John 18

1O̱ki. Jesus sota̱miksistanistooma a̱a̱mostska. Sota̱momatapoowa, ki anni̱i̱ksi oma̱nikapiimiksi. Sota̱mopama̱atoomiaawa amo̱o̱hka kawahko̱yihka a̱a̱nistoohpihka Kidron. Ki a̱nnimaoʼka sapipo̱mmaaniksi miistsi̱i̱ksi. Sota̱mitapistsso̱oyaawa Jesus ki anni̱i̱ksi oma̱nikapiimiksi.

2A̱nnima Jesus ita̱i̱kaapohpokomowoomiwa oma̱nikapiimiksi. A̱nnihkayii Judas iihtssksini̱ma amii Jesus otsi̱tapistssoohpi. Oma̱a Judas a̱kitomatskaiwa Jesus.

3Kii ki sota̱mitsistsso̱owa Judas. Itsi̱stssi̱piiwa omi̱i̱ksi ika̱katapiiyi a̱wawahkaoʼtsiiksi, ki anni̱i̱ksi omi̱i̱ksiska otsi̱nnakiimoawaiksi omi̱i̱ksi Jews. Iihpo̱ʼtooyaawa a̱a̱mostska pako̱yittsi, ki siipia̱naʼkimaʼtsi, ki o̱mohtawa̱wahkaoʼtsiaʼpanistsspiaawa.

4Jesus a̱kaohkanaissksinima manista̱kohkoyiʼpi. Ki sota̱mitsi̱ssipoyiwa, ki sota̱manistsiiwa omi̱i̱ksi iihpo̱ʼkistsso̱oiksi a̱wawahkaoʼtsiiksi, “Taka̱a kita̱ʼpaissammawaawa?” 5Oso̱tamanikkaiksi, “ki annaahka Jesusahk, iihto̱ʼtoowahka Nazareth.” Sota̱manistsiiwaiksi, “Niistoakaoʼka.”

O̱ki. Omi̱i ota̱o̱matskaoki, Judasi, iihpoksi̱poyiimiiwa anni̱i̱ksi otoʼtsi̱piaaiksi a̱wawahkaoʼtsiiksi.

6Ki Jesus, ota̱a̱ʼnistahsaiksi, “Niisto̱akaoʼka” itohsi̱sttaapikssiiyaiksi, itsi̱sttohkohpiiyaiksi. 7Ki a̱nniayii Jesus sota̱mattanistsiiwaiksi “Taka̱a kita̱ʼpaissammawaawa?” Oso̱tamattanikkaiksi, “Ki Jesus, iihto̱ʼtoowa Nazareth.” 8Sota̱manistsiiwaiksi Jesus, “Kika̱wanistohpoaawa niisto̱akaoʼka. Ikkama̱koʼtookiinoainiki, amo̱ksi poʼto̱o̱kaawa.”

9Annihka ota̱a̱ʼtsimoihkaahsi Jesus itani̱stsiiwa o̱nni “A̱a̱mokska ki̱tohkokkihpikska, ma̱a̱tsitsinsstsiihpa na̱a̱hkaaʼtsai.” Amoohka otani̱ssi Jesus, a̱nnihkayi iihtani̱stsiiwa ami̱i̱ksi a̱wawahkaoʼtsiiksi, “Amo̱ksi poʼto̱o̱kaawa.”

10O̱ki. Oma̱a Simon Peter iihtsi̱tohkoyikiwa ottoa̱ni. O̱mahksisttoana. Sota̱msaoʼtoyiiwayi. Sota̱mohtawaya̱kiiwa omii ni̱naato̱yaapiikoani anniiska oma̱nikapiimiska. Sota̱mikahksstookiiwayi. Amo̱o niʼto̱ohtsi oohto̱o̱kisayi itsi̱kahksstookiiwayi. O̱ki. Oma̱a na̱i̱kahksstookiaawa a̱a̱nistawa Malchus.

11Kii ki oma̱a Jesus a̱nniayii a̱a̱nistsiiwa Peteri, “Isska̱aksstsiisa ko̱ttoana. A̱a̱mohka ni̱nna nani̱stohkoyihpihka na̱a̱hkanistohkoyiʼssi kita̱kohkottsawanistsiksimstaa nita̱kohkottsipaoʼtsi.”

12Ki a̱nnimayii omi̱i̱ksi a̱wawahkaoʼtsiiksi ki anna̱a oʼtota̱mawawahkaoʼtsiiwa kii omi̱i̱ksiska omiikska Jews ota̱toaʼpinnakiimoaawaiksi, itsi̱nniiyaawa Jesus. Ki itsi̱ssksipistsiiyaawa̱yi.

