ᒪᑎᔪᐤ 11
11
ᒠᓐ ᑲ ᓯᑲᐃᑕᒐᑦ ᑲ ᓂᑐ ᒋᔅᒐᔨᒪᑦ ᒋᓴᓴ
ᓗᒃ 7.18-35
1ᐃᔅᐱ ᒪᒃ ᑲᒋ ᐃᓯ ᐛᑎᓱᒪᑦ ᒋᓴᔅ ᐅᒋᔅᒋᓄᐊᒧᐛᑭᓇ, ᐊᑯ ᒐ ᔅᑐᑕᑦ, ᒐᒋ ᒋᔅᑯᑎᒪᒐᑦ ᑭᔭ ᒐᒋ ᑭᒐᔅᒋᒧᑦ ᐊᓐᑕ ᑯᑎᑲ ᐅᑕᓇᐛ ᐊᓐᑕ ᒥᒋᒪ ᑲ ᑎᑯᓂᔨᒋ᙮
Matthew 11.2-11 (Advent-3 Year A)
2ᒠᓐ ᐅᓯᑲᐃᑕᒐᐤ ᒪᒃ ᒋ ᒪᑯᓇᑭᓄᐤ ᐊᑯ ᑲ ᒋᐸᐛᑭᓄᐅᑦ ᑲᒪᑯᓄᐛᓯᐅᒋᐛᐱᒡ᙮ ᐊᑯᑕ ᒪᒃ ᐊᓐᑕ ᑲ ᐸᑕᐧᒃ ᐊ ᑎᐸᒋᒪᑭᓄᔨᒋ ᑕᓐ ᐊ ᐃᑎᔨᒋ ᙭ᑕ, ᐊᑯ ᒂ ᐃᑎᓴᐛᑦ ᓂᓱ ᐅᒋᔅᒋᓄᐊᒧᐛᑭᓇ ᐊᓐᑕ ᐊ ᑕᔨᒋ ᒋᓴᓴ᙮ 3ᐊᑯ ᒂ ᑯᒂᒋᒪᒡ ᒋᓴᓴ, “ᐸᒋ ᐎᑎᒧᐅᓇᓐ ᒪ, ᐊᐅᒄ ᐊ ᒋᔾ ᙭ ᐊᓐ ᒐ ᑎᑯᓯᓂᑯᐱᓇ ᑭᔭ ᒪᒃ ᐊᔅᒄ ᐊ ᓂᑭ ᐸᓱᐛᔨᒪᓇᓐ ᑯᑎᒃ ᒐᒋ ᑎᑯᓯᐧᒃ ?”
4ᐊᑯ ᒋᓴᔅ ᐊᑕᑦ, “ᒋᐛᒄ, ᒐ ᐎᑎᒧᐛᒄ ᒠᓐ ᑕᓐ ᑲ ᐃᓯ ᐛᐱᒥᔭᒄ ᐊ ᐃᓯ ᐃᑐᑎᒪᓐ ᑭᔭ ᑕᓐ ᑲ ᐃᓯ ᐸᑎᒪᒄ᙮ 5ᐎᑎᒧᐛᐧᒄ ᒪᒃ ᐊ ᐛᐸᑎᒥᔨᒋ ᐊᓂᔭᔪᐛ ᐊᑲ ᐅᒋ ᐛᐸᑎᒥᔨᒋ, ᐊ ᐱᒧᑕᔨᒋ ᐊᓂᔭᔪᐛ ᐊᑲ ᐅᒋ ᐱᒧᑕᔨᒋ, ᑭᔭ ᐊ ᐸᔭᒋᓯᔨᒋ ᐊᓂᔭᔪᐛ ᑲ ᐊᔭᔨᒋ ᑲ ᒪᔭᑎᓂᔨᒡ ᐅᒥᒋᐛᔅᐱᓇᐅᓂᔪᐤ ᐊᒋ ᒥᓏᒋᐊᑭᓄᔨᒋ᙮ ᑭᔭ ᐊ ᐸᑎᒥᔨᒋ ᐊᓂᔭᔪᐛ ᐊᑲ ᐅᒋ ᐸᑎᒥᔨᒋ᙮ ᑭᔭ ᐊᒋ ᐅᓂᔅᑲᓇᑭᓄᔨᒋ ᐊᓂᔭᔪᐛ ᑲ ᓂᐱᔨᒋ᙮ ᑭᔭ ᒥᔽᒋᒧᐅᓂᔪᐤ ᐊ ᐛᐎᑎᒧᐛᑭᓄᔨᒋ ᑲ ᒋᔅᑎᒪᑎᓯᔨᒋ ᐊᐛᔪᐛ᙮ 6ᓱᐛᔨᑕᑯᓱᐤ ᒪᒃ ᐊᓐ ᐊᐛᓐ ᒐ ᐊᑲ ᐊᑐᐛᔨᒥᒂ᙮” ᐊᐅᑯᓐ ᑲ ᐃᑕᑦ ᒋᓴᔅ ᐊᓂᔭᔪᐛ ᒠᓇ ᐅᒋᔅᒋᓄᐊᒧᐛᑭᓂᔪᐛ᙮
