John 16

1Ki ina̱i̱ʼtanistsiiwa oma̱a Jesus oma̱nikapiimiksi, “O̱ki. Ko̱mohta̱i̱kayissanistohpoaawa a̱a̱mostska a̱kanistsiistska ka̱a̱hkohtsayiksiwa̱atoohsoayi kitoma̱i̱ʼtakssoaayi aaʼnistsi̱i̱saawa. 2Kitsi̱tsitapiihpoaawaiksi kita̱kohtsaisskookoaayaawa otsi̱tawaatsi̱moihkaahpoaawaistsi. Ki a̱kanistsiiwa oma̱a kita̱ksiʼnikkoaawawa a̱kanistsitsiihtaawa otawa̱a̱toaʼpanisttsissi ma̱a̱hkaahsitakia̱ttsaahsi A̱ʼpistotookiyi. 3A̱nni a̱kohtanistaʼpaissiiyaawa otsawa̱i̱ssksinoahsaawa ni̱nni ki niisto̱yi. 4A̱nnohka kitsi̱kayissanistohpoaawa ota̱yakanisttsiihpiaawa. Ki a̱nniai aa̱oʼtsstsiisi otsi̱takanistaʼpaisspiaawa kita̱kitsaakiaissksinihpoaawa kitsi̱i̱kaanistohpoaawayi. Anni̱i̱hka istsitsa̱omatapaaoʼsi a̱a̱mohka kima̱tsitanistohpoaawa, takaa kitsi̱tohpokaʼpaissiimohpoaawa. 5Ki a̱nnohkayii ta̱ksskitapoo nito̱ʼtsskooka, ki kitsi̱naoʼksaohtsopoahtsiiʼsakkihpoaawa nita̱yaakitapoohpi. 6Ki kita̱a̱nistohsoaayi a̱a̱mostska ko̱mohtsiitaʼpohkoniitsiihtaahpoaawa. 7O̱ki, kita̱kanistohpoaawa niitsiiyi. Ita̱pssokaʼpiiwa kiisto̱aawa nita̱ksistapoohsi. Oʼtsi̱tssksokaʼpiiwa. Nika̱taaʼksistapo̱ohtopi, oma̱ahka kita̱ksspommookoaawahka Natowo̱ttakahka ma̱takohkottsitapoowaatsi. Ki ayi̱i̱stapo̱oiniki nita̱kitsitapsskoa̱wa kiisto̱aawayi. 8Ki osto̱yi aa̱oʼtoosi kita̱kitaistama̱atsookoaawa ka̱taʼyaomaiʼtakiiksi otsi̱pahtsisskskaaʼtsimaanooayi. A̱i̱pahtsisskskaʼtsimiaawa manistsi̱i̱hpi maka̱ʼpiipaitapiʼssini. A̱i̱pahtsisskskaʼtsimiaawa manistsi̱i̱hpi moka̱moʼtsipaitapiiʼsini. A̱i̱pahtsisskskaʼtsimiaawa nanista̱yaakokakihtsima̱yihpiaawa. 9Ma̱tomaiʼtookaiksaawa. Ki a̱nniai sta̱minakowa otsi̱pahtsisskskaʼtsissoaayi maka̱ʼpipaitapiʼssini. 10Niisto̱wa nita̱kitapoo ni̱nna, ki kita̱yaaksawattsinookihpoaawa. Ki a̱nniai a̱kstaminakowa otsi̱pahtsisskskaʼtsissoaayi moka̱moʼtsipaitapiʼssini manistsi̱i̱hpi. 11Ki omi̱iska isti̱naayiska anno̱o ksa̱a̱hkommi, omi̱iska Makaʼpatoʼsiiyiska i̱i̱kaiksistokakihtsimatawa. Ki a̱nniayi sta̱minakowa otsi̱pahtsisskskaʼtsissoaayi nanista̱yaakokakihtsima̱yihpiaawa.

