Məsəloox 6
6
Zamin ma çurpa
1Bez ğar, q'ert'ay gala zamin çurpi,
Şot'ay gala əyit tadenusa,
2Vi ǰomoxun c'eri əyitmoğoxun təlinə baft'enusa,
Vi əyitmoğone va ləc'ürde.
3Mone, ene q'ert'ay kiyelnu.
T'e vədə, ay bez ğar, va çark'est'eynak'
Taki şot'ay turin oq'a bita, xoyinšba.
4Vi piyel nep' eysa ma barta,
Vi pulmoğo ma q'ic'p'a.
5Ceyranen içu ǒxə̌lbali kiyexun,
Q'uşen içu toraxun çark'est'ala k'inək' va çark'est'a.
Tənbəl ma baka
6Ay tənbəl, xuritura běğa,
Şot'oxun müdrikluğa zombaka.
7Şot'ay nə kalono,
Nə nəzərətçi, nəəl kalaluğbal.
8Ama p'urumal yəynul ukune girbon,
Exe vədine içeynak' yeme topbon.
9P'oy hun heq'ədər bask'alnu?
Hevaxt'al śirik' nep'ax mandalnu?
10Samalal bask'i nep'ax mandayin,
Kula kiin loxol laxi arśayin,
11Kəsibluğ amdarfǔq'k'al k'inək',
Eht'iyəcəl mela amdar k'inək' vi loxole eğon.
Pis amdari axır
12Yaramaz, şər amdar,
Əfçi əyitk'ane tarane,
13Himebsa, kiin-biine əyite.
14Şot'ay ük'e pis niyəte bu,
İz fikir həmişə şəre, davane galst'a.
15Kot'o görəl şot'ay bel bələne eğon,
Bürdən biti çarasuze mandon.
Q'ončuğoy nifrətbala vǔğ şey
16 Q'ončuğon ǔq şeyaxun nifrətp'i irit'ene,
Lap vǔğ şeyaxun:
17Alaxun oq'a běğala pulmoğoxun;
Əfçi əyitk'ala muzaxun;
Taxsırsuzt'ay p'iya śik'ala kulmoğoxun;
18Niyət şər bakala ük'əxun;
Şərə p'ap'seynak' muşt'ağ bakala turmoğoxun;
19İz əfçinen nəfəs haq'ala əfçi şahidaxun,
Saal viçimoğoy arane dava sakala amdaraxun.
Q'ert'ay çuğoxun ə̌xil baka
20Bezi ğar, vi bavay əmirxo eyexun ma c'evk'a,
Vi nanan zombit'oğo ma bosa.
21Şot'oğo vi ük'e boş efa,
Şot'oğo həmişə vi q'oq'exun suruk'p'a.
22Tağat'an şot'oğon va yaq' ak'est'alt'un,
Bask'at'an va q'orişalt'un,
Muğurbakat'an va maslaat tadalt'un.
23Me əmirxo çirağe,
Me maslaat işiğe,
Tərbiyineynak' bakala töhmət yəşəyinşest'ala yaq'e.
24Mot'oğon va tarak'ala çuğoxun,
Muč'a muzla q'ert'ay çuğoxun q'orişebon.
25Şot'ay gözəlluğa bənd ma baka,
Şot'ay pul q'ic'bsunen va maq'an ferett'i.
26Axıri tarak'ala çuğoy toy sa loq'ma šume,
P'oy şot'aynak' vi elmoğo het'aynak' laxavax?
27Aruğo q'oltuğe ext'i,
Paltara nu bok'osp'es banekon ki?
28S'ile loxol tarapi,
Turmoğo nu cərdes banekon ki?
29Q'ert'ay çuğoy t'ǒǒx bağalt'ay axıral metəre,
T'e çuğo laft'alo cazasuz tene mandal.
30Busa oğrinen iz tapana buybseynak' başq'ayin,
Şuk'k'alen şot'o tene q'inəyinşbsa.
31Ama şot'oval biq'at'an içuxun vǔğ q'at c'eğalane,
İz k'ojin bakal nu bakalt'u tadalane.
32Q'ert'ay çuğoxun tarak'alo isə lap q'ammaze,
İçu əfçibsun çureğalt'ine metərbon.
33Me işq'ara t'ap'en, biyabur baksunene yaq'běğsa,
Şo həmişə ç̌omə̌yin bakale.
34Şot'aynak' ki, t'e çuğoy işq'ara q'eyrəten bok'osebon,
Şot'oxun amansuz həyife haq'on.
35Hik'k'alen şot'ay işq'ara efes tene bakon,
K'ə tadayt'un şo tene irəzi bakon.
Currently Selected:
Məsəloox 6: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.
