Burqesun 16

Acari Avramaxun bı̌hi baki İsmaila eşt'un

1Sarayen Avrameynak' əyel eçes bateneksay. Şot'ay misirlu sa çuux-nökəre buy, iz s'i Acar. 2Sarayen Avrama metəre pi: «İsə ki Q'ončuğon za əyel tene tast'a, ext'a bezi me çuux-nökərəxun baka. Bərkə kot'in q'a bakayin zaynak' sa ğar eneçeri». Avramen Sarayi əyitə běneği, 3Sarayenal izi çuux-nökərə, misirlu Acara ext'i izi işq'ara çuux pi tanedi. Avrami Kənan oç̌ala eysun isə vis' useney. 4Avram Acaraxun baneki, Acaral əyeləne mandi. Acaren iz bı̌hi baksuna avabakala k'inək' içu kalane taşt'a burqi. 5T'e vədə Sarayen Avrama pine: «Hunnu kot'o bez bel laçuvk'iyo! Ext'i bez kiin kot'o vaynak' çuuxez bi, isəəl bı̌hi baki zaynak' yağine bake. Barta isə Q'ončuğonq'an pi şine beşi boşt'an düz nex». 6Avramen qaybaki metəre pi: «Vi nökəre hunen ava, hetər çurensa hat'etərəl ba». Hat'e ğinaxun Sarayen bureqi iz nökərə pul tadi işiğ nu tast'a, axırdal t'etəre baki ki, Acaren iz bula haq'i t'it'alane baki.

7Ams'i oç̌ala, Şur şəhəre tağala yaq'e loxol sa orayine buy, Acar hari miya p'ap'ala vədine Q'ončuğon İz angela şot'ay běš c'evk'i İz muzin 8pesedi: «Ay Sarayi nökər Acar, sa upa běyn, metər mayinen eysa, maç̌un taysa?» Acarenal qaybaki "şineynak' ki nökərluğezbsa, şot'oxunez bez bula haq'i t'ist'a - Sarayaxun" pine. 9T'e vədə Q'ončuğon angela İz muzin saal pesedi: «Qaybaka taki, vi bulal k'os'p'a vi nökərluğa ba». 10Oşa metəre pi: «Vaxun kala sa nəsil törəyinşakale, şot'oğoy saya t'eq'ədər booz ki, bǒq'ə̌lpi çark'est'ala tene bakal şot'oğo». 11Q'ončuğon saal angeli muzin əyitp'i pine: «Avazu ki, bı̌hinu. Vi sa ğar bakale, iz s'iya İsmail #16:11 İsmail - əbrani muzin "ismail" əyit "Buxačuğon inebaksa" upsune. laxa, şot'o görə ki, Buxačuğon vi t'ar ğine va inebaki. 12Vi me ğaren şuk'k'ala bač'an tene k'os'p'al, izi kalo iç bakale həmişə. Nə iç şuk'k'alaxun tene p'aq'al, nəəl içuxun tet'un yaq'ax tağal. Şot'ay ara izi viçimoğoxunal şaat' tene bakal».

13Acaren "mone, za Ak'alt'u zuval azk'i" pi, içuxun əyitk'ala Q'ončuğoy s'iya "Za ak'ala Buxačuxe" laxi. 14Kot'o görət'un həysəəl Qadeşi q'a Beredi arane bakala t'e orayini s'iya Beer-Laxay-Roi #16:14 Beer-Laxay-Roi - əbrani muzin me əyitmux "za ak'ala Dirist' Bakalt'ay orayin" upsune. nex.

15Hametər, Acaren Avrameynak' sa ğare eçeri, Avramenal t'e ğare s'iya İsmaile laxi. 16Acaren İsmaila eçat'an Avrami səksən ǔq yəşe buy.

Currently Selected:

Burqesun 16: udi

Highlight

Copy