12O̱ki. A̱nnoohka itsi̱i̱stapakawoyi ka̱a̱hkanistohpoaawaistsi. A̱nnohka kima̱takohkottanistohpoaawaistsaawa. Kita̱kiiko̱mayikiʼtsiihpoaayaawa. 13Ki oma̱ahka kita̱kohkokkoaawahka moka̱moʼtaʼpiiyi, oma̱ahka Natowo̱ttakahka aa̱oʼtoosi kita̱kito̱kamoʼtsi̱piookoaawa ka̱a̱hkiitaʼpoka̱mootssksinima̱atsookoohsoaayi. Anni̱i̱stsiska kita̱kaistamattsi̱yiihpoawayistska osto̱yi ma̱takohtoʼtsstsi̱i̱waistsaawa. A̱a̱nistahpistsi, a̱nnistskaoʼki kita̱kaistama̱atsookoaawa. Ki kita̱ksi̱kayissaistama̱atsookoaawa ota̱yaakanistsiihpi. 14A̱kaistamatstohkatoma nani̱stsspsspi. Niisto̱yi a̱kohtoʼtoʼtsima anni̱i̱stsiska kita̱kaistama̱tsiyihpoaawaistsi. A̱kohtsitaistamatstohkatom nani̱stsspsspi. 15Ni̱nna otsitapi̱i̱wahsistsi nino̱ohkattohkanaina̱anatoohpiaawa. Ki a̱nnihkayi ko̱mohtanistohpoaawa Natowo̱ttaka a̱kohtoʼtoʼtsima niisto̱i anni̱i̱stsiska kita̱kaistama̱ttsiyihpoaawaistsi.

16O̱ki. Ma̱taksisamowa kima̱takattsinookihpoaawa. Ki a̱ksipstsiksisamowa kita̱kattsitsinookihpoaawa.”

17O̱ki. Istsi̱kiksi anni̱ksiska oma̱nikapiimikska sota̱manisttsiiyaawa, “Tsaahtaa a̱a̱hkanistapawaani̱i̱wahtaoʼtsiks amoohka a̱a̱mohka ota̱a̱nikkihpihka, ma̱taksisamowa a̱kitsawattsinoawa; a̱ksipstsiksisamowa ki a̱kattsitsinoawa. Ki tsa̱a̱htaa a̱a̱hkanistapawaaniiwa a̱kitapoowa o̱nni.” 18Ki ma̱ttaniiyaawa, “Tsa̱a niitapa̱waaniiwa a̱a̱mohka otani̱ssi, a̱ksipstsiksisamowa. Mi̱stawaaniihpi.”

19O̱ki. Jesus issksino̱yiiwaiksi otsitsi̱i̱htaani ma̱a̱hksopoahtsiisa̱yissaiksi. Sota̱manistsiiwaiksi, “O̱ki. Ko̱mohtaisopoahtsiʼsattsiiyihpoaawa a̱a̱mohka ta̱a̱niihpihka, ma̱taksisamowa kita̱kitsainookihpoaawa, ki a̱ksipstsiksisamowa kita̱kattsitsinookihpoaawa. 20O̱ki, kita̱kanistohpoaawa niitsiiyi. Kiisto̱aawa kita̱yaaka̱sanihpoaawa, kita̱yaakaoyiʼtakihpoaawa. Kii ka̱taʼyaomaiʼtakiiksi a̱ksotamiʼtaamssiaawa. Ki kiisto̱aawa ki ta̱ksikihki̱niʼtakihpoaawa. Kii aipstsi̱ksisamosi kita̱kitahtsoaiʼtaamssa̱ttsootspoaawa. 21A̱nnohka kiisto̱aawa niʼto̱i niitsiiwa oma̱a aaki̱i̱wa a̱i̱tamaaksikamotaawa. Issksini̱ma oka̱o̱ʼtsstsissi otsi̱taksisttsoohkoyiʼpi; ki aiksistsi̱pokaamisi oma̱a aaki̱i̱wa ma̱takattohtsiksimssta̱a̱wa otsi̱sttsoohkoyiʼssi. A̱ksotamikakohtsiʼtaamssiwa o̱o̱mi otssitsi̱maani, otsipoka̱a̱iʼssayi. 22Ki a̱nnohka niʼto̱i niitsiiwa, kiisto̱aawa kita̱yaaksikihki̱niʼtakihpoaawa. Kii kita̱kitamattsinoohpoaawa, ki a̱nnimayii kita̱kstonnatohsiʼtaamsspoaawa. Ki ma̱takitsstsiihpa kito̱ʼtomookoaayi kitsi̱ʼtamssoaawayi. 23Ki a̱nniayii aʼnista̱ʼpisi kita̱kitsawattokamanikkihpoaawa. Kita̱kanistohpoaawa niitsiiyi. A̱a̱mostska kitsi̱i̱kamanistahpoaawayi ni̱nna, ikka̱mohto̱kamaniinoainiki kita̱mssoaayi omi̱i̱ksisk itoma̱i̱ʼtakiiksi niisto̱yi kita̱kitohkokkoaawaistsi. 24A̱nni kima̱tomaikakanistokamanistawaawa ni̱nna. A̱nnohka a̱o̱kamanistok ni̱nna. Kita̱kohtsitsiitaʼpiʼtaamsspoaawa.