13O̱ki. Ki o̱o̱mikskaoʼki sota̱motomitapipiiyaawa Jesusi omii Annas ma̱a̱hkokakihtsima̱yissi. Osto̱yi a̱nniskaoʼkinai maa̱hsi oma̱a Caiaphas. Oma̱a Caiaphas a̱nnahkaoʼka isspato̱yaapiikoana a̱nnihka isstoyi̱i̱hihka. Ki a̱nnihkayi iihtoto̱mitapi̱piiyaawa Jesus omii Annas. 14Oma̱a Caiaphas, a̱nnahkaoʼka annaahka a̱a̱niiwahka otsoka̱ʼpissi ma̱a̱hkohtsiʼnssi oma̱a niʼtsita̱piiwa, ki a̱nnihkayii a̱kohtsayiʼnitayaawa omi̱i̱ksi Jews. A̱nniayi i̱i̱kaanistsiiwa ami̱i̱ksi isto̱ʼtotamaʼpssiiksi Jews.

15O̱ki. Oma̱a Simon Peter iihtsa̱pawaawahkaawa Jesus. Ki anni̱i mattstsi̱ki, Jesus ono̱o̱hkattanikapiimi ma̱ttohtsapawaawahka̱yinai. Ki osto̱yi o̱tssksinooka omi̱i isspato̱yaapiikoani. Ki Jesus itsipi̱i̱ma omi̱i isspato̱yaapiikoani otopi̱ssini. Ki omi̱iska oma̱nikapiimiska iihpo̱ʼkiitsipi̱i̱minayi. 16O̱ki. Ki oma̱a Peter sa̱kiitsa̱yaipoyiwa omii kitsi̱mi. Itso̱o̱hkaipoyiiwa. Ki omi̱i̱ska mattstsi̱kiiska, Jesus, oma̱ttanikapiimiska, o̱tssksinooka omi̱i isspato̱yaapiikoani. Sota̱mattsaksiwa, kii itssi̱tsipssatsiiwa omi̱i aaki̱i̱yi, ita̱yoohkaipoyiyi, a̱i̱kayinnakiyi. Ki sota̱mipstsi̱piiwa Peteri.

17O̱ki. Ki oma̱a aaki̱i̱wa a̱i̱kayinnakiwa, sota̱manistsiiwa Peter, “Ka̱a̱hkstaoʼkatta̱mihpahtaw omi̱i̱ksiska oma̱nikapiimikska.” Peter sota̱maniiwa “Saa nima̱tamihpa.”

18O̱ki. Ki a̱nnikskaoʼkiaawa omi̱i̱ksi a̱ʼpaoʼtakiiksi, ki omi̱i̱ksi a̱waatoaʼpinnakiikoaiksi, ito̱ʼtsipoyiiyaawa ototota̱a̱noaawayi. Iihpoto̱taaoʼpi ksinitsi̱i̱stsi. I̱i̱ksstoyiiwa. Ki ai̱ksistohsoyiiyaawa. Ki a̱nnaoʼka oma̱a Peter, noohka̱ttsitsinaiksistohsoyiwaiksi.

19O̱ki. Ki o̱o̱maoʼka oma̱a Jesus ota̱i̱sopowahtsiʼsakka omi̱i isspato̱yaapiikoani. O̱mohtaisopoahtsiisakka̱yi ota̱a̱ssksinimaatsaiksi ki o̱tssksinimatstohkssistsi. 20Itani̱i̱wa oma̱a Jesus, “Nitsi̱tssksinimaatstohki otsi̱takaitapisskohpi, kana̱a̱tapiiyi ma̱a̱hkoohtsissaawa. Nitsi̱taika̱pipstssksinimaatstohki omi̱i̱stsi itawa̱atsi̱moihkaaoʼpistsi ki o̱o̱mi o̱mahkitawaatsi̱moihkaaoʼpi. Anni̱i̱ksi Jews iihkana̱i̱tomowo̱oyaawa. Nima̱tsikakitsisimissksinimaatstohki. 21Ki a̱nnohka tska̱a ko̱mohtaisopoahtsiiʼsakkihpa nitssksini̱matstohkssini. Kita̱kohkottsopoahtsiiʼsatayi omi̱i̱ksi ayo̱o̱htsimiiksi nita̱a̱niihpistsi. O̱o̱miksaoʼki. Issksini̱miaawa nita̱a̱nistahpiaawaistsi.”

