Mathiơ 7

Bruă C̆ahrơña

(Luka 6:37,38,41,42)

1“Juơi c̆ahrơña aràng sơi, tô buơl guhã 'buh kơđòng c̆ahrơña. 2Kơyoa buơl guhã c̆ahrơña aràng hơyơu lơi, nư̆n buơl guñu kŭng c̆ahrơña buơl guhã yơu nư̆n rơi. Buơl guhã wăl tơ aràng kàr lơi, nư̆n buơl guñu kŭng rơŭ wăl wơ̆ tơ buơl guhã kàr nư̆n rơi. 3Hơyơu hã c̆ơ 'buh thŭl lăm mơta adơi-ai drơi, bloh 'bu 'buh kơyơu gih lăm mơta drơi? 4Hơyơu hã khĭn đờm sơ̆ng adơi-ai hã lài: ‘Luơi dơlhă mă thŭl tơbiă mư̆ng mơta sơ-ai,’ lăm tŭ kơyơu gih sơđaŭ dò lăm mơta drơi? 5Ơ mơnih hơtai-hơtiàn mơthĭ-lơ̆r! Dơlhơu biă mă bĕ kơyơu gih klàh mư̆ng mơta hã, bloh nư̆n ka 'buh loh-làng, tô mă thŭl klàh mư̆ng mơta adơi-ai drơi jiơ̆ng.”

Du Pơnuaĭ Pơto-Pơsơdơ̆r Pơkơ̆n

(Luka 11:9-13)

6“Juơi brơi tơ asơu du phơ̆n sơc̆ih-sri, kŭng juơi prah pơtơu c̆ŭng c̆ơk-màng drơi tơ anaŭ pơbui, huơĭ guñu rơŭ juă tơ ala tơkai, sơ̆ng gài wơ̆ kĕ-hĕt buơl guhã.

7Yòng bĕ, rơŭ hũ; duah bĕ, rơŭ tòm; teh bĕ, bơh 'băng rơŭ pơh tơ buơl guhã. 8Kơyoa yah aràng sơi yòng nư̆n hũ; aràng sơi duah nư̆n tòm; sơ̆ng aràng sơi teh bơh 'băng nư̆n hũ pơh. 9Hũ aràng sơi lăm buơl guhã, tŭ anà drơi yòng pah, bloh brơi tơ ñu pơtơu ơu? 10Halài anà drơi yòng akàn, bloh brơi ala tơ ñu ơu? 11Yơu nư̆n, yah buơl guhã la mơnih jơhà bloh dò thơu brơi tơ anà drơi du phơ̆n siàm, tơ-ài la Ama buơl guhã dò tơ ngŏ lơngì bloh 'buh brơi du phơ̆n siàm tơ du mơnih yòng sơ̆ng Pô ơu?

12Yơu nư̆n, abih tơgrơ̆ pơnuaĭ hơgĕ buơl guhã khiăng aràng ngă tơ drơi, nư̆n kŭng ngă bĕ pơnuaĭ nư̆n tơ buơl guñu, kơyoa nư̆n la pơnuaĭ adăt-adia sơ̆ng pơnuaĭ gơnuăr-hwơ̆r.”

Dua Boh Jơlàn

13“Tơma bĕ bơh 'băng tìt, kơyoa bơh 'băng lơnàng sơ̆ng jơlàn prŏng nư̆n ba truh pơnuaĭ pơluĭ-pơlơhiă; hũ lô mơnih nau tơma lăm jơlàn nư̆n. 14Bloh bơh 'băng tìt sơ̆ng jơlàn gơniă ba truh pơnuaĭ hơdiŭ, mơnih duah hũ nư̆n tơkì.”

Kơyoa Mư̆ng Bruă Ngă Kràn-Thơu Mơnih Gơnuăr-Hwơ̆r Lơ̆r

(Luka 6:43,44)

15“Păl c̆ơ-kơrhia bĕ mư̆ng du mơnih gơnuăr-hwơ̆r lơ̆r. Buơl guñu truh sơ̆ng buơl guhã c̆ơ gah agàh lơnguh-lơngui siàm yơu abo, bloh gah dơrlăm, buơl guñu la asơu sĭng mơsak-jơhà jiăng kĕ-hĕt. 16Buơl guhã rơŭ kràn-thơu buơl guñu jiơ̆ng kơyoa mư̆ng bruă ngă pơnuaĭ đờm buơl guñu, 'buh krơi yơu c̆ơ boh nư̆n thơu kơyơu. 'Buh aràng sơi pĕ boh ño lăm anih puk druơi, halài pĕ boh hra lăm anih puk druơi kòng-lai. 17Yơu nư̆n, yah kơyơu siàm nư̆n tơbiă boh siàm, kơyơu jơhà nư̆n tơbiă boh jơhà. 18Kơyơu siàm 'buh rơgơi tơbiă boh jơhà, kŭng yơu kơyơu jơhà 'buh rơgơi tơbiă boh siàm. 19Yah kơyơu lơi 'buh tơbiă boh siàm nư̆n păl kŏng dròm sơ̆ng prah lăm apui. 20Yơu nư̆n, c̆ơ mư̆ng bruă ngă pơnuaĭ đờm bloh kràn-thơu jiơ̆ng aràng sơi la mơnih gơnuăr-hwơ̆r lơ̆r, 'buh krơi yơu gơnừm tơ bơnga boh bloh buơl guhã rơŭ kràn-thơu jiơ̆ng buơl guñu.

21'Buh iơŭ yah aràng sơi đờm sơ̆ng Kơu lài: ‘Khoai Yàng! Khoai Yàng!’ la hũ tơma lăm Lơgăr Lơngì ơu, bloh mĭn mơnih lơi ngă tui hơtai-khiăng Ama Kơu dò tơ ngŏ lơngì soh. 22Lăm hơrơi nư̆n, lô mơnih rơŭ đờm sơ̆ng Kơu lài: ‘Khoai Yàng! khoai Yàng! 'Buh iơŭ buơl dơlhă hũ mă angăn Yàng bloh đờm hwơ̆r, mă angăn Yàng bloh pơtrơh kơmlài, sơ̆ng mă angăn Yàng bloh ngă lô pơnuaĭ c̆rih ơu?’ 23Tŭ nư̆n, Kơu rơŭ đờm loh-làng sơ̆ng buơl guñu lài: ‘Ơ buơl mơnih ngă pơnuaĭ mơsak-jơhà, Kơu 'buh tŭ lơi thơu buơl guhã, nau bĕ mư tô tơrđơŭ mư̆ng mơta Kơu!’”

Păl Ngă Tui Pơnuaĭ Yàng

(Luka 6:47-49)

24“Yơu nư̆n, aràng sơi păng sơ̆ng ngă tui du pơnuaĭ Kơu đờm ni, nư̆n mơhiơ̆ yơu sa aràng mơnih jak-khờh, bơ̆ sàng drơi tơ ngŏ pơtơu prŏng. 25Yah hũ hơjàn tuh trŭn, ia soa, sơ̆ng rơbù angĭn wơh khăng, sàng nư̆n sơđaŭ dò dơ̆ng kơjăp, kơyoa hũ bơ̆ tơ ngŏ pơtơu prŏng. 26Aràng sơi păng pơnuaĭ Kơu đờm ni bloh 'buh ngă tui, nư̆n mơhiơ̆ yơu mơnih bơrngư̆l-gơla, bơ̆ sàng drơi tơ ngŏ lơ̆n c̆uah. 27Tŭ hơjàn tuh trŭn, ia soa truh, rơbù angĭn wơh khăng, sàng nư̆n rơŭ jơrlơh-tơrlŭng abih, sơ̆ng jơrlơh-tơrlŭng traŭ biă.”

28Hơdơi tŭ Yàng Jêsu đờm du pơnuaĭ nư̆n bơjơ, buơl làng mă ngă c̆rih-takơtuă mư̆ng pơnuaĭ pơto-pơsài Pô. 29Kơyoa Pô pơto hũ baŭ gơnăp-gơnuăr, bloh 'buh iơŭ yơu du mơnih gơnuăr-pơto pơnuaĭ adăt-adia buơl guñu pơto ơu.

Currently Selected:

Mathiơ 7: CNT15

Highlight

Copy