Mathiơ 10

Yàng Jêsu Rơwah Sa-Pluh Dua Aràng Mơnih Tơdi-Tơdài

(Mak 3:13-19; Luka 6:12-16)

1Yàng Jêsu iơu sa-pluh dua aràng mơnih tui-mơgru Pô truh, brơi tơ buơl guñu gơnuăr tô pơtrơh du kơmlài-jĭnràk, sơ̆ng pơsồ-pơsaih tơgrơ̆ pơnuaĭ lơ-ơ̆n lơngoh rơwă-sơkì. 2Ni la mơta sa-pluh dua aràng mơnih tơdi-tơdài: Dơlhơu biă la Simôn, kŭng angăn la Pier, sơ̆ng Andre, adơi ñu; Jakơ anà Sebede sơ̆ng Jăng, adơi ñu. 3Philip sơ̆ng Bathelemi; Thôma, sơ̆ng Mathiơ la mơnih rì-mă jia; Jakơ anà Alphe, sơ̆ng Thađe; 4Simôn mơnih Kanaan, sơ̆ng Juđa Iskariôt, la mơnih pơblơ̆-dră Yàng Jêsu.

5Yàng Jêsu pơđăr sa-pluh dua aràng mơnih tơdi-tơdài ni nau, sơ̆ng kơkơi pơđăr lài: “Juơi nau tơma lăm c̆àr buơl làng agàh, kŭng juơi tơma lăm sa plơi-prŏng lơi lăm buơl làng Samari, 6bloh siàm rơlau, nau truh bĕ sơ̆ng buơl làng Israel, kơyoa buơl guñu mơhiơ̆ yơu abo nau c̆ơrlah lơhiă. 7Tŭ nau jơlàn, đờm pơto-akhàn bĕ lài: ‘Lơgăr Lơngì hũ truh jĕ bơjơ.’ 8Pơsồ-pơsaih bĕ tơ mơnih lơ-ơ̆n lơngoh rơwă-sơkì, ngă tơ mơnih mơtai hơdiŭ wơ̆, pơsồ goh tơ mơnih dŭn, sơ̆ng pơtrơh du kơmlài. Buơl guhã hũ brơi soh, nư̆n kŭng păl brơi soh yơu nư̆n rơi. 9Juơi apăn mừh, priă, halài boh priă lăm tơlơi kơ-iăng. 10Kŭng juơi apăn kơdŭng nau jơlàn, halài dua blah ào, halài tơkhŏ, halài gai kwĕt. Kơyoa mơnih ngă bruă iơŭ păl hũ đồ-lĕng phơ̆n-kơya 'bơ̆ng.

11Tŭ buơl guhã tơma lăm plơi-prŏng halài plơi-tìt lơi, nư̆n duah tơnia bĕ tơ anih nư̆n hũ aràng sơi la mơnih iơŭ păl, sơ̆ng dò bĕ tơ anih nư̆n tơ̆l truh tơ tŭ tơbiă nau. 12Sơ̆ng tŭ tơma lăm sàng lơi, nư̆n lơkơu bĕ pơnuaĭ rĭng-lơngai tơ sàng nư̆n. 13Yah sàng nư̆n iơŭ păl, nư̆n pơnuaĭ rĭng-lơngai buơl guhã rơŭ truh sơ̆ng buơl guñu; yah 'buh iơŭ păl, nư̆n pơnuaĭ rĭng-lơngai buơl guhã rơŭ gài mơrai wơ̆ sơ̆ng buơl guhã. 14Yah aràng sơi 'buh wă-rò, halài 'buh păng pơnuaĭ buơl guhã, nư̆n tŭ nau tơbiă mư̆ng sàng halài plơi-prŏng nư̆n, tơrtuh bĕ thŭl hũ klĕm tơ tơkai buơl guhã. 15Iơŭ biă, Kơu đờm sơ̆ng buơl guhã, truh hơrơi c̆ahrơña, buơl làng du c̆àr Sôđôm sơ̆ng Gômôrơ rơŭ kŏng c̆ahrơña sơ-uơ̆l rơlau tơ buơl làng plơi-prŏng nư̆n.”

