A̱nnohka a̱a̱moyayii a̱kitsinikatoohpa. 2O̱ki. Oma̱a Simon Peter ki oma̱a Thomas, a̱nnahkaoʼka ma̱ttanistawa niistsi̱mi, ki oma̱a Nathanael, a̱nnahkaoʼka annaahka iihto̱ʼtoowahka omiima Cana, omii istakaipisskoi Galilee. O̱ki, ki omi̱i̱ksi Zebedee ohko̱i̱ksi, na̱tsitapiiyi, ki omi̱i̱ksi mattsistsi̱tapiiksi Jesus oma̱ttanikapiimaiksi. Itohka̱naiʼto̱manisto̱oyaawa.

3O̱ki. Simon Peter itani̱stsiiwa omiiksi “Niisto̱wa ta̱kotoomiihka.” Otsi̱tanikkaiksi, “Ta̱kohpoʼkioohpinnaan.” O̱ki. Sota̱momatapo̱oyaawa. Sota̱msapa̱aka̱opiiyaawa a̱a̱hkioohsaʼtsisi. Sota̱mipannomiihkaayaawa. Ma̱tsikakohkoomiihka̱awaiksi.

4Kii, ki a̱o̱ʼmatapsopoyinakowa. Kii o̱o̱maoʼka Jesus, i̱tssa̱i̱poyiwa o̱mahksikimi. Ki oma̱tonooka oma̱nikapiimiksi. 5Jesus sota̱manistsiiwa̱i̱ksi, “O̱ki napi̱waka. Kima̱tohkoomiihkaahpoaawa, a̱nnia?” Itaniiyaawa, “A̱a.” 6Itani̱stsiiwaiksi, “O̱ki. A̱a̱moya nitʼto̱o̱htsi kita̱a̱hkiohsaʼtsiimoaawa sota̱mitssoyaapiksik kitssksimata̱kssini. Kita̱kitohkoomiihkaahpoaawa.” O̱ki. A̱nniayi sota̱manisttsiiyaawa. Itsi̱i̱taʼpohkoomiihkaayaawa. Ma̱tsikakawaatsto̱o̱maaiksaawa otssksima̱takssoaawayi. Iiko̱maakayimmi otomi̱i̱hkaanoawaiksi.

7Kii ki Jesus ami̱i ota̱komimmai oma̱nikapiimi a̱a̱nistsiiyinai anniiska Peteriska, “A̱nnaoʼka kitsi̱naaiminnoona.” Ki oma̱a Simon Peter, ka̱ksapskaohsatom o̱mohtapoʼtakihpistsi. Ki ota̱ʼyoohtsissi sota̱msapskaohsatoma otsa̱otatsiisokaʼsimi. Ki sota̱mssa̱yohpaʼwaaniwa. 8Ki omi̱i̱ksi Jesus oma̱ttanikapiimiksi, otsi̱ʼnakaahkiohsaʼtsiimoaawayi sota̱mohtsitopitsaahkiohsiiyaawa. Ma̱tsipia̱owaatsi. Kaakso̱o̱kskaikiipippoohkata. Itopi̱tsisskapatomiaawa omii isksimata̱kssini. Iihtoi̱ʼtsiiwa mami̱i̱ksi.

9Ki a̱o̱ʼpitsissowo̱o̱yaawa. Ki a̱nnima issowo̱o̱htsi itsini̱miaawa atota̱a̱na. Iihtoto̱toohpa ksinitsi̱i̱stsi. Itsso̱yaihtsiiyaawa mami̱i̱yaawa. Ki napayi̱i̱niaawa. 10Jesus itani̱stsiiwaiksi, “A̱saistsipihtakika amo̱ksiska kitsi̱i̱miihkatawaawaiksi.”

11Simon Peter sota̱motoisapa̱aka̱opiiwa a̱a̱hkiohsaʼtsisi. Omii issksima̱takssini iihta̱o̱miihkaaoʼpi sota̱msaʼkapsskapatomayi. Kii ma̱tsikahkapiʼka̱a̱waatsiksi isskimata̱kssini ki̱i̱wa ota̱kayiʼpi otomi̱i̱hkaanoaawaiksi. Niitsi̱mmiaiksi kipi̱ppiaiksi nisitsi̱ppi niiko̱potsii (153).

12Jesus itani̱stsiiwaiksi, “A̱saistooka. A̱ksikskano̱yoʼpa.” O̱ki. Omiiksi Jesus oma̱nikapiimiksi ma̱tsitsspisstsiihpa ma̱a̱hksstsaawanikki, “Taka̱a kiisto̱wa?” Iihkaaa̱i̱ssksinimiaawa ota̱mssayi otsi̱naaimoaawayi. 13Jesus sota̱motooʼtakiwa napayi̱i. Iihtsi̱i̱soyiiwaiksi. A̱nnimayi niʼto̱yi ma̱ttsitsiisoyiiwaiksi mami̱i̱yi.

14O̱ki. Ki a̱nnihkaoʼka iihtso̱o̱kskayi Jesus otsi̱taistamatsoohsatahpi oma̱nikapiimiksi ota̱i̱ʼssksipoaoohsi.