7ᐃᔅᐱ ᒪᒃ ᑲ ᔅᑐᑕᔨᒋ ᒠᓇ ᐅᒋᔅᒋᓄᐊᒧᐛᑭᓂᔨᐛ, ᒋᓴᔅ ᒋ ᐊᔨᒧᒪᐤ ᒠᓇ ᐊᓐᑕ ᐊ ᒥᒐᑎᓇᓄᐎᒡ ᐊ ᐃᔅᒋᔄᑦ, “ᐃᔅᐱ ᑲ ᓂᑐᐛᐱᒪᒄ ᒠᓐ ᐊᓐᑕ ᐸᐧᑯᑎᔅᑭᒥᑲᒡ ᑲ ᑭᒐᔅᒋᒧᑦ, ᐊᐛᓐ ᑲ ᐃᑕᔨᒪᒄ ᒐ ᐛᐱᒪᒄ ? ᒧᔭᒻ ᒥᔅᑯᓯᔭ ᑕᓐ ᐊ ᐃᑕᔅᑎᒋ ᒥᒄ ᐊᓐᑕ ᐊ ᐃᓯ ᔪᑎᒡ ᐊ ᐃᓯ ᓄᐛᔭᔅᑎᒋ ᐊᐅᑯᓐ ᐊ ᐃᑕᔨᑕᑯᓯᑦ ᐊᐛᓐ ᓇᔅᒡ ᐊ ᓂᓱᐅᓇᒋᒪᑭᓄᐅᑦ ? ᐊᐅᑯᓐ ᐊ ᑲ ᐃᑕᔨᒪᒄ ᒠᓐ ᐊ ᐃᑕᔨᑕᑯᓯᑦ᙮ 8ᒐᒂᓐ ᒪᒃ ᐛᒋ ᓂᑐᐛᐱᒪᒄ ? ᐊᐛᓐ ᑲ ᐃᑕᔨᒪᒄ ᒐ ᐛᐱᒪᒄ ? ᓇᐸᐤ ᐊ ᓇᔅᒡ ᐊ ᒥᔽᔅᐱᓱᑦ ? ᐊᓐᒡ ᐊᐛᓐᒋ ᑲ ᒥᔽᔅᐱᓱᒡ ᒋᓴᐅᒋᒪᐛ ᐎᒋᔨᒡ ᐊᑯᑕ ᐊᑕᒡ᙮ 9ᒐᒂᓐ ᒪᒃ ᐛᒋ ᓂᑐᐛᐱᒪᒄ ? ᔅᒋ ᐃᑕᔨᑕᓇᐛᐤ ᐊ ᐅᒋᔅᒋᐛᐃᒐᓱᐤ ᒐ ᐛᐱᒪᒄ ? ᓂᐦᐃ, ᒋ ᐎᑎᒪᑎᓇᐛᐤ ᐊᔪᐛᒃ ᐎᔾ ᒠᓐ ᒋ ᐃᑕᔨᑕᑯᓱᐤ ᐃᔅᐱᔅ ᑯᑎᑲ ᐅᒋᔅᒋᐛᐃᒐᓱᐛ᙮ 10ᐊᐅᒄ ᐅ ᒠᓐ ᑲ ᐊᔨᒧᒪᑭᓄᐅᑦ ᐊᓐᑕ ᒋᓴᒪᓂᑐᐛ ᐅᑦ ᐃᔨᒧᐅᓂᔨᒡ ᑲ ᐃᑎᔅᑕᔨᒡ,
ᓂᑭ ᓂᑲᓂᑎᓴᐛᐤ ᐊᐛᓐ ᒐᒋ ᐊᔭᔅᑯᐎᐧᑲᐧᒃ ᐊᓂᔭᔪᐤ ᒪᔅᑭᓇᔪᐤ ᐊᓐᑕ ᒐ ᐱᒧᑕᐅᑦ᙮
