Burqesun 15

Buxačuğoy Avramaxun irəziluğ ğaç̌esun

1Sa heq'ədər vədə oşa Q'ončuğon Avrama ak'eśi pine: «Avram, q'ı̌maba! Va Zuz q'orişbsa, vi Bezi əyiten taysuni əvəzəl q'at-q'at haq'alnu». 2Ama Avramen qaybaki metəre pi: «Ay bezi Buxačux bakala Q'ončux, bezi əyel nu bakit'uxun oşa, Vi za tadalt'oğoy məənə hik'ə? Zu p'uri taśit'uxun oşa hər şey damask'lu Eliyezera manst'eynak'?» 3Oşa Avramen saal pine: «Za sa zürgət ten tadi, isə mone, bezi k'oya bakala nökərə mandale bezi hər şey!» 4Q'ončuğoy Avrama pi əyit isə mone baki: «Şot'o təə, vaxun bakit'u mandale vi hər şey».

5Oşa Q'ončuğon şot'o qavuna c'evk'i pine: «Göynul běğa, vi zənden, t'iya bakala muč'uliğo bǒq'ə̌lpi çark'est'es bankon? Tenbakon. Haketərəl vaxun bakit'oğo bǒq'ə̌lpi çark'est'ala tene bakal». #15:5 Rim. 4:18; Əbr. 11:12 6Avram Q'ončuğo věnebaki, me věluğa görəl şo Q'ončuğoy piyes düzgüne ak'eśi. #15:6 Rim. 4:3,9,22; Gal. 3:6; İak'. 2:23

7Oşa Buxačuğon saal Avramaxun əyitp'i pine: «Zu va xaldeyluğoy Ur şəhərexun c'evk'i miya eçeri Q'ončuxzu, eçerezu ki, me oç̌alxo həmişəluğ va tadoz». 8Avramen xavare haq'i: «Ay bez Buxačux bakala Q'ončux, hetər avabakoz p'oy zu me oç̌alxoy ene bez baksuna?» 9Q'ončuğonal pine: «Barta Zu Bez tadi əyiti loxol çurpsuna ak'est'az. Hayza həysə xib useni sa dənə ocas, sa dənə keçi, sa dənə eğel saal sa dənə giyər q'a təzə p'ap'i göyərçin eça». 10Avramen içu pi k'inək' bi mot'oğo bitova eçeri šamepi, oşa heyvanxo bı̌yexun qı̌bi qı̌t'u sa tərəf, qı̌t'uval t'e soğo tərəf çüt-çüt bi lanexi, ama q'uşurxo qı̌tenebi, şot'oğo dirist'e laxi. #15:10 Mo t'e vaxt'in amdarxoy irəziluğ ğaç̌eğat'an bala sa hərəkətey. Heyvanxo qǐbi, oşal şot'oğoy bǐyexun c'ovaksun şo upsuney ki, me irəziluğ ğaç̌eğalt'oğoy mat'in izi tadi əyiti loxol nu çurk'ayin, şot'ayal axır me heyvanxollarik'q'an baki. 11Murdarbaki heyvan ukala q'uşurxo hari yeq'e loxol arst'unt'un çuresay, ama Avramen şot'oğo şəp'esay.

12Hari běğ batk'ala vədine Avrama bə̌ğə̌loy sa nep'ene ç̌axp'i, şo nep'e boşal gip, zülmət sa bayinq'unane baft'i. 13T'e vədə Q'ončuğon Avrama pine: «İbaka, k'əz nex: vaxun törəyinşaki nəsil bip'baç̌ usen q'ərib sa gala yəşəyinşale, t'iya bakalt'oğonal şot'oğo k'ul k'inək' əşp'est'i koruğ zapest'alt'un. #15:13 C'eys. 1:1-14; Ap'ost'. 7:6 14Ama Zu t'e ölkin amdarxoy cazina tadoz, vaxun törəyinşaki nəsiləl t'e ganuxun içoğoy kul buy c'eğalt'un. #15:14 C'eys. 12:40-41; Ap'ost'. 7:7 15Hun isə pis əş ten ak'al, vi pula q'ic'p'i t'e dünyəne tağat'anal vaynak' śameśi ömürə yəşəyinşi lap q'ojabaki bakalnu. 16Vaxun bakiyorox me oç̌ala qaybakseynak' isə bip' nəsile badalbaki buq'on, şot'o görə ki, miya bakala emorluğoy əşp'est'ala günaxxo hələ ǰomol śirik' tene buybake, şot'oğoy cazina zapest'ala ği hari tene p'ap'e».

17Běğ batk'i tam bayinq'bakit'uxun oşa Avramen qı̌bi heyvanxoy bı̌yexun hari k'üünəxbakala buxari q'a bok'ala sa yalove c'ovaki. 18Hametər Q'ončuğon Avramaxun İzi irəziluğ ğaç̌esuna ak'est'i pine: «Mone, Misirə bakala oqnuxun burqi kala Yevfrat oqnul śirik' bakala me oç̌alxo bitova vaxun bakit'oğoz tast'a. 19K'ayinluğoy, genizluğoy, gadmonluğoy, 20xet'luğoy, p'erizluğoy, rafaluğoy, 21emorluğoy, kənanluğoy, girgaşluğoy q'a yevusluğoy yəşəyinşala me oç̌al vaxun törəyinşakit'oğo mandale». #15:18-21 Ap'ost'. 7:5

Currently Selected:

Burqesun 15: udi

Highlight

Copy