22Ota̱a̱ʼnistoohsi a̱a̱mohka oma̱a Jesus oso̱tamiʼtsisspinnoka omi̱i isskska̱atakiiyi. Ota̱a̱nikkayi, “Kita̱kohkottsayipoʼtsi̱ʼpoatawa isspato̱yaapiikoana annohka a̱nni.” 23Jesus itani̱i̱wa, “Niisto̱wa ikka̱msayiipitsiniki sota̱manistsisaawa anni̱i̱ksi mata̱piiksi nani̱stsayiipitspi. Ki nitsi̱i̱maanii. Kita̱kohkottsaiʼtsisspi̱nnoki.”

24O̱ki. Ki a̱nnimayii Annas ita̱psskoyiiwa Jesus omii isspato̱yaapiikoani, Caiaphas. Niitsi̱ssksipistahpi oma̱a Jesus, ki a̱nniai niitsita̱psskoawa̱yi.

25O̱ki. Oma̱a Simon Peter, sa̱kiitaipoyiwa, ita̱i̱ksistohsoyiwa. Ki oso̱tamanikkaiksi, “Ka̱a̱hkoohkattamihpahtaoʼtsinai omi̱i̱ksiska oma̱nikapiimikska.” Sota̱msayiʼtsimaawa oma̱a Peter. A̱a̱niiwa, “Saa, nima̱tamihpa.”

26O̱ki. Ki oma̱a isspa̱toyaapiikoana, omi̱i to̱kskammi omi̱i̱ksiska oma̱nikapiimiksi, itsini̱poyiiyinai. Osto̱yi o̱ksoʼkoawa anniiska anna̱a Peter otsi̱kahkstookiaayiska. Itani̱stsiiwa omi̱i Peter, “Sokstaa ka̱a̱hkitsinoo omii sapipo̱mmaaniksi miistsi̱i̱ksi. Ka̱a̱hkohpokitaipoyimawa Jesus.”

27Peter ma̱ttsistaiʼsayiʼtsimaawa. Sota̱msookohkomi̱yini omi̱iska ni̱naita̱waakiiyi.

28O̱ki. Ki o̱o̱mikskaoʼkiaawa omi̱i̱ksi istoʼtota̱maʼpssiksi Jews sotamistapi̱piiyaawa omi̱i Jesus. Itsi̱stapa̱aʼtomiaawa Caiaphas otopi̱ssini. Ki itapi̱piiyaawayi omiik o̱mahkaokakihtsimaayi oto̱mahkaokooaayika. A̱kaikskanaotoniwa. Noohki̱i̱tsitapiiwa o̱mahkaokakihtsimaawa. Ma̱tanistapssiwa Jew. Omi̱i̱ksi itapi̱piiksi Jesus itsawa̱isska̱akitsipiimiaawa. Niitoma̱i̱ʼtakiiyi Jews iiko̱kaʼpiiwa ma̱a̱hkitsipiissaawa noohki̱i̱tsitapiiyi ooko̱o̱aayi. Otoka̱kihtsimaanoaawa itana̱ʼsiwa oma̱a na̱i̱piima noohki̱i̱tsitapiiyi ooko̱o̱aayi, a̱kohtsitsaohkottsitsi̱nioyiwa anniihka a̱yakomahksiksistsikoyihka otsi̱tohkanaʼpssatoohpiaawa iihtsito̱ʼtsikamootsi̱ipiaahpi Egypt. A̱nnihkayi iihtsawa̱i̱sskaakitsipiimiaawa. 29O̱ki. Ki oma̱a o̱mahkaokakihtsimaawa, a̱a̱nistawa Pilate, sota̱mitapsaksiwaiksi; sota̱manistsiiwaiksi, “Tsa̱ anista̱piiwaatsiksi ko̱mohtaohtoipiaawaawatsi ama̱a ni̱naawa.” 30Oso̱tamanikkaiksi, “Ki oma̱a ni̱naawa ka̱taʼyaokaʼpitapiiwopi ma̱takitapipoʼtoannaana kiisto̱yi ka̱a̱hkitokakihtsimatahsi.” 31Pilate itsipo̱ʼtanistsiiwaiksi, “Sota̱moʼtooka. Sota̱mohpokakihtsimatok kita̱wattokakihtsimaanoaayi, kanista̱psspoaayi Jews.”

Omi̱i̱ksi Jews itani̱i̱yaawa, “Kiisto̱aawa Romans itana̱ʼsiwa kitoka̱kihtsimaanoaawa Niisto̱nnaana Jews ma̱a̱hksayitsstsissi na̱a̱hkokakihtsimatannaani a̱a̱hksiʼnitahsi. Ki a̱nnihkayii kiisto̱yi no̱mohtsitapi̱piannaana ka̱a̱hkokakihtsimatahsi.”