11ᒋ ᐎᑎᒪᑎᓇᐛᐤ, ᑕᑐᐤ ᐊᐛᓐᒋ ᑲ ᐱᒪᑎᓯᒡ ᓇᒪ ᐊᔪᐛᒃ ᐃᑕᔨᑕᑯᓱᐅᒡ ᑕᓐ ᐊ ᐃᑕᔨᑕᑯᓯᔨᒋ ᒠᓐ ᐅᓯᑲᐃᑕᒐᐛ᙮ ᐃᔭᐱᒡ ᒪᒃ ᐊᓐ ᑕᓐ ᒪᐅᒡ ᓄᑕᔅ ᑲ ᐃᑕᔨᑕᑯᓯᑦ ᒋᒋᒋᓯᒄ ᒋᓴᐅᒋᒪᐅᓂᒡ ᐊᔪᐛᒃ ᐎᔾ ᒋᔅᑕᔨᑕᑯᓱᐤ ᐃᔅᐱᔅ ᒠᓇ᙮ 12ᑲ ᐃᔅᐱᔅ ᒋᒋᐱᔨᑕᑦ ᒪᒃ ᒠᓐ ᐅᓯᑲᐃᑕᒐᐤ ᐊ ᑭᒐᔅᒋᒧᑦ, ᐅᑕ ᒪᒃ ᐃᔅ ᐊᓄᒡ, ᒧᔅ ᐎ ᓯᓱᒐᔨᒧᑕᑭᓄᐤ ᒋᒋᒋᓯᒄ ᒋᓴᐅᒋᒪᐅᓐ, ᑭᔭ ᑲ ᐊᒂᑕᔨᑕᑯᓯᒡ ᐊᐛᓐᒋ ᓇᔅᒡ ᓱᒃ ᐊ ᒪᓯᒐᒡ ᐎᔨᐛᐤ ᐊ ᐎ ᒪᑯᓂᒪᓱᒡ᙮ 13ᐛᔅ ᒥᓯᐛ ᐊᓂᔭᐧᑲ ᐅᒋᔅᒋᐛᐃᒐᓱᒡ ᒋ ᐎᑎᒧᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ ᒐ ᐅᑎᒋᐱᔨᒡ, ᐊᐅᑯᓐ ᒪᒃ ᑭᔭ ᑲ ᐃᓯ ᐸᒋ ᐎᑕᒂᒡ ᐊᓐᑕ ᐊᔭᒥᐊᐅ ᐎᓱᐛᐅᒥᓯᓇᐃᑭᓂᒡ ᐸᑐᔅ ᑲ ᑎᑯᓯᐧᒃ ᒠᓐ᙮ 14ᐅᒡ ᐅᒋᔅᒋᐛᐃᒐᓱᒡ ᒋ ᐃᔅᒋᔄᐅᒡ ᐊᔅᒄ ᒐ ᑎᑯᓯᓂᔨᒋ ᐃᓚᐃᒐᔨᒋ, ᑎᔭᑈᑎᐛᐛᒂ ᒪᒃ, ᐅ ᒠᓐ ᐊᐅᑯᓐ ᐊᓐ ᐃᓚᐃᒐ᙮ ᐊᐅᒄ ᐅ ᐅᒋᔅᒋᐛᐃᒐᓱᐤ ᒐ ᑎᑯᓯᓂᑯᐱᓇ᙮ 15ᐎ ᓂᔅᑐᑎᒧᒄ ᒪᒃ ᑕᓐ ᑲ ᐃᓯ ᐸᑎᒪᒄ᙮”
Matthew 11.16-19,25-30 (Proper-9 Year A)
16“ᓂᑭ ᐊᔨᒧᒪᐅᒡ ᐃᔪᒡ ᐊᓄᒡ ᒪᒂᒡ ᑲ ᐱᒪᑎᓯᒡ ᑕᓐ ᐊ ᐃᑕᔨᑕᑯᓯᒡ᙮ ᒧᔭᒻ ᐊᐛᓯᒡ ᐊᑲ ᒋ ᓂᓇᐊᔨᑎᒥᐃᑐᒡ ᐊ ᐃᓯ ᒪᑐᐛᒡ ᐊᐅᑯᓐ ᐊ ᐃᑎᒡ᙮ 17ᐊ ᑕᑈᑎᑐᒡ, ᐊ ᐃᔅᒋᔄᒡ,