16“Ni, Kơu pơđăr buơl guhã nau yơu abo tơma tơkrah tơrpuơl asơu sĭng. Yơu nư̆n, buơl guhã păl khờh-rơgơi bĕ yơu ala sơ̆ng lơnguh-siàm yơu c̆ĭm kơtrơu. 17C̆ơ-kơrhia bĕ mơnih lăm rài, kơyoa buơl guñu rơŭ jào buơl guhã tơ anaŭ anih c̆ahrơña, sơ̆ng glih-pờng buơl guhã lăm du sàng pơtòm. 18Kơyoa mư̆ng Kơu, buơl guhã rơŭ kơđòng ba truh tơ anaŭ du kwăng apăn-akŏ du c̆àr lăm lơgăr sơ̆ng du pơtau, tô ngă grơh tơ anaŭ buơl guñu sơ̆ng tơ du buơl làng agàh. 19Bloh tŭ buơl guñu mă jào buơl guhã, juơi sơnư̆ng kơ-ù păl đờm hơyơu lơi, halài đờm tơgrơ̆ pơnuaĭ hơgĕ; kơyoa lăm jơ nư̆n, tơgrơ̆ pơnuaĭ hơgĕ păl đờm rơŭ hũ brơi tơ buơl guhã. 20Kơyoa 'buh iơŭ rùp-phŭn buơl guhã đờm ơu, bloh la Bơngă Sơc̆ih-Sri mư̆ng Ama buơl guhã, rơŭ mư̆ng hơtai-hơtiàn buơl guhã đờm tơbiă.

21Sơ-ai rơŭ jào adơi tô aràng pơmơtai, ama rơŭ jào anà, du anà rơŭ tơgồ tămdră-wơ̆ sơ̆ng ame ama, sơ̆ng ngă tơ ame ama păl mơtai. 22Buơl guhã rơŭ kŏng tơgrơ̆ buơl làng mơbai-lơmù kơyoa angăn Kơu, bloh aràng sơi kơjăp hơtai-hơtiàn tơ̆l truh luĭ-dŭt, nư̆n rơŭ hũ dŏng-pơklàh. 23Tŭ aràng mă-pơkơŭ buơl guhã lăm plơi-prŏng ni, nư̆n pleh dơŭ bĕ lăm plơi-prŏng dih; kơyoa biă, Kơu đờm sơ̆ng buơl guhã, buơl guhã ka nau abih du plơi-prŏng buơl làng Israel nư̆n Anà Mơnih hũ truh bơjơ.

24Mơnih tui-mơgru 'buh rơlau pô-pơto, mơnih hơlŭn-hơlă 'buh rơlau mơnih pô-phŭn. 25Mơnih tui-mơgru hũ yơu pô-pơto, mơnih hơlŭn-hơlă hũ yơu mơnih pô-phŭn, nư̆n tơ̆l bơjơ. Yah buơl guñu hũ iơu pô sàng la Beelsebul, nư̆n du mơnih lăm sàng buơl guñu rơŭ iơu dò jơhà rơlau truh kàr lơi wơ̆! 26Yơu nư̆n, buơl guhã juơi huơĭ, kơyoa 'buh hũ bruă hơgĕ ac̆ĭng-bơdơŭ bloh 'buh păl ràng-tơbiă, 'buh hũ bruă hơgĕ bơdơŭ-tơrđơŭ bloh rơŭ 'buh hũ thơu truh. 27Kơyoa nư̆n, tơgrơ̆ pơnuaĭ hơgĕ Kơu đờm sơ̆ng buơl guhã lăm anih kơnăm, đờm tơbiă bĕ tơkrah glai hơrơi; tơgrơ̆ pơnuaĭ hơgĕ buơl guhã mơhư̆ đờm sào tơ gah tơnia, nư̆n đì bĕ tơ ngŏ bơbŭng sàng bloh đờm tơbiă.