15O̱ki. Ota̱i̱ʼksistsikskanoissaawa Jesus itssi̱tsipssatsiiwa Simon Peter. A̱nniskaoʼkinai Joannas ohko̱yi. Jesus a̱a̱nistsiiwayi, “O̱ki Simon, kika̱taiʼto̱ʼtsitskakomimmokihpa anni̱i̱ksi nanista̱komimmiyihpi.” Ota̱a̱nikkayi, “A̱a nitsi̱naaimi. Ki̱tssksiniihpa kita̱komimmohsi.” Jesus itani̱stsiiwayi, “Ki omi̱i̱ksi nitsi̱i̱maiʼtookiksi mata̱piiksi a̱nni i̱i̱mahkihkinaipokaai, a̱nniai anistoto̱i̱tsikatsisaawa.”

16O̱ki. Ki ma̱ttsistaaʼnistsiiwayi, “Simon, kika̱taaʼkomimmokihpa?” Oma̱ttsitanikkayi, “A̱a nitsi̱naaimi. Ki̱tssksiniihpa kita̱komimmohsi.” Jesus itani̱stsiiwa̱yi, “Omi̱i̱ksi nitsi̱i̱maiʼtookiksi a̱nni i̱i̱mahkihkinai anistoto̱i̱tsikatsisaawa.”

17O̱ki. A̱nnika o̱mohtsookskaahpi Jesus a̱a̱nistsiiwa Peter, “Simon, kika̱taʼkomimmokihpa?”

Kii ki Peter iihtaka̱nawa otso̱o̱kskawaniyissi Jesusi, “Kika̱taaʼkomimmokihpa?” Itani̱i̱wa “Nitsi̱naaimi, kitsi̱ʼtsinissksiniihpa. Ki̱tssksiniihpa kita̱komimmohsi.” Jesus itani̱stsiiwayi, “Anistoto̱i̱tsikatsisa nitsi̱i̱maiʼtookiksi a̱nni i̱i̱mahkihkinai.

18Kita̱kanisto niitsi̱i̱yi. Kiisto̱wa kitsi̱tsaakiaiʼnaksstspi kita̱ksi̱kaiksistsopoatsistotoohsi kii kita̱komaiʼpssiimi, ki kitsi̱tapa̱akoohpi kita̱kitapoo. Kii aomahki̱tapiiniki kita̱kitsissikinsstsaaki. A̱kitsissksipiihpa koʼtsi̱i̱stsi A̱kitsstsiihpa kita̱ki̱kaiksistsopoatsistotooki. Kita̱kitapi̱piookoo ki̱tsawaisstaahpi ka̱a̱hkitapoohsi.” 19(O̱ki. A̱a̱mohka otani̱ssi Jesus iihtsi̱ʼpoyiwa omi̱i Peter manista̱ksiʼnihpiayi. A̱kitoʼtoowa ita̱ksiʼnitahpi. Otsi̱ʼnssini a̱kohtsitaistamatstohkatom mani̱stsspsspi A̱ʼpistotookiiyi.)

O̱ki. Jesus ina̱i̱ʼtanistsiiwayi, “Tsapo̱o̱t niisto̱wa!”

20O̱ki. Peter sota̱moʼtaksipoyiwa, sota̱minoyiiwa anniska oma̱a Jesus ota̱komimmai oma̱nikapiimi otohpo̱ʼkiawaawahkaahsinai. (A̱nnahkaoʼka annaahka itsita̱pitssto̱piiwa Jesusi anniihka otsi̱tota̱ksoyihpiaawayihka. A̱nnahkaoʼka anniihka itani̱stsiiwa Jesus anniihka otsi̱totaksoyihpiaawayihka, “Nitsinaaimi taka̱a kita̱komatskaoka?”)

21O̱ki. Oma̱a Peter itsino̱yiiwa amoska Jesus ota̱komimmayi oma̱nikapiimi. Itani̱stsiiwa Jesus, “Nitsi̱naaimi. Tsa̱a a̱kanistohkoyimma o̱o̱ma?”

22Jesus itani̱i̱wa, “I̱i̱makstatainiki ma̱a̱hkitsakiaipaitapiiʼssi niisto̱wa aiʼssko̱ʼtooiniki, kiisto̱wa kima̱tsitoʼtohkoyikiihpa manista̱kohkoyiʼpi. Ka̱kohtsapo̱o̱t niisto̱wa.” 23O̱ki. A̱nnihkayi sota̱manistsipahtsoohtsimaʼsiwa Jesus ma̱a̱hkanissi o̱tsawaaksi̱ʼnssayi omi̱iska o̱mohtsiʼpoyiihpiska oma̱nikapiimiska. Aka̱i̱tapiiyi a̱omaiʼtakiiksi iihtsima̱tomiksi. Kii a̱a̱mohka ma̱toohkaniiwaatsi Jesus. Ka̱a̱kaniiwa, “I̱i̱makstatainiki ma̱a̱hkitsaakiaipaitapiiʼssi aiʼssko̱ʼtooiniki, kima̱a̱tsitoʼtohkoyikiihpa manista̱kohkoyiʼpi.” 24O̱ki. Omi̱i̱ska oma̱a Jesus o̱mohta̱i̱ʼpoyiihpiska oma̱nikapiimiska, a̱nniskaoʼkinai a̱i̱tsinikatominayi a̱mostska. A̱nnoohk a̱a̱maoʼka anniihka ota̱i̱tsinikatoohpi. Issksini̱i̱hpa oto̱manaʼssi a̱a̱mostsi osi̱naakssistsi. 25O̱ki. Iika̱ttakawoyi Jesus ota̱nisttsiihpistsi. Ikka̱mssaakohkanaitsinikatoohpi ota̱nisttsiihpistsi ma̱takohkottohkanaitsinikatoʼpa.

Currently Selected:

John 21: BLA1979

Highlight

Copy