‘ᐊ ᓂᐳᐅᓇᓄᐅᒡ ᓂᒋ ᐎ ᐃᓯ ᒪᑐᐛᓇᓐ, ᐊ ᒋᔍᐛᐱᒐᔭᒡ ᐊ ᑎᔭᒡ, ᓇᒪ ᒪᒃ ᒋ ᐅᒋ ᓂᒥᓇᐛᐤ,
ᑭᔭ ᓂᒋ ᓂᑭᒧᓇᓐ ᐊ ᒋᔅᑎᒪᒋᑕᒂᒋ ᓂᑭᒧᐅᓇ, ᓇᒪ ᒪᒃ ᒋ ᐅᒋ ᒪᓇᐛᐤ᙮’
18ᐃᔅᐱ ᒪᒃ ᒠᓐ ᑲ ᑎᑯᓯᐧᒃ ᓇᒪ ᐊᓯᑯᒻ ᐅᒋ ᐅᑎᓂᒻ ᒥᒋᒥᔪᐤ, ᓇᒪ ᑭᔭ ᐅᒋ ᒥᓄᐤ ᓱᒥᓇᐳᔪᐤ, ᑭᔭ ᒂ ᐃᑕᑭᓄᐅᑦ ᒥᒋ ᐊᒐᒂ ᐱᔅᑲᑯᐤ᙮ 19ᐊᑯ ᒪᒃ ᐃᔪᐤ ᐅᑯᓯᓴᓐ ᒋ ᒥᒋᓱᐤ ᑭᔭ ᒋ ᒥᓄᐤ, ᒋ ᐃᔅᒋᔄᔪᐛ ᒪᒃ ᐊᐛᔪᐛ, ‘ᑭᓄᐛᐱᒪᐧᒄ ᒪ ᐅ ᓇᐸᐤ, ᑕᑈ ᒥᔅᑎ ᒥᒋᓱᐤ ᑭᔭ ᑕᑈ ᐎᒋᐸᐤ, ᐊ ᐅᐎᒐᐛᑭᓂᑦ ᐅᒥᒐᑎᓯᐛ, ᑭᔭ ᐊᓂᔭᔪᐛ ᓂᑎᒥᒄ ᑲ ᐃᑎᔨᒋ ᑲ ᒪᒧᓴᒋᓂᒥᔨᒋ ᒋᓴᐅᒋᒪᐤ ᓱᓇᔭᔪᐤ᙮’ ᒥᒄ ᒪᒃ ᑕᓐ ᐊ ᐃᓯ ᐱᒪᑎᓯᑦ ᐊᐛᓐ ᐊᑯᑕ ᐊ ᓄᑯᓂᔨᒡ ᑕᓐ ᐊ ᐃᓯ ᑭᒐᑕᐛᔨᑕᐧᒃ᙮”
ᐊᓂᔭ ᐅᑕᓇᐛ ᐊᓐᑕ ᐊᑲ ᑕᑈᔭᔨᒪᑭᓄᐅᑦ ᒋᓴᔅ
ᓗᒃ 10.13-15
20ᐊᓐᑕ ᒪᒃ ᐊᓂᔭ ᐅᑕᓇᐛ ᒋᓴᔅ ᒪᐅᒡ ᑲ ᐃᑐᑕᐧᒃ ᒪᒥᔅᑲᒡ ᐃᑐᐅᓇ ᐊᓐᒡ ᒪᒃ ᐃᔪᒡ ᑲ ᑕᒡ ᐊᓐᑕ ᐊᓂᔭ ᐅᑕᓇᐛ ᐃᔭᐱᒡ ᓇᒪ ᐅᒋ ᒂᔅᑲᑎᓯᐅᒡ᙮ ᓇᒪ ᒪᒃ ᐅᒋ ᒥᓇᒋᒪᐤ ᐊ ᐃᑕᑦ, 21“ᒋᔨᐛᐤ ᑲ ᑕᔭᒄ ᐊᓐᑕ ᐅᑕᓇᒡ ᑯᕋᓯᓐ ᑲ ᐃᓯᓂᐧᑲᑕᒡ ᐊᔪᐛᒡ ᒋᑭ ᒥᒋᐱᔨᓇᐛᐤ, ᑭᔭ ᒋᔨᐛᐤ ᐸᑦᓴᐃᑕ ᑲ ᑕᔭᒄ ᐊᐅᑯᓐ ᒧᔭᒻ ᒐ ᐃᓯ ᒥᒋᐱᔭᒄ ᑭᔭ ᒋᔨᐛᐤ᙮ ᐛᔅ ᐊᓂᔭ ᒪᒥᔅᑲᒡ ᒐᒂᔪᐛ ᑲ ᐃᓯ ᐃᑐᑎᒪᑯᐅᔭᒄ ᒋ ᐃᑐᑕᑭᓄᐎᒂᓂ ᐊᓐᑕ ᐛᔅᑭᒡ ᑕᐃᕋ ᑭᔭ ᓴᐃᑐᓐ ᑲ ᐃᓯᓂᐧᑲᑕᒋ ᐅᑕᓇᐛ, ᓴᔅ ᐛᔅᑭᒡ ᒋᐸ ᒂᔅᑲᑎᓱᐅᒡ ᐎᔨᐛᐤ ᐊᓐᒡ ᐃᔪᒡ᙮ ᐊᑯ ᒪᒃ ᐊ ᐎ ᓄᑯᑕᒡ ᐊᔅᐱᔅ ᒥᑕᒋᔨᐛᓯᒡ ᐅᒥᒋᑥᐅᓄᐛᐛ ᒋᐸ ᐱᔎᔭᑭᐳᐅᒡ ᐊ ᑲᐛᑭᓂᔨᒋ ᐊᐱᒋᑕᐅᓇ, ᐊᓐᑕ ᒪᒃ ᐃᔎᔅᒐᒡ ᒋᐸ ᐊᐳᐅᒡ᙮ 22ᒋ ᐎᑎᒪᑎᓇᐛᐤ ᐃᔅᐱ ᐅᑎᒋᐱᔨᒐ ᒐ ᑎᐸᔅᑯᓂᒐᐅ ᒋᓯᑲᒡ, ᒋᓴᒪᓂᑐᐤ ᒋᑭ ᐛᐛᓯᐊᐤ ᐊᓂᔭ ᑕᐃᕋ ᑭᔭ ᓴᐃᑐᓐ ᑲᒋ ᑕᔨᒋ᙮ ᒋᔨᐛᐤ ᒪᒃ ᐊᑐᐎᔅ ᒋᑭ ᐛᐛᓯᐃᑯᐅᓇᐛᐤ᙮ 23ᐊᑯ ᒪᒃ ᒋᔨᐛᐤ ᐊᓐᑕ ᑲᐳᕐᓇᐊᒥᒡ ᑲ ᑕᔭᒄ ᓇᔅᒡ ᑕᑈ ᒋᑦ ᐊᔅᐸᔨᒧᓇᐛᐤ ᐊᓐᑕ ᒋᒋᒋᓯᑯᒡ ᒐᒋ ᐃᓯ ᐅᑎᓂᑯᐅᔭᒄ᙮ ᓇᒪ ᒪᒃ, ᒥᒋ ᐃᔅᑯᑕᒡ ᒋᑭ ᐃᓯ ᓂᑎᒋᐛᐱᓂᑯᓇᐛᐤ᙮ ᒪᒥᔅᑲᒡ ᒐᒂᔪᐛ ᒋ ᐃᓯ ᐃᑐᑕᑭᓄᐛ ᐊᓐᑕ ᒋᑦ ᐃᑕᐅᓄᐛᒡ ᐃᔭᐱᒡ ᒪᒃ ᓇᒪ ᒋ ᐅᒋ ᒂᔅᑲᑎᓯᓇᐛᐤ ᑭᔭ ᐊᓂᔭ ᒪᒥᔅᑲᒡ ᒐᒂᔪᐛ ᑲ ᐃᓯ ᐃᑐᑎᒪᑯᐅᔭᒄ, ᒋ ᐃᑐᑕᑭᓄᐎᒂᓂ ᐊᓐᑕ ᓱᑕᒻ ᐅᑕᓇᒡ ᒋᐸ ᒂᔅᑲᑎᓱᐅᒡ ᐊᓐᒡ ᐊᓐᑕ ᑲ ᑕᒡ ᑭᔭ ᐊᓄᒡ ᐊᔅᒄ ᒋᐸ ᑎᑯᓐ ᐊᓐ ᐅᑕᓇᐤ᙮ 24ᒋ ᐎᑎᒪᑎᓇᐛᐤ ᒪᒃ ᐃᔅᐱ ᐅᑎᒋᐱᔨᒐ ᒐ ᑎᐸᔅᑯᓂᒐᐅ ᒋᓯᑲᒡ, ᒋᔨᐛᐤ ᐅᔅᑕ ᐊᒂᒡ ᒋᑭ ᐃᓯ ᑎᐸᔅᑯᓂᑯᓇᐛᐤ ᐃᔅᐱᔅ ᐊᓐᒡ ᐃᔪᒡ ᓱᑕᒻ ᑲ ᑕᒡ ᐊᑎ ᐊᓂᔭ ᐊᒋ ᐃᔅᐱᔅ ᒥᒐᑎᓯᒡ᙮”
ᒋᓴᔅ ᑲ ᐎᓴᒪᑦ ᐊᐛᔪᐛ ᒐᒋ ᓂᑐᐛᐱᒥᑯᑦ
