Burqesun 11

Vaviloni k'üllə

1T'e döörəst'ə dünyəne bakala amdarxoy bitot'in sa muzine əyitey, bitot'inal suna q'amişebaksay. 2Şorox gelebaksunen běğc'eğalaç taśi Şinar oç̌ala p'at'unp'i, hariyal sa qavun ga bə̌ğə̌bi miya məsk'ənt'un saki. 3Sa ğiyal metərt'un pi: «Ekinan nešum k'ulen kərpiç düzbi şot'o yönbəri bok'osp'en». Haketərəl bit'un: şot'oğon ǰěne gala kərpiç, oč'in galal q'irt'un əşp'est'a burqi. 4Oşa metərt'un pi: «Ekinan sa şəhər lasaki iz bı̌yex t'etər sa k'üllə biq'en ki, iz bul taśi göynulq'an p'ap'i. Metər bayan beşi s'i t'ap'eğale, me dünyəne śaralğayan aç̌i teyan batk'al».

5 Q'ončuğonal amdarxon biq'ala şəhərə q'a me alloy k'üllinə běğseynak' oq'a śiri 6pine: «Morox bito amdarxoy sa azuk' k'inək' baki sa muzin əyitpsunaxune. Həysə metərt'un bsasa, oşa k'ə balt'un? Běšinə̌mə haq'es tene bakal mot'oğoy! 7Nexzu śiğen mot'oğoy sunaxun əyitk'ala muza cöyben, barta suna maq'at'un q'amişaki».

8Metərluğen, Q'ončuğon t'etəre bi ki, şorox cöybaki dünyəni bip' t'ǒǒx śart'unśi, t'e şəhərəl hat'etər qǔnqǔl manedi. 9T'e gane s'iyal mot'o görət'un Vavilon #11:9 Vavilon - əbrani muzin "vavilon", yəni "babel" əyit "gərgürbsun" əyitəne oşq'ar. laxey, Q'ončuğon miya amdarxoy muza gərgürbi dünyənen sa śarpsuna görə.

Şemaxun burqi Avramal śirik' bakiyorox

(1 Hadis. 1:24-27)

10Moval Şemaxun bakit'oğoy siyəyi:

Oç̌ala xenen ç̌axp'it'uxun p'ə̌ usen oşa, Şeme düz sabaç̌ yəş bakat'an iz ğar Arp'ak'şade baki. 11Arp'ak'şad bakit'uxun oşa Şem hələ sa qobaç̌ usenal yəşəyinşebi, şot'ay q'erəzəl ğarmux, xuyərmuxe baki.

12Arp'ak'şadi otuz qo yəş bakat'an iz ğar Şelaxe baki. 13Şelax bakit'uxun oşa Arp'ak'şad hələ sa bip'baç̌ xib usenal yəşəyinşebi, şot'ay q'erəzəl ğarmux, xuyərmuxe baki.

14Şelaxi otuz yəş bakat'an iz ğar Evere baki. 15Ever bakit'uxun oşa Şelax hələ sa bip'baç̌ xib usenal yəşəyinşebi, şot'ay q'erəzəl ğarmux, xuyərmuxe baki.

16Everi otuz bip' yəş bakat'an iz ğar P'elege baki. 17P'eleg bakit'uxun oşa Ever hələ sa bip'baç̌ otuz usenal yəşəyinşebi, şot'ay q'erəzəl ğarmux, xuyərmuxe baki.

18P'elegi otuz yəş bakat'an iz ğar Reune baki. 19Reu bakit'uxun oşa P'eleg hələ sa p'ə̌baç̌ vuy usenal yəşəyinşebi, şot'ay q'erəzəl ğarmux, xuyərmuxe baki.

20Reuni otuz p'ə̌ yəş bakat'an iz ğar Seruk'e baki. 21Seruk' bakit'uxun oşa Reu hələ sa p'ə̌baç̌ vǔğ usenal yəşəyinşebi, şot'ay q'erəzəl ğarmux, xuyərmuxe baki.

22Seruk'i otuz yəş bakat'an iz ğar Naxore baki. 23Naxor bakit'uxun oşa Seruk' hələ sa p'ə̌baç̌ usenal yəşəyinşebi, şot'ay q'erəzəl ğarmux, xuyərmuxe baki.

24Naxori saq'ovuy yəş bakat'an iz ğar T'eraxe baki. 25T'erax bakit'uxun oşa Naxor hələ sa sabaç̌ vuyes's'e usenal yəşəyinşebi, şot'ay q'erəzəl ğarmux, xuyərmuxe baki.

26T'eraxi yetmiş yəş bakit'uxun oşa şot'ay me ğarmuxe baki: Avram, Naxor saal Xaran.

T'erax q'a T'eraxaxun bakiyorox

27Moval T'eraxi ğarmux: Avram, Naxor saal Xaran. Xarani Lut' uk'ala ğare buy. 28Xaran iç isə hələ iz bava dirist' bakat'an izi nanaxun baki şəhəre, yəni xaldeyluğoy Ur şəhəre p'ure. 29Avram q'a Naxor lašk'oyt'unbaki. Avrami çuğoy s'i Saray, Naxori çuğoy s'i isə Milk'aney. Milk'a Xarani xuyərey, Xarani q'erəz sa xuyərəl buney, iz s'i İsk'a. 30Sarayi əyel tene baksay, şo ərəmik'ey.

31T'eraxen iz ğar Avrama q'a iz bin Saraya saal Xaranaxun baki ğar Lut'a, yəni izi nəvə, ext'i içoğoy bakala xaldeyluğoy Ur şəhərexun c'ere. Şo Kənan oç̌alane taysun çuresay, ama hari Xarrana p'ap'i miyane məsk'ən saki.

32T'erax düz p'ə̌baç̌ qo usen yəşəyinşi, hame Xarranal p'ure.

Currently Selected:

Burqesun 11: udi

Highlight

Copy