25Omi̱i̱stsi kita̱a̱nistohpoaawaistsi, nitsi̱sttsksiʼpoatoohpiaawa. Ki a̱yaakoʼtsstsiiwa kitsi̱taksawattsisttsksiʼpoatohpoaayi, kita̱kohtsitsiʼtskaanistohpoaawa ni̱nna. 26Ki a̱nnihka ksiistsiko̱yihka kita̱kohtokamanistawaawa ni̱nna kita̱mssoaayi ami̱i̱ksisk itoma̱i̱ʼtakiiksi niisto̱i. Nima̱tawaaniihpa niisto̱wa kita̱kanistomoohpoaawa ni̱nna. Kita̱kohkottawattokamanistawaawa. 27Osto̱yi kita̱komimmokoaawa. Kiisto̱aawa kita̱komimmokihpoaawa, ki kita̱o̱maiʼtsiihpoaawa no̱mohtsistapoʼtoohsi ni̱nna, ki a̱nnihkayii ko̱mohtakomimmokoaawa. 28No̱mohtsiistapoʼtoo ni̱nna, ki anno̱o ksa̱a̱hkommi nitsi̱toʼtoo. Ki nita̱ksiistapa̱atoohpa. Nita̱ksskitapoo ni̱nna.”

29O̱ki. Ki a̱nniai oma̱nikapiimiksi otsi̱tanikkaiksi, “Ki a̱nnohka kita̱i̱ʼtskanikkihpinnaana. Kima̱tsistsksiʼpoakkihpinnaan. 30Ki a̱nnohkayii ni̱tssksiniihpinnaan kiisto̱wa kitsi̱ʼtsinissksiniʼpa. Oma̱a iika̱msstaasi mata̱piiwa ma̱a̱hkohkoissksinimaahsi kima̱takstsinaisopoahtsiiʼsakka. Kiisto̱wa kita̱ksotamikakanistawa otsitsi̱i̱htatoohpi ma̱a̱hkssksinissi. Ki a̱a̱mohkayii no̱mohtaomaiʼtsiihpinnaan ko̱mohtoʼtoohsi A̱ʼpistotookiwa.”

31Jesus itani̱stsiiwa̱i̱ksi, ka̱a̱hksawa̱i̱ʼta̱ʼpomaiʼtakihpoaawa. 32I̱sstsiiyik. A̱yaakoʼtsstsiiwa kitsi̱takohkanaisskikkihpoaawayi. Kita̱kohkanawa̱niitoohpoaawa. Kita̱kitohkanawaaniitahkayihpoaawa. Kita̱kitsiʼtsi̱taisskikkihpoaawa. Ki niisto̱wa nima̱takitsiitaʼpiʼtsitaisskikkowa. Ni̱nna ni̱tohpokaʼpaissiimoka.

33Anni̱i̱stska kita̱a̱nistohpoaawaistska, no̱mohtanistoohpiaawa ka̱a̱hkohtoʼtoʼtsissoaayi iʼta̱a̱ma̱ʼpi. Kita̱kohtsitoʼtoʼtsiihpoaawa iʼta̱amaʼpii niisto̱wa. Anno̱o ksa̱a̱hko̱mma kita̱ki̱tsinaokohkoyiʼpoaawa. Iika̱ʼkimaaka. Niisto̱wa ta̱i̱tamaakssikaatstoʼpa saommitaʼpi anno̱o ksa̱a̱hkomma.

Currently Selected:

John 16: BLA1979

Highlight

Copy