ᓗᒃ 10.21,22
Matthew 11.16-19, 25-30 (Proper-9 Year A)
25ᐊᑯᑕ ᒪᒃ ᒋᓴᔅ ᑲ ᐊᔭᒥᐊᑦ ᐊ ᐃᔅᒋᔄᑦ, “ᓄᑕ, ᒋ ᓂᓇᔅᑯᒥᑎᓐ ᐊᒋ ᐛᐸᑎᔨᑥᐤ ᐊᓐᒡ ᐊᐛᓐᒋ ᐊᑲ ᐅᒋ ᒋᔅᑯᑎᒧᐛᑭᓄᐎᒡ ᐊᓂᔭᔪᐛ ᒐᒂᔪᐛ ᑲ ᑲᑐᐅᑥᐤ ᑲ ᑭᒐᑕᐛᔨᑕᒡ᙮ 26ᓂᐦᐃ, ᓄᑕ ᒋ ᓂᓇᔅᑯᒥᑎᓐ ᐛᔅ ᐊᐅᑯᓐ ᐅ ᑲ ᐃᓯ ᓇᐊᔨᑎᒥᓐ᙮”
27ᐊᑯ ᐃᔅᐱ ᑲᒋ ᐃᓯ ᐊᔭᒥᐊᑦ ᒋᓴᔅ ᒋ ᐃᑕᐤ, “ᓄᑕᐎᔾ ᒥᓯᐛ ᒐᒂᔪᐤ ᓂᒋ ᒥᔨᒄ ᒐᒋ ᓂᓇᑭᑐᐛᔨᑎᒧᒡ᙮ ᐛᔅ ᓇᒪ ᐊᐛᓐ ᒋᔅᒐᔨᒪᐤ ᐅᑯᓯᓯᒪᐛ, ᒥᒄ ᐅᑕᐎᒪᐤ ᒋᔅᒐᔨᒪᐤ᙮ ᑭᔭ ᓇᒪ ᐊᐛᓐ ᒋᔅᒐᔨᒪᐤ ᐅᑕᐎᒪᐛ, ᒥᒄ ᐅᑯᓯᓯᒪᐤ ᒋᔅᒐᔨᒪᐤ, ᑭᔭ ᒥᒄ ᐎᔾ ᐅᑯᓯᓯᒪᐤ ᒋᑭ ᐅᑎᓇᐤ ᐊᐛᔪᐛ ᐊᓂᔭᔪᐛ ᒐᒋ ᒋᔅᒐᔨᒪᔨᒋ ᐅᑕᐎᒪᐛ᙮”
28“ᐸᒋ ᓇᓯᒄ ᒥᓯᐛ ᒋᔨᐛᐤ ᑲ ᐊᑐᔅᒐᔭᒄ ᑭᔭ ᑲ ᑈᒧᐅᑕᔭᒄ, ᒋᑭ ᒥᔨᑎᓇᐛᐤ ᒐᒋ ᐊᔽᓯᔭᒄ᙮ 29ᐅᑎᓂᒪᓱᒄ ᓂᑦ ᐊᐱᔅᑲᑭᓐ, ᒋᔅᒋᓄᐛᐱᒥᒄ ᒪᒃ, ᐛᔅ ᓂᔪᔅᐸᑎᓯᓐ ᑭᔭ ᓂ ᑎᐱᑕᔨᒧᓐ ᓂᑕᐃᒡ᙮ ᑭᔭ ᒋᑭ ᒥᔅᑲᓇᐛᐤ ᒪᒃ ᒐ ᐃᓯ ᐊᔽᐱᒡ ᒋᑦ ᐊᒐᐧᑯᐛᐅᒡ᙮ 30ᐛᔅ ᐛᑎᓐ ᓂᑦ ᐊᐱᔅᑲᒐᐅᓐ ᑭᔭ ᐃᔭᑭᓱᐤ ᓂᐎᐅᓱᐅᓐ᙮”
Currently Selected:
ᒪᑎᔪᐤ 11: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