28Buơl guhã juơi huơĭ tơ du mơnih mĭn pơmơtai jiơ̆ng rùp-phàp bloh 'buh pơmơtai jiơ̆ng bơngă-joa, bloh păl huơĭ bĕ tơ Pô hũ rơgơi pơluĭ-pơlơhiă abih găm rùp-phàp sơ̆ng bơngă-joa lăm brŏng-apui. 29Dua drơi c̆ĭm ñiă 'buh iơŭ mĭn pơblơi hũ sa xu priă ơu? Bloh yah Ama buơl guhã 'buh brơi gơnuăr, nư̆n 'buh sa drơi lơi lĕ trŭn tơ ala lơ̆n. 30'Bù tơ akŏ buơl guhã kŭng hũ yàu abih bơjơ. 31Yơu nư̆n, juơi huơĭ, kơyoa buơl guhã c̆ơk-màng rơlau lô c̆ĭm ñiă. 32Kơyoa nư̆n, aràng sơi akhàn-tơbiă Kơu tơ anaŭ tơgrơ̆ mơnih pơkơ̆n, Kơu kŭng rơŭ akhàn-tơbiă mơnih nư̆n tơ anaŭ Ama Kơu dò tơ ngŏ lơngì. 33Dò aràng sơi kơmlah-luơi Kơu tơ anaŭ tơgrơ̆ mơnih pơkơ̆n, nư̆n Kơu kŭng rơŭ kơmlah-luơi buơl guñu tơ anaŭ Ama Kơu dò tơ ngŏ lơngì.

34Juơi sơnư̆ng Kơu truh tô apăn pơnuaĭ rĭng-lơngai tơ dun-ya; Kơu truh, 'buh iơŭ tô apăn pơnuaĭ rĭng-lơngai, bloh la apăn đào sơdrà. 35Kơu truh tô pơc̆ơrlah krơi anà lơkơi sơ̆ng ama, anà kơmơi sơ̆ng ame, mơrtơu-kơmơi sơ̆ng ame-tămhã. 36Sơ̆ng aràng rơŭ hũ mơnih mơbai-tămdră, la mơnih phŭn lăm sàng dơnò drơi.

37Aràng sơi rơnăm tơ ame halài ama rơlau tơ Kơu, nư̆n 'buh iơŭ păl tơ Kơu. Aràng sơi rơnăm tơ anà lơkơi halài anà kơmơi rơlau tơ Kơu, kŭng 'buh iơŭ păl tơ Kơu. 38Aràng sơi 'buh glăm kơyơu pơkăl drơi bloh tui Kơu, nư̆n kŭng 'buh iơŭ păl tơ Kơu. 39Aràng sơi gàr-rơmiă pơnuaĭ hơdiŭ drơi, nư̆n rơŭ lơhiă; dò aràng sơi kơyoa mư̆ng Kơu bloh prah luơi pơnuaĭ hơdiŭ drơi, nư̆n rơŭ duah hũ wơ̆.

40Aràng sơi wă-rò buơl guhã, la wă-rò Kơu. Aràng sơi wă-rò Kơu, la wă-rò Pô hũ pơđăr Kơu. 41Aràng sơi wă-rò sa aràng mơnih gơnuăr-hwơ̆r kơyoa mơnih nư̆n la mơnih gơnuăr-hwơ̆r, rơŭ đồ-mă hũ phơ̆n mơyòm-brơi pioh tơ mơnih gơnuăr-hwơ̆r. Aràng sơi wă-rò sa aràng mơnih rĭng-tơpă kơyoa mơnih nư̆n la mơnih rĭng-tơpă, rơŭ đồ-mă hũ phơ̆n mơyòm-brơi pioh tơ mơnih rĭng-tơpă. 42Aràng sơi brơi tơ sa aràng lăm du mơnih tìt ni mơñŭm, yah mĭn sa c̆uàn ia mơrềt soh, kơyoa mơnih nư̆n la mơnih tui-mơgru Kơu; iơŭ biă, Kơu đờm sơ̆ng buơl guhã, mơnih nư̆n rơŭ 'buh lơhiă phơ̆n mơyòm-brơi drơi ơu.”

Currently Selected:

Mathiơ 10: CNT15

Highlight

Copy