Mat'fey 2

Müdrik amdarxoy hari bul k'os'bsun

1İsus İudeyin Bet'lexem şəhəre padçağ İrodi döörəst'ane nanaxun baki. Şo nanaxun bakit'uxun oşa běğ c'eğala tərəfəxun bakala müdrik amdarxo Yerusalima hari 2xavart'un haq'i: «İudeyxoy təzə nanaxun baki gələcəyin padçağ maya? Běğ c'eğala tərəf Şot'ay nanaxun baksuna avabakest'ala muč'uli c'eysuna ak'i Şot'o bul k'os'bsayan hare». #2:2 Ams'i oç̌. 24:17; Yer. 23:5; Zək. 9:9; Mrk'. 15:2; İoan. 1:49

3Padçağ İroden mot'o ibakat'an içal, Yerusalima yəşəyinşaloroxal bito narahatt'unbaki. 4İroden bito samci běyinšxo saal k'anun zombalxo girbi şot'oğoxun Xrist'osi maya nanaxun baksunane xavar haq'i. 5Şot'oğonal "İudeyin Bet'lexem şəhəre" pit'un, şot'o görə ki, xavareçali piyorox metəre śameśe:

6«Ay İudeyin oç̌ala bakala Bet'lexem,

İudeyin kakala şəhərmoğoy boş ən mis'ik'onu pi şot'oğoxun oq'a bakala sa şəhər tenu hun!

Şot'o görə ki, vaxun c'eğale bez azuk' bakala israilluğoynak'

İz sürünə bəsləyinşi běğala sa çoban k'inək' bakala kalaluğbal!» #2:6 2 Şam. 5:2; 1 Hadis. 11:2; Mik'. 5:2

7T'e vədə İroden müdrik amdarxo c'əp'k'in k'alpi şot'oğoxun muč'ulin ak'eśi dəgig vaxt'ane zombaki. 8"Takinan əylə yönbəri qə̌věkinan, bə̌ğə̌bala k'inək' za xavar tadanan, zuval taśi Şot'o bul k'os'boz" pi, şot'oğo Bet'lexemane yaq'abi.

9Metərluğen, şot'oğon padçaği pit'oğo bitova ǔmǔxlaxi yaq'at'un baft'i. İçoğoy běğ c'eğala tərəf ak'i muč'ulinenal şot'oğo yaq' ak'est'ane burqi. Muč'uli taśi düz Körpə bakala gane loxol çurepi. 10Şot'oğon muč'ulin çurpsuna ak'i lap gelet'un mǔqbaki. 11K'oya baśi Körpə İz Nana Mariyaxun sagala at'unk'i, k'ə̌k'ə̌p'i loxol çökt'i Şot'o bult'un k'os'bi. İçoğoy eçeri toyexlu payurxo qaypi Şot'o q'ızıl, ladan saal mirrat'un #2:11 ladan - bok'ospseynak' bakala şaat' adeğala q'aribaki q'ir; mirra - şaat' adeğala oyurxoxun həzirbaki toyexlu c'əyin tadi. 12Üşe nep'en isə İrodi t'ǒğǒl nu qaybaksuni tapşuruğat'un haq'i, şot'o görəl içoğoy oç̌ala qaybakat'an fırıpi q'erəz yaq'ent'un taśi.

Misirə t'ist'un

13Müdrik amdarxo yaq'a baft'it'uxun oşa Q'ončuğoy sa angel İosifa nep'e boş ak'eśi pine: «Hayza, Körpə q'a İz Nana ext'a Misirə t'it'a. Zu va uk'ala vədinəl śirik'al t'et'iya manda, şot'o görə ki, İroden Körpə qə̌věśi bə̌ğə̌bi bespsune çuresa». 14Metərluğen, İosif hayzeri hat'e üşe Körpə q'a İz Nana ext'i Misirəne taśi. 15İrod biyaminal t'et'iyane mandi. Mo Q'ončuğon xavareçala pest'i əyit bex p'ap'seynak'e baki:

«Bez Ğara Misirəxunez k'alpi». #2:15 Hos. 11:1

16İroden müdrik amdarxoy içu axmaği gala laxsuna q'amişakat'an gelene əcuğləyinşaki. Əmirbi Bet'lexema q'a iz hərrəmine bakala bito p'ə̌ saal p'ə̌ yəşəxun oq'a bakala körpə ğar əyloğo besp'esedi. Körpəy yəşə müdrik amdarxon içu pi vədinə görəne hesabbey. 17Metərluğen, Yeremiya xavareçalen pi me əyit bexe p'ap'i:

18"Mone, Rama şəhərexun sa səse c'eysa,

Ǒnepsuni, kala şivani səsure mo!

Rahilən iz əyloğoynak'e ǒnene,

Şip'tenebaksa şo,

Şot'o görə ki, şorox ene butet'un". #2:18 Yer. 31:15

Misirəxun Nazaret'a qaybaksun

19İrod p'urit'uxun oşa, İosifa Misirə Q'ončuğoy angele nep'e boş ak'eśi. 20Şot'in pine: «Hayza, Körpə q'a İz Nana ext'a İsrail ölkinə qaybaka, şot'aynak' ki, Körpəy elmoğo haq'sun çureğalorox p'uret'un». 21İosifal hayzeri Körpə q'a İz Nana ext'i İsrail ölkinəne yaq'a baft'i. 22Ama Arxelani iz bava İrodi gala İudeyin padçağ baksuna ibakat'an t'iya taysuna q'ǐnebi. Nep'e boş içu ayan bakit'uxun oşal Galileya oç̌alane taśi. 23Hariyal Nazaret' uk'ala şəhəre areśi. Mo xavareçalxon pi "Şot'o Nazaret'lu ukalt'un" əyit bex p'ap'seynak'e baki.

Currently Selected:

Mat'fey 2: udi

Highlight

Copy