32Oma̱a Jesus osto̱i i̱i̱kayissanistoma manista̱yaaksiʼnihpa. A̱nnihkayii iihtani̱staisiwa omi̱i̱ksi mata̱piiksii ma̱a̱hkanistahsaawa Pilate ma̱a̱hkokakihtsimatahsi Jesus.

33Kii ki oma̱a Pilate sota̱mattsskitsipiima omii oto̱mahkaokooaayi. Sota̱minihkatsiwa amii Jesus. Sota̱manistsiiwayi “Kika̱taaʼmihpa otsi̱sttsiipihkini̱naaimoaawayi Jews.”

34Itani̱i̱wa Jesusa “A̱a̱mohka kika̱taʼwattaniihpa, kia̱yaa a̱a̱hkitsstsiihpa kita̱a̱nikki a̱a̱mohka?” 35Itani̱i̱wa Pilate, “Ki̱tssksiniihpa ni̱tsawanistapssi Jew. Kitsi̱tsinitapiihpiksi ki omi̱i̱ksi kitsi̱naato̱yaapiikoamoaawaiksi ki a̱nnikskaoʼkiaawa kitsipo̱o̱hsapipoʼtookiksi. Tsa̱ anista̱piiwa ko̱mohtaistsi̱piookaiksaawa? Kitsiki̱i̱hpa?” 36Itani̱i̱wa Jesus, “Nitsi̱naaiʼssini ma̱tohtoʼtsstsiiwa anno̱o ksa̱a̱hkommi. Nanista̱psstopi a̱nni ami̱i̱ksi istsi̱naaiksi anno̱o ksa̱a̱hkomm nima̱nikapiimiksi a̱a̱hkstaoʼksipoʼtsiʼtskaamiwopiaawa ami̱i̱ksi Jews. Ki a̱nnihkayii ami̱i̱ksi Jews nima̱takohkottsa̱minno̱kaiksi. Nitsi̱naiʼssini ma̱tohtoʼtsstsiiwa anno̱o ksa̱a̱hkommi.” 37Oma̱a Pilate, sota̱maniiwa, “Iika̱nistsinattsiwa a̱nni kita̱waaniihpi kitsi̱sttsiipihkini̱naiʼssi.” Jesus itsipo̱ʼtanistsiiwayi, “Kiistowa, a̱nnaoʼka annaahka a̱a̱niiwahka. Ki niisto̱wa no̱mohtsipokaayi, ki anno̱o ksa̱a̱hkomm no̱mohtsitoʼtoo na̱a̱hkitsitsinikatoohsi oma̱naʼssini. Kana̱i̱tapiiyi iihta̱i̱sapooiksi oma̱naʼssini nita̱ksisstsiwokiaawa.” 38Oma̱a pilate itani̱stsiiwa Jesus, “A̱a̱hkikkamsayiitsstsiihpa oma̱naʼssiiyi.”

O̱ki. Ota̱i̱ʼksistanistoohsi a̱a̱mohka oma̱a Pilate itsski̱tapsaksiwa omi̱i̱ksi Jews, ki itani̱stsiiwaiksi “Nimatohkoonima̱a̱hpa a̱a̱hkohtotoiʼmahsi. 39Ki kiisto̱aawa kanista̱psspoaayi Jews, ko̱mohtaisapoohpoaawa a̱a̱mohka kanista̱ʼpaisspoaawayihka, aa̱oʼtsstsiisi amoohka o̱mahksiksistsikoyihka, kitsi̱tawaanikkihpoaawa niʼtsita̱piiwa na̱a̱hksipoʼtoahsi, amo̱ksiska iyi̱nnaikska, ka̱a̱hksipoʼtomoohsoaayi. O̱ki. A̱nnohka taka̱a kita̱ksipoʼtomoohpoaawa? Kita̱kstaiʼpoʼtomoohpoaawa amo̱o kitsi̱sttsiihpihkini̱naaimoaawa, kanista̱psspoaayi Jews?”

40Ki sota̱msohkawaaniiyaawa, “Pinipo̱ʼtoosa Jesus. Poʼto̱o̱sa Barabbas.” O̱ki, a̱a̱mohka Barabbas a̱nniksaoʼki anni̱i̱kska a̱ohkanohkimaikska ma̱a̱hkokihkaʼsaawa.

Currently Selected:

John 18: BLA1979

Highlight

Copy