Mat'fey 21

İsusi Yerusalima baysun

(Mrk'. 11:1-11; Luk'. 19:28-40; İoan. 12:12-19)

1Şorox Yerusalima ı̌šalayinşaki Zeytun buruğo Bet'fagey ayiza p'ap'at'an İsusen p'ə̌ şagirdə yaq'abi 2şot'oğo pine: «Ef běš bakala ayize takinan. P'ap'ala k'inək' t'et'iya ğaç̌ sa elema q'a iz q'oduğa ak'alnan. Şot'oğo şadbi Bez t'ǒğǒl eçanan. 3Şinesa və̌x sa əyit uk'ayin, şot'o metər coğab tadanan: "Morox Q'ončuğone lazım". Şot'inal hat'e saad şot'oğo taşt'una icaza tadale». 4Moroxal xavareçalen pi me əyit bex p'ap'seynak'e baki:

5«Sioni xuyərə #21:5 Sioni xuyərə - yəni Yerusalimi amdarxo. Sion Yerusalimi bisi s'ine. "Xuyər" memiya "amdarxo" upsune. upanan ki,

"Běğa, vi Padçağ vi tərəfe eysa,

Şo İçu ala nu biq'alone, elemi loxole arśe,

Q'oduği loxole arśi eysa Şo."» #21:5 İsa. 62:11; Zək. 9:9

6Şagirdxo taśi İsusen əmirbi k'inək' bit'un. 7Elema q'a iz q'oduğa eçeri şot'oğoy loxol içoğoy paltara laxi İsusa arśevt'unk'i. 8Camaati gelet'ine içoğoy paltara yaq'a pastst'ay, bəzit'oğon isə xodurxoy taymoğot'un bot'i yaq'a pastst'ay. 9İsusi běš tağala saal bač'anexun eğala camaaten metəre harayey:

«Davidi Ğara hosanna! #21:9 Hosanna - əbrani muzin "Buxačuğo alxışq'an baki!" haray k'inək'e əşesa.

Q'ončuğoy s'iyen Eğalo bəxt'əvəre!

Ən alloyluğxo hosanna!» #21:9 Ǐvel mə̌ğ. 118:25-26

10İsus Yerusalima bağat'an dirist' şəhəren Şot'oxune əyitey. Amdarxon xavart'un haq'say: «Mo şuva?» 11İz bač'anexun eğalt'oğon isə nexey: «Mo Galileyin Nazaret' şəhərexun bakala İsus xavareçale».

İsusi haq'i-toydalxo xramaxun şəp'esun

(Mrk'. 11:15-19; Luk'. 19:45-48; İoan. 2:13-22)

12İsus xrama hari haq'i-toydalxo bitova t'et'iin şəp'eśi. Təngə badalbalxoy q'a göyərçin toydalxoy ist'olxo taranedi. 13Şot'oğo metəre pi:

«"Bez k'oj afırıpseynak' bakala k'oj k'aleğale" #21:13 İsa. 56:7

pine śameśe. Ama və̌n şot'o "fǔq'k'alxoy mesanan" #21:13 Yer. 7:11 c'urevk'e!»

14 Xrama bakat'an İsusi t'ǒğǒl k'ač'i saal axsağ amdarxone ı̌šalayinşaki, İsusenal şot'oğo q'olayebi. 15Ama samci běyinšxon q'a k'anun zombalxon Şot'ay məət't'əl mandala əşurxo biq'suna saal xrama "Davidi Ğara hosanna!" uk'a harayk'ala əyloğo ak'i əcuğləyinşt'unbaki. 16Şot'oğon pit'un: «Mot'oğoy k'ə upsuna inbaksa?» İsusen şot'oğo pine: «Hoo.

"Körpə əyloğoy q'a döş ukala əyloğoy ǰomoxun c'eğale

Vaynak' bakala tərif" #21:16 Ǐvel mə̌ğ. 8:2

əyitə tenan k'alpe?»

17İsusen şot'oğo barti şəhərexun c'ere. Şo Bet'anyina taśi uşe t'iyane mandi.

Bar nu tadala incilnə xod

(Mrk'. 11:12-14,20-24; Luk'. 13:6-9)

18Savaxt'an İsus şəhəre qaybakat'an busanebaki. 19Yaq'e t'ǒğǒl sa incilnə xod ak'i şot'o ı̌šalayinşebaki, ama xode loxol xazalaxun başq'a sa şey tene bə̌ğə̌bi. İsusen şot'o "barta ene vi loxol meyvə maq'an baki" pine, incilnə xodal hat'e saad q'arinebaki. 20Şagirdxon mot'o ak'i məət't'əlt'un mandi, "axıri me incilnə xod hat'e saad hetəre q'aribaki?" pit'un. 21İsusen şot'oğo coğabe tadi: «Və̌x düzinəz nex: əgər və̌st'a věluğ baki nu şüpələyinşakaynan, Bezi me incilnə xodin bel eçeriyo hik'ə ki? Lap me buruğo "hayza, va dənizə bosa" uk'aynan, hak'etərəl banekon. #21:21 Mat'. 17:20; 1 K'or. 13:2 22Əgər və̌st'a věluğ bakayin, afırık'at'an ef çureğalt'u haq'alnan».

İsusa tadeśi ext'iyər

(Mrk'. 11:27-33; Luk'. 20:1-8)

23İsus xrama hari zombat'an, samci běyinšxon saal azuk'i ağsaq'q'alxon Şot'o ı̌šalayinşaki xavart'un haq'i: «Hun me əşurxo mani ext'iyərenen bsa? Va ke ext'iyərə şine tade?» 24İsusen şot'oğo pine: «Zuval və̌xun sa əyit xavar haq'oz, Bezi suala coğab tadaynan, Zuval mot'oğo mani ext'iyəren bsuna və̌x uk'oz. 25K'unuk'bseynak' İoana ext'iyər mayine tadeśey? Göynuxun yoxsa amdarxoxun?» Şot'oğon burt'unqi içoğoy arane maslaatpsa: «Əgər uk'ayan "göynuxun", "p'oy şot'o het'aynak' tenan věbaki?" uk'ale. 26"Amdarxoxun" upsunal camaataxun q'ǐne, axıri bitot'in İoana xavareçale hesabbsa». 27Şot'o görəl metərt'un coğab tadi: «Teyan ava». İsusenal şot'oğo "t'e vədə Zuval mot'oğo mani ext'iyəren bsuna və̌x tez uk'al" pine.

P'ə̌ ğare barada məsələ

28«P'oy və̌n me məsəlin barada k'ənan fikirbsa? Sa amdari p'ə̌ ğare baksa. Sunt'ay t'ǒğǒl taśi "ay bez ğar, taki ğe t'ulluğa əşp'a" nexe. 29Şot'inal süft'ə "tez çuresa" pi, ama oşa pěšmanbaki tanesa. 30Me amdar iz t'iyə̌mi ğare t'ǒğǒlal taśi p'urum hame əyitə nexe. T'e ğarenal süft'ə "tazsa, bez ağa" pi, ama oşa tene taysa. 31İsə ef zənden, mot'oğoy mat'ine iz bavay çureğalt'u bex p'ap'esp'i?» Şot'oğon "samcit'in" pit'un. İsusen şot'oğo pine: «Və̌x düzinəz nex: naloggirbalxo q'a tarak'ala çupux və̌xun běš Buxačuğoy padçağluğa bağalt'un! 32Axıri, İoan ef t'ǒğǒl düzgün yaq'a ak'est'eynak' eğat'an və̌n şot'o tenan věbaki. Ama naloggirbalxo q'a tarak'ala çupux şot'o vět'unbaki. Və̌n isə lap mot'o ak'it'uxun oşal tenan pěšman baki şot'o věbaki. #21:32 Luk'. 3:12; 7:29-30

Pis bağbanxoy barada məsələ

(Mrk'. 12:1-12; Luk'. 20:9-19)

33Q'erəz sa məsəlinə ǔmǔxlaxanan: Sa amdari oç̌ale baksa, eçeriyal t'e oç̌ala t'ulluğe lasak'sa. İzi hərrəminə çəpərebsa, bona ga kašp'i t'ulq'ač'k'ale düzbsa, t'iyana nəzərətbseynak' alloy sa q'alane biq'sa. Oşa isə me t'ulluğa bağbanxo şərten tadi, iç c'eri q'erəz ölkinəne taysa. #21:33 İsa. 5:1-7 34Hari bar girbala vədə p'ap'at'an şot'in içu koft'ala paya exst'eynak' iz k'ulurxo bağbanxoy t'ǒğǒle yaq'absa. 35Ama bağbanxon şot'ay k'ulurxo biq'i sunt'u t'ap't'unne, t'iyə̌mint'u best'unbsa, xibimcit'u isə ǰělayinşt'unbsa. 36T'e vədə t'ulluği q'ončuğon p'urum süft'int'uxunal gele q'erəz k'ulurxone yaq'absa. Ama bağbanxon şot'oğoy belal süft'int'oğoy bel eçeri əşurxot'un eşt'a. 37Axırda "bez ğara hörmətt'unbon" pi, iz ğarane şot'oğoy t'ǒğǒl yaq'absa. 38Bağbanxon isə ğara ak'i içoğoy arane metərt'un nex: "Oç̌al mot'o mandale! Ekinan kot'o besp'en oç̌al yaxq'an mandi!" 39Hametərəl bsat'un, şot'o biq'i t'ulluğaxun t'ǒǒx c'evk'i best'unbsa. 40İsə ef zənden me t'ulluği q'ončuğon hari me bağbanxo k'ə bale?» 41Şot'oğon pit'un: «Me içoğoy ük' pisluğen buy bakalt'oğo əfçibale, t'ulluğa isə t'etər amdarxo şərten tadale ki, şot'oğon bara iz vədine içu tadat'un».

42İsusen şot'oğo pine: «P'oy və̌n Ǐvel Śame boş mot'oğo tenan k'alpe ki?

"Barizap'k'alxon t'ǒǒx bosi ǰě

K'ojin binorina efala ǰěne baki.

Mo Q'ončuğoy əşey,

Beş piin běš baki mat mandala əşe". #21:42 Ǐvel mə̌ğ. 118:22-23

43Mot'aynak'al və̌x nexzu: Buxačuğoy padçağluğ və̌xun haq'eśi Şot'ay bar tadala azuk'a tadeğale. 44Me ǰěne loxol bitalo śareğale, ǰě isə şi loxol bitayin, şot'o č'ak'k'ale». #21:44 Bəzi kiinśamurxost'a me bənd tene bu.

45Samci běyinšxon q'afariseyxon İsusi exlət'p'i məsəlxo ibakat'an q'amişt'unbaki ki, İsusen me əyitmoğo içoğoy baradane nex. 46Şot'oğon çurt'unśi İsusa biq'at'un, ama camaataxun q'ǐt'unbi, şot'aynak' ki, camaaten Şot'o xavareçale hesabbsay.

Currently Selected:

Mat'fey 21: udi

Highlight

Copy